سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب کسی شخص کا اسلام اچھا ہو جائے، تو وہ جو بھی نیکی کرتا ہے، اس کا اجر اسے دس گنا سے لے کر سات سو گنا تک ملتا ہے، اور ہر برائی جس کا وہ ارتکاب کرتا ہے، وہ ایک برائی کے طور پر نوٹ کی جاتی ہے، یہاں تک کہ وہ اللہ تعالیٰ کی بارگاہ میں حاضر ہو جاتا ہے۔“ [صحیح ابن حبان/كتاب الإيمان/حدیث: 228]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”آدمی کے اسلام کی خوبی میں سے ایک چیز لایعنی چیزوں کو ترک کرنا ہے۔“ [صحیح ابن حبان/كتاب الإيمان/حدیث: 229]

سیدنا عبداللہ بن عمرو رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”مسلمان وہ ہے، جس کے ہاتھ اور زبان سے دوسرے مسلمان محفوظ رہیں، مہاجر وہ شخص ہے، جو ان چیزوں کو چھوڑ دے جس سے اللہ تعالیٰ نے منع کیا ہے۔“ [صحیح ابن حبان/كتاب الإيمان/حدیث: 230]

سیدنا ابوموسیٰ اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بے شک ایک مومن دوسرے مومن کے لیے ایک عمارت کی مانند ہے، جس کا ایک حصہ دوسرے کو مضبوط کرتا ہے۔“ [صحیح ابن حبان/كتاب الإيمان/حدیث: 231]

سیدنا ابوموسیٰ اشعری رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”اہلِ ایمان کی آپس میں مثال ایک عمارت کی مانند ہے۔“ راوی کہتے ہیں کہ نبی اکرم صلی اللہ علیہ وسلم نے اپنی انگلیاں (ایک دوسری میں) پیوست کیں اور ارشاد فرمایا: ”اس کا ایک حصہ دوسرے کو تھامے رکھتا ہے۔“ [صحیح ابن حبان/كتاب الإيمان/حدیث: 232]

سیدنا نعمان بن بشیر رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”مومن کی مثال جسم کی مانند ہے، جب اس کا ایک حصہ تکلیف کا شکار ہوتا ہے، تو پورا جسم اس تکلیف کو محسوس کرتا ہے۔“ [صحیح ابن حبان/كتاب الإيمان/حدیث: 233]

سیدنا انس بن مالک رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”کوئی بھی شخص اللہ تعالیٰ پر اس وقت تک (کامل ایمان رکھنے والا) شمار نہیں ہو سکتا، جب تک وہ اپنے بھائی کے لیے وہ چیز پسند نہ کرے، جو وہ اپنے لیے پسند کرتا ہے۔“ [صحیح ابن حبان/كتاب الإيمان/حدیث: 234]

سیدنا انس بن مالک رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”بندہ ایمان کی حقیقت تک اس وقت تک نہیں پہنچ سکتا، جب تک وہ لوگوں کے لیے اس چیز کو پسند نہیں کرتا، جو بھلائی وہ اپنے لیے پسند کرتا ہے۔“ [صحیح ابن حبان/كتاب الإيمان/حدیث: 235]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اس ذات کی قسم! جس کے دستِ قدرت میں میری جان ہے، تم لوگ اس وقت تک جنت میں داخل نہیں ہو گے جب تک تم مومن نہیں ہو جاتے اور تم اس وقت تک مومن نہیں ہو سکتے جب تک ایک دوسرے سے محبت نہیں رکھتے۔ کیا میں ایسی چیز کے بارے میں تمہاری رہنمائی نہ کروں کہ جب وہ تم کر لو گے تو تمہارے درمیان محبت پیدا ہو جائے گی؟ تم اپنے درمیان سلام کو پھیلاؤ۔“ [صحیح ابن حبان/كتاب الإيمان/حدیث: 236]

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”تین چیزیں ایسی ہیں، جو کسی شخص میں ہوں گی تو وہ ایمان کی حلاوت کو پا لے گا: ایک وہ شخص کہ اللہ اور اس کا رسول اس کے نزدیک ان دونوں کے علاوہ ہر چیز سے زیادہ محبوب ہوں، ایک وہ شخص جو کسی قوم کے ساتھ محبت رکھتا ہو اور وہ صرف اللہ کی رضا کے لیے ان لوگوں سے محبت رکھتا ہو، اور ایک وہ شخص جسے آگ میں ڈالا جانا اس سے زیادہ محبوب ہو کہ وہ دوبارہ یہودی یا عیسائی ہو جائے۔“ [صحیح ابن حبان/كتاب الإيمان/حدیث: 237]