سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے یہ بات ارشاد فرمائی ہے: ”مجھے اس بات کا حکم دیا گیا ہے کہ میں لوگوں کے ساتھ اس وقت تک جنگ کرتا رہوں، جب تک وہ یہ نہیں کہہ دیتے کہ «لَا إِلٰهَ إِلَّا اللّٰهُ» ”اللہ تعالیٰ کے علاوہ اور کوئی معبود نہیں ہے“، جو شخص یہ کہہ دے کہ «لَا إِلٰهَ إِلَّا اللّٰهُ» ”اللہ تعالیٰ کے علاوہ اور کوئی معبود نہیں ہے“، وہ اپنی جان اور اپنے مال کو مجھ سے محفوظ کر لے گا، البتہ اس کے حق کا معاملہ مختلف ہے، اور اس شخص کا حساب اللہ تعالیٰ کے ذمے ہو گا۔“ تو اللہ تعالیٰ نے اپنی کتاب میں آیت نازل فرمائی۔ اللہ تعالیٰ نے ایک ایسی قوم کا تذکرہ کیا جنہوں نے تکبر اختیار کیا، اللہ تعالیٰ نے فرمایا: ﴿إِنَّهُمْ كَانُوا إِذَا قِيلَ لَهُمْ لَا إِلٰهَ إِلَّا اللّٰهُ يَسْتَكْبِرُونَ﴾ [سورة الصافات: 35] ”بے شک یہ وہ لوگ ہیں، جب ان سے یہ کہا جائے کہ اللہ تعالیٰ کے علاوہ اور کوئی معبود نہیں ہے، تو یہ لوگ تکبر کرتے ہیں۔“ اللہ تعالیٰ نے یہ بات بھی ارشاد فرمائی ہے: ﴿إِذْ جَعَلَ الَّذِينَ كَفَرُوا فِي قُلُوبِهِمُ الْحَمِيَّةَ حَمِيَّةَ الْجَاهِلِيَّةِ فَأَنْزَلَ اللّٰهُ سَكِينَتَهُ عَلَىٰ رَسُولِهِ وَعَلَى الْمُؤْمِنِينَ وَأَلْزَمَهُمْ كَلِمَةَ التَّقْوَىٰ﴾ [سورة الفتح: 26] ”جب ان لوگوں کے دلوں میں کفر تھا، جب انہوں نے وہ ہٹ دھرمی اختیار کی جو زمانہ جاہلیت کی تھی تو اللہ تعالیٰ نے اپنے رسول اور اہل ایمان پر سکینت نازل کی اور انہیں تقویٰ کے کلمے پر لازم کر دیا۔“ (سیدنا ابوہریرہ رضی اللہ عنہ کہتے ہیں:) یہاں تقویٰ کے کلمے سے مراد یہ کہنا ہے: «لَا إِلٰهَ إِلَّا اللّٰهُ مُحَمَّدٌ رَّسُولُ اللّٰهِ» ”اللہ تعالیٰ کے علاوہ اور کوئی معبود نہیں ہے، اور محمد صلی اللہ علیہ وسلم اللہ کے رسول ہیں۔“ مشرکین نے حدیبیہ کے موقع پر اس بارے میں تکبر کا اظہار کیا تھا۔ [صحیح ابن حبان/كتاب الإيمان/حدیث: 218]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”مجھے اس بات کا حکم دیا گیا ہے کہ میں لوگوں کے ساتھ اس وقت تک جنگ کرتا رہوں جب تک وہ اس بات کی گواہی نہ دیں کہ اللہ تعالیٰ کے علاوہ اور کوئی معبود نہیں ہے، اور میں اللہ کا رسول ہوں، اور وہ نماز قائم کریں، اور زکات ادا کریں، جب وہ ایسا کر لیں گے، تو وہ اپنی جانیں اور مال مجھ سے محفوظ کر لیں گے، البتہ اسلام کے حق کا معاملہ مختلف ہے، اور ان لوگوں کا حساب اللہ تعالیٰ کے ذمہ ہو گا۔“ [صحیح ابن حبان/كتاب الإيمان/حدیث: 219]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”مجھے اس بات کا حق دیا گیا ہے کہ میں ان لوگوں کے ساتھ اس وقت تک جنگ کرتا رہوں جب تک وہ یہ اعتراف نہیں کر لیتے کہ «لَا إِلٰهَ إِلَّا اللّٰهُ» ”اللہ تعالیٰ کے علاوہ اور کوئی معبود نہیں“ اور وہ مجھ پر اور جو کچھ میں لے کر آیا ہوں اس پر ایمان نہیں لے آتے، جب وہ ایسا کریں گے تو وہ اپنی جانیں اور اپنے مال محفوظ کر لیں گے، البتہ ان کے حق کا معاملہ مختلف ہے اور ان لوگوں کا حساب اللہ تعالیٰ کے ذمے ہو گا۔“ [صحیح ابن حبان/كتاب الإيمان/حدیث: 220]

عبدالرحمن بن ابوعمرہ انصاری اپنے والد رضی اللہ عنہ کا یہ بیان نقل کرتے ہیں: ہم ایک غزوہ میں نبی اکرم صلی اللہ علیہ وسلم کے ساتھ تھے، لوگوں کو شدید بھوک لاحق ہو گئی۔ انہوں نے نبی اکرم صلی اللہ علیہ وسلم سے اجازت مانگی کہ وہ اپنے سواری کے بعض جانور قربان کر دیں۔ تو سیدنا عمر رضی اللہ عنہ نے عرض کی: یا رسول اللہ! اگر ہم بھوک کے عالم میں پیادہ ہو کر دشمن کا سامنا کریں گے، تو پھر ہمارا کیا بنے گا؟ یا رسول اللہ! اگر آپ مناسب سمجھیں، تو آپ لوگوں کو حکم دیں کہ ان کے پاس جو کچھ بھی کھانے پینے کی چیز بچی ہوئی ہے، وہ لے آئیں۔ (نبی اکرم صلی اللہ علیہ وسلم نے یہ حکم دے دیا) تو لوگ وہ چیزیں لانے لگے؛ ایک شخص ایک مٹھی اناج یا اس سے زیادہ لے آیا، اور جو شخص سب سے زیادہ لے کر آیا تھا، وہ ایک صاع کھجور لے کر آیا تھا۔ نبی اکرم صلی اللہ علیہ وسلم نے اس سب کو ایک دسترخوان پر جمع کروایا، پھر جو اللہ تعالیٰ کو منظور تھا، وہ آپ صلی اللہ علیہ وسلم نے اللہ تعالیٰ سے دعا مانگی، پھر آپ صلی اللہ علیہ وسلم نے لوگوں کو بلایا کہ وہ اپنے برتن لے آئیں اور آپ صلی اللہ علیہ وسلم نے وہ اناج ان میں ڈالنا شروع کیا، تو لشکر میں موجود کوئی برتن ایسا باقی نہیں رہا جو بھر نہ گیا ہو، اور وہ اناج پھر بھی اتنا ہی باقی رہ گیا۔ تو نبی اکرم صلی اللہ علیہ وسلم مسکرا دیے یہاں تک کہ آپ صلی اللہ علیہ وسلم کے اطراف کے دانت نظر آنے لگے اور آپ صلی اللہ علیہ وسلم نے یہ بات ارشاد فرمائی: ”میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے، اور میں اس بات کی گواہی دیتا ہوں کہ میں اللہ کا رسول ہوں، اور میں اللہ تعالیٰ کی بارگاہ میں اس بات کی گواہی دیتا ہوں کہ جو مومن بندہ اللہ تعالیٰ کی بارگاہ میں ان دو باتوں کے ہمراہ حاضر ہو گا، تو یہ دونوں چیزیں اس شخص کے لیے قیامت کے دن جہنم سے بچاؤ کا ذریعہ بن جائیں گی۔“ سیدنا ابوعمرہ انصاری رضی اللہ عنہ کا نام ثعلبہ بن عمرو بن محصن ہے۔ [صحیح ابن حبان/كتاب الإيمان/حدیث: 221]

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اہلِ جنت، جنت میں داخل ہو جائیں گے، اہل جہنم، جہنم میں داخل ہو جائیں گے، پھر اللہ تعالیٰ فرمائے گا: تم ان لوگوں کا جائزہ لو جس شخص کے دل میں رائی کے دانے کے برابر بھی ایمان تمہیں مل جائے اسے (جہنم میں سے) نکال دو۔“ نبی اکرم صلی اللہ علیہ وسلم فرماتے ہیں: ”تو وہ لوگ جہنم سے یوں نکلیں گے کہ وہ جلنے کے بعد کوئلہ ہو چکے ہوں گے۔ انہیں نہرِ حیات میں ڈالا جائے گا، تو وہ اس میں سے یوں پھوٹ پڑیں گے، جس طرح سیلابی پانی کے کنارے پر دانہ پھوٹ پڑتا ہے۔“ نبی اکرم صلی اللہ علیہ وسلم نے ارشاد فرمایا: ”کیا تم نے اسے دیکھا نہیں ہے، وہ کس طرح زرد رنگ کا ہوتا ہے اور ادھر ادھر لہرا رہا ہوتا ہے؟“ [صحیح ابن حبان/كتاب الإيمان/حدیث: 222]

سیدنا محمود بن ربیع انصاری رضی اللہ عنہ بیان کرتے ہیں کہ نبی اکرم صلی اللہ علیہ وسلم کے صحابی سیدنا عتبان بن مالک رضی اللہ عنہ، جن کا تعلق انصار سے ہے اور انہیں غزوہ بدر میں شرکت کا شرف حاصل ہے، وہ ایک مرتبہ نبی اکرم صلی اللہ علیہ وسلم کی خدمت میں حاضر ہوئے۔ انہوں نے عرض کی: ”یا رسول اللہ! میری بینائی کمزور ہو گئی ہے، میں اپنے محلے کے لوگوں کو نماز پڑھاتا ہوں، جب بارش ہوتی ہے تو نشیبی حصے میں میرے اور ان لوگوں کے درمیان پانی بہنے لگتا ہے، تو میں ان کی مسجد تک نہیں آ سکتا کہ انہیں جا کر نماز پڑھاؤں، اس لیے یا رسول اللہ! میں یہ چاہتا ہوں کہ آپ (میرے ہاں) تشریف لائیں اور میرے گھر میں کسی جگہ آپ نماز ادا کریں، تاکہ میں اس جگہ کو جائے نماز بنا لوں۔“ راوی بیان کرتے ہیں: نبی اکرم صلی اللہ علیہ وسلم نے ارشاد فرمایا: ”میں عنقریب ایسا کروں گا۔“ سیدنا عتبان رضی اللہ عنہ بیان کرتے ہیں کہ اگلے دن نبی اکرم صلی اللہ علیہ وسلم اور سیدنا ابوبکر صدیق رضی اللہ عنہ دن چڑھنے کے بعد تشریف لائے۔ نبی اکرم صلی اللہ علیہ وسلم نے اندر آنے کی اجازت طلب کی، میں نے آپ صلی اللہ علیہ وسلم کی خدمت میں اجازت پیش کی، نبی اکرم صلی اللہ علیہ وسلم گھر میں داخل ہونے کے بعد پہلے تشریف فرما نہیں ہوئے، آپ صلی اللہ علیہ وسلم نے ارشاد فرمایا: ”تم اپنے گھر میں کہاں یہ پسند کرتے ہو کہ میں وہاں نماز ادا کروں؟“ راوی کہتے ہیں: میں نے گھر کے ایک گوشے کی طرف اشارہ کیا، تو نبی اکرم صلی اللہ علیہ وسلم وہاں کھڑے ہوئے، آپ صلی اللہ علیہ وسلم نے تکبیر کہی، ہم آپ صلی اللہ علیہ وسلم کے پیچھے کھڑے ہو گئے۔ نبی اکرم صلی اللہ علیہ وسلم نے دو رکعات نماز پڑھائی اور آپ صلی اللہ علیہ وسلم نے سلام پھیر دیا۔ راوی کہتے ہیں: ہم نے آپ صلی اللہ علیہ وسلم کو خزیرہ (مخصوص قسم کا کھانا) کھانے کے لیے روک لیا، جو ہم نے آپ صلی اللہ علیہ وسلم کے لیے تیار کیا تھا۔ راوی کہتے ہیں، محلے کے کچھ لوگ بھی نبی اکرم صلی اللہ علیہ وسلم کے ارد گرد اکٹھے ہو گئے، یہاں تک کہ گھر میں متعدد افراد اکٹھے ہو گئے۔ ان میں سے ایک شخص نے کہا: مالک بن دخشن کہاں ہے؟ تو کسی دوسرے نے کہا: وہ منافق ہے، وہ اللہ اور اس کے رسول سے محبت نہیں رکھتا۔ نبی اکرم صلی اللہ علیہ وسلم نے اس شخص سے فرمایا: ”تم اس کے بارے میں یہ بات نہ کہو، کیا تم نے اسے دیکھا نہیں ہے کہ اس نے «لَا إِلٰهَ إِلَّا اللّٰهُ» ”اللہ تعالیٰ کے علاوہ اور کوئی معبود نہیں ہے“ کہا ہے؟ اس نے اللہ تعالیٰ کی رضامندی کے لیے یہ کلمہ پڑھا ہے۔“ لوگوں نے عرض کی: اللہ اور اس کا رسول زیادہ بہتر جانتے ہیں، ہم نے تو یہ بات نوٹ کی ہے کہ اس کی توجہ اور اس کی خیر خواہی منافقین کے لیے ہے۔ نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ نے ایسے شخص پر جہنم کو حرام قرار دے دیا ہے، جو اللہ تعالیٰ کی رضا کے حصول کے لیے «لَا إِلٰهَ إِلَّا اللّٰهُ» ”اللہ کے سوا کوئی معبود نہیں“ پڑھتا ہے۔“ ابن شہاب رحمہ اللہ کہتے ہیں: میں نے حصین بن محمد انصاری رحمہ اللہ سے سوال کیا، یہ بنو سالم سے تعلق رکھنے والے ایک صاحب ہیں اور ان کے اکابرین میں سے ہیں، ان سے میں نے سیدنا محمود بن ربیع رضی اللہ عنہ کی روایت کے بارے میں دریافت کیا تو انہوں نے اس روایت کی تصدیق کی۔ [صحیح ابن حبان/كتاب الإيمان/حدیث: 223]

سیدنا عبداللہ بن مسعود رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”جنت میں ایسا کوئی شخص داخل نہیں ہو گا جس کے دل میں رائی کے دانے کے وزن جتنا تکبر ہو گا اور جہنم میں وہ شخص داخل نہیں ہو گا جس کے دل میں رائی کے دانے جتنا ایمان ہو گا۔“ [صحیح ابن حبان/كتاب الإيمان/حدیث: 224]

سیدنا عبداللہ بن عمرو بن العاص رضی اللہ عنہما سے روایت ہے کہ نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ قیامت کے دن میری امت کے ایک فرد کو تمام مخلوق میں سے الگ کرے گا، پھر اس کے سامنے ننانوے رجسٹر کھول دے گا، ان میں سے ہر ایک اتنا بڑا ہو گا جہاں تک نگاہ کام کرتی ہے، پھر اللہ تعالیٰ ارشاد فرمائے گا: کیا تم اس میں سے کسی چیز کا انکار کرتے ہو؟ کیا نوٹ کرنے والے محافظ فرشتوں نے تمہارے ساتھ کوئی زیادتی کی ہے؟ وہ جواب دے گا: جی نہیں، اے میرے پروردگار! اللہ تعالیٰ فرمائے گا: کیا تمہارے پاس کوئی عذر ہے یا نیکی ہے؟ تو وہ شخص مبہوت ہو جائے گا اور عرض کرے گا: اے میرے پروردگار! جی نہیں۔ اللہ تعالیٰ فرمائے گا: جی ہاں! تمہاری ایک نیکی ہمارے پاس ہے، اور آج کے دن تم پر کوئی ظلم نہیں کیا جائے گا۔“ پھر اس شخص کے سامنے کاغذ کا ایک ٹکڑا نکالا جائے گا، جس میں یہ تحریر ہو گا: «أَشْهَدُ أَنْ لَا إِلٰهَ إِلَّا اللّٰهُ وَأَنَّ مُحَمَّدًا عَبْدُهُ وَرَسُولُهُ» ”میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے، اور بے شک سیدنا محمد صلی اللہ علیہ وسلم اس کے بندے اور اس کے رسول ہیں۔“ پھر اللہ تعالیٰ فرمائے گا: ”میزان کے پاس آ جاؤ۔“ وہ بندہ عرض کرے گا: اے میرے پروردگار! ان رجسٹروں کے مقابلے میں اس کاغذ کی کیا حیثیت ہے؟ اللہ تعالیٰ فرمائے گا: ”تمہارے ساتھ کوئی زیادتی نہیں ہو گی۔“ نبی اکرم صلی اللہ علیہ وسلم فرماتے ہیں: ”تو وہ تمام رجسٹر ایک پلڑے میں رکھے جائیں گے اور وہ کاغذ کا ٹکڑا دوسرے پلڑے میں رکھا جائے گا، تو رجسٹروں والا پلڑا اوپر چلا جائے گا اور کاغذ کے ٹکڑے والا پلڑا بھاری ہو جائے گا۔“ پھر اللہ تعالیٰ فرمائے گا (یا شاید نبی اکرم صلی اللہ علیہ وسلم نے یہ بات ارشاد فرمائی یا شاید کسی راوی کے یہ الفاظ ہیں): ”اللہ تعالیٰ کے اسم سے زیادہ وزنی اور کوئی چیز نہیں ہے۔“ [صحیح ابن حبان/كتاب الإيمان/حدیث: 225]

سیدنا ابوذر غفاری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ یہ فرماتا ہے: اے آدم کے بیٹے! اگر تم زمین جتنی خطائیں لے کر میری بارگاہ میں حاضر ہو، لیکن تم کسی کو میرے ساتھ شریک نہ ٹھہراتے ہو، تو میں زمین جتنی مغفرت کے ہمراہ تم سے ملاقات کروں گا۔“ [صحیح ابن حبان/كتاب الإيمان/حدیث: 226]

صالح ہمدانی، امام شعبی کے بارے میں یہ بات نقل کرتے ہیں: میں نے خراسان سے تعلق رکھنے والے ایک شخص کو دیکھا کہ وہ امام شعبی کے پاس آیا اور بولا: اے ابوعمرو! ہماری طرف اہل خراسان اس بات کے قائل ہیں، جب کوئی شخص اپنی کنیز کو آزاد کر کے پھر اس کے ساتھ شادی کرے، تو اس کی مثال ایسے شخص کی مانند ہے، جو اپنے قربانی کے جانور پر سوار ہو جاتا ہے، تو امام شعبی نے بتایا: ابوبردہ نے اپنے والد (سیدنا ابوموسیٰ اشعری رضی اللہ عنہ) کے حوالے سے یہ بات نقل کی ہے، نبی اکرم صلی اللہ علیہ وسلم نے یہ بات ارشاد فرمائی ہے: ”تین لوگ ایسے ہیں، جنہیں دگنا اجر عطا کیا جائے گا۔ اہل کتاب سے تعلق رکھنے والا وہ شخص جو اپنے نبی پر ایمان لائے، اور پھر وہ نبی اکرم صلی اللہ علیہ وسلم کا زمانہ پا کر آپ صلی اللہ علیہ وسلم پر بھی ایمان لے آئے اور آپ کی پیروی کرے، تو اسے دگنا اجر ملے گا۔ ایک وہ غلام جو اللہ تعالیٰ کا اپنے ذمے حق ادا کرے اور اپنے ذمے اپنے آقا کا بھی حق ادا کرے اسے بھی دگنا اجر ملے گا۔ اور ایک وہ شخص جس کی کوئی کنیز ہو، وہ اسے اچھی خوراک فراہم کرے، اس کی اچھی تعلیم و تربیت کرے، پھر اسے آزاد کر کے اس کے ساتھ شادی کرے، تو اس کو دگنا اجر ملے گا۔“ امام شعبی نے خراسان کے رہنے والے اس شخص سے کہا: تم کسی معاوضے کے بغیر اس حدیث کو حاصل کر لو، ورنہ پہلے اس سے کم (مضمون والی) روایت کے لیے مدینہ منورہ تک سفر کر کے جانا پڑتا تھا۔ [صحیح ابن حبان/كتاب الإيمان/حدیث: 227]