سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”تین خصوصیات جس شخص میں ہوں گی، وہ ایمان کی حلاوت کو پا لے گا۔ ایک یہ کہ اللہ اور اس کا رسول صلی اللہ علیہ وسلم ، اس کے نزدیک ان دونوں کے علاوہ ہر چیز سے زیادہ محبوب ہوں۔ (دوسری) یہ کہ وہ کسی شخص کے ساتھ محبت رکھتا ہو، اور وہ صرف اللہ کے لیے اس سے محبت رکھتا ہو۔ اور (تیسری) یہ کہ وہ کفر کی طرف واپس جانے کو اسی طرح ناپسند کرے، جس طرح وہ اس بات کو ناپسند کرتا ہے کہ آگ جلا کر اسے اس آگ میں ڈال دیا جائے۔“ [صحیح ابن حبان/كتاب الإيمان/حدیث: 238]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”تین باتیں ہر مسلمان پر لازم ہیں: بیمار کی عیادت کرنا، جنازے میں شریک ہونا اور چھینکنے والا شخص جب «الْحَمْدُ لِلّٰهِ» ”تمام تعریفیں اللہ کے لیے ہیں“ کہے، تو اسے جواب دینا۔“ [صحیح ابن حبان/كتاب الإيمان/حدیث: 239]

سیدنا ابومسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ایک مسلمان کے دوسرے مسلمان پر چار حق ہیں: جب وہ بیمار ہو جائے تو اس کی عیادت کرے، جب وہ فوت ہو جائے تو اس کے جنازے میں شریک ہو، جب وہ چھینکے تو وہ اسے چھینک کا جواب دے اور جب وہ اس کی دعوت کرے تو وہ اس کی دعوت قبول کرے۔“ [صحیح ابن حبان/كتاب الإيمان/حدیث: 240]

سیدنا ابوہریرہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”ایک مسلمان کے دوسرے مسلمان پر پانچ حق ہیں: سلام کا جواب دینا، بیمار کی عیادت کرنا، جنازے کے ساتھ جانا، دعوت کو قبول کرنا اور چھینکنے والے کا جواب دینا۔“ [صحیح ابن حبان/كتاب الإيمان/حدیث: 241]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ایک مسلمان کے دوسرے مسلمان پر چھ حق ہیں۔“ لوگوں نے عرض کی: یا رسول اللہ! وہ کون سے ہیں؟ آپ صلی اللہ علیہ وسلم نے فرمایا: ”جب وہ اس سے ملاقات کرے، تو اسے سلام کرے اور جب وہ اس کی دعوت کرے، تو وہ اسے قبول کرے اور جب وہ اس سے خیر خواہی کا طلب گار ہو، تو اس کی خیر خواہی کرے اور جب وہ چھینک کر اللہ تعالیٰ کی حمد بیان کرے، تو یہ اسے جواب دے، جب وہ بیمار ہو، تو اس کی عیادت کرے اور جب وہ فوت ہو جائے، تو یہ اس کے جنازے کے ساتھ جائے۔“ [صحیح ابن حبان/كتاب الإيمان/حدیث: 242]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”کون شخص مجھے ایسے درخت کے بارے میں بتائے گا، جس کی مثال بندہ مومن کی طرح ہے، ﴿أَصْلُهَا ثَابِتٌ وَفَرْعُهَا فِي السَّمَاءِ﴾ [سورة إبراهيم: 24] جس کی بنیاد مضبوط ہے اور اس کی شاخیں آسمان میں ہیں، وہ ﴿تُؤْتِي أُكُلَهَا كُلَّ حِينٍ بِإِذْنِ رَبِّهَا﴾ [سورة إبراهيم: 25] ہر وقت اپنے پروردگار کے اذن کے تحت پھل دیتا ہے۔“ سیدنا عبداللہ رضی اللہ عنہما کہتے ہیں: میں نے یہ کہنے کا ارادہ کیا کہ یہ کھجور کا درخت ہے، لیکن اپنے والد صاحب کی موجودگی کی وجہ سے میں ایسا نہیں کر سکا، تو نبی اکرم صلی اللہ علیہ وسلم نے ارشاد فرمایا: ”یہ کھجور کا درخت ہے۔“ (سیدنا عبداللہ بن عمر رضی اللہ عنہما بیان کرتے ہیں کہ بعد میں) میں نے اپنے والد سے اس بات کا تذکرہ کیا، تو انہوں نے فرمایا: اگر تم اس وقت یہ بات کہہ دیتے، تو میرے نزدیک اس چیز سے زیادہ محبوب ہوتا۔ راوی کہتے ہیں: میرا خیال ہے، روایت میں یہ الفاظ ہیں: سرخ اونٹوں سے زیادہ محبوب ہوتا۔ [صحیح ابن حبان/كتاب الإيمان/حدیث: 243]

سیدنا عبداللہ بن عمر رضی اللہ عنہما بیان کرتے ہیں: ایک مرتبہ ہم نبی اکرم صلی اللہ علیہ وسلم کے پاس بیٹھے ہوئے تھے۔ اسی دوران «الْجُمَّارُ» (کھجور کے درخت کا گوند) لایا گیا، تو نبی اکرم صلی اللہ علیہ وسلم نے ارشاد فرمایا: ”ایک درخت ایسا ہے، جس کی برکت مسلمان کی مانند ہے۔“ سیدنا عبداللہ بن عمر رضی اللہ عنہما کہتے ہیں: مجھے خیال آیا کہ وہ کھجور کا درخت ہو گا۔ پھر میں نے حاضرین کا جائزہ لیا، تو میں وہاں دس آدمیوں میں سے دسواں فرد تھا، اور میں وہاں سب سے کم سن تھا۔ اس لیے میں خاموش رہا۔ نبی اکرم صلی اللہ علیہ وسلم نے فرمایا: ”وہ کھجور کا درخت ہے۔“ [صحیح ابن حبان/كتاب الإيمان/حدیث: 244]

سیدنا عبداللہ بن عمر رضی اللہ عنہما بیان کرتے ہیں: ایک دن نبی اکرم صلی اللہ علیہ وسلم نے اپنے اصحاب سے فرمایا: ”مجھے ایسے درخت کے بارے میں بتاؤ! جس کی مثال بندہ مومن کی طرح ہے۔“ راوی کہتے ہیں: لوگ جنگلات کے مختلف درختوں کے بارے میں بات چیت کرنے لگے، سیدنا عبداللہ رضی اللہ عنہما کہتے ہیں: میرے ذہن میں خیال آیا کہ وہ کھجور کا درخت ہو سکتا ہے۔ پہلے میں یہ بات کہنے لگا، لیکن جب میں نے حاضرین کی عمر کا جائزہ لیا، تو مجھے بات کرنے کی ہمت نہیں ہوئی، کوئی بھی شخص اس سوال کا جواب نہیں دے سکا تو نبی اکرم صلی اللہ علیہ وسلم نے فرمایا: ”یہ کھجور کا درخت ہے۔“ [صحیح ابن حبان/كتاب الإيمان/حدیث: 245]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”بے شک درختوں میں سے ایک درخت ایسا ہے جس کے پتے گرتے نہیں ہیں اور اس کی مثال مسلمان کی مانند ہے، تم لوگ مجھے بتاؤ وہ کون سا درخت ہے؟“ لوگ جنگلات کے مختلف درختوں کے بارے میں غور و فکر کرنے لگے۔ سیدنا عبداللہ رضی اللہ عنہ کہتے ہیں: میرے ذہن میں یہ آیا کہ یہ کھجور کا درخت ہے، لیکن مجھے شرم آ گئی۔ پھر لوگوں نے عرض کی: یا رسول اللہ! آپ بتائیے کہ وہ کون سا درخت ہے؟ تو نبی اکرم صلی اللہ علیہ وسلم نے فرمایا: ”وہ کھجور کا درخت ہے۔“ (راوی کہتے ہیں) بعد میں، میں نے اس کا تذکرہ سیدنا عمر رضی اللہ عنہ سے کیا، تو انہوں نے فرمایا: اگر تم اس وقت یہ بات کہہ دیتے کہ یہ کھجور کا درخت ہے، تو یہ میرے نزدیک اس، اس چیز سے زیادہ محبوب ہوتی۔ [صحیح ابن حبان/كتاب الإيمان/حدیث: 246]

سیدنا ابورزین رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”مومن کی مثال کھجور کے درخت کی مانند ہے، جو صرف پاکیزہ چیز کھاتا ہے، اور جو صرف پاکیزہ چیز دیتا ہے۔“ امام ابن حبان رحمہ اللہ فرماتے ہیں: شعبہ نامی راوی کو روایت میں راوی کا نام «عَدَس» نقل کرنے میں وہم ہوا ہے، اصل لفظ «حَدَس» ہے جیسا کہ حماد بن سلمہ اور دیگر حضرات نے یہ لفظ بیان کیا ہے۔ [صحیح ابن حبان/كتاب الإيمان/حدیث: 247]