سیدنا ابوجعد ضمری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص کسی عذر کے بغیر تین جمعہ ترک کر دے وہ منافق ہے۔“ [صحیح ابن حبان/كتاب الإيمان/حدیث: 258]

علاء بن عبدالرحمن بیان کرتے ہیں کہ میں سیدنا انس بن مالک رضی اللہ عنہ کی خدمت میں حاضر ہوا، میں اور میرے ساتھ ایک اور صاحب تھے، ہم ظہر کے بعد ان کی خدمت میں حاضر ہوئے تو انہوں نے دریافت کیا: کیا تم لوگوں نے عصر کی نماز پڑھ لی ہے؟ ہم نے جواب دیا: جی نہیں! تو انہوں نے فرمایا: تم دونوں حجرہ میں نماز ادا کر لو۔ ہم اس سے فارغ ہو گئے، انہوں نے نماز طویل ادا کی، جب وہ نماز پڑھ کر ہماری طرف متوجہ ہوئے تو انہوں نے سب سے پہلے ہم سے یہ کہا کہ نبی اکرم صلی اللہ علیہ وسلم نے یہ بات ارشاد فرمائی ہے: ”یہ منافقین کی نماز ہے، ان میں سے کوئی شخص نماز کو مؤخر کرتا رہتا ہے، یہاں تک کہ جب سورج شیطان کے دو سینگوں کے درمیان پہنچ جاتا ہے، تو وہ شخص اٹھ کر چار مرتبہ ٹھونگیں مارتا ہے، وہ نماز میں اللہ تعالیٰ کا ذکر بہت کم کرتا ہے۔“ [صحیح ابن حبان/كتاب الإيمان/حدیث: 259]

سیدنا انس بن مالک رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”کیا میں تمہیں منافقین کی نماز کے بارے میں نہ بتاؤں؟ وہ عصر کی نماز کو ادا نہیں کرتا، یہاں تک کہ جب سورج شیطان کے دو سینگوں کے درمیان (راوی کو شک ہے شاید یہ الفاظ ہیں) شیطان کے سینگ تک پہنچ جاتا ہے، تو وہ مرغ کی طرح ٹھونگے مارتا ہے، وہ اس نماز میں اللہ کا ذکر بہت تھوڑا سا کرتا ہے۔“ [صحیح ابن حبان/كتاب الإيمان/حدیث: 260]

علاء بن عبد الرحمن بیان کرتے ہیں: ہم لوگ سیدنا انس بن مالک رضی اللہ عنہ کی خدمت میں ظہر کے بعد حاضر ہوئے، تو وہ عصر کی نماز ادا فرما رہے تھے، جب وہ نماز پڑھ کر فارغ ہوئے، تو ہم نے یا شاید انہوں نے جلدی نماز ادا کرنے کا تذکرہ کیا، تو سیدنا انس بن مالک رضی اللہ عنہ نے فرمایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”یہ منافقین کی نماز ہے، یہ منافقین کی نماز ہے۔“ یہ بات آپ صلی اللہ علیہ وسلم نے تین مرتبہ ارشاد فرمائی: ”ان میں سے کوئی ایک شخص بیٹھا رہتا ہے، یہاں تک کہ جب سورج زرد ہو جاتا ہے اور وہ شیطان کے دو سینگوں کے درمیان پہنچ جاتا ہے (راوی کو شک ہے شاید یہ الفاظ ہیں) شیطان کے دو سینگوں پر پہنچ جاتا ہے، تو وہ شخص اٹھ کر چار مرتبہ ٹھونگے مارتا ہے، وہ اس نماز میں اللہ تعالیٰ کا ذکر بہت تھوڑا کرتا ہے۔“ [صحیح ابن حبان/كتاب الإيمان/حدیث: 261]

علاء بن عبدالرحمن بیان کرتے ہیں کہ ایک مرتبہ وہ ظہر کی نماز ادا کرنے کے بعد بصرہ میں سیدنا انس بن مالک رضی اللہ عنہ کے گھر گئے، راوی بیان کرتے ہیں کہ سیدنا انس بن مالک رضی اللہ عنہ کا گھر مسجد کے پہلو میں تھا، جب وہ ان کی خدمت میں حاضر ہوئے تو انہوں نے دریافت کیا: کیا تم نے عصر کی نماز ادا کر لی ہے؟ ہم نے جواب دیا: ہم تو ابھی ظہر کی نماز پڑھ کر آئے ہیں، تو سیدنا انس رضی اللہ عنہ نے فرمایا: تم لوگ عصر کی نماز ادا کر لو! چنانچہ ہم نے عصر کی نماز ادا کر لی، جب ہم نماز پڑھ کر فارغ ہوئے تو انہوں نے فرمایا: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”یہ منافق کی نماز ہے، (منافق شخص) بیٹھا ہوا سورج کو دیکھتا رہتا ہے، یہاں تک کہ جب وہ شیطان کے دو سینگوں کے درمیان پہنچ جاتا ہے، تو وہ اٹھ کر چار مرتبہ ٹھونگے مارتا ہے اور اس نماز میں اللہ تعالیٰ کا ذکر بہت تھوڑا سا کرتا ہے۔“ [صحیح ابن حبان/كتاب الإيمان/حدیث: 262]

علاء بن عبدالرحمن بیان کرتے ہیں: میں اور میرا ایک ساتھی ظہر کی نماز کے بعد سیدنا انس بن مالک رضی اللہ عنہ کی خدمت میں حاضر ہوئے، تو انہوں نے دریافت کیا: ”کیا تم نے عصر کی نماز ادا کر لی ہے؟“ ہم نے جواب دیا: ”جی نہیں۔“ انہوں نے فرمایا: ”تم ہمارے ہاں حجرے میں نماز ادا کر لو۔“ جب ہم نماز پڑھ کر فارغ ہوئے، تو سیدنا انس رضی اللہ عنہ نے طویل نماز ادا کی۔ نماز پڑھ کر فارغ ہونے کے بعد وہ ہماری طرف متوجہ ہوئے، تو انہوں نے سب سے پہلی بات ہمارے ساتھ یہ کی کہ نبی اکرم صلی اللہ علیہ وسلم نے یہ بات ارشاد فرمائی ہے: «تِلْكَ صَلَاةُ الْمُنَافِقِ، يَجْلِسُ يَرْقُبُ الشَّمْسَ حَتَّى إِذَا كَانَتْ بَيْنَ قَرْنَيِ الشَّيْطَانِ -أَوْ عَلَى قَرْنَيِ الشَّيْطَانِ- قَامَ فَنَقَرَهَا أَرْبَعًا، لَا يَذْكُرُ اللهَ فِيهَا إِلَّا قَلِيلًا» ”یہ منافقین کی نماز ہے؛ ان میں سے کوئی ایک شخص بیٹھا رہتا ہے، یہاں تک کہ جب سورج شیطان کے سینگ پر (راوی کو شک ہے شاید یہ الفاظ ہیں: شیطان کے دو سینگوں کے درمیان) پہنچ جاتا ہے، تو وہ شخص اٹھ کر چار مرتبہ ٹھونگے مارتا ہے، وہ ان رکعات میں اللہ تعالیٰ کا ذکر بہت تھوڑا سا کرتا ہے۔“ [صحیح ابن حبان/كتاب الإيمان/حدیث: 263]

ابوجعفر نامی راوی بیان کرتے ہیں کہ عبید بن عمیر مکہ مکرمہ میں تقریر کر رہے تھے، ان کے پاس سیدنا عبداللہ بن عمر اور سیدنا عبداللہ بن صفوان رضی اللہ عنہما اور دیگر صحابہ کرام بھی موجود تھے، عبید بن عمیر نے یہ بتایا کہ نبی اکرم صلی اللہ علیہ وسلم نے یہ بات ارشاد فرمائی ہے: ”منافق کی مثال دو ریوڑوں کے درمیان والی بکری کی مانند ہے، اگر وہ اس ریوڑ کی طرف جاتی ہے، تو اسے سینگ مارے جاتے ہیں اور اگر وہ اس ریوڑ کی طرف جاتی ہے، تو اسے سینگ مارے جاتے ہیں۔“ تو سیدنا عبداللہ بن عمر رضی اللہ عنہ نے فرمایا: ایسا نہیں ہے۔ اس پر عبید بن عمیر غصے میں آ گئے اور بولے: کیا آپ میری بات کو مسترد کر رہے ہیں؟ سیدنا عبداللہ بن عمر رضی اللہ عنہ نے فرمایا: میں تمہاری بات کو مسترد نہیں کر رہا، لیکن نبی اکرم صلی اللہ علیہ وسلم نے جب یہ بات ارشاد فرمائی تھی اس وقت میں نبی اکرم صلی اللہ علیہ وسلم کے پاس موجود تھا۔ اس پر سیدنا عبداللہ بن صفوان رضی اللہ عنہ نے دریافت کیا: اے ابوعبدالرحمن! نبی اکرم صلی اللہ علیہ وسلم نے کیا ارشاد فرمایا تھا؟ تو سیدنا عبداللہ بن عمر رضی اللہ عنہ نے فرمایا: (نبی اکرم صلی اللہ علیہ وسلم نے ریوڑ کے لیے) لفظ «رَبِيضَيْنِ» ”ربیضین“ استعمال کیا تھا (جب کہ تم نے لفظ «غَنَمَيْنِ» ”غنمین“ استعمال کیا ہے)۔ تو عبید بن عمیر یا شاید عبداللہ بن صفوان بولے: اے ابوعبدالرحمن! «رَبِيضَيْنِ» اور «غَنَمَيْنِ» دونوں کا مطلب ایک ہی ہے۔ تو سیدنا عبداللہ بن عمر رضی اللہ عنہ نے فرمایا: میں نے تو اسی طرح سنا ہے، میں نے تو اسی طرح سنا ہے، میں نے تو اسی طرح سنا ہے۔ (راوی بیان کرتے ہیں) سیدنا عبداللہ بن عمر رضی اللہ عنہ جب نبی اکرم صلی اللہ علیہ وسلم کی زبانی کوئی لفظ سنتے، تو آپ رضی اللہ عنہ اس میں کوئی اضافہ یا کوئی کمی نہیں کرتے تھے۔ [صحیح ابن حبان/كتاب الإيمان/حدیث: 264]

سیدنا ابوہریرہ رضی اللہ عنہ کے بارے میں یہ بات منقول ہے، انہوں نے اس آیت کے بارے میں یہ بات ارشاد فرمائی ہے: (ارشاد باری تعالیٰ ہے) ﴿بے شک اللہ تعالیٰ تم لوگوں کو یہ حکم دیتا ہے، تم امانتیں ان کے اہل لوگوں کو ادا کر دو۔﴾ [سورة النساء: 58] یہ آیت یہاں تک ہے: ﴿بے شک اللہ تعالیٰ سننے والا اور دیکھنے والا ہے۔﴾ [سورة النساء: 58] (سیدنا ابوہریرہ رضی اللہ عنہ بیان کرتے ہیں:) ”میں نے نبی اکرم صلی اللہ علیہ وسلم کو دیکھا کہ آپ نے اپنا انگوٹھا اپنے کان پر رکھا اور اپنی انگلی جس کے ذریعے نماز کے دوران اشارہ کیا جاتا ہے اسے اپنی آنکھ پر رکھا۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا اپنی انگلی کو اپنے کانوں اور اپنی آنکھوں پر رکھنے کا مطلب یہ ہے: آپ لوگوں کے سامنے اس بات کو واضح کریں کہ اللہ تعالیٰ اس کان کی وجہ سے نہیں سنتا جس میں سوراخ اور موڑ ہوتا ہے، اور اس آنکھ کی مدد سے نہیں دیکھتا ہے جس میں پتلیاں اور ڈیلا اور سفیدی ہوتی ہے، ہمارا پروردگار اس بات سے بلند و برتر ہے کہ اسے اس کی مخلوق میں سے کسی چیز کے ساتھ مشابہ قرار دیا جائے بلکہ وہ کسی آلے کے بغیر سنتا اور دیکھتا ہے جیسے وہ چاہتا ہے۔ [صحیح ابن حبان/كتاب الإيمان/حدیث: 265]

سیدنا ابوموسیٰ اشعری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ سوتا نہیں ہے اور یہ اس کی شان کے لائق بھی نہیں ہے کہ وہ سو جائے، وہ پلڑے کو اوپر نیچے کرتا رہتا ہے۔ دن کے اعمال رات ہونے سے پہلے اور رات کے اعمال دن ہونے سے پہلے اس کی بارگاہ میں پیش کر دیے جاتے ہیں۔ اس کا حجاب نور ہے، اگر اس کے ایک پردے کو ہٹا دیا جائے تو اس کی ذات کے انوار ہر اس چیز کو جلا دیں جو اس کی بصارت کے دائرے میں ہیں۔ اس نے اپنا دستِ رحمت رات کے وقت گناہ کرنے والے شخص کے لیے پھیلایا ہوا ہے تاکہ دن میں اس کی توبہ قبول کرے اور دن میں گناہ کرنے والے شخص کے لیے پھیلایا ہوا ہے تاکہ رات میں اس کی توبہ قبول کرے، (ایسا اس وقت تک ہوتا رہے گا) جب تک سورج مغرب سے طلوع نہیں ہو جاتا۔“ [صحیح ابن حبان/كتاب الإيمان/حدیث: 266]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ فرماتا ہے: ابنِ آدم مجھے جھوٹا قرار دیتا ہے، حالانکہ اسے اس بات کا حق نہیں ہے کہ مجھے جھوٹا قرار دے؛ ابنِ آدم مجھے برا کہتا ہے، حالانکہ اسے اس کا حق نہیں ہے کہ وہ مجھے برا کہے، جہاں تک اس کے میری تکذیب کرنے کا تعلق ہے، تو اس سے مراد اس کا یہ کہنا ہے: اللہ تعالیٰ مجھے دوبارہ پیدا نہیں کرے گا جس طرح اس نے مجھے پہلے پیدا کیا ہے؛ تو کیا اسے دوبارہ پیدا کرنے کے مقابلے میں پہلی مرتبہ پیدا کرنا میرے لیے زیادہ آسان نہیں ہے؟ جہاں تک اس کے مجھے برا کہنے کا تعلق ہے، تو اس سے مراد اس کا یہ کہنا ہے: اللہ تعالیٰ کی اولاد ہے، حالانکہ میں اللہ تعالیٰ ہوں، میں یکتا ہوں، میں بے نیاز ہوں، ﴿لَمْ يَلِدْ وَلَمْ يُولَدْ * وَلَمْ يَكُن لَّهُ كُفُوًا أَحَدٌ﴾ [سورة الإخلاص: 3-4] ”نہ میں نے کسی کو جنم دیا ہے، اور نہ مجھے جنم دیا گیا ہے اور نہ کوئی میرا ہمسر ہو سکتا ہے۔““ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”کیا پہلی مرتبہ پیدا کرنا اللہ تعالیٰ کے لیے دوبارہ پیدا کرنے کے مقابلے میں زیادہ آسان نہیں تھا؟“ اس میں اس بات کا واضح بیان موجود ہے کہ وہ صفات، جو اس شخص میں نقص واقع کر دیں جس میں وہ صفت پائی جاتی ہے، تو یہ بات جائز نہیں ہے کہ اس کی مثل کو اللہ تعالیٰ کی طرف منسوب کیا جائے، کیونکہ قیاس اس بات کا تقاضا کرتا ہے کہ یہ بات لازم ہو کہ ”میرے لیے زیادہ آسان“ کے بجائے ”میرے لیے زیادہ مشکل“ کے الفاظ ہونے چاہیے تھے، لیکن مشکل ہونے کے لفظ کو اس لیے ترک کیا گیا، کیونکہ یہ نقص کے الفاظ میں سے ہے، اور اس کی جگہ آسان ہونے کے لفظ کو بدلے کے طور پر لایا گیا جس میں نقص کا پہلو نہیں پایا جاتا۔ [صحیح ابن حبان/كتاب الإيمان/حدیث: 267]