سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”دنیا مومن کے لیے قید خانہ ہے اور کافر کے لیے جنت ہے۔“ [صحیح ابن حبان/كتاب الرقائق/حدیث: 687]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”دنیا مومن کے لیے قید خانہ ہے اور کافر کے لیے جنت ہے۔“ [صحیح ابن حبان/كتاب الرقائق/حدیث: 688]

سیدنا ابودرداء رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اللہ تعالیٰ کے اس فرمان ﴿كُلَّ يَوْمٍ هُوَ فِي شَأْنٍ﴾ [سورة الرحمن: 29] کے بارے میں یہ بات بیان فرمائی (ارشادِ باری تعالیٰ ہے): ”ہر روز اس کی نئی شان ہوتی ہے۔“ نبی اکرم صلی اللہ علیہ وسلم فرماتے ہیں: ”اس کی شان میں یہ بات شامل ہے کہ «يَغْفِرُ ذَنْبًا، وَيُفَرِّجُ كَرْبًا، وَيَرْفَعُ قَوْمًا، وَيَخْفِضُ آخَرِينَ» ”وہ گناہ کی مغفرت کر دیتا ہے، پریشانی کو ختم کر دیتا ہے، ایک قوم کو سربلندی نصیب کرتا ہے اور دوسروں کو پست کر دیتا ہے۔““ [صحیح ابن حبان/كتاب الرقائق/حدیث: 689]

ابوعبدرب بیان کرتے ہیں کہ میں نے سیدنا معاویہ رضی اللہ عنہ کو اس منبر پر یہ بیان کرتے ہوئے سنا، وہ کہتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”دنیا میں سے صرف آزمائش اور فتنہ باقی رہ گیا ہے۔“ [صحیح ابن حبان/كتاب الرقائق/حدیث: 690]

سیدہ ام سلمہ رضی اللہ عنہا بیان کرتی ہیں کہ ایک رات نبی اکرم صلی اللہ علیہ وسلم نے ارشاد فرمایا: ” «سُبْحَانَ اللّٰهِ» ”اللہ تعالیٰ کی ذات ہر عیب سے پاک ہے“، کتنے ہی فتنے نازل کر دیے گئے ہیں اور کتنے ہی خزانوں کے دروازے کھول دیے گئے ہیں۔ حجرے میں رہنے والی خواتین کو بیدار کر دو، کیونکہ دنیا میں بہت سی باپردہ عورتیں قیامت کے دن بے پردہ ہوں گی۔“ [صحیح ابن حبان/كتاب الرقائق/حدیث: 691]

سیدنا اسامہ بن زید رضی اللہ عنہما بیان کرتے ہیں: نبی اکرم صلی اللہ علیہ وسلم نے یہ بات ارشاد فرمائی ہے: ”میں جنت کے دروازے پر کھڑا ہوا تھا، اس میں داخل ہونے والے زیادہ تر لوگ غریب لوگ تھے اور خوشحال لوگوں کو وہاں روک لیا گیا تھا، اور جب اہل جہنم کو جہنم میں جانے کا حکم ہوا اور میں نے جہنم کا جائزہ لیا، تو اس میں داخل ہونے والی اکثر خواتین تھیں۔“ امام ابن حبان رحمہ اللہ فرماتے ہیں: عمران بن موسیٰ نامی راوی نے اس روایت میں سیدنا اسامہ بن زید رضی اللہ عنہما کے ساتھ سیدنا سعید بن زید رضی اللہ عنہ کو بھی ملا دیا ہے۔ یہاں معتمر نامی راوی سے مراد معتمر بن سلیمان ہے۔ [صحیح ابن حبان/كتاب الرقائق/حدیث: 692]

نافع بیان کرتے ہیں: سیدنا عبداللہ بن عمر رضی اللہ عنہما نے ایک چرواہے کی بانسری کی آواز سنی، تو انہوں نے اپنی دونوں انگلیاں اپنے کانوں میں رکھ لیں اور راستے سے ایک طرف ہٹ گئے، وہ یہ فرماتے جا رہے تھے: اے نافع! کیا تمہیں آواز آ رہی ہے؟ میں جواب دیتا تھا: جی ہاں! جب میں نے کہا: اب نہیں آ رہی، تو وہ واپس راستے پر آ گئے، پھر انہوں نے فرمایا: ”میں نے نبی اکرم صلی اللہ علیہ وسلم کو بھی اسی طرح کرتے ہوئے دیکھا ہے۔“ [صحیح ابن حبان/كتاب الرقائق/حدیث: 693]

سیدنا ابوموسیٰ اشعری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”خبردار! بیشک درہم اور دینار نے تم سے پہلے لوگوں کو بھی ہلاکت کا شکار کر دیا اور یہ تم لوگوں کو بھی ہلاکت کا شکار کر دیں گے۔“ [صحیح ابن حبان/كتاب الرقائق/حدیث: 694]

سیدنا انس بن مالک رضی اللہ عنہ بیان کرتے ہیں کہ سیدہ ام سلیم رضی اللہ عنہا نے نبی اکرم صلی اللہ علیہ وسلم کی خدمت میں تازہ کھجوروں کا ایک تھال بھیجا، تو نبی اکرم صلی اللہ علیہ وسلم نے مٹھی میں کھجوریں لے کر انہیں اپنی ایک زوجہ محترمہ کی طرف بھجوا دیا، پھر آپ صلی اللہ علیہ وسلم نے مٹھی میں کھجوریں لیں اور اپنی ازواج کی طرف بھجوا دیا، پھر آپ صلی اللہ علیہ وسلم نے انہیں بھجوا دیا اور آپ صلی اللہ علیہ وسلم کو اس بات کی خواہش بھی تھی، آپ صلی اللہ علیہ وسلم نے کئی مرتبہ ایسا کیا اور آپ صلی اللہ علیہ وسلم کو اس بات کی خواہش بھی تھی۔ [صحیح ابن حبان/كتاب الرقائق/حدیث: 695]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم جب بھی کسی جنگ میں شریک ہونے کے لیے تشریف لے جاتے تھے، تو آپ صلی اللہ علیہ وسلم سب سے آخر میں سیدہ فاطمہ رضی اللہ عنہا سے ملتے تھے اور جب بھی آپ صلی اللہ علیہ وسلم کسی جنگ سے واپس تشریف لاتے تھے، تو سب سے پہلے سیدہ فاطمہ رضی اللہ عنہا سے ملتے تھے۔ جب آپ صلی اللہ علیہ وسلم غزوہ تبوک میں شرکت کے لیے تشریف لے گئے، تو آپ صلی اللہ علیہ وسلم کے ساتھ سیدنا علی رضی اللہ عنہ بھی تھے۔ سیدہ فاطمہ رضی اللہ عنہا کھڑی ہوئیں۔ انہوں نے اپنے گھر میں ایک چٹائی بچھا لی اور گھر کے دروازے پر پردہ لٹکا دیا۔ انہوں نے اس پردے کو زعفران کے ساتھ رنگ دیا تھا۔ جب ان کے والد صلی اللہ علیہ وسلم تشریف لائے اور انہوں نے سیدہ فاطمہ رضی اللہ عنہا کے اس عمل کو دیکھا، تو وہ واپس تشریف لے گئے اور مسجد میں تشریف فرما ہوئے۔ سیدہ فاطمہ رضی اللہ عنہا نے سیدنا بلال رضی اللہ عنہ کو پیغام بھجوایا اور کہا: اے بلال! تم میرے والد صلی اللہ علیہ وسلم کے پاس جاؤ اور ان سے دریافت کرو کہ آپ صلی اللہ علیہ وسلم میرے دروازے سے واپس کیوں چلے گئے۔ سیدنا بلال رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم سے اس بارے میں دریافت کیا، تو نبی اکرم صلی اللہ علیہ وسلم نے ارشاد فرمایا: ”میں نے دیکھا ہے کہ اس نے وہاں ایک نیا کام کیا تھا۔“ سیدنا بلال رضی اللہ عنہ نے سیدہ فاطمہ رضی اللہ عنہا کو اس بارے میں بتایا، تو انہوں نے اس پردے کو اتار دیا اور اس بچھونے کو اٹھا دیا اور اس پر موجود چیزوں کو ایک طرف رکھ کے خود پرانے سے کپڑے پہن لیے، پھر سیدنا بلال رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے اور نبی اکرم صلی اللہ علیہ وسلم کو اس بارے میں بتایا، تو نبی اکرم صلی اللہ علیہ وسلم آپ کے ہاں تشریف لائے۔ آپ صلی اللہ علیہ وسلم نے انہیں (سیدہ فاطمہ رضی اللہ عنہا کو) گلے لگا لیا اور ارشاد فرمایا: ”تم اسی طرح رہا کرو، میرے ماں باپ تم پر قربان ہوں۔“ [صحیح ابن حبان/كتاب الرقائق/حدیث: 696]