سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم جب بھی کسی جنگ میں شریک ہونے کے لیے تشریف لے جاتے تھے تو آپ سب سے آخر میں سیدہ فاطمہ رضی اللہ عنہا سے ملتے تھے اور جب بھی آپ کسی جنگ سے واپس تشریف لاتے تھے تو سب سے پہلے سیدہ فاطمہ رضی اللہ عنہا سے ملتے تھے۔ جب آپ صلی اللہ علیہ وسلم غزوہ تبوک میں شرکت کے لیے تشریف لے گئے تو آپ کے ساتھ سیدنا علی رضی اللہ عنہ بھی تھے۔ سیدہ فاطمہ رضی اللہ عنہا کھڑی ہوئیں، انہوں نے اپنے گھر میں ایک چٹائی بچھا لی اور گھر کے دروازے پر پردہ لٹکا دیا، انہوں نے اس پردے کو زعفران کے ساتھ رنگ دیا تھا۔ جب ان کے والد تشریف لائے اور انہوں نے سیدہ فاطمہ رضی اللہ عنہا کے اس عمل کو دیکھا تو وہ واپس تشریف لے گئے اور مسجد میں تشریف فرما ہوئے۔ سیدہ فاطمہ رضی اللہ عنہا نے سیدنا بلال رضی اللہ عنہ کو پیغام بھجوایا اور کہا: اے بلال! تم میرے والد کے پاس جاؤ اور ان سے دریافت کرو کہ آپ میرے دروازے سے واپس کیوں چلے گئے۔ سیدنا بلال رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم سے اس بارے میں دریافت کیا تو نبی اکرم صلی اللہ علیہ وسلم نے ارشاد فرمایا: ”میں نے دیکھا ہے کہ اس نے وہاں ایک نیا کام کیا تھا۔“ سیدنا بلال رضی اللہ عنہ نے سیدہ فاطمہ رضی اللہ عنہا کو اس بارے میں بتایا تو انہوں نے اس پردے کو اتار دیا اور اس بچھونے کو اٹھا دیا اور اس پر موجود چیزوں کو ایک طرف رکھ کے خود پرانے سے کپڑے پہن لیے، پھر سیدنا بلال رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے اور نبی اکرم صلی اللہ علیہ وسلم کو اس بارے میں بتایا تو نبی اکرم صلی اللہ علیہ وسلم آپ کے ہاں تشریف لائے، آپ صلی اللہ علیہ وسلم نے انہیں (سیدہ فاطمہ رضی اللہ عنہا کو) گلے لگا لیا اور ارشاد فرمایا: ”تم اسی طرح رہا کرو، میرے ماں باپ تم پر قربان ہوں۔“ [صحیح ابن حبان/كتاب الرقائق/حدیث: 697]

سیدنا عبداللہ بن عمر رضی اللہ عنہما بیان کرتے ہیں: نبی اکرم صلی اللہ علیہ وسلم نے میرے کندھے کو پکڑا (راوی کو شک ہے شاید یہ الفاظ ہیں:) میرے دونوں کندھوں کو پکڑا اور فرمایا: ”تم دنیا میں یوں رہو جیسے تم اجنبی ہو یا تم مسافر ہو۔“ راوی بیان کرتے ہیں: سیدنا عبداللہ بن عمر رضی اللہ عنہما یہ فرمایا کرتے تھے جب تم صبح کر لو، تو شام کا انتظار نہ کرو اور جب شام کر لو، تو صبح کا انتظار نہ کرو اور بیماری سے پہلے اپنی صحت کو اور مرنے سے پہلے اپنی زندگی کو غنیمت سمجھو۔
اسحاق نامی راوی کہتے ہیں: حسن بن قزعہ بیان کرتے ہیں: یحییٰ بن معین نے مجھ سے صرف اس حدیث کے بارے میں دریافت کیا ہے۔ [صحیح ابن حبان/كتاب الرقائق/حدیث: 698]

عبداللہ بن بریدہ اپنے والد سیدنا بریدہ رضی اللہ عنہ کے حوالے سے نبی کریم صلی اللہ علیہ وسلم کا یہ فرمان نقل کرتے ہیں: ”اہلِ دنیا کے نزدیک حسب (برتری کا معیار) مال ہے۔“ [صحیح ابن حبان/كتاب الرقائق/حدیث: 699]

عبداللہ بن بریدہ رحمہ اللہ اپنے والد رضی اللہ عنہ کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”اہلِ دنیا کے نزدیک حسب (یعنی برتری) کا معیار مال ہے، جس کی طرف وہ جاتے ہیں۔“ [صحیح ابن حبان/كتاب الرقائق/حدیث: 700]

مطرف اپنے والد (سیدنا عبداللہ بن شخیر رضی اللہ عنہ) کا یہ بیان نقل کرتے ہیں، انہوں نے کہا کہ میں نبی اکرم صلی اللہ علیہ وسلم کی خدمت میں حاضر ہوا تو آپ یہ آیت تلاوت فرما رہے تھے: ﴿أَلْهَاكُمُ التَّكَاثُرُ﴾ [سورة التكاثر: 1] ”کثرت تمہیں غفلت کا شکار کر دے گی“۔ نبی اکرم صلی اللہ علیہ وسلم نے فرمایا: ”ابنِ آدم کہتا ہے: یہ میرا مال ہے، یہ میرا مال ہے، حالانکہ تمہارا مال وہ ہے، جو کھا کر تم فنا کر دو، یا جسے پہن کر تم پرانا کر دو، یا جسے صدقہ کر کے تم آگے بھیج دو۔“ [صحیح ابن حبان/كتاب الرقائق/حدیث: 701]

سیدنا ابی بن کعب رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”ابنِ آدم نے جو کچھ کھایا ہے، اس کے ذریعے دنیا کی مثال بیان کی جا سکتی ہے، جو ابنِ آدم کے جسم سے نکلتا ہے، وہ اگرچہ اس میں مصالحہ ڈالتا ہے اور نمک ڈالتا ہے لیکن تم اس بات کا جائزہ لو (کہ آدمی کے پیٹ میں رہ کر) وہ کیا بن جاتا ہے۔“ [صحیح ابن حبان/كتاب الرقائق/حدیث: 702]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم کی اونٹنی «عَضْبَاء» سے آگے کوئی نہیں نکل سکتا تھا، جب بھی اس کے ساتھ مقابلہ ہوتا تھا وہ آگے نکل جاتی تھی۔ ایک مرتبہ ایک دیہاتی ایک اونٹ پر بیٹھ کر آیا، اس نے اس اونٹنی کے ساتھ مقابلہ کیا تو وہ آگے نکل گیا۔ یہ بات نبی اکرم صلی اللہ علیہ وسلم کے اصحاب رضی اللہ عنہم کو گراں گزری، جب نبی اکرم صلی اللہ علیہ وسلم نے ان کے چہروں پر یہ بات ملاحظہ کی تو آپ صلی اللہ علیہ وسلم نے ارشاد فرمایا: ”اللہ تعالیٰ پر یہ بات لازم ہے کہ اس دنیا میں جب کسی چیز کو سربلندی عطا کرے تو اسے پستی بھی عطا کرے۔“ [صحیح ابن حبان/كتاب الرقائق/حدیث: 703]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کا ایک مخصوص پلنگ تھا، جسے مخصوص قسم کے (پتوں، یا شاخوں) کے ذریعے بنا گیا تھا، اس پر سیاہ رنگ کی چادر موجود تھی جس کے اندر ہم نے اس قسم کے پتے بھرے ہوئے تھے، ایک مرتبہ سیدنا ابوبکر اور سیدنا عمر رضی اللہ عنہما نبی اکرم صلی اللہ علیہ وسلم کی خدمت میں حاضر ہوئے، نبی اکرم صلی اللہ علیہ وسلم اس پر سوئے ہوئے تھے، نبی اکرم صلی اللہ علیہ وسلم نے ان دونوں حضرات کو دیکھا تو آپ صلی اللہ علیہ وسلم سیدھے ہو کر بیٹھ گئے، ان دونوں صاحبان نے دیکھا کہ نبی اکرم صلی اللہ علیہ وسلم کے پہلو پر پلنگ کا نشان موجود ہے تو سیدنا ابوبکر اور سیدنا عمر رضی اللہ عنہما رو پڑے، انہوں نے عرض کی: یا رسول اللہ! آپ کا جو پلنگ اور جو بستر ہم دیکھ رہے ہیں کیا اس کی سختی آپ کو تکلیف نہیں دیتی ہے، جبکہ قیصر اور کسری ریشم اور دیباج کے اوپر آرام کرتے ہیں، تو نبی اکرم صلی اللہ علیہ وسلم نے فرمایا: ”تم دونوں یہ بات نہ کرو، کیونکہ قیصر اور کسری کے بستر جہنم میں ہوں گے اور میرا پلنگ اور میرا بستر، ان کا ٹھکانہ جنت میں ہے۔“ [صحیح ابن حبان/كتاب الرقائق/حدیث: 704]

سیدنا فضالہ بن عبید رضی اللہ عنہ بیان کرتے ہیں کہ انہوں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اس شخص کے لیے مبارکباد ہے، جسے اسلام کی طرف ہدایت دی گئی، ضروریات کے مطابق اسے چیزیں دی گئیں اور اس کو اللہ تعالیٰ نے اس چیز پر قناعت عطا کی۔“ [صحیح ابن حبان/كتاب الرقائق/حدیث: 705]

عامر بن عبداللہ بیان کرتے ہیں کہ جب سیدنا سلمان الخیر (یعنی سیدنا سلمان فارسی رضی اللہ عنہ) کے انتقال کا وقت قریب آیا، تو لوگوں نے ان پر گھبراہٹ محسوس کی۔ لوگوں نے دریافت کیا: اے ابوعبداللہ! آپ کیوں گھبرا رہے ہیں؟ جبکہ آپ کو بھلائی کی طرف سبقت لے جانے کا شرف حاصل ہے، آپ نے نبی اکرم صلی اللہ علیہ وسلم کے ہمراہ غزوات میں شرکت کی ہے اور بڑی فتوحات میں حصہ لیا ہے، تو سیدنا سلمان فارسی رضی اللہ عنہ نے فرمایا: مجھے یہ چیز گھبراہٹ کا شکار کر رہی ہے کہ ہمارے حبیب صلی اللہ علیہ وسلم جب ہم سے جدا ہوئے تھے، تو آپ صلی اللہ علیہ وسلم نے ہم سے یہ عہد لیا تھا، آپ صلی اللہ علیہ وسلم نے فرمایا تھا: ”تم میں سے کسی شخص کے لیے ایک دن کے لیے اتنی چیز کافی ہے، جو کسی سوار کا زادِ سفر ہوتی ہے۔“ تو یہ چیز مجھے گھبراہٹ کا شکار کر رہی ہے، پھر جب سیدنا سلمان فارسی رضی اللہ عنہ کا مال جمع کیا گیا، تو اس کی قیمت پندرہ دینار بنتی تھی۔ (امام ابن حبان رحمہ اللہ فرماتے ہیں:) عامر نامی راوی عامر بن عبدقیس ہیں، جبکہ سلمان خیر سے مراد سیدنا سلمان فارسی رضی اللہ عنہ ہیں۔ [صحیح ابن حبان/كتاب الرقائق/حدیث: 706]