سیدنا عبداللہ بن عمرو رضی اللہ عنہما بیان کرتے ہیں: ایک مرتبہ میں مسجد میں بیٹھا ہوا تھا، غریب مہاجرین کا ایک حلقہ بنا ہوا تھا، وہ لوگ مسجد کے درمیان میں بیٹھے ہوئے تھے، اس دوران نبی اکرم صلی اللہ علیہ وسلم مسجد میں تشریف لائے، یہ دوپہر کے وقت کی بات ہے، آپ صلی اللہ علیہ وسلم ان لوگوں کے پاس تشریف لے گئے اور ان کے ساتھ بیٹھ گئے، جب میں نے نبی اکرم صلی اللہ علیہ وسلم کو دیکھا کہ آپ صلی اللہ علیہ وسلم ان کے ساتھ بیٹھ گئے ہیں، تو میں اٹھ کر آپ صلی اللہ علیہ وسلم کے پاس آیا، تو میں نے آپ صلی اللہ علیہ وسلم کی گفتگو کا یہ حصہ پایا، آپ صلی اللہ علیہ وسلم ارشاد فرما رہے تھے: ”غریب مہاجرین کو یہ خوشخبری دے دو کہ وہ لوگ خوشحال لوگوں سے چالیس سال پہلے جنت میں داخل ہوں گے۔“ [صحیح ابن حبان/كتاب الرقائق/حدیث: 677]

سیدنا عبداللہ بن عمرو رضی اللہ عنہما بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”بے شک غریب مہاجرین خوشحال لوگوں سے قیامت کے دن ستر (راوی کو شک ہے شاید یہ الفاظ ہیں:) چالیس سال پہلے (جنت میں داخل ہوں گے)۔“ [صحیح ابن حبان/كتاب الرقائق/حدیث: 678]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”خوشحالی مال کی کثرت سے نہیں آتی، بلکہ اصل خوشحالی دل کی بے نیازی ہے۔“ [صحیح ابن حبان/كتاب الرقائق/حدیث: 679]

عبدالرحمن بن ابان اپنے والد کا یہ بیان نقل کرتے ہیں: ایک مرتبہ سیدنا زید بن ثابت رضی اللہ عنہ دوپہر کے وقت مروان کے پاس سے اٹھ کر باہر آئے، تو میں نے سوچا یہ اس وقت ضرور کسی ایسے کام کے سلسلے میں گئے ہوں گے کہ جو مروان ان سے دریافت کرنا چاہتا ہوگا، میں نے سیدنا زید رضی اللہ عنہ سے دریافت کیا، تو انہوں نے فرمایا: اس نے ہم سے کچھ چیزوں کے بارے میں دریافت کیا جو ہم نے نبی اکرم صلی اللہ علیہ وسلم کی زبانی سنی ہیں۔ (سیدنا زید رضی اللہ عنہ نے بتایا) میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اللہ تعالیٰ اسے خوش رکھے جو ہم سے حدیث سنے اور پھر اسے دوسرے تک پہنچا دے، کیونکہ بعض اوقات علم حاصل کرنے والا شخص اس شخص تک اسے منتقل کر دیتا ہے جو اس سے زیادہ علم والا ہوتا ہے اور بعض اوقات علم حاصل کرنے والا شخص درحقیقت عالم نہیں ہوتا، تین چیزیں ایسی ہیں جن کے بارے میں مسلمان کا دل دھوکہ نہیں دیتا: عمل کا اللہ تعالیٰ کے لیے خالص ہونا، مسلمان حکمرانوں کے لیے خیر خواہی اور ان کی جماعت کے ساتھ رہنا، کیونکہ ان کی دعا غیر موجود لوگوں تک محیط ہوتی ہے، جس شخص کی نیت دنیا ہوگی اللہ تعالیٰ اس کے معاملے کو متفرق کر دے گا اور اس کی غربت کو اس کے سامنے کر دے گا اور دنیا میں سے اسے صرف وہی کچھ ملے گا جو اس کے نصیب میں لکھا گیا ہے اور جس شخص کی نیت آخرت ہوگی اللہ تعالیٰ اس کے معاملے کو سمیٹ دے گا، اس کے دل میں خوشحالی ڈال دے گا اور دنیا سرنگوں ہو کر اس کے پاس آئے گی۔“ [صحیح ابن حبان/كتاب الرقائق/حدیث: 680]

سیدنا ابوذر غفاری رضی اللہ عنہ بیان کرتے ہیں: ایک مرتبہ میں نبی اکرم صلی اللہ علیہ وسلم کے ساتھ مسجد میں موجود تھا، اسی دوران آپ نے ارشاد فرمایا: ”تم مجھے دیکھ کر بتاؤ کہ مسجد میں تمہارے سامنے کون سا شخص سب سے بلند تر حیثیت کا مالک ہے؟“ میں نے اس بات کا جائزہ لیا، تو وہاں ایک شخص حلہ پہن کر لوگوں کے ساتھ بیٹھا بات چیت کر رہا تھا، میں نے جواب دیا: یہ والا شخص، نبی اکرم صلی اللہ علیہ وسلم نے فرمایا: ”تم اب اس بات کا جائزہ لو کہ تمہارے سامنے کون سا شخص سب سے کم تر حیثیت کا مالک ہے؟“ تو میں نے اس بات کا جائزہ لیا، تو وہاں ایک غریب سا شخص پرانے سے کپڑوں میں بیٹھا ہوا تھا، میں نے عرض کی: یہ والا شخص، نبی اکرم صلی اللہ علیہ وسلم نے ارشاد فرمایا: ”یہ (غریب شخص) قیامت کے دن اللہ تعالیٰ کی بارگاہ میں اس (امیر آدمی جیسے) زمین بھر لوگوں سے بہتر ہو گا۔“ [صحیح ابن حبان/كتاب الرقائق/حدیث: 681]

سیدنا ابوہریرہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کے ستر اصحاب کو صفہ میں دیکھا ہے، ان میں سے کسی ایک کے پاس بھی چادر نہیں ہوتی تھی، صرف چھوٹا تہبند ہوتا تھا یا ایک چادر ہوتی تھی جسے وہ «تَوْشِيح» کے طور پر لپیٹ لیتا تھا اور اپنے پیچھے باندھ لیتا تھا۔ [صحیح ابن حبان/كتاب الرقائق/حدیث: 682]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم کے زمانہ اقدس میں ہماری خوراک صرف دو سیاہ چیزیں ہوتی تھیں: کھجور اور پانی۔ [صحیح ابن حبان/كتاب الرقائق/حدیث: 683]

سیدہ عائشہ صدیقہ رضی اللہ عنہا بیان کرتی ہیں: جو شخص تمہیں یہ بات بتائے کہ ہم پیٹ بھر کر کھجوریں کھا لیا کرتے تھے، اس نے تمہارے ساتھ غلط بیانی کی ہے، جب نبی اکرم صلی اللہ علیہ وسلم نے قریظہ کو فتح کیا، تو ہمیں کچھ کھجوریں اور چربی ملی تھی۔ [صحیح ابن حبان/كتاب الرقائق/حدیث: 684]

سیدنا ابوذر غفاری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”اے ابوذر! کیا تم یہ سمجھتے ہو کہ مال کا زیادہ ہونا خوشحالی ہے؟“ میں نے عرض کی: جی ہاں، یا رسول اللہ! نبی اکرم صلی اللہ علیہ وسلم نے فرمایا: ”پھر تو تم یہ سمجھتے ہو گے کہ مال کا کم ہونا غربت ہے؟“ میں نے عرض کی: جی ہاں، یا رسول اللہ! نبی اکرم صلی اللہ علیہ وسلم نے ارشاد فرمایا: ”اصل خوشحالی دل کا خوشحال ہونا ہے اور اصل غربت دل کا غریب ہونا ہے۔“ پھر نبی اکرم صلی اللہ علیہ وسلم نے قریش سے تعلق رکھنے والے ایک شخص کے بارے میں مجھ سے دریافت کیا، آپ صلی اللہ علیہ وسلم نے فرمایا: ”کیا تم فلاں شخص کو جانتے ہو؟“ میں نے عرض کی: جی ہاں، یا رسول اللہ! نبی اکرم صلی اللہ علیہ وسلم نے دریافت کیا: ”تمہاری اس کے بارے میں کیا رائے ہے اور اسے کیا سمجھا جاتا ہے؟“ میں نے عرض کی: جب وہ کوئی چیز مانگے، تو اسے دے دی جائے اور جب وہ کہیں آئے، تو اسے اندر آنے دیا جائے۔ پھر نبی اکرم صلی اللہ علیہ وسلم نے اہل صفہ سے تعلق رکھنے والے ایک شخص کے بارے میں مجھ سے دریافت کیا اور فرمایا: ”کیا تم فلاں کو جانتے ہو؟“ میں نے عرض کی: نہیں، اللہ کی قسم! یا رسول اللہ! میں اسے نہیں جانتا۔ پھر نبی اکرم صلی اللہ علیہ وسلم اس کا حسب نسب میرے سامنے بیان کرتے رہے، یہاں تک کہ میں نے اس کو پہچان لیا، تو میں نے عرض کیا: یا رسول اللہ! مجھے اس کی شناخت ہو گئی ہے۔ نبی اکرم صلی اللہ علیہ وسلم نے فرمایا: ”تمہاری اس کے بارے میں کیا رائے ہے اور اسے کیا سمجھا جاتا ہے؟“ میں نے عرض کی: وہ صفہ سے تعلق رکھنے والا ایک غریب آدمی ہے۔ نبی اکرم صلی اللہ علیہ وسلم نے ارشاد فرمایا: ”وہ (غریب آدمی) اس دوسرے (امیر آدمی جیسے) زمین بھر لوگوں سے زیادہ بہتر ہے۔“ میں نے عرض کی: یا رسول اللہ! اس شخص کو اس چیز میں سے کچھ حصہ عطا نہیں کیا گیا جو دوسرے کو دی گئی ہے، تو نبی اکرم صلی اللہ علیہ وسلم نے ارشاد فرمایا: ”اگر اس کو بھلائی دی گئی ہے، تو یہ اس کا زیادہ اہل ہے اور اگر اس کو اس سے پھیر لیا گیا ہے، تو اسے نیکی عطا کی گئی ہے۔“ [صحیح ابن حبان/كتاب الرقائق/حدیث: 685]

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب بھی سورج نکلتا ہے تو اس کے پہلو میں دو فرشتے ہوتے ہیں جو یہ اعلان کرتے ہیں: «اللَّهُمَّ أَعْطِ مُنْفِقًا خَلَفًا، وَأَعْطِ مُمْسِكًا تَلَفًا» ”اے اللہ! جو شخص (تیری راہ میں) خرچ کرتا ہے، تو اسے اس کے بدلے میں مزید عطا کر اور جو شخص خرچ نہیں کرتا ہے، تو اس کے بدلے میں اس کا نقصان کر دے۔“” [صحیح ابن حبان/كتاب الرقائق/حدیث: 686]