سیدنا عبداللہ بن عمر رضی اللہ عنہما سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”جو شخص اللہ کے نام پر مانگے اسے دے دو، جو شخص اللہ کے نام پر پناہ مانگے اسے پناہ دے دو اور جو شخص تمہاری دعوت کرے تو اسے قبول کرو۔“ [صحیح ابن حبان/كتاب الزكاة/حدیث: 3409]

ابوالاحوص اپنے والد (مالک بن نضلہ رضی اللہ عنہ) کا یہ بیان نقل کرتے ہیں کہ میں نے عرض کی: یا رسول اللہ صلی اللہ علیہ وسلم ! میرا گزر ایک شخص کے پاس سے ہوا، اس نے مجھے مہمان بھی نہیں بنایا اور میری مہمان نوازی بھی نہیں کی، تو کیا میں اس کے ساتھ ایسا ہی کروں؟ نبی اکرم صلی اللہ علیہ وسلم نے فرمایا: ”(جی نہیں) بلکہ تم اس کی مہمان نوازی کرو۔“ [صحیح ابن حبان/كتاب الزكاة/حدیث: 3410]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم ، سیدنا ابوبکر رضی اللہ عنہ اور سیدنا عمر رضی اللہ عنہ ہمارے ہاں تشریف لائے، ہم نے ان کو کھانے کے لیے تازہ کھجوریں پیش کیں اور انہیں پانی پیش کیا، تو نبی اکرم صلی اللہ علیہ وسلم نے ارشاد فرمایا: ”یہ ان نعمتوں میں شامل ہے جن کے بارے میں تم سے حساب لیا جائے گا۔“ [صحیح ابن حبان/كتاب الزكاة/حدیث: 3411]

سیدنا عمر بن خطاب رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کی خدمت میں عرض کی: میں نے فلاں شخص کو دیکھا ہے، جو دعا کرتا ہے اور بھلائی کا ذکر کرتا ہے، وہ یہ ذکر کرتا ہے کہ آپ صلی اللہ علیہ وسلم نے اسے دو دینار دیے ہیں، تو نبی اکرم صلی اللہ علیہ وسلم نے ارشاد فرمایا: ”لیکن فلاں کو تو میں نے اتنا اور اتنا کچھ دیا تھا، لیکن نہ تو اس نے تعریف کی اور نہ ہی بھلائی کی بات کہی۔“ [صحیح ابن حبان/كتاب الزكاة/حدیث: 3412]

سیدنا اسامہ بن زید رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جس شخص کے ساتھ بھلائی کی جائے، تو وہ بھلائی کرنے والے سے یہ کہے: «جَزَاكَ اللَّهُ خَيْرًا» ”اللہ تعالیٰ تمہیں جزائے خیر دے“، تو اس شخص نے تعریف پوری کر دی۔“ [صحیح ابن حبان/كتاب الزكاة/حدیث: 3413]

سیدنا عمر بن خطاب رضی اللہ عنہ بیان کرتے ہیں کہ وہ نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: یا رسول اللہ صلی اللہ علیہ وسلم ! میں نے فلاں شخص کو دیکھا ہے کہ وہ شکر گزار ہو رہا تھا، اس نے یہ بات ذکر کی کہ آپ صلی اللہ علیہ وسلم نے اسے دو دینار عطا کیے ہیں، تو نبی اکرم صلی اللہ علیہ وسلم نے ارشاد فرمایا: ”فلاں شخص کو؟ تو میں نے دس سے لے کر ایک سو کے درمیان ادائیگی کی تھی، اس نے تو اس کا شکریہ ادا نہیں کیا اور نہ ہی اس کا ذکر کیا، کوئی شخص میرے پاس سے اپنی ضرورت کے لیے کوئی چیز لے کر نکلتا ہے، جو اس نے بغل میں لی ہوتی ہے وہ چیز صرف جہنم ہوتی ہے۔“ سیدنا عمر رضی اللہ عنہ بیان کرتے ہیں: میں نے عرض کی: یا رسول اللہ صلی اللہ علیہ وسلم ! آپ صلی اللہ علیہ وسلم ان لوگوں کو دے کیوں دیتے ہیں؟ تو نبی اکرم صلی اللہ علیہ وسلم نے فرمایا: ”وہ مجھ سے مانگتے رہتے ہیں اور اللہ تعالیٰ کو میرا بخل منظور نہیں ہے۔“ [صحیح ابن حبان/كتاب الزكاة/حدیث: 3414]

سیدنا جابر بن عبداللہ رضی اللہ عنہما بیان کرتے ہیں کہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جس کے ساتھ بھلائی کی جائے، اسے بھلائی کرنے کے لیے صرف تعریف ملے تو وہ شکر گزار ہو، اور جو شخص اس کو چھپاتا ہے وہ کفرانِ نعمت کرتا ہے، اور جو شخص باطل چیز سے خود کو آراستہ ظاہر کرتا ہے وہ جھوٹ کے دو کپڑے پہننے کی مانند ہے۔“ [صحیح ابن حبان/كتاب الزكاة/حدیث: 3415]