ام المؤمنین سیدہ عائشہ صدیقہ رضی اللہ عنہا بیان کرتی ہیں کہ انہوں نے عرض کی: یا رسول اللہ صلی اللہ علیہ وسلم ! کیا ہم بھی آپ کے ہمراہ نکلا نہ کریں اور جہاد میں حصہ نہ لیا کریں؟ کیونکہ میری رائے کے مطابق قرآن میں سب سے افضل عمل جہاد ہے۔ نبی اکرم صلی اللہ علیہ وسلم نے فرمایا: ”نہیں، بلکہ سب سے بہترین جہاد بیت اللہ کا حج ہے، ایسا حج جو «مَبْرُورٌ» ”مقبول“ ہو۔“ [صحیح ابن حبان/كتاب الحج/حدیث: 3702]

سیدنا ابو سعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ فرماتا ہے: جب میں بندے کے جسم کو تندرست رکھوں اور میں اسے کشادگی عطا کروں اور پھر اس پر پانچ سال گزر جائیں اور وہ میری طرف نہ آئے، تو وہ محروم ہے۔“ [صحیح ابن حبان/كتاب الحج/حدیث: 3703]

سیدنا ابوہریرہ رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم نے خطبہ دیتے ہوئے ارشاد فرمایا: ”اے لوگو! بے شک اللہ تعالیٰ نے تم پر حج کو فرض قرار دیا ہے۔“ ایک شخص کھڑا ہوا، اس نے عرض کی: یا رسول اللہ صلی اللہ علیہ وسلم ! کیا ہر سال؟ راوی کہتے ہیں: تو نبی اکرم صلی اللہ علیہ وسلم نے اسے کوئی جواب نہیں دیا، یہاں تک کہ اس شخص نے تین مرتبہ اپنا سوال دہرایا، تو نبی اکرم صلی اللہ علیہ وسلم نے فرمایا: ”اگر میں ہاں کہہ دیتا، تو یہ لازم ہو جاتا اور اگر یہ لازم ہو جاتا، تو تم اسے ادا نہیں کر پاتے۔ جن معاملات کے بارے میں میں تمہیں بتاتا نہیں ہوں، تم ان معاملات میں مجھے رہنے دیا کرو، کیونکہ تم سے پہلے کے لوگ اپنے انبیاء سے بکثرت (غیر ضروری) سوالات کرنے اور ان سے اختلاف رکھنے کی وجہ سے ہلاکت کا شکار ہوئے تھے؛ جب میں تم لوگوں کو کسی چیز سے منع کروں، تو اس سے اجتناب کرو اور جب میں تمہیں کسی بات کا حکم دوں، تو جہاں تک تم سے ہو سکے اس پر عمل کرو۔“ انہوں نے یہ بات بھی ذکر کی کہ سورۃ مائدہ میں موجودہ آیت اس بارے میں نازل ہوئی تھی: ﴿اے ایمان والو! ایسی چیزوں کے بارے میں دریافت نہ کرو کہ اگر انہیں تمہارے سامنے ظاہر کر دیا جائے، تو تمہیں برا لگے﴾ [سورة المائدة: 101] ۔ [صحیح ابن حبان/كتاب الحج/حدیث: 3704]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے لوگوں کو خطبہ دیتے ہوئے ارشاد فرمایا: ”اے لوگو! بے شک اللہ تعالیٰ نے تم پر حج کو فرض قرار دیا ہے۔“ ایک صاحب کھڑے ہوئے انہوں نے عرض کی: کیا ہر سال میں؟ یہاں تک کہ انہوں نے تین مرتبہ یہ سوال کیا، لیکن نبی اکرم صلی اللہ علیہ وسلم نے ان سے اعراض کیا، پھر آپ صلی اللہ علیہ وسلم نے ارشاد فرمایا: ”اگر میں ہاں کہہ دیتا، تو یہ لازم ہو جاتا اور اگر یہ لازم ہو جاتا، تو تم اسے ادا نہیں کر پاتے۔“ پھر نبی اکرم صلی اللہ علیہ وسلم نے ارشاد فرمایا: ”جن معاملات میں، میں تمہیں ترک کر دیتا ہوں تم ان میں مجھے رہنے دو، کیونکہ تم سے پہلے کے لوگ اپنے انبیاء سے (غیر ضروری) سوالات کرنے اور اختلاف رکھنے کی وجہ سے ہلاکت کا شکار ہوئے تھے؛ میں تمہیں جس چیز کے بارے میں حکم دوں، جہاں تک تم سے ہو سکے اسے بجا لاؤ اور جب میں تمہیں کسی چیز سے منع کر دوں، تو تم اس سے اجتناب کرو۔“ [صحیح ابن حبان/كتاب الحج/حدیث: 3705]

سیدنا عبداللہ بن عمر رضی اللہ عنہما بیان کرتے ہیں کہ جب نبی اکرم صلی اللہ علیہ وسلم نے اپنی ازواج کے ہمراہ حج کیا، تو آپ صلی اللہ علیہ وسلم نے ارشاد فرمایا: ”بے شک یہ حج ہے اور پھر تم پر گھر میں رہنا لازم ہے“ (امام ابن حبان رحمہ اللہ فرماتے ہیں): اس روایت کے الفاظ بعض خواتین کے لیے استعمال ہوئے ہیں اور اس سے مراد نبی اکرم صلی اللہ علیہ وسلم کی ازواج ہیں اور اس میں قصد بعض حالتوں کا کیا گیا ہے، اور یہ وہ حالت ہے کہ جب ان خواتین پر اس حالت کے دوران فرائض کو قائم کرنا لازم نہیں تھا جیسے نماز ادا کرنا اور اس جیسے دیگر امور۔ [صحیح ابن حبان/كتاب الحج/حدیث: 3706]

سیدنا ابوہریرہ رضی اللہ عنہ اللہ تعالیٰ کے اس فرمان ﴿بَرَاءَةٌ مِّنَ اللَّهِ وَرَسُولِهِ﴾ [سورة التوبة: 1] ”اللہ تعالیٰ اور اس کے رسول کی طرف سے اظہارِ لاتعلقی ہے“ کے بارے میں نقل کرتے ہیں، سیدنا ابوہریرہ رضی اللہ عنہ بیان کرتے ہیں: جب نبی اکرم صلی اللہ علیہ وسلم حنین سے واپس تشریف لائے، تو آپ نے ”جعرانہ“ سے عمرہ کیا تھا، پھر آپ نے اس حج کے موقع پر سیدنا ابوبکر رضی اللہ عنہ کو امیر مقرر کیا تھا۔ [صحیح ابن حبان/كتاب الحج/حدیث: 3707]

سیدنا عبداللہ بن عدی زہری رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو دیکھا، آپ اپنی سواری پر حزورہ کے مقام پر وقوف کیے ہوئے تھے اور یہ فرما رہے تھے: ”(اے مکہ) اللہ کی قسم! بے شک تو اللہ کی سرزمین میں سب سے بہتر (حصہ) ہے اور تو اللہ تعالیٰ کے نزدیک اللہ کی زمین میں سے سب سے پسندیدہ (جگہ ہے)، اگر مجھے تجھ سے نکالا نہ گیا ہوتا، تو میں تجھ سے نہ نکلتا۔“ [صحیح ابن حبان/كتاب الحج/حدیث: 3708]

سیدنا عبداللہ بن عباس رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”(اے مکہ) تو کتنا پاکیزہ شہر ہے؟ اور مجھے کتنا محبوب ہے؟ اگر میری قوم نے مجھے تجھ سے نکالا نہ ہوتا، تو میں تیرے علاوہ اور کہیں رہائش اختیار نہ کرتا۔“ [صحیح ابن حبان/كتاب الحج/حدیث: 3709]

سیدنا عبداللہ بن عمرو رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا، آپ نے اپنی پشت خانہ کعبہ کے ساتھ لگائی ہوئی تھی: ”حجر اسود اور مقام ابراہیم دونوں جنت کے یواقیت میں سے یاقوت ہیں، اگر اللہ تعالیٰ نے ان کے نور پر پردہ نہ ڈالا ہوتا، تو یہ مشرق اور مغرب کے درمیان کی جگہ کو روشن کر دیتے۔“ [صحیح ابن حبان/كتاب الحج/حدیث: 3710]

سیدنا عبداللہ بن عباس رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”(قیامت کے دن) اس حجر اسود کی ایک زبان اور دو ہونٹ ہوں گے اور یہ قیامت کے دن ہر اس شخص کے بارے میں حق کے ہمراہ گواہی دے گا، جس نے اس کا استلام کیا تھا۔“ [صحیح ابن حبان/كتاب الحج/حدیث: 3711]