سیدنا جابر رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم کے دست اقدس پر اسلام قبول کیا، اسے مدینہ منورہ میں بخار ہو گیا، وہ دیہاتی (مدینہ منورہ چھوڑ کر) چلا گیا، تو نبی اکرم صلی اللہ علیہ وسلم نے ارشاد فرمایا: ”مدینہ بھٹی کی مانند ہے، جو خرابی کو ختم کر دیتی ہے اور پاکیزہ چیز کو نکھار دیتی ہے۔“ [صحیح ابن حبان/كتاب الحج/حدیث: 3732]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”یہاں سے جو بھی شخص اس سے بے رغبت ہوتے ہوئے نکلے گا (نبی اکرم صلی اللہ علیہ وسلم کی مراد مدینہ منورہ تھی)، تو اللہ تعالیٰ اس کے بدلے میں مدینہ منورہ کو وہ شخص عطا کر دے گا جو اس (مدینہ منورہ) کے لیے اس (نکل جانے والے) شخص سے زیادہ بہتر ہو گا اور مدینہ لوگوں کے لیے زیادہ بہتر ہے، اگر انہیں اس بات کا علم ہو۔“ [صحیح ابن حبان/كتاب الحج/حدیث: 3733]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”لوگوں پر ایک زمانہ ایسا آئے گا کہ ایک شخص اپنے چچازاد اور اپنے قریبی رشتے داروں کو بلائے گا کہ: سہولت کی طرف آؤ، سہولت کی طرف آؤ! حالانکہ اگر انہیں علم ہو، تو مدینہ ان کے لیے زیادہ بہتر ہے۔ اس ذات کی قسم جس کے دستِ قدرت میں میری جان ہے! یہاں سے بے رغبتی اختیار کرتے ہوئے جو بھی شخص نکلے گا، تو اللہ تعالیٰ اس شخص سے زیادہ بہتر شخص (مدینہ منورہ کو) عطا کر دے گا۔ خبردار! مدینہ بھٹی کی مانند ہے، جو خرابی کو نکال دیتا ہے اور قیامت اس وقت تک قائم نہیں ہو گی جب تک مدینہ اپنے برے لوگوں کو یوں نہیں نکال دے گا جیسے بھٹی لوہے کے میل (یا زنگ) کو نکال دیتی ہے۔“ [صحیح ابن حبان/كتاب الحج/حدیث: 3734]

سیدنا جابر رضی اللہ عنہ بیان کرتے ہیں کہ ایک دیہاتی نے نبی اکرم صلی اللہ علیہ وسلم کے دست اقدس پر اسلام قبول کیا۔ اس دیہاتی کو مدینہ منورہ میں بخار ہو گیا۔ وہ (مدینہ منورہ چھوڑ) کر چلا گیا، تو نبی اکرم صلی اللہ علیہ وسلم نے ارشاد فرمایا: ”بے شک مدینہ بھٹی کی مانند ہے، جو خرابی کو ختم کر دیتی ہے اور اچھائی کو نکھار دیتی ہے۔“ [صحیح ابن حبان/كتاب الحج/حدیث: 3735]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”عنقریب ایسا وقت آئے گا کہ جب لوگ علم کے حصول کے لیے اونٹوں کے جگر پگھلا دیں گے (یعنی انتہائی زیادہ سفر کریں گے)، لیکن انہیں کوئی ایسا عالم نہیں ملے گا جو اہل مدینہ کے عالم سے بڑا عالم ہو۔“ ابوموسیٰ نامی راوی بیان کرتے ہیں کہ مجھے یہ بات پتا چلی ہے کہ ابن جریج رحمہ اللہ یہ فرماتے تھے: ہم یہ سمجھتے ہیں کہ اس سے مراد سیدنا امام مالک رحمہ اللہ ہیں۔ میں نے اس بات کا تذکرہ سفیان رحمہ اللہ سے کیا، تو انہوں نے فرمایا: عالم وہ شخص ہوتا ہے جو اللہ تعالیٰ سے ڈرتا ہو اور ہمیں ایسے کسی شخص کا علم نہیں ہے جو عُمَری سے زیادہ اللہ تعالیٰ سے ڈرتا ہو، ان کی مراد عبداللہ بن عبدالعزیز رحمہ اللہ تھے۔ [صحیح ابن حبان/كتاب الحج/حدیث: 3736]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص اہل مدینہ کے ساتھ برائی کا ارادہ کرے گا، اللہ تعالیٰ اسے (جہنم کی آگ میں) یوں گھول دے گا، جس طرح نمک پانی میں گھل جاتا ہے۔“ [صحیح ابن حبان/كتاب الحج/حدیث: 3737]

سیدنا جابر بن عبداللہ رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص اہل مدینہ کو خوف زدہ کرے گا، تو اللہ تعالیٰ اسے خوف زدہ کرے گا۔“ [صحیح ابن حبان/كتاب الحج/حدیث: 3738]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”یہاں کی سختیوں اور شدت پر جو بھی شخص صبر کرے گا، قیامت کے دن میں اس کا شفیع ہوں گا۔“ [صحیح ابن حبان/كتاب الحج/حدیث: 3739]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”مدینہ منورہ کی سختی اور مشکل پر جو شخص صبر کرے گا میں اس کا ”شفیع“ (راوی کو شک ہے یہ الفاظ ہیں) ”گواہ“ ہوں گا۔“ [صحیح ابن حبان/كتاب الحج/حدیث: 3740]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”تم میں سے جس شخص کے لیے یہ ممکن ہو کہ وہ مدینہ منورہ میں انتقال کرے اسے مدینہ میں انتقال کرنا چاہیے، کیونکہ جو شخص یہاں فوت ہوگا میں اس کی شفاعت کروں گا۔“ [صحیح ابن حبان/كتاب الحج/حدیث: 3741]