سیدنا جابر رضی اللہ عنہ بیان کرتے ہیں کہ فتحِ مکہ کے دن نبی اکرم صلی اللہ علیہ وسلم (مکہ میں) داخل ہوئے تو آپ صلی اللہ علیہ وسلم نے سیاہ عمامہ باندھا ہوا تھا۔ (امام ابن حبان رحمہ اللہ فرماتے ہیں:) سیدنا انس بن مالک رضی اللہ عنہ کے حوالے سے منقول روایت میں یہ بات مذکور ہے کہ جب نبی اکرم صلی اللہ علیہ وسلم مکہ میں داخل ہوئے تھے تو آپ صلی اللہ علیہ وسلم کے سرِ مبارک پر خود تھا، جبکہ سیدنا جابر رضی اللہ عنہ سے منقول روایت میں یہ بات مذکور ہے کہ نبی اکرم صلی اللہ علیہ وسلم جب مکہ میں داخل ہوئے تھے تو آپ صلی اللہ علیہ وسلم نے سیاہ عمامہ باندھا ہوا تھا، حالانکہ نبی اکرم صلی اللہ علیہ وسلم احرام کے بغیر مکہ میں صرف ایک مرتبہ داخل ہوئے تھے، یہ فتحِ مکہ کا دن تھا، تو اس بات کا امکان موجود ہے کہ اس دن میں نبی اکرم صلی اللہ علیہ وسلم نے اپنے سر پر خود بھی رکھا ہو اور اس پر سیاہ عمامہ بھی باندھا ہو، تو سیدنا جابر رضی اللہ عنہ نے عمامے کا ذکر کیا جسے انہوں نے دیکھا تھا اور سیدنا انس رضی اللہ عنہ نے خود کا ذکر کیا جو انہوں نے دیکھا تھا، تو اس طرح ان دونوں روایات میں کوئی تضاد اور اختلاف نہیں ہوگا۔ [صحیح ابن حبان/كتاب الحج/حدیث: 3722]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”مجھے ایک ایسی بستی کے بارے میں حکم دیا گیا ہے، جو تمام بستیوں کو اپنی لپیٹ میں لے گی۔ لوگ یہ کہتے ہیں: یہ یثرب ہے، حالانکہ یہ مدینہ ہے، یہ لوگوں کو یوں باہر نکال دے گا جیسے بھٹی لوہے کے زنگ کو ختم کر دیتی ہے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”مجھے ایک بستی کے بارے میں حکم دیا گیا ہے، جو دیگر بستیوں کو کھا جائے گی۔“ یہ مثال بیان کرنے کے الفاظ ہیں اور اس سے مراد یہ ہے: اسلام کا آغاز مدینہ منورہ سے ہو گا اور پھر وہ دیگر بستیوں پر غالب آ جائے گا اور پورے ملک پر غالب آ جائے گا، تو یہ اس طرح ہو گا جیسے مدینہ پورے ملک پر غالب آ گیا۔ اس سے یہ مراد نہیں ہے کہ مدینہ دیگر بستیوں کو کھا جائے گا۔ [صحیح ابن حبان/كتاب الحج/حدیث: 3723]

سیدہ عائشہ صدیقہ رضی اللہ عنہا بیان کرتی ہیں کہ جب نبی اکرم صلی اللہ علیہ وسلم مدینہ منورہ تشریف لائے، تو سیدنا ابوبکر اور سیدنا بلال رضی اللہ عنہما کو بخار ہو گیا۔ سیدہ عائشہ رضی اللہ عنہا کہتی ہیں کہ میں ان کے پاس آئی اور میں نے پوچھا: ابا جان! آپ کا کیا حال ہے؟ اے بلال! آپ کا کیا حال ہے؟ سیدہ عائشہ رضی اللہ عنہا بیان کرتی ہیں کہ جب سیدنا ابوبکر رضی اللہ عنہ کو بخار ہوا، تو وہ یہ شعر پڑھتے تھے: ہر شخص اپنے گھر والوں کے پاس صبح کرتا ہے، حالانکہ موت اس کے جوتے کے تسمے سے بھی زیادہ قریب ہوتی ہے۔ جب سیدنا بلال رضی اللہ عنہ (اللہ تعالیٰ ان پر رحم فرمائے) کی طبیعت کچھ بہتر ہوتی تھی، تو وہ بلند آواز میں یہ پڑھتے تھے: ہائے افسوس! کیا میں اس وادی میں کبھی رات بسر کر سکوں گا کہ میرے ارد گرد اذخر اور جلیل (مکہ کی مخصوص گھاس) ہو گی؟ کیا میں کبھی کسی دن مجنہ کے پانی تک پہنچ پاؤں گا؟ کیا شامہ اور طفیل (نامی پہاڑ) میرے سامنے آئیں گے؟ سیدہ عائشہ رضی اللہ عنہا بیان کرتی ہیں کہ میں نبی اکرم صلی اللہ علیہ وسلم کی خدمت میں حاضر ہوئی اور میں نے آپ کو اس بارے میں بتایا، تو آپ صلی اللہ علیہ وسلم نے دعا فرمائی: «اللَّهُمَّ حَبِّبْ إِلَيْنَا الْمَدِينَةَ كَحُبِّنَا مَكَّةَ أَوْ أَشَدَّ، وَصَحِّحْهَا، وَبَارِكْ لَنَا فِي صَاعِهَا وَمُدِّهَا، وَانْقُلْ حُمَّاهَا فَاجْعَلْهَا بِالْجُحْفَةِ» ”اے اللہ! تو مدینہ کو بھی ہمارے نزدیک اسی طرح محبوب کر دے جس طرح ہمیں مکہ سے محبت ہے بلکہ (مدینہ کو) زیادہ محبوب کر دے اور اسے ہمارے لیے صحت افزاء بنا دے اور ہمارے لیے اس کے صاع اور اس کے مد میں برکت دے دے اور یہاں کے بخار کو یہاں سے منتقل کر دے اسے حجفہ منتقل کر دے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کے بخار کو حجفہ کی طرف منتقل کرنے کی دعا فرمانے کی علت یہ ہے کہ ان دنوں حجفہ یہودیوں کی بستی تھی اور وہاں کوئی مسلمان نہیں تھا، اس لیے نبی اکرم صلی اللہ علیہ وسلم نے یہ بات ارشاد فرمائی: ”کہ اس کے بخار کو حجفہ کی طرف منتقل کر دے۔“ [صحیح ابن حبان/كتاب الحج/حدیث: 3724]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم نے احد پہاڑ کی طرف دیکھ کر ارشاد فرمایا: «أُحُدٌ جَبَلٌ يُحِبُّنَا وَنُحِبُّهُ» ”بے شک احد پہاڑ ہم سے محبت کرتا ہے اور ہم اس سے محبت کرتے ہیں۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”ایک پہاڑ جو ہم سے محبت کرتا ہے اور ہم اس سے محبت کرتے ہیں“ اس سے مراد پہاڑ پر رہنے والے لوگ ہیں۔ اس کی مثال اللہ تعالیٰ کا یہ فرمان ﴿وَأُشْرِبُوا فِي قُلُوبِهِمُ الْعِجْلَ بِكُفْرِهِمْ﴾ [سورة البقرة: 93] ہے: ”تو ان کے کفر کی وجہ سے ان کے دلوں میں بچھڑے کو ڈال دیا گیا“ اس سے مراد بچھڑے کی محبت ہے اور اس کی مثال اللہ تعالیٰ کا یہ فرمان ﴿وَاسْأَلِ الْقَرْيَةَ﴾ [سورة يوسف: 82] بھی ہے: ”تم بستی سے دریافت کرو“ اس سے مراد بستی میں رہنے والے لوگ ہیں۔ اور (حدیث میں مذکور الفاظ) سے مراد اہل مدینہ ہیں، تو یہاں نبی اکرم صلی اللہ علیہ وسلم نے حدیث کے الفاظ کو یوں استعمال کیا ہے کہ وہ پہاڑ جو احد ہے اس سے مقصود مدینہ منورہ لیا ہے، تو یہ ان دونوں کے درمیان مقاربت اور مجاورت کے طور پر ہوگا۔ [صحیح ابن حبان/كتاب الحج/حدیث: 3725]

سیدنا جابر بن سمرہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو سنا، آپ نے مدینہ منورہ کو «طَابَةَ» ”طابہ“ کا نام دیا ہے۔ [صحیح ابن حبان/كتاب الحج/حدیث: 3726]

سیدنا عبداللہ بن عمر رضی اللہ عنہما سے روایت ہے کہ نبی اکرم صلی اللہ علیہ وسلم نے ارشاد فرمایا: ”بے شک ایمان مدینہ منورہ کی طرف یوں پلٹ آئے گا، جس طرح سانپ اپنے بل کی طرف پلٹتا ہے۔“ [صحیح ابن حبان/كتاب الحج/حدیث: 3727]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”بے شک ایمان مدینہ منورہ کی طرف یوں پلٹ آئے گا جس طرح سانپ اپنے بل کی طرف پلٹتا ہے“۔ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”ایمان مدینہ منورہ کی طرف سمٹ آئے گا“ اس سے مراد اہل ایمان ہیں۔ اس کی وجہ یہ ہے: مدینہ منورہ ایک خشک علاقہ ہے جہاں خشک زمین اور ریت کے ٹیلے زیادہ ہیں، یہاں اللہ تعالیٰ نے وہ چیزیں نہیں رکھی ہیں جو آنکھوں اور جان کو لذیذ اور پاکیزہ محسوس ہوتی ہیں، جو شخص اللہ تعالیٰ اور آخرت کے گھر کی طلب کا ارادہ کرتا ہے، اس کے لیے اللہ تعالیٰ نے یہاں خوراک رکھی ہے۔ اس لیے مدینہ منورہ کی طرف صرف وہی شخص مائل ہو سکتا ہے، جو اس فنا ہونے والی اور زائل ہو جانے والی دنیا سے لاتعلق ہو اور اس کی طرف وہی شخص راغب ہو سکتا ہے، جو مکمل طور پر ہمیشہ رہنے والی آخرت کی طرف متوجہ ہو۔ [صحیح ابن حبان/كتاب الحج/حدیث: 3728]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”بے شک ایمان مدینہ منورہ کی طرف یوں پلٹ آئے گا، جس طرح سانپ اپنے بل کی طرف جاتا ہے۔“ [صحیح ابن حبان/كتاب الحج/حدیث: 3729]

سیدہ فاطمہ بنت قیس رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا: ”اے مسلمانوں کے گروہ! تم لوگوں کو یہ خوشخبری ہے کہ دجال اس میں داخل نہیں ہو گا“ (راوی کہتے ہیں:) نبی اکرم صلی اللہ علیہ وسلم کی مراد مدینہ منورہ تھا۔ [صحیح ابن حبان/كتاب الحج/حدیث: 3730]

سیدنا ابوبکرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”مدینہ منورہ میں دجال کا رعب داخل نہیں ہو سکے گا، اس کے سات دروازے ہوں گے جن میں سے ہر دروازے پر دو فرشتے تعینات ہوں گے۔“ [صحیح ابن حبان/كتاب الحج/حدیث: 3731]