سیدنا عبداللہ بن عباس رضی اللہ عنہما روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”اللہ تعالیٰ قیامت کے دن اس حجر اسود کو ضرور ایسی حالت میں اٹھائے گا کہ اس کی دو آنکھیں ہوں گی، جن کی مدد سے وہ دیکھتا ہوگا اور ایک زبان ہوگی، جس کی مدد سے وہ کلام کرتا ہوگا اور یہ ہر اس شخص کے بارے میں حق کے ہمراہ گواہی دے گا، جس نے اس کا استلام کیا تھا۔“ [صحیح ابن حبان/كتاب الحج/حدیث: 3712]

سیدنا عبداللہ بن عباس رضی اللہ عنہما، سیدنا ابی بن کعب رضی اللہ عنہ کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”جب جبرائیل علیہ السلام نے زمزم کے مقام پر اپنی ایڑی ماری، تو سیدنا اسماعیل علیہ السلام کی والدہ نے مٹی کو اکٹھا کرنا شروع کیا (تاکہ پانی کے گرد آڑ بنا لیں)۔“ نبی اکرم صلی اللہ علیہ وسلم فرماتے ہیں: «يَرْحَمُ اللَّهُ أُمَّ إِسْمَاعِيلَ» ”اللہ تعالیٰ ہاجرہ رضی اللہ عنہا پر رحم فرمائے، اگر وہ اسے ایسے ہی رہنے دیتیں، تو یہ ایک بہتا ہوا بڑا چشمہ ہوتا۔“ [صحیح ابن حبان/كتاب الحج/حدیث: 3713]

سیدنا جابر بن عبداللہ رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”کسی بھی شخص کے لیے یہ بات جائز نہیں ہے کہ وہ مکہ میں ہتھیار اٹھائے۔“ [صحیح ابن حبان/كتاب الحج/حدیث: 3714]

سیدنا ابوہریرہ رضی اللہ عنہ بیان کرتے ہیں کہ جب اللہ تعالیٰ نے اپنے رسول کے لیے مکہ کو فتح کر دیا، تو ہذیل نے بنولیث سے تعلق رکھنے والے ایک شخص کو اپنے ایک مقتول کے عوض میں قتل کر دیا، یہ زمانہ جاہلیت کا معاملہ تھا، اس بات کی اطلاع نبی اکرم صلی اللہ علیہ وسلم کو ملی۔ آپ کھڑے ہوئے اور آپ نے ارشاد فرمایا: ”بے شک اللہ تعالیٰ نے ہاتھیوں کو مکہ تک نہیں پہنچنے دیا، لیکن اس نے اپنے رسول اور اہل ایمان کو اس پر غلبہ عطا کیا، مجھ سے پہلے کسی بھی شخص کے لیے یہ حلال نہیں ہوا تھا اور میرے بعد بھی یہ کسی کے لیے حلال نہیں ہو گا، میرے لیے بھی دن کے ایک مخصوص حصے میں اسے حلال قرار دیا گیا اور یہ اب اس گھڑی کے بعد قابل احترام ہے، یہاں کے درخت کو کاٹا نہیں جائے گا، یہاں کے کانٹے کو توڑا نہیں جائے گا، یہاں کی گری ہوئی چیز کو اٹھایا نہیں جائے گا، البتہ اعلان کرنے کے لیے اٹھایا جا سکتا ہے، جس شخص کا کوئی عزیز قتل ہوا ہو، اسے دو باتوں میں سے ایک بات کا اختیار ہو گا، یا تو وہ (قاتل کو) قتل کر دے یا پھر فدیہ وصول کر لے۔“ (راوی بیان کرتے ہیں:) یمن سے تعلق رکھنے والے ایک صاحب کھڑے ہوئے جن کا نام ابوشاہ تھا۔ انہوں نے عرض کی: یا رسول اللہ! آپ یہ مجھے لکھوا دیں۔ نبی اکرم صلی اللہ علیہ وسلم نے فرمایا: ”ابوشاہ کو لکھ کر دے دو۔“ پھر سیدنا عباس رضی اللہ عنہ کھڑے ہوئے، انہوں نے عرض کی: یا رسول اللہ صلی اللہ علیہ وسلم ! صرف «الْإِذْخِرُ» ”اذخر“ (کاٹنے کی اجازت دیں)، کیونکہ ہم اسے قبرستان میں استعمال کرتے ہیں اور گھروں میں بھی استعمال کرتے ہیں۔ نبی اکرم صلی اللہ علیہ وسلم نے فرمایا: ” «الْإِذْخِرُ» ”اذخر“ (کا حکم مختلف ہے یعنی اسے کاٹنے کی اجازت ہے)۔“ [صحیح ابن حبان/كتاب الحج/حدیث: 3715]

سیدنا علی رضی اللہ عنہ بیان کرتے ہیں کہ ہمارے پاس کوئی ایسی کتاب نہیں ہے جس کو ہم پڑھتے ہوں، صرف اللہ کی کتاب ہے یا ایک صحیفہ ہے جو میری تلوار کی میان میں ہے، پھر انہوں نے اس صحیفے کو ہمارے سامنے پڑھا، اس میں اونٹوں کی دیت کے حوالے سے اور زخموں کی دیت کے حوالے سے کچھ احکام تھے اور اس میں ایک یہ بات موجود تھی: ”جو (آزاد شدہ غلام) اپنے آقا کی بجائے کسی اور کی طرف خود کو منسوب کرے، اس پر اللہ تعالیٰ، اس کے فرشتوں اور تمام لوگوں کی لعنت ہو، اللہ تعالیٰ قیامت کے دن ایسے شخص کی کوئی بھی فرض یا نفل عبادت قبول نہیں کرے گا۔ تمام مسلمانوں کی دی ہوئی پناہ ایک جیسی حیثیت رکھتی ہے، ان کا عام فرد بھی اسے پورا کرنے کی کوشش کرے گا اور جو کوئی شخص کسی مسلمان کو رسوا کرے گا، تو اس پر اللہ تعالیٰ، فرشتوں اور تمام لوگوں کی لعنت ہو گی، ایسے شخص کی قیامت کے دن کوئی فرض یا نفل عبادت قبول نہیں ہو گی اور مدینہ منورہ اپنے دونوں کناروں کے درمیان پورے کا پورا قابلِ احترام ہے، جو شخص یہاں بدعت ایجاد کرے یا بدعتی کو پناہ دے، تو اس پر اللہ تعالیٰ، فرشتوں اور تمام لوگوں کی لعنت ہو، ایسے شخص سے قیامت کے دن کوئی فرض یا نفل عبادت قبول نہیں کی جائے گی۔“ [صحیح ابن حبان/كتاب الحج/حدیث: 3716]

سیدنا علی رضی اللہ عنہ بیان کرتے ہیں: ہم نے نبی اکرم صلی اللہ علیہ وسلم کے حوالے سے صرف قرآن کو نوٹ کیا ہے یا وہ احکام ہیں جو صحیفے میں ہیں۔ انہوں نے بتایا کہ نبی اکرم صلی اللہ علیہ وسلم نے یہ بات ارشاد فرمائی ہے: ”مدینہ عیر سے ثور تک حرم ہے، جو شخص یہاں کوئی بدعت ایجاد کرے یا بدعتی کو پناہ دے، تو اس پر اللہ تعالیٰ، فرشتوں اور تمام لوگوں کی لعنت ہو، ایسے شخص کی کوئی فرض یا نفل عبادت قبول نہیں ہو گی۔ مسلمانوں کی دی ہوئی پناہ یکساں حیثیت رکھتی ہے، ان کا عام فرد بھی اسے پوری کرنے کی کوشش کرے گا، جو شخص کسی مسلمان کو رسوا کرے گا، اس پر اللہ تعالیٰ، فرشتوں اور تمام لوگوں کی لعنت ہو گی، ایسے شخص کی کوئی فرض یا نفل عبادت قبول نہیں ہو گی اور جو شخص اپنے آقا کی بجائے خود کو کسی اور کی طرف منسوب کرے، اس پر اللہ تعالیٰ، فرشتوں اور تمام لوگوں کی لعنت ہو گی۔“ [صحیح ابن حبان/كتاب الحج/حدیث: 3717]

سیدنا مطیع رضی اللہ عنہ بیان کرتے ہیں: میں نے فتح مکہ کے دن نبی اکرم صلی اللہ علیہ وسلم کو یہ بات ارشاد فرماتے ہوئے سنا: ”آج کے بعد قیامت کے دن تک کسی بھی قریشی کو باندھ کر قتل نہیں کیا جائے گا۔“ اس دن مسلمانوں کو کفارِ مکہ سے صرف سیدنا مطیع رضی اللہ عنہ ہاتھ لگے تھے، ان کا نام عاص تھا، تو نبی اکرم صلی اللہ علیہ وسلم نے ان کا نام مطیع رکھا۔ [صحیح ابن حبان/كتاب الحج/حدیث: 3718]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم جب مکہ میں داخل ہوئے تو آپ کے سر پر خود تھا، تو آپ نے اسے اتارا تو آپ کی خدمت میں عرض کی گئی کہ ابن خطل کعبہ کے پردوں میں چھپا ہوا ہے، تو نبی اکرم صلی اللہ علیہ وسلم نے فرمایا: ”اسے قتل کر دو۔“ [صحیح ابن حبان/كتاب الحج/حدیث: 3719]

سیدنا عبداللہ بن عباس رضی اللہ عنہما بیان کرتے ہیں کہ فتح مکہ کے دن نبی اکرم صلی اللہ علیہ وسلم نے ارشاد فرمایا: ”یہ شہر قابل احترام ہے، اللہ تعالیٰ نے اسے قیامت کے دن تک کے لیے قابل احترام قرار دیا ہے، یہاں کا شکار بھگایا نہیں جائے گا، یہاں کا کانٹا توڑا نہیں جائے گا اور یہاں کی گری ہوئی چیز کو اٹھایا نہیں جائے گا، البتہ اعلان کرنے کے لیے اٹھایا جا سکتا ہے اور یہاں کے پودوں کو اکھیڑا نہیں جائے گا۔“ سیدنا عباس رضی اللہ عنہ نے عرض کی: اذخر کی اجازت دے دیں، وہ گھروں میں استعمال ہوتی ہے، تو نبی اکرم صلی اللہ علیہ وسلم نے ارشاد فرمایا: ”اذخر کی اجازت ہے، اب ہجرت باقی نہیں رہی، البتہ جہاد اور نیت باقی ہے اور جب تم سے (جہاد کے لیے) نکلنے کے لیے کہا جائے، تو تم نکل کھڑے ہو۔“ [صحیح ابن حبان/كتاب الحج/حدیث: 3720]

سیدنا انس رضی اللہ عنہ بیان کرتے ہیں کہ فتح مکہ کے موقع پر نبی اکرم صلی اللہ علیہ وسلم مکہ میں داخل ہوئے، آپ کے سر مبارک پر خود تھا، لوگوں نے عرض کی: یا رسول اللہ صلی اللہ علیہ وسلم ! ابن خطل کعبہ کے پردوں میں چھپا ہوا ہے، نبی اکرم صلی اللہ علیہ وسلم نے ارشاد فرمایا: ”اسے قتل کر دو“، تو اسے قتل کر دیا گیا۔ [صحیح ابن حبان/كتاب الحج/حدیث: 3721]