سیدہ عائشہ صدیقہ رضی اللہ عنہا بیان کرتی ہیں: ایک انصاری لڑکی میری زیر پرورش تھی میں نے اس کی شادی کروا دی۔ سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم اس کی شادی کے دن میرے ہاں تشریف لائے آپ صلی اللہ علیہ وسلم کو گانے وغیرہ کی کوئی آواز سنائی نہیں دی، تو آپ صلی اللہ علیہ وسلم نے فرمایا: ”اے عائشہ! کیا تم نے اس کی شادی کے لیے گانا وغیرہ نہیں گایا؟ کیا تم لوگ اس پر گانا نہیں گاؤ گی؟“ پھر آپ صلی اللہ علیہ وسلم نے ارشاد فرمایا: ”انصار گانے کو پسند کرتے ہیں۔“ [صحیح ابن حبان/كتاب الحظر والإباحة/حدیث: 5875]

سیدہ عائشہ صدیقہ رضی اللہ عنہا بیان کرتی ہیں کہ سیدنا ابوبکر رضی اللہ عنہ (ان کے) ہاں آئے، اس وقت ان کے پاس دو لڑکیاں بیٹھی ہوئی دف بجا کر گانا گا رہی تھیں۔ نبی اکرم صلی اللہ علیہ وسلم اپنے چہرے پر کپڑا ڈال کر آرام فرما رہے تھے۔ سیدنا ابوبکر رضی اللہ عنہ نے ان دونوں لڑکیوں کو ڈانٹا، تو نبی اکرم صلی اللہ علیہ وسلم نے اپنا کپڑا ہٹایا اور فرمایا: ”اے ابوبکر! انہیں کرنے دو کیونکہ یہ عید کے دن ہیں۔“ سیدہ عائشہ رضی اللہ عنہا بیان کرتی ہیں کہ جب حبشیوں کا وفد نبی اکرم صلی اللہ علیہ وسلم کی خدمت میں حاضر ہوا تو وہ لوگ مسجد میں کھڑے ہو کر کرتب دکھانے لگے، میں نے نبی اکرم صلی اللہ علیہ وسلم کو دیکھا کہ آپ نے مجھے اپنی چادر کی اوٹ میں کر لیا، میں ان لوگوں کو دیکھتی رہی، وہ لوگ مسجد میں کرتب دکھا رہے تھے یہاں تک کہ میں ہی اکتا گئی، تم لوگ خود اندازہ کر لو کہ ایک ایسی لڑکی جس کی عمر کم ہو اسے اس طرح کے کھیل کود دیکھنے کا کتنا شوق ہو گا۔ زہری رحمہ اللہ بیان کرتے ہیں کہ سعید بن مسیب رحمہ اللہ نے مجھے یہ بات بتائی ہے، سیدنا ابوہریرہ رضی اللہ عنہ نے یہ بات بیان کی ہے کہ سیدنا عمر رضی اللہ عنہ (مسجد میں) داخل ہوئے، اس وقت حبشی لوگ مسجد میں کرتب دکھا رہے تھے۔ سیدنا عمر رضی اللہ عنہ نے انہیں ڈانٹا تو نبی اکرم صلی اللہ علیہ وسلم نے فرمایا: ”اے عمر! انہیں کرنے دو کیونکہ یہ بنو ارفدہ ہیں۔“ [صحیح ابن حبان/كتاب الحظر والإباحة/حدیث: 5876]

سیدہ عائشہ صدیقہ رضی اللہ عنہا بیان کرتی ہیں: سیدنا ابوبکر رضی اللہ عنہ میرے ہاں تشریف لائے، اس وقت میرے پاس انصار کی دو لڑکیاں بیٹھی ہوئی گانا گا رہی تھیں جو جنگ بعاث کے موقع پر انصار کے طرز عمل کے بارے میں تھا، سیدنا ابوبکر رضی اللہ عنہ نے فرمایا: نبی اکرم صلی اللہ علیہ وسلم کے گھر میں شیطان کے آلات موجود ہیں؟ یہ عید کے دنوں کی بات ہے، تو نبی اکرم صلی اللہ علیہ وسلم نے فرمایا: ”اے ابوبکر! ہر قوم کی ایک مخصوص عید ہوتی ہے اور یہ ہماری عید ہے۔“ [صحیح ابن حبان/كتاب الحظر والإباحة/حدیث: 5877]

سیدہ ربیع بنت معوذ رضی اللہ عنہا بیان کرتی ہیں کہ نبی اکرم صلی اللہ علیہ وسلم تشریف لائے، آپ صلی اللہ علیہ وسلم میری شادی کی صبح ہمارے ہاں آئے تو میرے بستر پر تشریف فرما ہوئے جس طرح تم میرے پاس بیٹھے ہوئے ہو، تو انصار کی کچھ لڑکیاں دف بجا رہی تھیں اور غزوہ بدر کے موقع پر شہید ہونے والے اپنے آباؤ اجداد کی تعریفیں کر رہی تھیں، ان میں سے ایک لڑکی نے یہ مصرع بھی پڑھ دیا: ”ہمارے درمیان ایک ایسا نبی موجود ہے جو کل جو کچھ ہونا ہے اس کے بارے میں بھی جانتا ہے۔“ تو نبی اکرم صلی اللہ علیہ وسلم نے ارشاد فرمایا: ”اسے چھوڑ دو اور وہی گاؤ جو پہلے گا رہی تھیں۔“ [صحیح ابن حبان/كتاب الحظر والإباحة/حدیث: 5878]