سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم میرے ہاں تشریف لاتے تھے اور میں اس وقت گڑیا کے ساتھ کھیل رہی ہوتی تھی۔ [صحیح ابن حبان/كتاب الحظر والإباحة/حدیث: 5865]

سیدہ عائشہ صدیقہ رضی اللہ عنہا بیان کرتی ہیں: میں گڑیوں کے ساتھ کھیل رہی ہوتی تھی، میری سہیلیاں آ جاتی تھیں اور میرے ساتھ کھیلتی تھیں، جب وہ نبی اکرم صلی اللہ علیہ وسلم کو دیکھتی تھیں تو اٹھ کر چلی جاتی تھیں، نبی اکرم صلی اللہ علیہ وسلم انہیں میرے پاس بھیج دیتے تھے تو وہ میرے ساتھ کھیلا کرتی تھیں۔ [صحیح ابن حبان/كتاب الحظر والإباحة/حدیث: 5866]

سیدنا ابوہریرہ رضی اللہ عنہ بیان کرتے ہیں کہ ایک مرتبہ کچھ حبشی اپنے جنگی ہتھیاروں کے ساتھ کرتب دکھا رہے تھے، اسی دوران سیدنا عمر رضی اللہ عنہ آ گئے، انہوں نے ان کی طرف کنکریاں پھینکیں، تو نبی اکرم صلی اللہ علیہ وسلم نے ارشاد فرمایا: ”اے عمر! انہیں کرنے دو۔“ [صحیح ابن حبان/كتاب الحظر والإباحة/حدیث: 5867]

سیدہ عائشہ صدیقہ رضی اللہ عنہا بیان کرتی ہیں کہ ایک مرتبہ سیدنا ابوبکر رضی اللہ عنہ ان کے ہاں آئے، اس وقت ان کے پاس دو لڑکیاں بیٹھی ہوئی تھیں جو گانا گا رہی تھیں، یہ عید کے موقع کی بات ہے۔ نبی اکرم صلی اللہ علیہ وسلم نے کپڑے کے ذریعے چہرہ ڈھانپا ہوا تھا، سیدنا ابوبکر رضی اللہ عنہ نے ان لڑکیوں کو ڈانٹا تو نبی اکرم صلی اللہ علیہ وسلم نے اپنے چہرے سے کپڑا ہٹایا اور فرمایا: ”اے ابوبکر! ان دونوں کو گانے دو کیونکہ یہ عید کے دن ہیں۔“ سیدہ عائشہ رضی اللہ عنہا بیان کرتی ہیں کہ مجھے نبی اکرم صلی اللہ علیہ وسلم کے بارے میں یہ بات یاد ہے کہ آپ صلی اللہ علیہ وسلم نے اپنی چادر کے ذریعے مجھے اوٹ میں لیا ہوا تھا اور میں ان حبشیوں کو دیکھ رہی تھی جو کرتب دکھا رہے تھے، میں اس وقت کم سن لڑکی تھی، تو تم خود اندازہ کر لو کہ ایک کم سن لڑکی جس کی عمر بھی زیادہ نہ ہو (اسے اس طرح کے کرتب دیکھنے میں کتنی دلچسپی ہو گی)۔ [صحیح ابن حبان/كتاب الحظر والإباحة/حدیث: 5868]

سیدہ عائشہ صدیقہ رضی اللہ عنہا بیان کرتی ہیں کہ سیدنا ابوبکر رضی اللہ عنہ ایامِ تشریق میں ان کے ہاں آئے، ان کے پاس دو لڑکیاں بیٹھی ہوئی گا رہی تھیں اور دف بجا رہی تھیں، سیدنا ابوبکر رضی اللہ عنہ نے ان دونوں کو ڈانٹا اور ان دونوں کی دف کو پھاڑ دیا تو نبی اکرم صلی اللہ علیہ وسلم نے ارشاد فرمایا: ”انہیں کرنے دو کیونکہ یہ عید کے دن ہیں۔“ [صحیح ابن حبان/كتاب الحظر والإباحة/حدیث: 5869]

سیدنا انس بن مالک رضی اللہ عنہ بیان کرتے ہیں کہ حبشی لوگ نبی اکرم صلی اللہ علیہ وسلم کے سامنے کرتب دکھایا کرتے تھے اور وہ ایسی باتیں کرتے تھے جو سمجھ نہیں آتی تھیں، نبی اکرم صلی اللہ علیہ وسلم نے دریافت فرمایا: ”یہ کیا کہہ رہے ہیں؟“ تو لوگوں نے بتایا کہ یہ کہہ رہے ہیں: «مُحَمَّدٌ عَبْدٌ صَالِحٌ» ”سیدنا محمد صلی اللہ علیہ وسلم ایک نیک بندے ہیں۔“ [صحیح ابن حبان/كتاب الحظر والإباحة/حدیث: 5870]

سیدہ عائشہ صدیقہ رضی اللہ عنہا بیان کرتی ہیں کہ سیدنا ابوبکر رضی اللہ عنہ عید کے دنوں میں ان کے ہاں آئے، تو ان کے پاس دو لڑکیاں بیٹھی ہوئی گانا گا رہی تھیں اور دف بجا رہی تھیں۔ نبی اکرم صلی اللہ علیہ وسلم چہرے پر کپڑا لے کر لیٹے ہوئے تھے۔ سیدنا ابوبکر رضی اللہ عنہ نے ان دونوں لڑکیوں کو ڈانٹا تو نبی اکرم صلی اللہ علیہ وسلم نے اپنے چہرے سے کپڑا ہٹایا اور ارشاد فرمایا: ”اے ابوبکر! انہیں کرنے دو کیونکہ یہ عید کے دن ہیں“ (سیدہ عائشہ رضی اللہ عنہا بیان کرتی ہیں) یہ منیٰ کے مخصوص دن تھے (یعنی بڑی عید کا موقع تھا)۔ سیدہ عائشہ رضی اللہ عنہا بیان کرتی ہیں: مجھے نبی اکرم صلی اللہ علیہ وسلم کے بارے میں یہ بات یاد ہے کہ آپ صلی اللہ علیہ وسلم نے اپنی چادر کے ذریعے مجھے اوٹ میں لیا ہوا تھا اور میں حبشیوں کو دیکھ رہی تھی جو مسجد میں کرتب دکھا رہے تھے، میں اس وقت کم سن لڑکی تھی۔ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم سے منقول اباحات کے بارے میں روایات کا یہ آخری حصہ ہے جسے ہم نے مختلف فصلوں میں املا کروایا ہے، اس قسم سے تعلق رکھنے والی کچھ احادیث باقی رہ گئی ہیں، جنہیں ہم دیگر اقسام میں ذکر کر دیں گے جس طرح ہم نے انہیں اس قسم میں ذکر کیا ہے جو اس بنیادی طریقہ کار کے مطابق ہے جس کے مطابق ہم نے کتاب ترتیب دی ہے۔ اس قسم کے بعد ہم سنن کی پانچویں قسم املا کروائیں گے اور یہ نبی اکرم صلی اللہ علیہ وسلم کے وہ افعال ہیں جو ان کی فصول اور انواع کے ہمراہ املا کروائے جائیں گے، اگر اللہ تعالیٰ نے یہ فیصلہ کیا اور اس نے یہ چاہا۔ اللہ تعالیٰ ہمیں ان لوگوں میں شامل کرے جن کی رہنمائی سیدھے راستے کی طرف کی گئی اور درست راستے کی توفیق دی گئی اور جنہوں نے سنن اور اخبار کو جمع کرنے کا ارادہ کیا اور مستند روایات کا فہم حاصل کیا اور اس چیز کو ترجیح دی جو اعمال انہیں باری تعالیٰ کی بارگاہ میں مقرب کر سکتے ہیں اور اس چیز پر ترجیح دی جو اصول میں اس سے دور کرتے ہیں، بیشک وہ (یعنی اللہ تعالیٰ) سب سے بہتر مسؤول ہے۔ [صحیح ابن حبان/كتاب الحظر والإباحة/حدیث: 5871]

سیدنا ابوموسیٰ اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص پانسہ کھیلتا ہے وہ اللہ اور اس کے رسول کی نافرمانی کرتا ہے۔“ [صحیح ابن حبان/كتاب الحظر والإباحة/حدیث: 5872]

سلیمان بن بریدہ اپنے والد رضی اللہ عنہ کے حوالے سے نبی صلی اللہ علیہ وسلم کا یہ فرمان نقل کرتے ہیں: ”جو شخص پانسہ کھیلتا ہے گویا کہ وہ اپنا ہاتھ خنزیر کے گوشت اور خون میں لت پت کر لیتا ہے۔“ [صحیح ابن حبان/كتاب الحظر والإباحة/حدیث: 5873]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک شخص کو کبوتر کے پیچھے دوڑتے ہوئے دیکھا تو فرمایا: ”ایک شیطان دوسرے شیطان کے پیچھے جا رہا ہے۔“ (امام ابن حبان رحمہ اللہ فرماتے ہیں:) کبوتر کے ساتھ کھیلنے والے شخص کا فعل آگے بڑھ کر ایسی صورت حال لے آتا ہے جو اللہ تعالیٰ کو ناپسند ہو، تو جو شخص کسی ایسی چیز کا مرتکب ہوتا ہے جو اللہ تعالیٰ کو ناپسند ہو وہ شخص گنہگار ہوتا ہے اور گنہگار شخص کو شیطان کہنا جائز ہے اگرچہ اس کا تعلق اولادِ آدم سے ہو، اللہ تعالیٰ نے فرمایا ہے: ﴿شَيَاطِينَ الْإِنسِ وَالْجِنِّ﴾ [سورة الأنعام: 112] ”انسانوں اور جنات میں سے شیاطین۔“ تو اللہ تعالیٰ نے ان دونوں طبقوں میں سے گنہگار کے لیے لفظ شیطان استعمال کیا ہے، اسی طرح نبی اکرم صلی اللہ علیہ وسلم نے کبوتر کے لیے لفظ شیطان مجاورت کے طور پر استعمال کیا ہے کیونکہ یہاں گنہگار شخص کا فعل اسی کبوتر سے متعلق ہے۔ [صحیح ابن حبان/كتاب الحظر والإباحة/حدیث: 5874]