سیدنا ابوہریرہ رضی اللہ عنہ بیان کرتے ہیں کہ ان تک نبی اکرم صلی اللہ علیہ وسلم کا یہ فرمان پہنچا ہے: ”اللہ تعالیٰ کی بارگاہ میں سب سے بدتر نام یہ ہے کہ کسی شخص کو بادشاہوں کا بادشاہ کہا جائے (راوی کہتے ہیں:) یعنی شہنشاہ کہا جائے۔“ [صحیح ابن حبان/كتاب الحظر والإباحة/حدیث: 5835]

سیدنا سمرہ بن جندب رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں اس بات سے منع کیا ہے کہ ”ہم اپنے غلاموں کے ان چار ناموں میں سے کوئی نام رکھیں: «أَفْلَحُ» ”افلح“، «رَبَاحٌ» ”رباح“، «يَسَارٌ» ”یسار“ اور «نَافِعٌ» ”نافع“۔“ [صحیح ابن حبان/كتاب الحظر والإباحة/حدیث: 5836]

سیدنا سمرہ بن جندب رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”تم اپنے غلام کا نام «أَفْلَحَ» ”افلح“، «نَجِيحًا» ”نجیح“، «رَبَاحًا» ”رباح“ اور «يَسَارًا» ”یسار“ نہ رکھو، تم اس بات کا جائزہ لو کہ تم اس پر کوئی اضافہ نہ کرو۔“ [صحیح ابن حبان/كتاب الحظر والإباحة/حدیث: 5837]

سیدنا سمرہ بن جندب رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”تم اپنے غلام کا نام رباح یا نجیح یا یسار یا افلح نہ رکھو۔“ (شاید راوی کہتے ہیں:) یہ چار نام ہیں، تم ان میں کوئی اضافہ نہ کرنا۔ شیخ ابو حاتم رحمہ اللہ بیان کرتے ہیں: اس بات کا احتمال موجود ہے کہ اس روایت میں جو چار نام ذکر کیے گئے ہیں، غلاموں کے وہ نام رکھنے کی اس ممانعت کی علت یہ ہو کہ زمانہ شرک کے قریب تھا، وہ اپنے غلاموں کے یہ نام رکھا کرتے تھے اور وہ یہ سمجھتے تھے کہ «رَبَاح» نام کے ساتھ فائدہ ہوتا ہے، «نَجَاح» نام کے ساتھ کامیابی ملتی ہے، «يَسَار» نام کے ساتھ خوشحالی ملتی ہے اور «فَلَاح» کے نام کے ساتھ کامیابی ملتی ہے، یہ اللہ تعالیٰ کی طرف سے نہیں ہوتی، تو اسی وجہ سے نبی اکرم صلی اللہ علیہ وسلم نے لوگوں کو یہ نام رکھنے سے منع کر دیا۔ [صحیح ابن حبان/كتاب الحظر والإباحة/حدیث: 5838]

سیدنا جابر بن عبداللہ رضی اللہ عنہما بیان کرتے ہیں کہ انہوں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اگر اللہ نے چاہا اور میں زندہ رہ گیا، تو میں اس بات سے منع کر دوں گا کہ کسی کا نام برکت یا نافع یا افلح رکھا جائے۔“ (راوی بیان کرتے ہیں) مجھے نہیں معلوم کہ روایت کے الفاظ میں لفظ افلح ہے یا نہیں ہے، پھر نبی اکرم صلی اللہ علیہ وسلم کا وصال ہو گیا، تاہم آپ صلی اللہ علیہ وسلم نے اس سے منع نہیں کیا تھا، اس کے بعد سیدنا عمر رضی اللہ عنہ نے اس سے منع کرنے کا ارادہ کیا، لیکن پھر انہوں نے بھی اسے چھوڑ دیا۔ [صحیح ابن حبان/كتاب الحظر والإباحة/حدیث: 5839]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے اس بات کا ارادہ کیا کہ آپ برکت، افلح، یسار، نافع اور اس جیسے دیگر نام رکھنے سے منع کر دیں گے، پھر میں نے دیکھا کہ آپ صلی اللہ علیہ وسلم اس کے بعد خاموش رہے اور آپ صلی اللہ علیہ وسلم نے اس بارے میں کوئی بات ارشاد نہیں فرمائی، پھر نبی اکرم صلی اللہ علیہ وسلم کا وصال ہو گیا، اس کے بعد سیدنا عمر رضی اللہ عنہ نے ایسا کرنے کا ارادہ کیا، لیکن پھر انہوں نے بھی اسے ترک کر دیا۔ [صحیح ابن حبان/كتاب الحظر والإباحة/حدیث: 5840]

سیدنا جابر رضی اللہ عنہ بیان کرتے ہیں: سیدنا عمر رضی اللہ عنہ نے کہا: اگر میں زندہ رہ گیا تو میں یہودیوں کو جزیرہ عرب سے نکال دوں گا۔ سیدنا عمر رضی اللہ عنہ نے بتایا: نبی اکرم صلی اللہ علیہ وسلم نے ارشاد فرمایا ہے: ”اگر میں زندہ رہا تو میں لوگوں کو رباح، نجیح، افلح اور یسار نام رکھنے سے منع کر دوں گا۔“ [صحیح ابن حبان/كتاب الحظر والإباحة/حدیث: 5841]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے اس بات کا ارادہ کیا کہ آپ صلی اللہ علیہ وسلم میمون یا برکت یا افلح یا اس جیسا کوئی اور نام رکھنے سے منع کر دیں، لیکن پھر آپ صلی اللہ علیہ وسلم نے اسے ترک کر دیا۔ [صحیح ابن حبان/كتاب الحظر والإباحة/حدیث: 5842]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم سفر سے واپس تشریف لائے، میرے پاس ایک پردہ تھا جس پر تصویر بنی ہوئی تھی، میں نے اس کو اطاق پر لٹکا دیا تھا۔ سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے اسے پکڑ کر کھینچا اور فرمایا: ”کیا تم دیوار پر پردہ کر رہی ہو؟“ میں نے اس کپڑے کے دو سرہانے بنا دیے، پھر میں نے نبی اکرم صلی اللہ علیہ وسلم کو دیکھا کہ آپ صلی اللہ علیہ وسلم اس پر آرام فرما ہوئے ہیں (یعنی آپ صلی اللہ علیہ وسلم نے اس سے منع نہیں کیا)۔ [صحیح ابن حبان/كتاب الحظر والإباحة/حدیث: 5843]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”گھروں میں تصویریں لگانے سے منع کیا ہے۔“ [صحیح ابن حبان/كتاب الحظر والإباحة/حدیث: 5844]