سیدنا عبداللہ بن عباس رضی اللہ عنہما بیان کرتے ہیں کہ سیدنا ابوطلحہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”فرشتے ایسے گھر میں داخل نہیں ہوتے جس میں کتا یا تصویر موجود ہو۔“ [صحیح ابن حبان/كتاب الحظر والإباحة/حدیث: 5855]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم کی زوجہ محترمہ سیدہ میمونہ رضی اللہ عنہا نے مجھے یہ بات بتائی کہ ایک دن نبی اکرم صلی اللہ علیہ وسلم پریشان تھے، سیدہ میمونہ رضی اللہ عنہا نے عرض کی: یا رسول اللہ صلی اللہ علیہ وسلم ! آج آپ صلی اللہ علیہ وسلم کا مزاج درست محسوس نہیں ہو رہا، تو نبی اکرم صلی اللہ علیہ وسلم نے ارشاد فرمایا: ”جبرائیل نے مجھ سے یہ وعدہ کیا تھا کہ وہ گزشتہ رات مجھ سے ملیں گے، لیکن وہ مجھ سے نہیں ملے، اللہ کی قسم! وہ تو میرے ساتھ وعدہ خلافی نہیں کرتے۔“ راوی بیان کرتے ہیں کہ وہ سارا دن نبی اکرم صلی اللہ علیہ وسلم نے اسی عالم میں گزار دیا، پھر آپ صلی اللہ علیہ وسلم کے ذہن میں کتے کے پلے کا خیال آیا جو آپ کے پلنگ کے نیچے تھا، آپ صلی اللہ علیہ وسلم کے حکم کے تحت اسے باہر نکال دیا گیا، پھر آپ صلی اللہ علیہ وسلم نے اپنے دستِ مبارک میں پانی لے کر اس جگہ پر چھڑکا، جب شام ہوئی تو سیدنا جبرائیل علیہ السلام آپ صلی اللہ علیہ وسلم سے ملنے کے لیے آئے، نبی اکرم صلی اللہ علیہ وسلم نے فرمایا: ”تم نے مجھ سے یہ وعدہ کیا تھا کہ گزشتہ رات مجھ سے ملنے کے لیے آؤ گے؟“ تو سیدنا جبرائیل علیہ السلام نے عرض کی: ”جی ہاں، لیکن ہم (فرشتے) کسی ایسے گھر میں داخل نہیں ہوتے جس میں کتا یا تصویر موجود ہو۔“ [صحیح ابن حبان/كتاب الحظر والإباحة/حدیث: 5856]

سیدنا جابر بن عبداللہ رضی اللہ عنہما بیان کرتے ہیں، نبی اکرم صلی اللہ علیہ وسلم نے سیدنا عمر بن خطاب رضی اللہ عنہ کو فتح مکہ کے موقع پر بطحاء میں یہ حکم دیا کہ وہ خانہ کعبہ کے پاس آئیں اور اس میں موجود ہر تصویر کو مٹا دیں، نبی اکرم صلی اللہ علیہ وسلم خانہ کعبہ کے اندر اس وقت تک داخل نہیں ہوئے جب تک اس میں موجود تمام تصویریں مٹا نہیں دی گئیں۔ [صحیح ابن حبان/كتاب الحظر والإباحة/حدیث: 5857]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم جب خانہ کعبہ کے اندر داخل ہوئے تو آپ صلی اللہ علیہ وسلم کو اس میں سیدنا ابراہیم علیہ السلام اور سیدہ مریم رضی اللہ عنہا کی تصویریں ملیں۔ نبی اکرم صلی اللہ علیہ وسلم نے ارشاد فرمایا: ”جہاں تک ان لوگوں کا تعلق ہے، تو یہ لوگ یہ بات جانتے ہیں، فرشتے ایسے گھر میں داخل نہیں ہوتے جس میں تصویر موجود ہو، یہ سیدنا ابراہیم علیہ السلام کی تصویر موجود ہے، یہ بھلا کب پانسہ کھیلا کرتے تھے۔“ [صحیح ابن حبان/كتاب الحظر والإباحة/حدیث: 5858]

ابوزرعہ بیان کرتے ہیں: میں اور سیدنا ابوہریرہ رضی اللہ عنہ سعید یا شاید مروان (نامی حکمران) کے گھر میں داخل ہوئے تو سیدنا ابوہریرہ رضی اللہ عنہ نے دیوار پر تصویر بنی دیکھی تو انہوں نے بتایا کہ نبی اکرم صلی اللہ علیہ وسلم نے یہ بات ارشاد فرمائی ہے، اللہ تعالیٰ فرماتا ہے: ”اس شخص سے زیادہ ظالم اور کون ہوگا، جو میری مخلوق کی طرح تخلیق کرنے کی کوشش کرتا ہے، ان لوگوں کو چاہیے کہ وہ ایک دانہ بنا دیں، یا ایک ذرہ پیدا کر دیں۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”انہیں چاہیے کہ وہ ایک دانہ بنا دیں، یا ایک ذرہ پیدا کر دیں“ یہاں پر الفاظ امر کے ہیں، لیکن اس کے ذریعے مراد یہ ہے: مقابل کو عاجز قرار دیا جائے۔ [صحیح ابن حبان/كتاب الحظر والإباحة/حدیث: 5859]

سیدہ عائشہ صدیقہ رضی اللہ عنہا بیان کرتی ہیں: انہوں نے ایک پردہ لٹکایا جس میں تصویریں بنی ہوئی تھیں، نبی اکرم صلی اللہ علیہ وسلم گھر میں داخل ہوئے تو آپ صلی اللہ علیہ وسلم نے اسے اتار دیا، سیدہ عائشہ رضی اللہ عنہا بیان کرتی ہیں: میں نے اسے کاٹ کر دو تکیے بنا لیے۔ حاضرین میں سے ایک صاحب نے (حدیث بیان کرنے والے محدث) سے کہا: کیا آپ نے ابومحمد کو یہ بات ذکر کرتے ہوئے نہیں سنا کہ سیدہ عائشہ رضی اللہ عنہا نے یہ بات بتائی ہے کہ نبی اکرم صلی اللہ علیہ وسلم نے ان تکیوں کے ساتھ ٹیک بھی لگائی تھی؟ تو قاسم کے صاحبزادے نے کہا: جی نہیں، تاہم میں نے انہیں یہ بیان کرتے ہوئے سنا ہے، قاسم کے صاحبزادے کی مراد قاسم بن محمد تھے۔ [صحیح ابن حبان/كتاب الحظر والإباحة/حدیث: 5860]

سیدنا عبداللہ بن عباس رضی اللہ عنہما بیان کرتے ہیں: جب نبی اکرم صلی اللہ علیہ وسلم نے گھر میں (یعنی خانہ کعبہ کے اندر) تصویریں دیکھیں، تو آپ صلی اللہ علیہ وسلم اس کے اندر تشریف نہیں لے گئے، آپ صلی اللہ علیہ وسلم کے حکم کے تحت انہیں مٹا دیا گیا، آپ صلی اللہ علیہ وسلم نے اس میں تصویر دیکھی کہ سیدنا ابراہیم علیہ السلام اور سیدنا اسماعیل علیہ السلام کے ہاتھ میں پانسے کے تیر ہیں، تو نبی اکرم صلی اللہ علیہ وسلم نے فرمایا: ”اللہ تعالیٰ ان لوگوں کو برباد کرے، اللہ کی قسم! ان دونوں صاحبان نے کبھی پانسہ نہیں کھیلا۔“ [صحیح ابن حبان/كتاب الحظر والإباحة/حدیث: 5861]

سیدنا عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم مسجد میں داخل ہوئے تو اس وقت اس کے ارد گرد تین سو ساٹھ بت تھے، نبی اکرم صلی اللہ علیہ وسلم نے اپنے ہاتھ میں موجود چھڑی کے ذریعے انہیں مارنا شروع کیا اور آپ صلی اللہ علیہ وسلم یہ پڑھتے جا رہے تھے: «جَاءَ الْحَقُّ وَزَهَقَ الْبَاطِلُ ۚ إِنَّ الْبَاطِلَ كَانَ زَهُوقًا» ﴿جَاءَ الْحَقُّ وَزَهَقَ الْبَاطِلُ ۚ إِنَّ الْبَاطِلَ كَانَ زَهُوقًا﴾ [سورة الإسراء: 81] ”حق آ گیا اور باطل مٹ گیا، بے شک باطل مٹنے ہی والا تھا۔“ [صحیح ابن حبان/كتاب الحظر والإباحة/حدیث: 5862]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کے زمانہ اقدس میں، میں گڑیا کے ساتھ کھیلا کرتی تھی، میری سہیلیاں میرے پاس آ جاتی تھیں، جب وہ نبی اکرم صلی اللہ علیہ وسلم کو دیکھتی تھیں تو وہ اٹھ کر چلی جاتی تھیں، پھر نبی اکرم صلی اللہ علیہ وسلم انہیں میرے ساتھ کھیلنے کے لیے میری طرف بھیج دیتے تھے۔ [صحیح ابن حبان/كتاب الحظر والإباحة/حدیث: 5863]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم میرے ہاں تشریف لائے، میں اس وقت گڑیا کے ساتھ کھیل رہی تھی، نبی اکرم صلی اللہ علیہ وسلم نے پردہ ہٹایا اور دریافت کیا: ”اے عائشہ (رضی اللہ عنہا)! یہ کیا ہے؟“ میں نے عرض کی: یا رسول اللہ ( صلی اللہ علیہ وسلم )! یہ گڑیا ہے۔ نبی اکرم صلی اللہ علیہ وسلم نے فرمایا: ”تمہارے درمیان جو چیز ہے یہ کیا ہے؟“ میں نے عرض کی: یا رسول اللہ ( صلی اللہ علیہ وسلم )! یہ گھوڑا ہے۔ نبی اکرم صلی اللہ علیہ وسلم نے دریافت کیا: ”کیا کپڑے سے بنے ہوئے گھوڑے کے پر ہوتے ہیں؟“ سیدہ عائشہ رضی اللہ عنہا نے عرض کی: کیا سیدنا سلیمان علیہ السلام کے گھوڑے کے پر نہیں تھے؟ تو نبی اکرم صلی اللہ علیہ وسلم مسکرا دیے۔ [صحیح ابن حبان/كتاب الحظر والإباحة/حدیث: 5864]