سیدہ عائشہ صدیقہ رضی اللہ عنہا بیان کرتی ہیں کہ انہوں نے ایک پردہ خریدا جس میں تصویریں بنی ہوئی تھیں، جب نبی اکرم صلی اللہ علیہ وسلم نے اس کو دیکھا تو آپ صلی اللہ علیہ وسلم دروازے پر ٹھہر گئے، آپ صلی اللہ علیہ وسلم گھر کے اندر تشریف نہیں لائے، میں نے آپ صلی اللہ علیہ وسلم کے چہرے پر ناراضگی کے اثرات محسوس کر لیے۔ سیدہ عائشہ رضی اللہ عنہا نے عرض کی: یا رسول اللہ صلی اللہ علیہ وسلم ! میں اللہ تعالیٰ اور اس کے رسول کی بارگاہ میں توبہ کرتی ہوں، میں نے کیا گناہ کیا ہے؟ نبی اکرم صلی اللہ علیہ وسلم نے ارشاد فرمایا: ”یہ پردہ کہاں سے آیا ہے؟“ سیدہ عائشہ رضی اللہ عنہا نے عرض کی: یہ میں نے آپ صلی اللہ علیہ وسلم کے لیے خریدا ہے تاکہ آپ صلی اللہ علیہ وسلم اس پر تشریف فرما ہوں اور اس کے ساتھ ٹیک لگائیں۔ نبی اکرم صلی اللہ علیہ وسلم نے ارشاد فرمایا: ”ان تصویریں بنانے والوں کو قیامت کے دن عذاب دیا جائے گا، ان سے یہ کہا جائے گا: تم نے جو تخلیق کیا تھا اسے زندہ کرو۔“ پھر آپ صلی اللہ علیہ وسلم نے ارشاد فرمایا: ”بے شک جس گھر میں تصویریں موجود ہوں، فرشتے اس میں داخل نہیں ہوتے۔“
(امام ابن حبان رحمہ اللہ فرماتے ہیں:) اس بات کا امکان موجود ہے کہ یہ وہ گھر ہو جس میں نبی اکرم صلی اللہ علیہ وسلم پر وحی نازل ہوتی تھی، اب یہ بات ناممکن ہے کہ کوئی شخص گھر میں موجود ہو اور اس میں تصویر بھی موجود ہو تو آدمی کے ساتھ موجود حفاظت والے فرشتے گھر کے اندر نہ جائیں، حالانکہ وہ دونوں بھی فرشتے ہی ہیں، اسی طرح نبی اکرم صلی اللہ علیہ وسلم کا یہ فرمان: ”فرشتے ایسے سواروں کے ساتھ نہیں ہوتے جن میں کتا یا گھنٹی موجود ہو“ اس کے ذریعے نبی اکرم صلی اللہ علیہ وسلم کی مراد یہ تھی کہ جو سوار سفر میں ایک دوسرے کے ساتھ ہوتے ہیں، اب یہ بات ناممکن ہے کہ حاجی یا عمرہ کرنے والے لوگ دور دراز کے شہروں سے روانہ ہوں اور وہ اونٹوں اور جانوروں پر سوار ہو کر بیت عتیق آنے کا قصد کریں، ان کے ہمراہ گھنٹیاں اور کتے بھی ہوں اور پھر فرشتے ان کے ساتھ نہ آئیں، حالانکہ وہ لوگ اللہ تعالیٰ کے مہمان ہیں۔ [صحیح ابن حبان/كتاب الحظر والإباحة/حدیث: 5845]

سیدنا عبداللہ بن عباس رضی اللہ عنہما کے بارے میں یہ بات منقول ہے کہ ایک شخص ان کے پاس آیا اور بولا: میں یہ تصویریں بناتا ہوں، تو سیدنا عبداللہ بن عباس رضی اللہ عنہما نے بتایا کہ نبی اکرم صلی اللہ علیہ وسلم نے یہ بات ارشاد فرمائی ہے: ”بے شک اللہ تعالیٰ تصویریں بنانے والوں کو تصویریں بنانے کی وجہ سے عذاب دے گا۔“ راوی بیان کرتے ہیں کہ وہ شخص چلا گیا، اس نے یہ بیان کیا تھا کہ اس کے بال بچے ہیں (جن کے لیے وہ اس طریقے سے روزی کماتا ہے)، تو سیدنا عبداللہ بن عباس رضی اللہ عنہما نے فرمایا: تم کوئی ایسی تصویر نہ بناؤ جو کسی جاندار چیز کی ہو۔ [صحیح ابن حبان/كتاب الحظر والإباحة/حدیث: 5846]

سیدہ عائشہ صدیقہ رضی اللہ عنہا بیان کرتی ہیں کہ ایک مرتبہ نبی اکرم صلی اللہ علیہ وسلم ان کے ہاں تشریف لائے تو انہوں نے ایک پردہ لٹکایا ہوا تھا جس میں تصویریں بنی ہوئی تھیں، تو نبی اکرم صلی اللہ علیہ وسلم کے چہرہ مبارک کا رنگ تبدیل ہو گیا، آپ صلی اللہ علیہ وسلم اس پردے کی طرف بڑھے اور آپ صلی اللہ علیہ وسلم نے اپنے دستِ مبارک کے ذریعے اسے اتار دیا، پھر آپ صلی اللہ علیہ وسلم نے ارشاد فرمایا: ”بے شک قیامت کے دن شدید عذاب ان لوگوں کو ہو گا جو اللہ کی مخلوق کی تصویریں بناتے ہیں۔“ [صحیح ابن حبان/كتاب الحظر والإباحة/حدیث: 5847]

سعید بن ابوالحسن رحمہ اللہ بیان کرتے ہیں کہ میں سیدنا عبداللہ بن عباس رضی اللہ عنہما کے پاس بیٹھا ہوا تھا، ایک شخص ان کے پاس آیا اور بولا: میں ایک ایسا شخص ہوں جس کی روزی کا مدار تصویریں بنانے پر ہے، تو سیدنا عبداللہ بن عباس رضی اللہ عنہما نے بتایا کہ میں نے سیدنا محمد صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص تصویر بناتا ہے تو اللہ تعالیٰ اسے یہ عذاب دے گا کہ وہ اس میں روح پھونکے اور وہ اس میں روح نہیں پھونک سکے گا۔“ یہ سن کر اس شخص کا رنگ زرد ہو گیا، تو سیدنا عبداللہ بن عباس رضی اللہ عنہما نے فرمایا: اگر تم نے ضرور تصویریں بنانی ہیں تو تم درختوں کی بنا لو یا کسی ایسی چیز کی بنا لو جس میں روح نہیں ہوتی۔ [صحیح ابن حبان/كتاب الحظر والإباحة/حدیث: 5848]

رافع بن اسحاق بیان کرتے ہیں کہ میں اور عبداللہ بن ابوطلحہ سیدنا ابوسعید خدری رضی اللہ عنہ کی خدمت میں ان کی عیادت کے لیے حاضر ہوئے، تو سیدنا ابوسعید خدری رضی اللہ عنہ نے ہمیں بتایا کہ اللہ کے رسول صلی اللہ علیہ وسلم نے ہمیں یہ بات بتائی ہے: ”بے شک فرشتے ایسے گھر میں داخل نہیں ہوتے جس میں تماثیل یا تصویر موجود ہو۔“ یہ شک اسحاق نامی راوی کو ہے کہ سیدنا ابوسعید رضی اللہ عنہ نے ان دونوں میں سے کون سا لفظ بیان کیا تھا۔ [صحیح ابن حبان/كتاب الحظر والإباحة/حدیث: 5849]

نبی اکرم صلی اللہ علیہ وسلم کے صحابی سیدنا ابوطلحہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”بے شک فرشتے ایسے گھر میں داخل نہیں ہوتے جس میں تصویر موجود ہو۔“ بسر نامی راوی بیان کرتے ہیں کہ بعد میں وہ بیمار ہو گئے، ہم ان کی عیادت کرنے کے لیے گئے تو ان کے دروازے پر ایک پردہ لٹکا ہوا تھا جس میں تصویر بنی ہوئی تھی، میں نے عبیداللہ خولانی سے کہا: کیا انہوں نے ہمیں (تصویر کے بارے میں) حدیث نہیں سنائی تھی اور یہ کپڑا انہوں نے لٹکا دیا ہے؟ تو عبیداللہ نے کہا: کیا تم نے انہیں یہ کہتے ہوئے نہیں سنا تھا کہ ”کپڑے پر نقش و نگار“ کا حکم مختلف ہے (یعنی اس کی اجازت ہے)؟ [صحیح ابن حبان/كتاب الحظر والإباحة/حدیث: 5850]

عبیداللہ بن عبداللہ بیان کرتے ہیں کہ وہ سیدنا ابوطلحہ انصاری رضی اللہ عنہ کی عیادت کرنے کے لیے (گئے)، راوی کہتے ہیں: تو ہم نے سیدنا سہل بن حنیف رضی اللہ عنہ کو ان کے پاس پایا، راوی کہتے ہیں: سیدنا ابوطلحہ رضی اللہ عنہ نے ایک شخص کو بلایا جس نے ان کے نیچے سے بچھونا نکال لیا، تو سیدنا سہل بن حنیف رضی اللہ عنہ نے ان سے دریافت کیا: آپ نے اسے کیوں نکالا؟ انہوں نے بتایا: اس میں تصویریں بنی ہوئی ہیں اور ان کے بارے میں نبی اکرم صلی اللہ علیہ وسلم نے جو بات ارشاد فرمائی وہ آپ جانتے ہیں، تو سیدنا سہل رضی اللہ عنہ نے کہا: کیا نبی اکرم صلی اللہ علیہ وسلم نے یہ نہیں فرمایا: ”کپڑے پر بنے ہوئے نقش و نگار کا حکم مختلف ہے“؟ تو سیدنا ابوطلحہ رضی اللہ عنہ نے کہا: جی ہاں، لیکن میں اپنے اطمینان کے لیے (اسے بھی نکال رہا ہوں)۔ [صحیح ابن حبان/كتاب الحظر والإباحة/حدیث: 5851]

عون بن ابوجحیفہ رحمہ اللہ بیان کرتے ہیں کہ میں نے اپنے والد (سیدنا ابوجحیفہ رضی اللہ عنہ) کو دیکھا، انہوں نے پچھنے لگانے والا ایک غلام خریدا، وہ اپنے پچھنے لگانے کے آلات لے کر آیا تو انہوں نے انہیں توڑ دیا، میں نے ان سے اس بارے میں دریافت کیا تو انہوں نے بتایا کہ ”بے شک نبی اکرم صلی اللہ علیہ وسلم نے خون (یعنی پچھنے لگانے) کی قیمت، کتے کی قیمت اور فاحشہ عورت کی آمدن (استعمال کرنے سے) منع فرمایا ہے، اور آپ صلی اللہ علیہ وسلم نے جسم گودنے والی عورت اور گدوانے والی عورت، سود کھانے والے شخص اور کھلانے والے شخص پر لعنت فرمائی ہے اور آپ صلی اللہ علیہ وسلم نے تصویر بنانے والے پر لعنت فرمائی ہے۔“ [صحیح ابن حبان/كتاب الحظر والإباحة/حدیث: 5852]

سیدنا ابوہریرہ رضی اللہ عنہ بیان کرتے ہیں کہ سیدنا جبرائیل علیہ السلام نبی اکرم صلی اللہ علیہ وسلم کی خدمت میں حاضر ہوئے، نبی اکرم صلی اللہ علیہ وسلم کے گھر میں ایک پردہ تھا جس میں تصویریں بنی ہوئی تھیں۔ نبی اکرم صلی اللہ علیہ وسلم نے فرمایا: ”اندر آ جائیں“، تو انہوں نے عرض کی کہ ہم ایسے گھر میں داخل نہیں ہوتے جس میں تصویریں موجود ہوں، اگر آپ صلی اللہ علیہ وسلم نے انہیں اپنے گھر میں ضرور استعمال کرنا ہے تو آپ صلی اللہ علیہ وسلم ان کے سر کاٹ دیں یا انہیں کاٹ کر تکیے بنا لیں یا انہیں بچھونے بنا لیں۔ [صحیح ابن حبان/كتاب الحظر والإباحة/حدیث: 5853]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جبرائیل میرے پاس آئے اور انہوں نے کہا: میں گزشتہ رات آپ کے پاس آیا تھا، لیکن میں اس لیے آپ کے گھر میں داخل نہیں ہو سکا کیونکہ گھر میں آدمی کی تصویر موجود تھی“۔ (راوی کہتے ہیں:) گھر میں ایک پردہ تھا جس میں تصویر بنی ہوئی تھی اور گھر میں ایک کتا بھی تھا۔ تو نبی اکرم صلی اللہ علیہ وسلم نے تصویر کے سر کے بارے میں حکم دیا کہ اسے کاٹ دیا جائے اور جس پردے میں تصویریں بنی ہوئی تھیں آپ صلی اللہ علیہ وسلم نے اس کے بارے میں حکم دیا کہ اس میں تصویروں کے سر کاٹ دیے جائیں اور اس کپڑے کے ذریعے تکیے بنا لیے جائیں۔ آپ صلی اللہ علیہ وسلم کے حکم کے تحت کتے کو باہر نکال دیا گیا، وہ کتے کا بچہ تھا جس کے ساتھ سیدنا امام حسن اور سیدنا امام حسین رضی اللہ عنہما کھیلا کرتے تھے، وہ ان کے پلنگ کے نیچے تھا۔ نبی اکرم صلی اللہ علیہ وسلم فرماتے ہیں: ”پھر جبرائیل میرے پاس آئے، اس کے بعد وہ مسلسل مجھے پڑوسی کے بارے میں تلقین کرتے رہے یہاں تک کہ مجھے یوں محسوس ہوا کہ وہ اسے وارث قرار دے دیں گے“۔ [صحیح ابن حبان/كتاب الحظر والإباحة/حدیث: 5854]