عون بن ابوجحیفہ اپنے والد (رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ابوبکر اور عمر (رضی اللہ عنہما) جنت کے تمام پہلے والے اور بعد والے عمر رسیدہ افراد کے سردار ہیں، البتہ انبیاء اور مرسلین کا معاملہ مختلف ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 6904]

ابورافع بیان کرتے ہیں: ابولؤلؤ نامی شخص سیدنا مغیرہ بن شعبہ رضی اللہ عنہ کا غلام تھا، وہ چکیاں تیار کرتا تھا، سیدنا مغیرہ رضی اللہ عنہ اس سے روزانہ چار درہم خراج وصول کرتے تھے۔ ابولؤلؤ کی ملاقات سیدنا عمر بن خطاب رضی اللہ عنہ سے ہوئی، اس نے کہا: اے امیر المؤمنین! سیدنا مغیرہ رضی اللہ عنہ نے مجھ پر بہت زیادہ تاوانِ خراج عائد کیا ہوا ہے، آپ ان سے بات کیجیے کہ وہ میرے لیے تخفیف کر دیں۔ سیدنا عمر رضی اللہ عنہ نے اس سے کہا: تم اللہ سے ڈرو اور اپنے آقا کے ساتھ اچھا سلوک کرو۔ اس پر وہ غلام غصے میں آ گیا اور بولا: آپ کا عدل میرے علاوہ باقی سب لوگوں کے لیے ہے! اس نے اپنے ذہن میں یہ طے کیا کہ وہ سیدنا عمر رضی اللہ عنہ کو شہید کر دے گا، اس نے ایک خنجر لیا جو دو دھاری تھا، اس نے اسے زہر آلود کیا، پھر وہ اسے لے کر ہرمزان کے پاس آیا اور بولا: اس کے بارے میں تمہاری کیا رائے ہے؟ اس نے کہا: یہ تم جسے بھی مارو گے اسے قتل کر دو گے۔ تو ابولؤلؤ نے سیدنا عمر رضی اللہ عنہ کو (شہید کرنے کا) ارادہ کیا، وہ صبح کی نماز میں سیدنا عمر رضی اللہ عنہ کے پاس آیا اور سیدنا عمر رضی اللہ عنہ کے پیچھے کھڑا ہو گیا۔ سیدنا عمر رضی اللہ عنہ کا یہ معمول تھا کہ جب نماز کے لیے اقامت کہہ دی جاتی تو وہ یہ کہتے تھے: تم لوگ اپنی صفیں درست کر لو؛ انہوں نے اپنے معمول کے مطابق یہ کلمہ کہا، پھر جب انہوں نے تکبیر کہی تو ابولؤلؤ نے ان کے کندھے پر وار کیا اور ان کے پہلو پر وار کیا، تو سیدنا عمر رضی اللہ عنہ گر پڑے، اس نے اس خنجر کے ذریعے تیرہ اور آدمیوں کو بھی زخمی کیا جن میں سے سات لوگ فوت بھی ہو گئے تھے۔ سیدنا عمر رضی اللہ عنہ کو اٹھا کر ان کے گھر کی طرف لایا گیا، لوگ چیخ و پکار کرنے لگے، یہاں تک کہ سورج کے طلوع ہونے کا وقت قریب آیا تو سیدنا عبدالرحمن بن عوف رضی اللہ عنہ نے لوگوں میں اعلان کیا: اے لوگو! نماز، نماز۔ راوی کہتے ہیں: تو لوگ گھبرا کر نماز کی طرف آئے، سیدنا عبدالرحمن بن عوف رضی اللہ عنہ آگے بڑھے، انہوں نے قرآن کی سب سے چھوٹی سورتوں کے ذریعے ان لوگوں کو نماز پڑھائی۔ جب انہوں نے نماز مکمل کر لی تو یہ لوگ سیدنا عمر رضی اللہ عنہ کی طرف آئے، سیدنا عمر رضی اللہ عنہ نے مشروب منگوایا تاکہ اس بات کا جائزہ لیں کہ زخم کی مقدار کیا ہے، تو نبیذ لائی گئی، سیدنا عمر رضی اللہ عنہ نے وہ پی تو وہ ان کے زخم سے باہر آ گئی، لیکن یہ پتا نہیں چلتا تھا کہ کیا یہ نبیذ ہے یا خون ہے، پھر سیدنا عمر رضی اللہ عنہ نے دودھ منگوا کر اسے پیا تو وہ ان کے زخم سے باہر آ گیا۔ لوگوں نے کہا: اے امیر المؤمنین! آپ پر کوئی حرج نہیں ہے، تو سیدنا عمر رضی اللہ عنہ نے فرمایا: اگر تو قتل ہونا حرج ہے، تو میں تو قتل ہو گیا۔ پھر لوگ ان کی تعریف کرنے لگے اور یہ کہنے لگے: اے امیر المؤمنین! اللہ تعالیٰ آپ کو جزائے خیر عطا کرے، آپ ایسے تھے اور ویسے تھے، پھر وہ لوگ چلے گئے اور دوسرے لوگ آ گئے اور ان کی تعریف کرتے رہے۔ سیدنا عمر رضی اللہ عنہ نے فرمایا: اللہ کی قسم! تم لوگ جو کہہ رہے ہو اس کے باوجود میری یہ آرزو ہے کہ میں اس (حکومت) کے معاملے سے برابری کی بنیاد پر چھوٹ جاؤں، نہ میرے ذمے کچھ ہو اور نہ ہی مجھے کچھ ملے، بے شک اللہ کے رسول صلی اللہ علیہ وسلم کا صحابی ہونا میری سلامتی کے لیے کافی ہے۔ پھر سیدنا عبداللہ بن عباس رضی اللہ عنہما نے گفتگو شروع کی جو ان کے سرہانے موجود تھے، وہ سیدنا عمر رضی اللہ عنہ کے اتنے قریبی تھے جیسے ان کے خاندان کے فرد ہوں۔ سیدنا عبداللہ بن عباس رضی اللہ عنہما انہیں قرآن کی تلاوت پڑھ کر سنایا کرتے تھے۔ سیدنا عبداللہ بن عباس رضی اللہ عنہما نے گفتگو کرتے ہوئے کہا: جی نہیں، اللہ کی قسم! آپ برابری کی بنیاد پر اس معاملے سے نہیں نکلیں گے، آپ نے نبی اکرم صلی اللہ علیہ وسلم کی صحبت اختیار کی، آپ نبی اکرم صلی اللہ علیہ وسلم کے ساتھ رہے اور نبی اکرم صلی اللہ علیہ وسلم آپ سے اس طرح راضی تھے جیسے اس سب سے بہتر شخص سے راضی ہوں جو آپ کے ساتھ رہا، آپ کا نبی اکرم صلی اللہ علیہ وسلم کی بارگاہ میں یہ مقام تھا، یہ مقام تھا، یہ مقام تھا، یہاں تک کہ جب نبی اکرم صلی اللہ علیہ وسلم کا وصال ہوا تو نبی اکرم صلی اللہ علیہ وسلم آپ سے راضی تھے، اس کے بعد آپ اللہ کے رسول صلی اللہ علیہ وسلم کے خلیفہ کے ساتھ رہے، آپ ان کی حکومت کے معاملے کو نافذ کرتے رہے، آپ نے ان کے لیے یہ کیا، ان کے لیے یہ کیا۔ اے امیر المؤمنین! اس کے بعد آپ حکمران بن گئے، تو آپ اتنے اچھے حکمران بنے جتنا کوئی بھی شخص اچھا حکمران ہو سکتا ہے، آپ نے یہ کیا اور وہ کیا۔ سیدنا عمر رضی اللہ عنہ کو سیدنا عبداللہ بن عباس رضی اللہ عنہما کی گفتگو سے آرام محسوس ہوا، سیدنا عمر رضی اللہ عنہ نے ان سے کہا: تم اپنی بات میرے سامنے دہراؤ۔ سیدنا عبداللہ بن عباس رضی اللہ عنہما نے ان کے سامنے یہ بات دہرائی، تو سیدنا عمر رضی اللہ عنہ نے فرمایا: اللہ کی قسم! تم جو کچھ کہہ رہے ہو اس کے باوجود (میں یہ سمجھتا ہوں) کہ اگر میرے لیے تمام روئے زمین سونے کی ہو جائے، تو میں اسے آج کے دن موت کی ہولناکی کے مقابلے میں فدیے کے طور پر دے دوں، میں نے چھ آدمیوں کی مجلس شوریٰ قائم کر دی ہے: عثمان، علی بن ابوطالب، طلحہ بن عبیداللہ، زبیر بن عوام، عبدالرحمن بن عوف اور سعد بن ابی وقاص رضی اللہ عنہم۔ سیدنا عمر رضی اللہ عنہ نے سیدنا عبداللہ بن عمر رضی اللہ عنہما کو ان حضرات کے ساتھ مشیر کے طور پر مقرر کیا لیکن ان کا حصہ نہیں بنایا، آپ نے ان حضرات کو تین دن کی مہلت دی (وہ تین دن کے اندر اپنے میں سے کسی کو خلیفہ منتخب کر لیں)۔ سیدنا عمر رضی اللہ عنہ نے سیدنا صہیب رضی اللہ عنہ کو یہ ہدایت کی کہ وہ لوگوں کو نماز پڑھاتے رہیں، اللہ تعالیٰ کی رحمت اور اس کی رضامندی سیدنا عمر رضی اللہ عنہ پر نازل ہو۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 6905]

سیدہ عائشہ صدیقہ رضی اللہ عنہا بیان کرتی ہیں: سیدنا ابوبکر صدیق رضی اللہ عنہ نے نبی اکرم صلی اللہ علیہ وسلم کے ہاں اندر آنے کی اجازت مانگی، میں اس وقت نبی اکرم صلی اللہ علیہ وسلم کے ساتھ ایک ہی چادر میں تھی۔ نبی اکرم صلی اللہ علیہ وسلم نے انہیں اجازت دے دی، نبی اکرم صلی اللہ علیہ وسلم نے ان کی ضرورت کو پورا کیا اور آپ صلی اللہ علیہ وسلم اسی حالت میں چادر کے اندر ہی رہے، پھر وہ تشریف لے گئے، پھر سیدنا عمر بن خطاب رضی اللہ عنہ نے آپ صلی اللہ علیہ وسلم کے ہاں اندر آنے کی اجازت مانگی۔ نبی اکرم صلی اللہ علیہ وسلم نے انہیں اجازت دی، نبی اکرم صلی اللہ علیہ وسلم نے ان کی ضرورت کو پورا کیا لیکن آپ صلی اللہ علیہ وسلم اسی حالت میں چادر میں تشریف فرما رہے، پھر سیدنا عمر رضی اللہ عنہ چلے گئے، پھر سیدنا عثمان غنی رضی اللہ عنہ نے آپ صلی اللہ علیہ وسلم کے ہاں اندر آنے کی اجازت مانگی، تو نبی اکرم صلی اللہ علیہ وسلم نے اپنے کپڑے ٹھیک کیے اور سیدھے ہو کر بیٹھ گئے، پھر نبی اکرم صلی اللہ علیہ وسلم نے ان کی ضرورت پوری کی، پھر وہ تشریف لے گئے، سیدہ عائشہ رضی اللہ عنہا بیان کرتی ہیں: میں نے عرض کی: یا رسول اللہ! سیدنا ابوبکر رضی اللہ عنہ نے آپ صلی اللہ علیہ وسلم کے ہاں اندر آنے کی اجازت مانگی، آپ صلی اللہ علیہ وسلم نے ان کی ضرورت کو پورا کیا لیکن آپ صلی اللہ علیہ وسلم اسی حالت میں رہے، پھر سیدنا عمر رضی اللہ عنہ نے آپ صلی اللہ علیہ وسلم کے ہاں اندر آنے کی اجازت مانگی، آپ صلی اللہ علیہ وسلم نے ان کی ضرورت کو پورا کیا لیکن آپ صلی اللہ علیہ وسلم اسی حالت میں رہے، پھر سیدنا عثمان رضی اللہ عنہ نے آپ صلی اللہ علیہ وسلم کے ہاں اندر آنے کی اجازت مانگی، تو آپ صلی اللہ علیہ وسلم نے اپنے کپڑے ٹھیک کیے اور سیدھے ہو کر بیٹھ گئے۔ نبی اکرم صلی اللہ علیہ وسلم نے فرمایا: ”اے عائشہ! عثمان ایک شرم والا شخص ہے، اگر میں اسے اسی حالت میں اجازت دے دیتا تو مجھے اندیشہ تھا کہ وہ اپنی حاجت میرے سامنے بیان نہ کرتا۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 6906]

سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم اپنے گھر میں زانوں سے کپڑا ہٹا کر لیٹے ہوئے تھے، سیدنا ابوبکر رضی اللہ عنہ نے اندر آنے کی اجازت مانگی، نبی اکرم صلی اللہ علیہ وسلم نے انہیں اجازت دے دی لیکن آپ صلی اللہ علیہ وسلم اسی حالت میں رہے اور وہ نبی اکرم صلی اللہ علیہ وسلم کے ساتھ بات چیت کرتے رہے، پھر سیدنا عمر رضی اللہ عنہ نے اندر آنے کی اجازت مانگی، نبی اکرم صلی اللہ علیہ وسلم نے انہیں بھی اجازت عطا کر دی لیکن آپ صلی اللہ علیہ وسلم اسی حالت میں رہے اور وہ بات چیت کرتے رہے، پھر سیدنا عثمان رضی اللہ عنہ نے اندر آنے کی اجازت مانگی تو نبی اکرم صلی اللہ علیہ وسلم سیدھے ہو کر بیٹھ گئے اور آپ صلی اللہ علیہ وسلم نے اپنے کپڑے ٹھیک کر لیے، سیدنا عثمان رضی اللہ عنہ اندر آئے اور وہ بات چیت کرتے رہے، جب وہ چلے گئے تو سیدہ عائشہ رضی اللہ عنہا نے دریافت کیا: یا رسول اللہ! پہلے سیدنا ابوبکر رضی اللہ عنہ آئے لیکن آپ صلی اللہ علیہ وسلم نے ان کے لیے حرکت نہیں کی اور آپ صلی اللہ علیہ وسلم نے ان کی کوئی خاص پرواہ نہیں کی، پھر سیدنا عمر رضی اللہ عنہ آئے، آپ صلی اللہ علیہ وسلم نے ان کے لیے بھی حرکت نہیں کی اور ان کی بھی کوئی خاص پرواہ نہیں کی، پھر جب سیدنا عثمان رضی اللہ عنہ اندر آئے تو آپ صلی اللہ علیہ وسلم سیدھے ہو کر بیٹھ گئے اور آپ صلی اللہ علیہ وسلم نے اپنے کپڑے بھی ٹھیک کیے، تو نبی اکرم صلی اللہ علیہ وسلم نے فرمایا: ”میں ایک ایسے شخص سے حیا کیوں نہ کروں جس سے فرشتے بھی حیا کرتے ہیں۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 6907]

سیدنا انس بن مالک رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم احد پہاڑ پر چڑھے، آپ صلی اللہ علیہ وسلم کے ساتھ سیدنا ابوبکر، سیدنا عمر اور سیدنا عثمان رضی اللہ عنہم بھی چڑھے، تو وہ احد حرکت کرنے لگا، نبی اکرم صلی اللہ علیہ وسلم نے فرمایا: ”تم ٹھہرے رہو (تمہارے اوپر) ایک نبی، ایک صدیق اور دو شہید موجود ہیں۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 6908]

حبیب بن ابوملیکہ بیان کرتے ہیں کہ ایک شخص نے سیدنا عبداللہ بن عمر رضی اللہ عنہما سے سیدنا عثمان غنی رضی اللہ عنہ کے بارے میں دریافت کیا کہ کیا وہ غزوہ بدر میں شریک ہوئے تھے؟ سیدنا عبداللہ بن عمر رضی اللہ عنہما نے جواب دیا: جی نہیں۔ اس نے دریافت کیا: کیا وہ بیعت رضوان میں شریک ہوئے تھے؟ سیدنا عبداللہ بن عمر رضی اللہ عنہما نے جواب دیا: جی نہیں۔ انہوں نے دریافت کیا کہ کیا وہ ان لوگوں میں شامل تھے جو اس دن پیچھے ہٹ گئے تھے جب دو گروہ ایک دوسرے کے آمنے سامنے آئے تھے؟ سیدنا عبداللہ بن عمر رضی اللہ عنہما نے جواب دیا: جی ہاں۔ اس شخص نے کہا: «اللهُ أَكْبَرُ» ”اللہ اکبر“، پھر وہ شخص چلا گیا۔ سیدنا عبداللہ بن عمر رضی اللہ عنہما سے کہا گیا: یہ آپ نے کیا کیا؟ اب یہ شخص جائے گا اور لوگوں کو بتائے گا کہ آپ سیدنا عثمان غنی رضی اللہ عنہ کی تنقیص کرتے ہیں، تو سیدنا عبداللہ بن عمر رضی اللہ عنہما نے فرمایا: اسے میرے پاس بلا کر لاؤ۔ جب وہ شخص آیا، تو سیدنا عبداللہ بن عمر رضی اللہ عنہما نے فرمایا: تم نے جس چیز کے بارے میں مجھ سے دریافت کیا تھا، تمہیں وہ بات یاد ہے؟ اس نے جواب دیا: جی ہاں، میں نے آپ سے سیدنا عثمان غنی رضی اللہ عنہ کے بارے میں دریافت کیا تھا کہ کیا وہ غزوہ بدر میں شریک ہوئے تھے، تو آپ نے جواب دیا کہ جی نہیں، تو سیدنا عبداللہ بن عمر رضی اللہ عنہما نے فرمایا: نبی اکرم صلی اللہ علیہ وسلم نے غزوہ بدر کے موقع پر سیدنا عثمان غنی رضی اللہ عنہ کو اپنے کسی کام سے بھیجا تھا اور سیدنا عثمان غنی رضی اللہ عنہ کے لیے (غزوہ بدر کے مال غنیمت میں) حصہ مقرر کیا تھا، اس شخص نے کہا: میں نے آپ سے یہ سوال کیا تھا کہ کیا وہ بیعت رضوان میں شریک ہوئے تھے، تو آپ نے جواب دیا کہ جی نہیں، سیدنا عبداللہ بن عمر رضی اللہ عنہما نے فرمایا: نبی اکرم صلی اللہ علیہ وسلم نے انہیں اپنے ذاتی کام کے سلسلے میں بھیجا تھا پھر نبی اکرم صلی اللہ علیہ وسلم نے اپنا ایک ہاتھ دوسرے ہاتھ پر رکھ کر (سیدنا عثمان رضی اللہ عنہ کی طرف سے بیعت کی تھی)، تو یہ بتاؤ کہ کون سا ہاتھ زیادہ بہتر تھا؟ نبی اکرم صلی اللہ علیہ وسلم کا ہاتھ یا سیدنا عثمان رضی اللہ عنہ کا ہاتھ؟ اس شخص نے کہا: میں نے آپ سے دریافت کیا تھا کہ کیا وہ اس دن پیچھے ہٹنے والوں میں شامل تھے جب دو گروہ ایک دوسرے کے مدمقابل آئے تھے، تو آپ نے جواب دیا کہ جی ہاں، تو سیدنا عبداللہ بن عمر رضی اللہ عنہما نے فرمایا: اللہ تعالیٰ نے یہ فرمایا ہے: ﴿إِنَّ الَّذِينَ تَوَلَّوْا مِنْكُمْ يَوْمَ الْتَقَى الْجَمْعَانِ إِنَّمَا اسْتَزَلَّهُمُ الشَّيْطَانُ بِبَعْضِ مَا كَسَبُوا ۖ وَلَقَدْ عَفَا اللَّهُ عَنْهُمْ ۗ إِنَّ اللَّهَ غَفُورٌ حَلِيمٌ﴾ ﴿انہوں نے جو کچھ کیا تھا اس میں سے کسی چیز کے عوض میں شیطان نے انہیں پھسلا دیا تھا لیکن اللہ تعالیٰ نے ان سے درگزر کیا بے شک اللہ تعالیٰ مغفرت کرنے والا اور بردبار ہے۔﴾ [سورة آل عمران: 155] (پھر سیدنا عبداللہ بن عمر رضی اللہ عنہما نے اس شخص سے فرمایا): اب تم جاؤ اور اپنی طرف سے پوری کوشش کر لو۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 6909]

سیدنا ابوموسیٰ اشعری رضی اللہ عنہ بیان کرتے ہیں کہ ایک مرتبہ نبی اکرم صلی اللہ علیہ وسلم ایک باغ میں موجود تھے، میں بھی آپ صلی اللہ علیہ وسلم کے ساتھ تھا، اسی دوران ایک شخص آیا، اس نے دروازہ کھولنے کے لیے کہا، تو نبی اکرم صلی اللہ علیہ وسلم نے فرمایا: ”اس کے لیے دروازہ کھول دو اور اسے جنت کی خوشخبری دے دو۔“ تو وہ سیدنا ابوبکر صدیق رضی اللہ عنہ تھے، پھر ایک اور شخص آیا، اس نے دروازہ کھولنے کے لیے کہا، تو نبی اکرم صلی اللہ علیہ وسلم نے فرمایا: ”اس کے لیے دروازہ کھول دو اور اسے جنت کی خوشخبری دے دو۔“ تو وہ سیدنا عمر بن خطاب رضی اللہ عنہ تھے، پھر ایک اور شخص آیا اور اس نے دروازہ کھولنے کے لیے کہا، تو نبی اکرم صلی اللہ علیہ وسلم نے فرمایا: ”اس کے لیے دروازہ کھول دو اور اسے جنت کی خوشخبری دے دو۔“ تو وہ سیدنا عثمان غنی رضی اللہ عنہ تھے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 6910]

سیدنا ابوموسیٰ اشعری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے مجھ سے فرمایا: ”دروازے کا دھیان رکھنا۔“ پھر ایک شخص آیا، اس نے اندر آنے کی اجازت مانگی، تو نبی اکرم صلی اللہ علیہ وسلم نے فرمایا: ”اسے اجازت دے دو اور اسے جنت کی خوشخبری دے دو۔“ تو وہ سیدنا ابوبکر صدیق رضی اللہ عنہ تھے۔ پھر ایک اور شخص آیا، اس نے اندر آنے کی اجازت مانگی، تو نبی اکرم صلی اللہ علیہ وسلم نے فرمایا: ”اسے اجازت دے دو اور اسے جنت کی خوشخبری دے دو۔“ وہ سیدنا عمر رضی اللہ عنہ تھے۔ پھر ایک اور شخص آیا، اس نے اندر آنے کی اجازت مانگی، تو نبی اکرم صلی اللہ علیہ وسلم خاموش رہے، پھر آپ صلی اللہ علیہ وسلم نے فرمایا: ”اسے اجازت دے دو، اسے جنت کی خوشخبری دے دو اور ساتھ اسے ایک شدید آزمائش کا شکار ہونا پڑے گا جو اسے لاحق ہوگی۔“ تو وہ سیدنا عثمان غنی رضی اللہ عنہ تھے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 6911]

سیدنا ابوموسیٰ اشعری رضی اللہ عنہ بیان کرتے ہیں کہ نبی اکرم صلی اللہ علیہ وسلم مدینہ منورہ کے ایک باغ میں ٹیک لگا کر بیٹھے ہوئے تھے، آپ صلی اللہ علیہ وسلم ایک چھڑی کے ذریعے پانی اور مٹی کرید رہے تھے، اسی دوران ایک شخص آیا، اس نے دروازہ کھولنے کے لیے کہا۔ نبی اکرم صلی اللہ علیہ وسلم نے فرمایا: ”اس کے لیے کھول دو اور اسے جنت کی خوشخبری دے دو۔“ تو وہ سیدنا ابوبکر رضی اللہ عنہ تھے، میں نے ان کے لیے دروازہ کھولا اور انہیں جنت کی خوشخبری دی، پھر ایک اور شخص نے دروازہ کھولنے کے لیے کہا، نبی اکرم صلی اللہ علیہ وسلم نے فرمایا: ”اس کے لیے دروازہ کھول دو اور اسے جنت کی خوشخبری دے دو۔“ تو وہ سیدنا عمر رضی اللہ عنہ تھے، میں نے ان کے لیے دروازہ کھول دیا اور انہیں جنت کی خوشخبری دی، پھر ایک اور شخص نے دروازہ کھولنے کے لیے کہا، نبی اکرم صلی اللہ علیہ وسلم کچھ دیر کے لیے بیٹھے رہے، پھر آپ صلی اللہ علیہ وسلم نے ارشاد فرمایا: ”اس کے لیے دروازہ کھول دو اور اسے جنت کی خوشخبری دے دو، لیکن اسے ایک آزمائش کا سامنا کرنا پڑے گا۔“ راوی کہتے ہیں: میں نے ان کے لیے دروازہ کھول دیا تو وہ سیدنا عثمان غنی رضی اللہ عنہ تھے، میں نے انہیں جنت کی خوشخبری دی اور انہیں وہ بات بیان کی جو نبی اکرم صلی اللہ علیہ وسلم نے ارشاد فرمائی تھی، تو انہوں نے کہا: اے اللہ! (میں تجھ سے) صبر کا سوال کرتا ہوں، (راوی کو شک ہے شاید یہ الفاظ ہیں) «اللَّهُ الْمُسْتَعَانُ» ”اللہ تعالیٰ سے ہی مدد حاصل کی جا سکتی ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 6912]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”گزشتہ رات (خواب میں) مجھے ایک نیک شخص دکھایا گیا، یہ کہ ابوبکر اللہ کے رسول کے ساتھ ہے اور عمر ابوبکر کے ساتھ ہے اور عثمان عمر کے ساتھ ہے۔“ سیدنا جابر رضی اللہ عنہما بیان کرتے ہیں: جب ہم لوگ نبی اکرم صلی اللہ علیہ وسلم کے پاس سے اٹھ گئے تو ہم نے کہا: نیک آدمی سے مراد تو نبی اکرم صلی اللہ علیہ وسلم ہوں گے، لیکن جہاں تک نبی اکرم صلی اللہ علیہ وسلم نے اس بات کا ذکر کیا ہے کہ ان میں سے ایک دوسرے کے ساتھ تھا تو یہ حکومت کا معاملہ ہوگا جس کے ہمراہ اللہ تعالیٰ نے اپنے نبی کو مبعوث کیا ہے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 6913]