سیدنا ابن عباس رضی اللہ عنہما فرماتے ہیں: انتہائی بوڑھے آدمی کے لیے اس بات کی اجازت دی گئی ہے کہ وہ روزہ نہ رکھے اور ہر دن کے عوض ایک مسکین کو کھانا کھلا دے اور اس کے ذمہ اس کی کوئی قضاء بھی نہیں ہے۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ اور اس میں دلیل ہے۔ [المستدرك على الصحيحين/كتاب الصوم/حدیث: 1624]

سیدنا ابوطلحہ بن زیاد الانصاری رضی اللہ عنہ فرماتے ہیں: میں نے نعمان بن بشیر رضی اللہ عنہ کو ” حمص “ کے منبر پر یہ فرماتے ہوئے سنا ہے: ہم نے رسول اللہ صلی اللہ علیہ وسلم کے ہمراہ رمضان المبارک کی 23 ویں رات کو ایک تہائی وقت تک قیام کیا۔ پھر پچیسویں رات کو آدھی رات تک قیام کیا، پھر ستائیسویں شب میں نصف شب تک پھر اسی شب مزید قیام کیا (یہ قیام اس قدر طویل ہوا کہ) ہم گمان کرنے لگے کہ ہم ” فلاح “ بھی نہیں پا سکیں گے۔ ہم اسی کو ” فلاح “ کہتے ہیں۔ جس کو تم ” سحری “ کہتے ہو۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ اور اس میں واضح دلیل موجود ہے کہ مسلمانوں کی مساجد میں نمازِ تراویح سنتِ مسنونہ ہے اور سیدنا علی ابن ابی طالب رضی اللہ عنہ، سیدنا عمر رضی اللہ عنہ کو یہ سنت قائم کرنے کی مسلسل ترغیب دلاتے رہے حتیٰ کہ سیدنا عمر رضی اللہ عنہ نے اس کو قائم کروا دیا۔ [المستدرك على الصحيحين/كتاب الصوم/حدیث: 1625]