نافع رحمہ اللہ بیان فرماتے ہیں کہ مدینہ کے قریب ایک مسجد میں اقامت کہی گئی اور ابن عمر رضی اللہ عنہما کی اس مسجد کے قریب زمین تھی جس میں وہ کھیتی باڑی کرتے تھے، اور اس مسجد کا امام ابن عمر رضی اللہ عنہما کا آزاد کردہ غلام تھا، اس آزاد کردہ غلام اور اس کے ساتھیوں کی رہائش وہاں تھی۔ نافع کہتے ہیں جب ابن عمر رضی اللہ عنہما نے ان (کی اذان و اقامت) کو سنا تو ان کے ساتھ نماز پڑھنے کے لیے آگئے، اس مسجد والے آزاد کردہ غلام نے ابن عمر رضی اللہ عنہما سے کہا: ”آئیں آپ ہمیں نماز پڑھائیں“، عبداللہ بن عمر رضی اللہ عنہما نے اس سے فرمایا: ”اپنی مسجد میں تو مجھ سے زیادہ حق دار ہے کہ نماز پڑھائے“، پھر آزاد کردہ غلام نے نماز پڑھائی۔ [المستدرك على الصحيحين/كتاب: الجهاد/حدیث: 2407]

حجیرہ سے روایت ہے کہ ام سلمہ رضی اللہ عنہا نے انہیں درمیان میں کھڑے ہو کر امامت کروائی۔ [المستدرك على الصحيحين/كتاب: الجهاد/حدیث: 2408]

جابر رضی اللہ عنہما سے روایت ہے کہ معاذ رضی اللہ عنہ نبی کریم صلی اللہ علیہ وسلم کے ساتھ عشاء کی نماز پڑھتے، پھر اپنی قوم والوں کے پاس جا کر انہیں یہی نماز پڑھاتے، یہ نماز معاذ رضی اللہ عنہ کی نفلی ہوتی جبکہ قوم والوں کی فرض عشاء کی نماز ہوتی۔ [المستدرك على الصحيحين/كتاب: الجهاد/حدیث: 2409]

جابر بن عبداللہ انصاری رضی اللہ عنہما سے روایت ہے کہ معاذ بن جبل رضی اللہ عنہ نبی کریم صلی اللہ علیہ وسلم کے ساتھ عشاء کی (فرضی) نماز پڑھتے، پھر اپنی قوم والوں کے پاس جاتے اور انہیں عشاء کی نماز پڑھاتے، جبکہ یہ ان کی نفل ہوتی۔ [المستدرك على الصحيحين/كتاب: الجهاد/حدیث: 2410]

انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم ایک گھوڑے پر سوار ہوئے تو اس سے گر پڑے، آپ صلی اللہ علیہ وسلم کا دایاں پہلو زخمی ہو گیا، آپ صلی اللہ علیہ وسلم نے ایک نماز بیٹھ کر پڑھائی تو ہم نے بھی آپ صلی اللہ علیہ وسلم کے پیچھے بیٹھ کر نماز پڑھی، جب آپ صلی اللہ علیہ وسلم فارغ ہوئے تو فرمایا: ”امام اس لیے مقرر کیا گیا ہے کہ اس کی اقتدا کی جائے، لہذا جب وہ کھڑا ہو کر نماز پڑھے تو تم بھی کھڑے ہو کر پڑھو، اور جب وہ رکوع کرے تو تم بھی رکوع کرو، اور جب وہ رکوع سے سر اٹھائے تو تم بھی اٹھاؤ، اور جب وہ «سَمِعَ اللهُ لِمَنْ حَمِدَهُ» ”اللہ نے اس کی سن لی جس نے اس کی تعریف کی“ کہے تو تم «رَبَّنَا وَلَكَ الْحَمْدُ» ”اے ہمارے رب! اور تیرے ہی لیے تمام تعریف ہے“ کہو، اور جب وہ بیٹھ کر نماز پڑھے تو تم سب بھی بیٹھ کر نماز پڑھو۔“ [المستدرك على الصحيحين/كتاب: الجهاد/حدیث: 2411]

ایک دوسری سند سے عائشہ رضی اللہ عنہا سے بھی اسی (سابقہ حدیث) طرح مروی ہے۔ [المستدرك على الصحيحين/كتاب: الجهاد/حدیث: 2412]

عائشہ رضی اللہ عنہا سے روایت ہے، وہ بیان فرماتی ہیں: میرے گھر میں رسول اللہ صلی اللہ علیہ وسلم نے نماز پڑھی جبکہ آپ صلی اللہ علیہ وسلم بیمار تھے، آپ صلی اللہ علیہ وسلم نے بیٹھ کر نماز پڑھی اور آپ صلی اللہ علیہ وسلم کے پیچھے لوگوں نے کھڑے ہو کر نماز پڑھی تو آپ صلی اللہ علیہ وسلم نے انہیں اشارہ کیا کہ بیٹھ جاؤ، جب آپ صلی اللہ علیہ وسلم نماز سے فارغ ہوئے تو فرمایا: ”امام اس لیے مقرر کیا جاتا ہے کہ اس کی اقتدا کی جائے، جب وہ رکوع کرے تو تم بھی رکوع کرو، اور جب وہ سر اٹھائے تو تم بھی سر اٹھاؤ، اور جب وہ بیٹھ کر نماز پڑھے تو تم بھی بیٹھ کر نماز پڑھو۔“ [المستدرك على الصحيحين/كتاب: الجهاد/حدیث: 2413]

ابوزبیر رحمہ اللہ سے مروی ہے، وہ جابر رضی اللہ عنہ سے روایت کرتے ہیں کہ وہ نکلے جبکہ وہ جابر رضی اللہ عنہ کو رخصت کر رہے تھے اور وہ بیمار تھے، تو جابر رضی اللہ عنہ نے بیٹھ کر نماز پڑھائی تو انہوں نے بھی ان کے پیچھے بیٹھ کر نماز پڑھی۔ [المستدرك على الصحيحين/كتاب: الجهاد/حدیث: 2414]

عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ابوبکر رضی اللہ عنہ کو حکم دیا کہ ”وہ لوگوں کو نماز پڑھائیں“، نبی کریم صلی اللہ علیہ وسلم نے افاقہ محسوس کیا تو آپ صلی اللہ علیہ وسلم تشریف لائے اور ابوبکر رضی اللہ عنہ کے ایک جانب بیٹھ گئے، رسول اللہ صلی اللہ علیہ وسلم نے ابوبکر رضی اللہ عنہ کی امامت فرمائی جبکہ آپ صلی اللہ علیہ وسلم بیٹھے ہوئے تھے اور ابوبکر رضی اللہ عنہ نے لوگوں کو کھڑے ہو کر امامت کروائی۔ [المستدرك على الصحيحين/كتاب: الجهاد/حدیث: 2415]

عبید بن عمیر اللیثی بیان کرتے ہیں کہ رسول اللہ صلی اللہ علیہ وسلم نے ابوبکر رضی اللہ عنہ کو لوگوں کو صبح کی نماز پڑھانے کا حکم دیا، اور ابوبکر رضی اللہ عنہ نے تکبیر کہی، نبی صلی اللہ علیہ وسلم نے کچھ افاقہ محسوس کیا، آپ صلی اللہ علیہ وسلم کھڑے ہوئے اور صفوں سے آگے نکل آئے، عبید کہتے ہیں ابوبکر رضی اللہ عنہ جب نماز پڑھتے تو کسی جانب متوجہ نہیں ہوتے تھے، جب ابوبکر رضی اللہ عنہ نے اپنے پیچھے کچھ محسوس کیا، اور پہچان لیا کہ اس جگہ پر رسول اللہ صلی اللہ علیہ وسلم کے علاوہ اور کوئی نہیں آ سکتا، واپس صف کی طرف پیچھے ہوئے تو رسول اللہ صلی اللہ علیہ وسلم نے انہیں ان کی جگہ لوٹا دیا۔ رسول اللہ صلی اللہ علیہ وسلم ان کے پہلو میں بیٹھ گئے، اور ابوبکر رضی اللہ عنہ کھڑے تھے، حتیٰ کہ جب ابوبکر رضی اللہ عنہ نماز سے فارغ ہوئے تو فرمایا: اے اللہ کے رسول صلی اللہ علیہ وسلم ! میرے خیال میں آپ صلی اللہ علیہ وسلم تندرست ہو گئے، اور یہ دن خارجہ کی بیٹی کا تھا، ابوبکر رضی اللہ عنہ اپنے گھر آ گئے، اور رسول اللہ صلی اللہ علیہ وسلم اپنی جگہ پر حجرے کے ایک جانب بیٹھ کر لوگوں کو فتنوں سے ڈراتے رہے، آپ صلی اللہ علیہ وسلم نے فرمایا: ”لوگوں کو نہیں چاہیے کہ ہر بات میں میری طرح عمل کریں کیونکہ میں اس چیز کو حلال کرتا ہوں جس کو اللہ نے اپنی کتاب میں حلال کیا ہے اور اس چیز کو حرام کرتا ہوں جسے اللہ نے اپنی کتاب میں حرام کیا ہے، اے فاطمہ! رسول اللہ صلی اللہ علیہ وسلم کی بیٹی، اے صفیہ! رسول اللہ صلی اللہ علیہ وسلم کی پھوپھی، جو کچھ اللہ کے ہاں ہے اس کے لیے عمل کرو، بے شک میں تمہارے واسطے اللہ سے کچھ بھی کفایت نہیں کر سکوں گا۔“ [المستدرك على الصحيحين/كتاب: الجهاد/حدیث: 2416]