سعید بن جبیر اور عبداللہ بن مالک دونوں سے روایت ہے کہ: ”ہم نے ابن عمر رضی اللہ عنہما کے ساتھ مزدلفہ میں مغرب اور عشاء کی نمازیں ایک تکبیر کے ساتھ پڑھیں۔“ اور محمد بن کثیر کی روایت کے ہم معنی بیان کیا۔ [سنن ابي داود/كتاب المناسك /حدیث: 1930]

سعید بن جبیر رحمہ اللہ نے کہا: ”ہم سیدنا ابن عمر رضی اللہ عنہ کی معیت میں (عرفات سے) لوٹے۔ جب مزدلفہ پہنچے تو انہوں نے ہمیں مغرب اور عشاء کی نمازیں تین رکعتیں اور دو رکعتیں ایک تکبیر کے ساتھ پڑھائیں۔ جب فارغ ہوئے تو ابن عمر رضی اللہ عنہ نے کہا: ”رسول اللہ صلی اللہ علیہ وسلم نے اس جگہ ہمیں اسی طرح نماز پڑھائی تھی۔“” [سنن ابي داود/كتاب المناسك /حدیث: 1931]

سلمہ بن کہیل نے کہا کہ میں نے جناب سعید بن جبیر رضی اللہ عنہ کو مزدلفہ میں دیکھا کہ انہوں نے اقامت کہی اور مغرب کی تین رکعتیں پڑھیں، پھر عشاء کی دو رکعتیں پڑھیں، پھر انہوں نے کہا: ”میں سیدنا ابن عمر رضی اللہ عنہ کے ساتھ حاضر تھا، انہوں نے اس جگہ اسی طرح کیا تھا اور انہوں نے بیان کیا تھا کہ میں رسول اللہ صلی اللہ علیہ وسلم کے ساتھ تھا اور آپ صلی اللہ علیہ وسلم نے اس جگہ اسی طرح کیا تھا۔“ [سنن ابي داود/كتاب المناسك /حدیث: 1932]

اشعث بن سلیم اپنے والد سے بیان کرتے ہیں کہ ”میں سیدنا ابن عمر رضی اللہ عنہ کے ساتھ عرفات سے مزدلفہ آیا۔ انہوں نے اس دوران میں تکبیر اور تہلیل کو نہیں چھوڑا حتیٰ کہ ہم مزدلفہ پہنچ گئے۔ پھر اذان اور اقامت کہی یا کسی کو حکم دیا کہ اذان اور اقامت کہے۔ پھر ہمیں مغرب کی تین رکعتیں پڑھائیں، پھر ہماری طرف متوجہ ہوئے اور کہا: ”نماز (عشاء کی بھی)“ پس ہمیں عشاء کی نماز پڑھائی، دو رکعتیں۔ پھر اپنا رات کا کھانا طلب کیا۔“ (اشعث بن سلیم نے) کہا: ”مجھے علاج بن عمرو نے اسی طرح بیان کیا جیسے کہ میرے والد (سلیم بن اسود) نے سیدنا ابن عمر رضی اللہ عنہ سے روایت کیا۔“ سیدنا ابن عمر رضی اللہ عنہ سے اس بارے میں پوچھا گیا تو انہوں نے کہا: ”میں نے رسول اللہ صلی اللہ علیہ وسلم کے ساتھ ایسے ہی پڑھی تھی۔“ [سنن ابي داود/كتاب المناسك /حدیث: 1933]

سیدنا عبداللہ بن مسعود رضی اللہ عنہ نے بیان کیا کہ ”میں نے رسول اللہ صلی اللہ علیہ وسلم کو کبھی نہیں دیکھا کہ آپ صلی اللہ علیہ وسلم نے کوئی نماز بے وقت پڑھی ہو۔ آپ صلی اللہ علیہ وسلم ہمیشہ وقت پر نماز پڑھتے تھے، مگر مزدلفہ میں آپ صلی اللہ علیہ وسلم نے مغرب اور عشاء کو جمع کر کے پڑھا (تاخیر سے) اور اگلے دن کی فجر کی نماز اپنے وقت سے پہلے پڑھی۔“ [سنن ابي داود/كتاب المناسك /حدیث: 1934]

سیدنا علی رضی اللہ عنہ بیان کرتے ہیں کہ (مزدلفہ میں) جب نبی کریم صلی اللہ علیہ وسلم نے صبح کی اور جبل قزح پر وقوف کیا تو فرمایا: ”یہ قزح ہے اور جائے وقوف ہے اور مزدلفہ سارا ہی جائے وقوف ہے، میں نے اس جگہ قربانی کی ہے اور منیٰ سب ہی قربان گاہ ہے، سو اپنے اپنے پڑاؤ پر قربانیاں کرو۔“ [سنن ابي داود/كتاب المناسك /حدیث: 1935]

سیدنا جابر بن عبداللہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”میں نے عرفات میں اس جگہ پر وقوف کیا ہے اور عرفات سارے کا سارا جائے وقوف ہے۔ میں نے مزدلفہ میں اس جگہ پر وقوف کیا ہے اور مزدلفہ سارا ہی جائے وقوف ہے۔ اور میں نے اس جگہ قربانی کی ہے اور منیٰ سب ہی قربان گاہ ہے۔ پس تم اپنے اپنے پڑاؤ پر قربانیاں کرو۔“ [سنن ابي داود/كتاب المناسك /حدیث: 1936]

سیدنا جابر بن عبداللہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”عرفات سارا ہی مقام وقوف ہے اور منیٰ سارا ہی قربان گاہ ہے اور مزدلفہ پورا ہی وقوف کی جگہ ہے اور مکہ کے سب راستے (یہاں آنے کی) راہ ہیں اور قربان گاہ بھی۔“ [سنن ابي داود/كتاب المناسك /حدیث: 1937]

عمر بن خطاب رضی اللہ عنہ نے بیان کیا کہ ”اہلِ جاہلیت (مزدلفہ سے) اس وقت تک روانہ نہیں ہوتے تھے جب تک کہ کوہِ ثبیر پر سورج کو (طلوع ہوتا) نہ دیکھ لیتے۔ سو نبی کریم صلی اللہ علیہ وسلم نے ان کی مخالفت کی اور طلوعِ آفتاب سے پہلے ہی وہاں سے روانہ ہو لیے۔“ [سنن ابي داود/كتاب المناسك /حدیث: 1938]

سیدنا ابن عباس رضی اللہ عنہ بیان کرتے ہیں کہ: ”میں رسول اللہ صلی اللہ علیہ وسلم کے اہل کے ان ضعیف افراد میں شامل تھا جن کو آپ صلی اللہ علیہ وسلم نے مزدلفہ کی رات قبل از وقت روانہ فرما دیا تھا۔“ [سنن ابي داود/كتاب المناسك /حدیث: 1939]