نافع سے مروی ہے کہ عبداللہ بن عمر رضی اللہ عنہما نے چوپایوں کے باڑے کے پاس تیمم کیا اور نمازِ عصر ادا کی، پھر مدینہ میں داخل ہوئے جبکہ سورج بلند تھا لیکن نماز دوبارہ نہیں پڑھی۔ [مسند امام شافعی/ كتاب الطهارة /حدیث: 91]

عمران بن حصین رضی اللہ عنہ روایت کرتے ہیں کہ نبی صلی اللہ علیہ وسلم نے جنبی آدمی کو حکم دیا کہ وہ تیمم کرے، پھر وہ نماز پڑھ لے، جب پانی دستیاب ہو تو وہ غسل کرے۔ ابوذر رضی اللہ عنہ سے مروی حدیث میں ہے: ”جب تجھے پانی مل جائے تو اس سے غسل کرلے۔“ [مسند امام شافعی/ كتاب الطهارة /حدیث: 92]

ام المؤمنین ام سلمہ رضی اللہ عنہا سے روایت ہے کہ ام سلیم رضی اللہ عنہا (ابو طلحہ کی اہلیہ) نبی صلی اللہ علیہ وسلم کی خدمت میں حاضر ہوئیں اور عرض کیا: ”اے اللہ کے رسول ( صلی اللہ علیہ وسلم )! اللہ تعالیٰ حق بیان کرنے سے حیا نہیں کرتا، کیا عورت کو جب احتلام ہو جائے تو اس پر غسل فرض ہے؟“ فرمایا: ”ہاں! جب وہ پانی دیکھے۔“ [مسند امام شافعی/ كتاب الطهارة /حدیث: 93]

زبید بن صلت سے روایت ہے وہ بیان کرتے ہیں کہ میں عمر بن خطاب رضی اللہ عنہ کے ساتھ جرف کی طرف گیا، انہوں نے دیکھا کہ وہ تو احتلام سے ہیں اور غسل کیے بغیر نماز پڑھ لی ہے، تو فرمایا: ”اللہ کی قسم مجھے نہیں معلوم کہ میں احتلام سے ہوں اور میں نے غسل بھی نہیں کیا اور نماز پڑھ لی ہے۔“ زبید کہتے ہیں انہوں نے غسل کیا اور کپڑے کو جہاں منی نظر آ رہی تھی اس جگہ سے دھویا اور جہاں سے نہیں دکھائی دیتی تھی پانی چھڑک دیا، اذان اور اقامت کہی پھر سورج کے بلند ہو جانے کے بعد نماز پڑھی۔ [مسند امام شافعی/ كتاب الطهارة /حدیث: 94]

سعيد بن المسیب رحمہ اللہ سے روایت ہے کہ ابوموسیٰ اشعری رضی اللہ عنہ ام المؤمنین عائشہ رضی اللہ عنہا کے پاس آئے اور کہا: ”مجھ پر محمد صلی اللہ علیہ وسلم کے صحابہ کا اختلاف ایک ایسے مسئلہ میں گراں ہو چکا ہے جس کو میں بڑا جانتا ہوں کہ آپ کے سامنے رکھوں۔“ عائشہ رضی اللہ عنہا نے فرمایا: ”وہ کیا مسئلہ ہے؟ جس کے بارے میں تو اپنی ماں سے سوال نہیں کرنا چاہتا، مجھ سے دریافت کرو!“ تو ابوموسیٰ اشعری رضی اللہ عنہ نے عائشہ رضی اللہ عنہا سے کہا: ”ایک آدمی اپنی بیوی کے پاس جاتا ہے اور وہ انزال سے قبل دور ہو جاتا ہے۔“ عائشہ رضی اللہ عنہا نے فرمایا: ”جب ختنہ، ختنہ سے تجاوز کر جائے تو غسل واجب ہو جاتا ہے۔“ ابوموسیٰ رضی اللہ عنہ نے کہا: ”میں آپ کے بعد کسی سے (اس مسئلہ میں) کبھی بھی سوال نہ کروں گا۔“ [مسند امام شافعی/ كتاب الطهارة /حدیث: 95]

سعيد بن مسیب رحمہ اللہ سے روایت ہے کہ ابوموسیٰ اشعری رضی اللہ عنہ نے عائشہ رضی اللہ عنہا سے دو ختنوں کے ملنے کے بارے میں سوال کیا تو عائشہ رضی اللہ عنہا نے فرمایا کہ رسول اللہ صلی اللہ علیہ وسلم نے فرمایا: ”جب دو ختنے (شرمگاہیں) مل جائیں یا ختنہ ختنے کو چھو لے، تو غسل واجب ہو گیا۔“ [مسند امام شافعی/ كتاب الطهارة /حدیث: 96]

عائشہ رضی اللہ عنہا سے روایت ہے، فرماتی ہیں نبی صلی اللہ علیہ وسلم نے فرمایا: ”جب تم میں سے کوئی چار شاخوں کے درمیان بیٹھا، پھر اس نے عضوِ مخصوص کو عورت کی شرم گاہ سے ملایا، تو اس پر غسل واجب ہو گیا۔“ [مسند امام شافعی/ كتاب الطهارة /حدیث: 97]

عائشہ رضی اللہ عنہا سے روایت ہے، فرماتی ہیں: جب دو ختنے مل جائیں تو غسل واجب ہو جاتا ہے۔ میں نے اور نبی صلی اللہ علیہ وسلم نے یہ عمل کیا اور (بعد میں) ہم نے غسل کیا۔ [مسند امام شافعی/ كتاب الطهارة /حدیث: 98]

ابی بن کعب رضی اللہ عنہ سے روایت ہے بیان کرتے ہیں، میں نے عرض کیا: ”اے اللہ کے رسول صلی اللہ علیہ وسلم ! جب ہم میں سے کوئی جماع کرے اور نزول سے قبل فارغ ہو جائے تو کیا کرے؟“ تو نبی صلی اللہ علیہ وسلم نے فرمایا: ”جو حصہ عورت کو لگا ہے اس کو دھو لے پھر وضو کر کے پھر نماز پڑھ لے۔“ [مسند امام شافعی/ كتاب الطهارة /حدیث: 99]

ابی بن کعب رضی اللہ عنہ سے مروی ہے کہ وہ کہا کرتے تھے کہ جس نے انزال نہیں کیا اس پر غسل نہیں، پھر ابی بن کعب رضی اللہ عنہ نے وفات سے قبل اس بات سے رجوع کر لیا تھا۔ [مسند امام شافعی/ كتاب الطهارة /حدیث: 100]