سیدنا جابر بن سمرہ رضی اللہ عنہ سے روایت ہے کہ ایک آدمی نے (مدینہ کے قریب) مقام حرہ پر پڑاؤ کیا۔ اس کے ساتھ اس کے بیوی بچے بھی تھے۔ (وہاں کے) ایک آدمی نے اس سے کہا کہ ”میری اونٹنی گم ہو گئی ہے، اگر تمہیں ملے تو اسے پکڑ لینا۔“ چنانچہ وہ اسے مل گئی مگر اس کا مالک نہ ملا۔ پھر وہ اونٹنی بیمار ہو گئی۔ تو اس شخص کی بیوی نے کہا کہ ”اس کو نحر (ذبح) کر لو۔“ مگر وہ نہ مانا اور بالآخر وہ مر گئی۔ تو عورت نے کہا کہ ”اس کا چمڑا اتار لو کہ ہم اس کی چربی اور گوشت خشک کر لیں اور کھائیں۔“ تو آدمی نے کہا: ”میں رسول اللہ صلی اللہ علیہ وسلم سے پوچھ لوں۔“ چنانچہ وہ آپ صلی اللہ علیہ وسلم کی خدمت میں آیا اور آپ صلی اللہ علیہ وسلم سے پوچھا تو آپ صلی اللہ علیہ وسلم نے فرمایا: ”کیا تمہارے پاس کچھ ہے جو تمہیں اس سے بے پروا کر دے؟“ اس نے کہا: ”نہیں۔“ آپ صلی اللہ علیہ وسلم نے فرمایا: ”تب تم اسے کھا سکتے ہو۔“ پھر اس اونٹنی کا مالک آ گیا تو اس نے اسے ساری تفصیل بتائی تو اس نے کہا: ”تم نے اسے نحر (ذبح) کیوں نہ کر لیا؟“ اس نے جواب دیا: ”مجھے تم سے حیاء آئی۔“ (کہ کہیں تم یہ نہ سمجھو کہ اس نے حیلے بہانے سے اونٹنی کاٹ کھائی ہے)۔ [سنن ابي داود/كتاب الأطعمة /حدیث: 3816]

سیدنا فجیع عامری رضی اللہ عنہ کا بیان ہے کہ وہ رسول اللہ صلی اللہ علیہ وسلم کی خدمت میں آئے اور پوچھا: ”کیا ہمارے لیے مردار حلال نہیں ہے؟“ آپ صلی اللہ علیہ وسلم نے فرمایا: ”تمہارا طعام کیا ہے؟“ ہم نے کہا: «الْغَبُوقُ» ”غبوق“ اور «الصَّبُوحُ» ”صبوح“۔ ابونعیم رحمہ اللہ کہتے ہیں کہ عقبہ (عقبہ بن وہب) نے مجھے اس کی وضاحت کی کہ ایک پیالہ دودھ صبح اور ایک پیالہ دودھ رات کو۔ کہا: ”میرے باپ کی قسم! یہ تو بڑی سخت بھوک ہے۔“ چنانچہ آپ صلی اللہ علیہ وسلم نے ان کے لیے اس حالت میں مردار کو حلال قرار دیا۔ امام ابوداؤد رحمہ اللہ فرماتے ہیں کہ ”دن کے آخر میں پی جانے والی چیز کو غبوق اور دن کے شروع میں پی جانے والی کو صبوح کہتے ہیں۔“ [سنن ابي داود/كتاب الأطعمة /حدیث: 3817]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”میرا جی چاہ رہا ہے کہ گندم کی سفید روٹی کھاؤں جو گھی اور دودھ میں گوندھی گئی ہو۔“ تو لوگوں میں سے ایک شخص اٹھا اور پکوا کر لے آیا اور آپ صلی اللہ علیہ وسلم کی خدمت میں پیش کر دی۔ آپ صلی اللہ علیہ وسلم نے پوچھا: ”یہ گھی کس چیز میں تھا؟“ اس نے کہا: ”سانڈے کی کھال کی کپی میں۔“ آپ صلی اللہ علیہ وسلم نے فرمایا: ”اسے اٹھا لو۔“ امام ابوداؤد رحمہ اللہ فرماتے ہیں: ”یہ حدیث منکر ہے۔“ امام ابوداؤد رحمہ اللہ فرماتے ہیں: ”سند میں مذکور ایوب، ایوب سختیانی نہیں ہے۔“ [سنن ابي داود/كتاب الأطعمة /حدیث: 3818]

سیدنا عبداللہ بن عمر رضی اللہ عنہما سے روایت ہے کہ تبوک میں نبی کریم صلی اللہ علیہ وسلم کو «جُبْنَة» یعنی پنیر پیش کیا گیا تو آپ صلی اللہ علیہ وسلم نے چھری منگوائی اور پھر «بِسْمِ اللّٰهِ» ”اللہ کے نام سے“ پڑھ کر اسے کاٹا۔ [سنن ابي داود/كتاب الأطعمة /حدیث: 3819]

سیدنا جابر رضی اللہ عنہ کا بیان ہے کہ نبی کریم صلی اللہ علیہ وسلم نے فرمایا: ”سرکہ بہترین سالن ہے۔“ [سنن ابي داود/كتاب الأطعمة /حدیث: 3820]

سیدنا جابر بن عبداللہ رضی اللہ عنہما نبی کریم صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”سرکہ بہترین سالن ہے۔“ [سنن ابي داود/كتاب الأطعمة /حدیث: 3821]

سیدنا جابر بن عبداللہ رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”جس شخص نے لہسن یا پیاز کھائی ہو وہ ہم سے الگ رہے یا فرمایا کہ ہماری مسجد سے الگ رہے، اسے چاہیے کہ اپنے گھر میں بیٹھا رہے۔“ (ایک بار) آپ صلی اللہ علیہ وسلم کے سامنے طباق پیش کیا گیا، اس میں کئی طرح کی سبزیاں تھیں۔ آپ صلی اللہ علیہ وسلم نے اس میں بو محسوس کی اور دریافت فرمایا تو جو سبزیاں اس میں تھیں سب بتائی گئیں۔ آپ صلی اللہ علیہ وسلم نے فرمایا: ”اسے اس شخص کے قریب کر دو۔“ (یعنی اس صحابی کے جو آپ صلی اللہ علیہ وسلم کے پاس تھا)۔ جب اس نے آپ صلی اللہ علیہ وسلم کو دیکھا (کہ آپ صلی اللہ علیہ وسلم نے نہیں کھایا) تو اس نے بھی اسے کھانا پسند نہ کیا۔ آپ صلی اللہ علیہ وسلم نے فرمایا: ”تم کھاؤ، کیونکہ میں (بہت قریب سے) اس سے بات کرتا ہوں جس سے تم نہیں کرتے۔“ احمد بن صالح نے لفظ «بِدْرٍ» کی وضاحت کرتے ہوئے فرمایا کہ ابن وہب نے اس کا ترجمہ ”طبق“ (طباق) کیا ہے۔ [سنن ابي داود/كتاب الأطعمة /حدیث: 3822]

سیدنا ابو سعید خدری رضی اللہ عنہ نے بیان کیا کہ رسول اللہ صلی اللہ علیہ وسلم کے پاس لہسن اور پیاز کا ذکر کیا گیا، اور کہا گیا: ”اے اللہ کے رسول! ان تمام میں سے لہسن (کی بو) زیادہ سخت ہے تو کیا آپ اسے حرام قرار دیتے ہیں؟“ تو نبی کریم صلی اللہ علیہ وسلم نے فرمایا: ”تم اسے کھاؤ اور تم میں سے جو اسے کھائے تو وہ اس مسجد کے قریب نہ آئے یہاں تک کہ اس سے اس کی بدبو ختم ہو جائے۔“ [سنن ابي داود/كتاب الأطعمة /حدیث: 3823]

سیدنا حذیفہ رضی اللہ عنہ سے منقول ہے، راوی کا خیال ہے کہ وہ رسول اللہ صلی اللہ علیہ وسلم سے روایت کرتے ہیں، آپ صلی اللہ علیہ وسلم نے فرمایا: ”جس نے قبلے کی طرف تھوکا تو قیامت کے دن وہ شخص اس حال میں آئے گا کہ اس کا تھوک اس کی آنکھوں کے درمیان لگا ہوگا، اور جس نے یہ ناپسندیدہ سبزی کھائی ہو وہ ہرگز ہماری مسجد کے قریب نہ آئے۔“ آپ صلی اللہ علیہ وسلم نے یہ بات تین بار فرمائی۔ [سنن ابي داود/كتاب الأطعمة /حدیث: 3824]

سیدنا ابن عمر رضی اللہ عنہما سے روایت ہے کہ نبی کریم صلی اللہ علیہ وسلم نے فرمایا: ”جس نے یہ سبزی کھائی ہو (لہسن اور پیاز) تو وہ ہرگز مسجدوں کے قریب نہ جائے۔“ [سنن ابي داود/كتاب الأطعمة /حدیث: 3825]