سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جب تم میں سے کسی کو چھینک آئے تو چاہیے کہ کہے: «الْحَمْدُ لِلّٰهِ عَلَى كُلِّ حَالٍ» ”ہر حال میں اللہ کی تعریف ہے۔“ اور اس کے بھائی یا ساتھی کو چاہیے کہ کہے: «يَرْحَمُكَ اللّٰهُ» ”اللہ تم پر رحم فرمائے۔“ اور پھر وہ جسے چھینک آئی ہو کہے: «يَهْدِيكُمُ اللّٰهُ وَيُصْلِحُ بَالَكُمْ» ”اللہ تمہیں ہدایت دے اور تمہارے احوال درست کر دے۔““ [سنن ابي داود/كتاب الأدب /حدیث: 5033]

سیدنا ابوہریرہ رضی اللہ عنہ سے روایت ہے، انہوں نے کہا: ”اپنے بھائی کو اس کی چھینک آنے پر تین بار جواب دے اور جو اس سے زیادہ ہو، تو پھر وہ زکام زدہ ہے۔“ [سنن ابي داود/كتاب الأدب /حدیث: 5034]

جناب سعید بن ابی سعید نے سیدنا ابوہریرہ رضی اللہ عنہ سے روایت کیا اور کہا: ”مجھے یہی معلوم ہے کہ انہوں نے اس حدیث کو نبی کریم صلی اللہ علیہ وسلم کی طرف نسبت کیا“ اور مذکورہ بالا روایت کے ہم معنی بیان کیا۔ امام ابوداؤد رحمہ اللہ کہتے ہیں: ”اس کو ابونعیم نے موسیٰ بن قیس کے واسطے سے محمد بن عجلان سے، انہوں نے سعید سے، انہوں نے سیدنا ابوہریرہ رضی اللہ عنہ سے، انہوں نے نبی کریم صلی اللہ علیہ وسلم سے روایت کیا۔“ [سنن ابي داود/كتاب الأدب /حدیث: 5035]

حمیدہ یا عبیدہ بنت عبید بن رفاعہ زرقی اپنے والد سے بیان کرتی ہیں کہ انہوں نے نبی کریم صلی اللہ علیہ وسلم سے روایت کیا، آپ صلی اللہ علیہ وسلم نے فرمایا: ”چھینک مارنے والے کو تین بار جواب دو۔ پھر اگر جواب دینا چاہو، تو دو اور اگر چاہو تو، چھوڑ دو۔“ [سنن ابي داود/كتاب الأدب /حدیث: 5036]

سیدنا ایاس بن سلمہ بن اکوع اپنے والد (سیدنا سلمہ بن اکوع رضی اللہ عنہ) سے روایت کرتے ہیں کہ ایک شخص نے نبی کریم صلی اللہ علیہ وسلم کی مجلس میں چھینک ماری، تو آپ صلی اللہ علیہ وسلم نے اسے دعا دی اور فرمایا: «يَرْحَمُكَ اللّٰهُ» ”اللہ تجھ پر رحم فرمائے۔“ اس نے پھر چھینک ماری تو آپ صلی اللہ علیہ وسلم نے فرمایا: ”اسے زکام ہے۔۔“ [سنن ابي داود/كتاب الأدب /حدیث: 5037]

سیدنا ابوبردہ اپنے والد رضی اللہ عنہ سے روایت کرتے ہیں کہ یہودی لوگ نبی کریم صلی اللہ علیہ وسلم کی مجلس میں عمداً چھینکیں مارا کرتے تھے اور توقع کرتے تھے کہ آپ صلی اللہ علیہ وسلم انہیں دعا دیتے ہوئے «يَرْحَمُكُمُ اللّٰهُ» ”اللہ تم پر رحم فرمائے۔“ کہیں گے۔ مگر آپ صلی اللہ علیہ وسلم انہیں یوں جواب دیتے: «يَهْدِيْكُمُ اللّٰهُ وَيُصْلِحُ بَالَكُمْ» ”اللہ تمہیں ہدایت دے اور تمہارے احوال کی اصلاح فرمائے۔“ [سنن ابي داود/كتاب الأدب /حدیث: 5038]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم کی مجلس میں دو آدمیوں کو چھینک آئی تو آپ صلی اللہ علیہ وسلم نے ایک کو جواب دیا اور دوسرے کو نہ دیا۔ تو آپ صلی اللہ علیہ وسلم سے کہا گیا: ”اے اللہ کے رسول! دو آدمیوں نے چھینک ماری، مگر آپ نے ایک کو جواب دیا ہے۔“ احمد (احمد بن یونس) نے وضاحت کی کہ ”یہاں لفظ «فَشَمَّتَ أَحَدَهُمَا» ”ان میں سے ایک کو دعا دی“ تھے یا «فَسَمَّتَ أَحَدَهُمَا» ”ان میں سے ایک کو دعا دی“ اور دوسرے کو چھوڑ دیا ہے؟“ تو آپ صلی اللہ علیہ وسلم نے فرمایا: ”اس نے (جس کو میں نے جواب دیا ہے) اللہ کی حمد کی ہے اور اس نے اللہ کی حمد نہیں کی۔“ [سنن ابي داود/كتاب الأدب /حدیث: 5039]