حضرت ربیعہ رضی اللہ عنہ سے روایت ہے، انہوں نے فرمایا: ”ہم ایک سفر میں رسول اللہ صلی اللہ علیہ وسلم کے ہمراہ تھے کہ آسمان پر بادل چھا گئے اور قبلے کی سمت معلوم نہ ہو سکی۔ ہم نے (اندازے سے) نماز پڑھی اور (زمین پر) نشان لگا لیے۔ جب سورج طلوع ہوا تو معلوم ہوا کہ ہم نے قبلے کے سوا (کسی اور طرف) نماز پڑھی ہے۔ ہم نے نبی صلی اللہ علیہ وسلم سے یہ واقعہ بیان کیا تو اللہ تعالیٰ نے یہ آیت مبارکہ نازل فرما دی: ﴿فَأَيْنَمَا تُوَلُّوا فَثَمَّ وَجْهُ اللَّهِ﴾ [سورة البقرة: 115] ”تم جدھر بھی رخ کرو، ادھر ہی اللہ کا چہرہ ہے۔““ [سنن ابن ماجه/كتاب إقامة الصلاة والسنة/حدیث: 1020]

حضرت طارق بن عبداللہ محاربی رضی اللہ عنہ سے روایت ہے، نبی صلی اللہ علیہ وسلم نے فرمایا: ”جب تو نماز پڑھ رہا ہو تو اپنے سامنے ہرگز نہ تھوکنا، نہ دائیں طرف تھوکنا، البتہ بائیں طرف یا قدم کے نیچے تھوک سکتے ہو۔“ [سنن ابن ماجه/كتاب إقامة الصلاة والسنة/حدیث: 1021]

حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم کو مسجد کی قبلے والی دیوار پر بلغم لگا ہوا نظر آیا۔ آپ صلی اللہ علیہ وسلم لوگوں کی طرف متوجہ ہوئے اور فرمایا: ”تمہیں کیا ہو گیا ہے کہ ایک آدمی اپنے رب کی طرف متوجہ ہو کر کھڑا ہوتا ہے، پھر اپنے سامنے بلغم تھوک دیتا ہے؟ کیا تم میں سے کسی کو یہ بات پسند ہے کہ اس کے سامنے آ کر اس کے چہرے پر تھوک دیا جائے؟ جب کسی کو تھوکنا ہو تو اپنی بائیں طرف تھوک لے یا اپنے کپڑے میں اس طرح کر لے۔“ (امام ابن ماجہ رحمہ اللہ کے استاد حضرت ابو بکر بن ابی شیبہ رحمہ اللہ نے فرمایا:) امام اسماعیل ابن علیہ رحمہ اللہ نے (اس حدیث کی وضاحت کرتے ہوئے مجھے یوں کر کے دکھایا کہ) کپڑے میں تھوکا، پھر کپڑے کو مل دیا۔ [سنن ابن ماجه/كتاب إقامة الصلاة والسنة/حدیث: 1022]

حضرت حذیفہ رضی اللہ عنہ سے روایت ہے کہ انہوں نے حضرت شبث بن ربعی رحمہ اللہ کو سامنے کی طرف تھوکتے دیکھ کر فرمایا: ”اے شبث! اپنے سامنے مت تھوکا کرو، کیوں کہ رسول اللہ صلی اللہ علیہ وسلم ایسا کرنے سے منع فرمایا کرتے تھے اور آپ صلی اللہ علیہ وسلم نے فرمایا ہے: ”جب آدمی نماز میں کھڑا ہوتا ہے تو اللہ تعالیٰ اپنا چہرہ مبارک اس کی طرف متوجہ فرما دیتا ہے حتی کہ وہ نماز سے فارغ ہو جائے یا کوئی برا کام کرے۔““ [سنن ابن ماجه/كتاب إقامة الصلاة والسنة/حدیث: 1023]

حضرت انس بن مالک رضی اللہ عنہ سے روایت ہے کہ ”رسول اللہ صلی اللہ علیہ وسلم نے نماز کے دوران میں کپڑے میں تھوکا، پھر اسے مل دیا۔“ [سنن ابن ماجه/كتاب إقامة الصلاة والسنة/حدیث: 1024]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جس نے کنکریوں کو ہاتھ لگایا، اس نے فضول کام کیا۔“ [سنن ابن ماجه/كتاب إقامة الصلاة والسنة/حدیث: 1025]

حضرت معیقیب رضی اللہ عنہ سے روایت ہے کہ رسول اللہ صلی اللہ علیہ وسلم نے نماز کے دوران میں کنکریوں پر ہاتھ پھیرنے کے بارے میں فرمایا: ”اگر تم نے ضرور یہ کام کرنا ہو تو ایک بار کر لو۔“ [سنن ابن ماجه/كتاب إقامة الصلاة والسنة/حدیث: 1026]

حضرت ابو ذر رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جب کوئی شخص نماز پڑھنے کھڑا ہوتا ہے تو رحمت الٰہی اس کی طرف متوجہ ہوتی ہے، اس لیے اسے چاہیے کہ (دوران نماز میں) کنکریوں پر ہاتھ نہ پھیرے۔“ [سنن ابن ماجه/كتاب إقامة الصلاة والسنة/حدیث: 1027]

ام المومنین حضرت میمونہ رضی اللہ عنہا سے روایت ہے، انہوں نے فرمایا: ”رسول اللہ صلی اللہ علیہ وسلم چھوٹی چٹائی پر نماز ادا فرماتے تھے۔“ [سنن ابن ماجه/كتاب إقامة الصلاة والسنة/حدیث: 1028]

حضرت ابو سعید رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم نے چٹائی پر نماز ادا فرمائی۔“ [سنن ابن ماجه/كتاب إقامة الصلاة والسنة/حدیث: 1029]