حضرت اسماء بنت ابوبکر رضی اللہ عنہا سے روایت ہے، انہوں نے فرمایا: رسول اللہ صلی اللہ علیہ وسلم نے سورج گرہن کی نماز پڑھائی، آپ کھڑے ہوئے اور طویل قیام فرمایا، پھر رکوع کیا تو بہت طویل رکوع کیا، پھر سر اٹھایا (اور قومہ کیا)، پھر سجدہ کیا تو بہت طویل سجدہ کیا، پھر سر اٹھایا اور قیام کیا تو بہت طویل قیام کیا، پھر رکوع کیا تو بہت طویل رکوع کیا، پھر سر اٹھا کر قیام کیا تو بہت طویل قیام کیا، پھر رکوع کیا، پھر سر اٹھا کر قیام کیا تو بہت طویل قیام کیا، پھر رکوع کیا تو طویل رکوع کیا، پھر سر اٹھایا (اور قومہ کیا)، پھر سجدہ کیا تو طویل سجدہ کیا، پھر سر اٹھایا، پھر سجدہ کیا تو طویل سجدہ کیا، پھر نماز سے فارغ ہوئے تو فرمایا: ”جنت مجھ سے قریب ہو گئی تھی حتی کہ اگر میں جرأت کرتا تو اس کا پھل توڑ کر تمہارے پاس لے آتا اور جہنم مجھ سے قریب ہوئی حتی کہ میں نے کہا: اے رب! (کیا لوگوں پر عذاب آ جائے گا) جب کہ میں ان کے درمیان موجود ہوں؟“ نافع بن عمر رضی اللہ عنہ نے فرمایا: میرا خیال ہے انہوں نے (ابن ابی ملیکہ نے حدیث بیان کرتے ہوئے) یہ الفاظ بھی فرمائے تھے کہ رسول اللہ صلی اللہ علیہ وسلم نے فرمایا: ”میں نے (جہنم میں) ایک عورت دیکھی جسے اس کی ایک بلی پنجے مار رہی تھی، میں نے کہا: اس کا کیا معاملہ ہے؟ تو انہوں نے کہا: اس نے اس (بلی) کو بند کر دیا تھا حتی کہ وہ بھوک سے مر گئی، نہ اس نے اسے (خود) کھانا دیا، نہ اسے چھوڑا کہ زمین کے کیڑے مکوڑے کھا لیتی۔“ [سنن ابن ماجه/كتاب إقامة الصلاة والسنة/حدیث: 1265]

حضرت اسحاق بن عبداللہ بن کنانہ رحمہ اللہ سے روایت ہے انہوں نے کہا: ”مجھے (ایک شہر کے) امیر نے عبداللہ بن عباس رضی اللہ عنہ کی خدمت میں بھیجا کہ ان سے نماز استسقاء کا مسئلہ دریافت کروں۔“ ابن عباس رضی اللہ عنہ نے فرمایا: ”انہیں مجھ سے خود پوچھ لینے میں کیا چیز مانع تھی؟“ پھر فرمایا: ”رسول اللہ صلی اللہ علیہ وسلم عاجزی کے ساتھ سادہ لباس میں، خشوع و خضوع کے ساتھ، آہستہ رفتار سے، گڑگڑاتے ہوئے (عیدگاہ کی طرف) روانہ ہوئے، پھر آپ نے دو رکعت نماز ادا کی جس طرح عید کے موقع پر پڑھی جاتی ہے۔ آپ صلی اللہ علیہ وسلم نے تمہارے اس خطبے جیسا خطبہ نہیں دیا۔“ [سنن ابن ماجه/كتاب إقامة الصلاة والسنة/حدیث: 1266]

عباد بن تمیم رضی اللہ عنہ نے (اپنے اخیافی چچا) عبداللہ بن زید بن عاصم رضی اللہ عنہ سے روایت کی کہ ”انہوں نے نبی صلی اللہ علیہ وسلم کو دیکھا کہ آپ صلی اللہ علیہ وسلم بارش کی دعا کے لیے عید گاہ تشریف لے گئے، آپ صلی اللہ علیہ وسلم نے قبلے کی طرف رخ کیا، اپنی چادر پلٹی اور دو رکعت نماز ادا کی۔“ [سنن ابن ماجه/كتاب إقامة الصلاة والسنة/حدیث: 1267]

حضرت ابوہریرہ رضی اللہ عنہ سے روایت ہے انہوں نے فرمایا: ”ایک دن رسول اللہ صلی اللہ علیہ وسلم بارش کی دعا کرنے کے لیے باہر تشریف لے گئے۔ آپ صلی اللہ علیہ وسلم نے اذان اور اقامت کہلوائے بغیر ہمیں دو رکعتیں پڑھائیں پھر خطبہ دیا، اللہ سے دعا کی اور ہاتھ اٹھائے ہوئے قبلہ رخ ہو گئے، پھر اپنی چادر کو پلٹا یعنی دائیں حصے کو بائیں طرف اور بائیں کو دائیں طرف کر لیا۔“ [سنن ابن ماجه/كتاب إقامة الصلاة والسنة/حدیث: 1268]

حضرت شرحبیل بن سمط رحمہ اللہ سے روایت ہے کہ انہوں نے حضرت کعب رضی اللہ عنہ سے کہا: ”کعب بن مرہ! ہمیں رسول اللہ صلی اللہ علیہ وسلم کی حدیث سنائیے اور احتیاط کیجیے۔“ حضرت کعب رضی اللہ عنہ نے فرمایا: ”ایک آدمی نبی صلی اللہ علیہ وسلم کی خدمت میں حاضر ہوا اور عرض کیا: ”اے اللہ کے رسول! ہمارے لیے پانی کی دعا کیجیے۔“ رسول اللہ صلی اللہ علیہ وسلم نے اپنے ہاتھ اٹھا دیے اور فرمایا: «اللَّهُمَّ اسْقِنَا غَيْثًا مَرِيئًا مَرِيعًا طَبَقًا عَاجِلًا غَيْرَ رَائِثٍ نَافِعًا غَيْرَ ضَارٍّ» ”اے اللہ! ہم پر بارش نازل فرما جو خوش گوار ہو، (برکات اور رزق میں) اضافہ کر دینے والی ہو، ہر جگہ برسنے والی ہو (جل تھل ایک کر دے) جلدی نازل ہونے والی ہو، تاخیر کرنے والی نہ ہو، فائدے دینے والی ہو نقصان دہ نہ ہو۔“ (اللہ تعالیٰ نے دعا قبول فرمائی) ابھی نماز جمعہ سے فارغ نہیں ہوئے تھے کہ بارش آ گئی۔ (بارش مسلسل ہوتی رہی حتی کہ لوگ حاضر خدمت ہوئے اور بارش (کی کثرت) کی شکایت کی، انہوں نے کہا: ”اے اللہ کے رسول! (ہمارے تو) مکان گر گئے ہیں“، رسول اللہ صلی اللہ علیہ وسلم نے فرمایا: «اللَّهُمَّ حَوَالَيْنَا وَلَا عَلَيْنَا» ”اے اللہ! ہمارے ارد گرد (بارش برسا) ہم پر نہ برسا۔“ (فوراً) بادل پھٹ کر دائیں بائیں بکھرنے لگ گیا۔“ [سنن ابن ماجه/كتاب إقامة الصلاة والسنة/حدیث: 1269]

حضرت عبداللہ بن عباس رضی اللہ عنہما سے روایت ہے انہوں نے فرمایا: ”ایک اعرابی (خانہ بدوش) نبی صلی اللہ علیہ وسلم کی خدمت میں حاضر ہوا اور عرض کیا: اے اللہ کے رسول! میں آپ کے پاس ایسے لوگوں کے پاس سے آیا ہوں جن کا کوئی چرواہا سفر خرچ نہیں لیتا اور کوئی سانڈ دم نہیں ہلاتا۔ نبی صلی اللہ علیہ وسلم منبر پر تشریف فرما ہوئے۔ اللہ کی تعریف کی، پھر فرمایا: «اللَّهُمَّ اسْقِنَا غَيْثًا مُغِيثًا مَرِيئًا طَبَقًا مَرِيعًا غَدَقًا عَاجِلًا غَيْرَ رَائِثٍ» ”اے اللہ! ہم پر بارش نازل فرما جس سے ہماری فریاد رسی ہو جائے، خوشگوار ہو، ہر جگہ برسنے والی ہو (رزق میں) اضافہ کرنے والی ہو، بڑے قطروں والی ہو، جلدی نازل ہونے والی ہو، تاخیر کرنے والی نہ ہو۔“ پھر آپ صلی اللہ علیہ وسلم منبر سے نیچے تشریف لے آئے (اس کے بعد) جس سمت سے بھی کوئی (مسافر) آیا، اس نے یہی کہا: ہمارے ہاں بارش ہوئی ہے۔“ [سنن ابن ماجه/كتاب إقامة الصلاة والسنة/حدیث: 1270]

حضرت ابوہریرہ رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم نے بارش کی دعا کی (اور ہاتھ خوب اٹھائے) حتی کہ مجھے آپ صلی اللہ علیہ وسلم کی بغلوں کی سفیدی نظر آگئی۔“ (حدیث کے راوی) معتمر رحمہ اللہ بیان کرتے ہیں: ”میرا خیال ہے کہ نماز استسقاء کے موقع پر ایسا ہوا۔“ [سنن ابن ماجه/كتاب إقامة الصلاة والسنة/حدیث: 1271]

حضرت عبداللہ بن عمر رضی اللہ عنہما سے روایت ہے، انہوں نے فرمایا: ”میں بعض اوقات رسول اللہ صلی اللہ علیہ وسلم کے چہرہ اقدس کو دیکھتا جب کہ آپ صلی اللہ علیہ وسلم منبر پر (بارش کی دعا کے لیے) تشریف فرما ہوتے اور آپ صلی اللہ علیہ وسلم کے منبر سے اترنے سے پہلے مدینے کا ہر پرنالہ پورے زور سے بہنے لگتا، تو مجھے شاعر کا یہ شعر یاد آ جاتا: ”وہ سفید فام شخصیت (رسول اکرم صلی اللہ علیہ وسلم ) جس کے چہرے کے وسیلے سے بادل سے بارش مانگی جاتی ہے، یتیموں کا نگہبان، بیواؤں کا محافظ۔“ یہ ابوطالب کا کلام ہے۔“ [سنن ابن ماجه/كتاب إقامة الصلاة والسنة/حدیث: 1272]

حضرت عبداللہ بن عباس رضی اللہ عنہما سے روایت ہے، انہوں نے فرمایا: ”میں رسول اللہ صلی اللہ علیہ وسلم کے بارے میں گواہی دیتا ہوں کہ آپ صلی اللہ علیہ وسلم نے خطبے سے پہلے (عید کی) نماز پڑھی، پھر خطبہ دیا، آپ صلی اللہ علیہ وسلم نے محسوس کیا کہ میں عورتوں کو (اپنی بات) نہیں سنا سکا (کیوں کہ وہ دور تھیں) چنانچہ آپ صلی اللہ علیہ وسلم خواتین کے پاس تشریف لے گئے اور انہیں وعظ و نصیحت کی اور انہیں صدقہ کرنے کا حکم دیا۔ حضرت بلال رضی اللہ عنہ نے اپنے ہاتھ اس طرح کیے ہوئے تھے، چنانچہ (ہر) عورت نے بالی، انگوٹھی اور (ایسی ہی) چیز (جو کسی کے پاس تھی کپڑے میں) ڈالنا شروع کر دی۔“ [سنن ابن ماجه/كتاب إقامة الصلاة والسنة/حدیث: 1273]