حضرت سعد القرظ رضی اللہ عنہ سے روایت ہے کہ ”نبی صلی اللہ علیہ وسلم نماز عید کے لیے پیدل تشریف لے جاتے تھے اور پیدل واپس آتے تھے۔“ [سنن ابن ماجه/كتاب إقامة الصلاة والسنة/حدیث: 1294]

حضرت عبداللہ بن عمر رضی اللہ عنہما سے روایت ہے، انہوں نے فرمایا: ”رسول اللہ صلی اللہ علیہ وسلم نمازِ عید کے لیے پیدل تشریف لے جاتے تھے اور پیدل واپس آتے تھے۔“ [سنن ابن ماجه/كتاب إقامة الصلاة والسنة/حدیث: 1295]

حضرت علی رضی اللہ عنہ سے روایت ہے، انہوں نے فرمایا: ”نمازِ عید کے لیے چل کر جانا سنت ہے۔“ [سنن ابن ماجه/كتاب إقامة الصلاة والسنة/حدیث: 1296]

حضرت ابورافع رضی اللہ عنہ سے روایت ہے کہ ”رسول اللہ صلی اللہ علیہ وسلم عید کی نماز کے لیے پیدل جاتے تھے۔“ [سنن ابن ماجه/كتاب إقامة الصلاة والسنة/حدیث: 1297]

حضرت سعد القرظ رضی اللہ عنہ سے روایت ہے کہ ”نبی صلی اللہ علیہ وسلم جب عیدین کی نماز کے لیے تشریف لے جاتے تو سعید بن ابی العاص کے گھر کے پاس سے گزرتے، پھر خیموں والوں کے پاس سے گزرتے، پھر (نماز کے بعد) دوسرے راستے سے، یعنی بنو زریق کے راستے سے واپس ہوتے، پھر حضرت عمار بن یاسر رضی اللہ عنہ کے گھر کے پاس سے اور حضرت ابو ہریرہ رضی اللہ عنہ کے گھر کے پاس سے گزر کر میدان میں پہنچتے (اور وہاں سے مسجد نبوی اور امہات المومنین کے گھروں کی طرف چلتے)۔“ [سنن ابن ماجه/كتاب إقامة الصلاة والسنة/حدیث: 1298]

حضرت عبداللہ بن عمر رضی اللہ عنہ سے روایت ہے کہ وہ عید کی نماز کے لیے ایک راستے سے جاتے اور دوسرے سے واپس آتے اور بیان کرتے کہ ”رسول اللہ صلی اللہ علیہ وسلم بھی اسی طرح کرتے تھے۔“ [سنن ابن ماجه/كتاب إقامة الصلاة والسنة/حدیث: 1299]

حضرت ابو رافع رضی اللہ عنہ سے روایت ہے کہ ”نبی صلی اللہ علیہ وسلم عید کی نماز کے لیے پیدل تشریف لے جاتے تھے اور جس راستے سے جاتے تھے اس کے علاوہ دوسرے راستے سے واپس تشریف لاتے تھے۔“ [سنن ابن ماجه/كتاب إقامة الصلاة والسنة/حدیث: 1300]

حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم جب عید کی نماز کے لیے باہر تشریف لے جاتے تو ”جس راستے سے جاتے اس کے سوا دوسرے راستے سے واپس آتے تھے۔“ [سنن ابن ماجه/كتاب إقامة الصلاة والسنة/حدیث: 1301]

حضرت عامر رضی اللہ عنہ سے روایت ہے، انہوں نے فرمایا: ”حضرت عیاش اشعری رضی اللہ عنہ نے ایک عید انبار میں منائی تو فرمایا: ”کیا بات ہے میں تمہیں گاتے بجاتے نہیں دیکھ رہا جس طرح رسول اللہ صلی اللہ علیہ وسلم کی موجودگی میں گانا بجانا ہوتا تھا؟“” [سنن ابن ماجه/كتاب إقامة الصلاة والسنة/حدیث: 1302]

حضرت قیس بن سعد رضی اللہ عنہ سے روایت ہے کہ انہوں نے فرمایا: ”رسول اللہ صلی اللہ علیہ وسلم کے عہد مبارک میں جو جو کچھ ہوتا تھا، وہ سب میں نے (تم لوگوں کو کرتے) دیکھ لیا ہے سوائے ایک چیز کے۔ رسول اللہ صلی اللہ علیہ وسلم کی موجودگی میں عید الفطر کے دن گانا بجانا ہوتا تھا۔ (جو تم نے ترک کر دیا ہے۔)“ [سنن ابن ماجه/كتاب إقامة الصلاة والسنة/حدیث: 1303]