حضرت جریر بن عبد اللہ بجلی رضی اللہ عنہ سے روایت ہے، انہوں نے فرمایا: ”ہم لوگ میت والوں کے ہاں جمع ہونے کو اور (جمع ہونے والوں کے لیے) کھانا تیار کرنے کو نوحہ شمار کرتے تھے۔“ [سنن ابن ماجه/كتاب الجنائز/حدیث: 1612]

حضرت عبداللہ بن عباس رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”بے وطنی کی موت شہادت ہے۔“ [سنن ابن ماجه/كتاب الجنائز/حدیث: 1613]

حضرت عبداللہ بن عمرو رضی اللہ عنہ سے روایت ہے، انہوں نے فرمایا کہ مدینہ میں ایک آدمی فوت ہو گیا، اس کی ولادت بھی مدینہ میں ہوئی تھی۔ نبی صلی اللہ علیہ وسلم نے اس کا جنازہ پڑھایا اور فرمایا: ”کاش! وہ اپنے مقامِ پیدائش کے سوا (کسی اور مقام پر) فوت ہوتا۔“ حاضرین میں سے ایک صاحب نے کہا: اے اللہ کے رسول! (آپ یہ تمنا) کیوں (کر رہے ہیں؟) آپ صلی اللہ علیہ وسلم نے فرمایا: ”جب آدمی اپنی پیدائش کی جگہ کے علاوہ کسی اور مقام پر فوت ہوتا ہے تو اس کے لیے مقامِ پیدائش سے مقامِ وفات تک پیمائش کر کے (اس کے برابر جگہ) جنت میں دی جاتی ہے۔“ [سنن ابن ماجه/كتاب الجنائز/حدیث: 1614]

حضرت ابو ہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جو شخص بیمار ہو کر مرا، وہ شہید ہوا، اسے قبر کے عذاب سے محفوظ رکھا جائے گا اور اسے صبح و شام جنت سے رزق دیا جاتا ہے۔“ [سنن ابن ماجه/كتاب الجنائز/حدیث: 1615]

حضرت عائشہ رضی اللہ عنہا سے روایت ہے، رسول اللہ صلی اللہ علیہ وسلم نے فرمایا: ”میت کی ہڈی توڑنا ایسے ہی ہے جیسے اس کی زندگی میں توڑنا۔“ [سنن ابن ماجه/كتاب الجنائز/حدیث: 1616]

ام المومنین حضرت ام سلمہ رضی اللہ عنہا سے روایت ہے، نبی صلی اللہ علیہ وسلم نے فرمایا: ”مردے کی ہڈی توڑنا گناہ کے لحاظ سے ایسا ہی ہے جیسے زندہ کی ہڈی توڑنا۔“ [سنن ابن ماجه/كتاب الجنائز/حدیث: 1617]

عبید اللہ بن عبد اللہ بن عقبہ رحمہ اللہ سے روایت ہے انہوں نے کہا: ”میں نے عائشہ رضی اللہ عنہا سے استفسار کرتے ہوئے کہا: ”امی جان! مجھے اللہ کے رسول صلی اللہ علیہ وسلم کے (قریبِ وفات) مرض کے متعلق بتائیے۔“ انہوں نے فرمایا: ”رسول اللہ صلی اللہ علیہ وسلم بیمار ہو گئے۔ آپ صلی اللہ علیہ وسلم پھونک مارنے لگے۔ ہم آپ صلی اللہ علیہ وسلم کی پھونک کو منقیٰ کھانے والے کی پھونک سے تشبیہ دیتے تھے۔ آپ صلی اللہ علیہ وسلم باری باری ازواجِ مطہرات کے ہاں اقامت فرماتے تھے۔ جب آپ صلی اللہ علیہ وسلم زیادہ بیمار ہو گئے تو امہاتِ المومنین سے اجازت طلب کی کہ نبی صلی اللہ علیہ وسلم خود عائشہ رضی اللہ عنہا کے گھر میں ٹھہرے رہیں اور ازواجِ مطہرات اپنی اپنی باری پر نبی صلی اللہ علیہ وسلم کی خدمت میں حاضر ہوتی رہیں۔“ عائشہ رضی اللہ عنہا نے فرمایا: ”رسول اللہ صلی اللہ علیہ وسلم دو آدمیوں کے درمیان (ان کے سہارے سے چلتے ہوئے) میرے گھر میں داخل ہوئے اور (ضعف کی وجہ سے) آپ صلی اللہ علیہ وسلم کے قدم مبارک زمین پر لکیر بناتے آ رہے تھے۔ ان دو حضرات میں سے ایک عباس رضی اللہ عنہ تھے“۔ (عبید اللہ بیان کرتے ہیں) میں نے یہ حدیث ابن عباس رضی اللہ عنہما کے سامنے بیان کی۔ انہوں نے فرمایا: ”کیا آپ کو معلوم ہے کہ وہ دوسرے صاحب کون تھے جن کا عائشہ رضی اللہ عنہا نے نام نہیں لیا؟ وہ علی بن ابی طالب رضی اللہ عنہ تھے“۔“ [سنن ابن ماجه/كتاب الجنائز/حدیث: 1618]

حضرت عائشہ رضی اللہ عنہا سے روایت ہے، انہوں نے فرمایا: نبی صلی اللہ علیہ وسلم ان الفاظ کے ساتھ اللہ کی پناہ حاصل کرتے تھے: «أَذْهِبِ الْبَاسَ رَبَّ النَّاسِ، وَاشْفِ أَنْتَ الشَّافِي، لَا شِفَاءَ إِلَّا شِفَاؤُكَ، شِفَاءً لَا يُغَادِرُ سَقَمًا» ”اے انسانوں کے رب! بیماری دور کر دے اور شفا دے دے تو ہی شفا دینے والا ہے، تیری شفا کے سوا کوئی شفا نہیں، ایسی شفا عطا فرما جو بیماری کو بالکل باقی نہ چھوڑے۔“ جس بیماری میں نبی صلی اللہ علیہ وسلم کی وفات ہوئی، اس کے دوران میں جب طبیعت زیادہ ناساز ہوگئی تو میں یہ دعا پڑھتی اور نبی صلی اللہ علیہ وسلم کا ہاتھ پکڑ کر آپ کے جسم پر پھیرتی تھی۔ (حیاتِ مبارکہ کے آخری دن جب میں نے دم کرنا چاہا) تو رسول اللہ صلی اللہ علیہ وسلم نے اپنا ہاتھ مبارک میرے ہاتھ سے نکال لیا اور فرمایا: «اللَّهُمَّ اغْفِرْ لِي وَأَلْحِقْنِي بِالرَّفِيقِ الْأَعْلَى» ”اے اللہ! میری مغفرت فرما اور مجھے بلند مرتبہ ساتھیوں سے ملا دے۔“ ام المومنین نے فرمایا: ”یہ آخری الفاظ ہیں جو میں نے آپ صلی اللہ علیہ وسلم کی زبانِ مبارک سے سنے۔“ [سنن ابن ماجه/كتاب الجنائز/حدیث: 1619]

حضرت عائشہ رضی اللہ عنہا سے روایت ہے، انہوں نے فرمایا: ”میں نے رسول اللہ صلی اللہ علیہ وسلم سے سنا، آپ فرما رہے تھے: ”جو بھی نبی بیمار ہوتا ہے، اسے دنیا اور آخرت میں سے ایک چیز کے انتخاب کا اختیار دیا جاتا ہے۔““ ام المومنین رضی اللہ عنہا نے فرمایا: ”جب رسول اللہ صلی اللہ علیہ وسلم پر وہ بیماری آئی جس میں آپ کی وفات ہوئی (اس دوران میں ایک دفعہ) نبی صلی اللہ علیہ وسلم کی آواز بھاری ہوگئی۔ میں نے سنا تو آپ فرما رہے تھے: ﴿مَعَ الَّذِينَ أَنْعَمَ اللَّهُ عَلَيْهِمْ مِنَ النَّبِيِّينَ وَالصِّدِّيقِينَ وَالشُّهَدَاءِ وَالصَّالِحِينَ﴾ [سورة النساء: 69] ”ان لوگوں کے ساتھ جن پر اللہ نے انعامات نازل کیے ہیں، نبیوں، صدیقوں، شہیدوں اور نیک لوگوں میں سے۔“ تب مجھے یقین ہو گیا کہ نبی صلی اللہ علیہ وسلم کو وہ اختیار دے دیا گیا ہے۔“ [سنن ابن ماجه/كتاب الجنائز/حدیث: 1620]

ام المومنین حضرت عائشہ رضی اللہ عنہا سے روایت ہے، انہوں نے فرمایا: ”(ایک بار) نبی صلی اللہ علیہ وسلم کی ازواج مطہرات رضی اللہ عنہن (ایک جگہ) جمع تھیں۔ ان میں سے کوئی بھی غیر حاضر نہ تھی۔ (اتنے میں) فاطمہ رضی اللہ عنہا تشریف لے آئیں، ان کی چال رسول اللہ صلی اللہ علیہ وسلم کی چال سے انتہائی مشابہ تھی۔ نبی صلی اللہ علیہ وسلم نے فرمایا: ”میری بیٹی کو خوش آمدید۔“ پھر انہیں اپنی بائیں طرف بٹھا لیا اور چپکے سے انہیں کوئی بات بتائی تو فاطمہ رضی اللہ عنہا رونے لگیں۔ رسول اللہ صلی اللہ علیہ وسلم نے انہیں پھر چپکے سے کوئی بات بتائی تو وہ ہنس پڑیں۔ میں نے ان سے کہا: ”آپ رو کیوں رہی تھیں؟“ انہوں نے فرمایا: ”میں رسول اللہ صلی اللہ علیہ وسلم کا راز ظاہر نہیں کر سکتی۔“ میں نے کہا: ”میں نے کبھی اس طرح غم کے فوراً بعد خوشی حاصل ہوتے نہیں دیکھی۔“ جب وہ روئی تھیں، تو میں نے ان سے کہا: ”رسول اللہ صلی اللہ علیہ وسلم نے ہم سب کو چھوڑ کر آپ سے خاص طور پر بات کی ہے (یہ تو ایک شرف اور خوشی کی بات ہے) پھر بھی آپ رو رہی ہیں؟“ میں نے ان سے پوچھا کہ نبی صلی اللہ علیہ وسلم نے کیا فرمایا تھا۔ انہوں نے کہا: ”میں اللہ کے رسول صلی اللہ علیہ وسلم کا راز ظاہر نہیں کر سکتی۔“ جب نبی صلی اللہ علیہ وسلم کی وفات ہو گئی تو اس کے بعد (کسی مناسب موقع پر) میں نے ان سے (پھر) پوچھ لیا کہ آپ صلی اللہ علیہ وسلم نے کیا فرمایا تھا۔ حضرت فاطمہ رضی اللہ عنہا نے فرمایا: ”رسول اللہ صلی اللہ علیہ وسلم مجھے بتا رہے تھے کہ جبریل علیہ السلام آپ صلی اللہ علیہ وسلم کے ساتھ ہر سال ایک بار قرآن مجید کا دور کیا کرتے تھے، اس سال دو بار دور کیا ہے (اور آپ صلی اللہ علیہ وسلم نے فرمایا:) ”میرا یہی خیال ہے کہ میرا وقت قریب آ گیا ہے اور میرے گھرانے میں سب سے پہلے تم مجھ سے ملو گی اور میں تمہارا بہتر پیش رو ہوں۔“ (یہ سن کر) مجھے رونا آ گیا، پھر نبی صلی اللہ علیہ وسلم نے مجھ سے سر گوشی میں فرمایا: ”کیا تم اس بات سے خوش نہیں ہو کہ تم مومنوں کی عورتوں کی سردار ہو؟ یا فرمایا: کہ تم اس امت کی عورتوں کی سردار ہو؟“ اس (خوشخبری) کی وجہ سے مجھے ہنسی آ گئی۔“ [سنن ابن ماجه/كتاب الجنائز/حدیث: 1621]