حضرت عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص کسی مصیبت زدہ کو تسلی دے، اسے بھی اس (مصیبت زدہ) کے برابر ثواب ملے گا۔“ [سنن ابن ماجه/كتاب الجنائز/حدیث: 1602]

حضرت ابوہریرہ رضی اللہ عنہ سے روایت ہے، نبی صلی اللہ علیہ وسلم نے فرمایا: ”جس آدمی کے تین بچے فوت ہو جائیں، وہ جہنم میں داخل نہیں ہوگا مگر قسم پوری کرنے کے لیے۔“ [سنن ابن ماجه/كتاب الجنائز/حدیث: 1603]

حضرت عتبہ بن عبد سلمی رضی اللہ عنہ سے روایت ہے، انہوں نے کہا: میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم نے فرمایا: ”جس مسلمان کے تین بچے فوت ہو جائیں جو گناہ کی عمر کو نہ پہنچے ہوں وہ جنت کے آٹھوں دروازوں پر اس کا استقبال کریں گے جس دروازے سے چاہے (جنت میں) داخل ہوجائے۔“ [سنن ابن ماجه/كتاب الجنائز/حدیث: 1604]

حضرت انس بن مالک رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”جن دو مسلمانوں (میاں بیوی) کے تین بچے فوت ہو جائیں جو گناہ کی عمر کو نہ پہنچے ہوں تو اللہ تعالیٰ ان پر رحمت کر کے انہیں جنت میں داخل کر دے گا۔“ [سنن ابن ماجه/كتاب الجنائز/حدیث: 1605]

حضرت عبداللہ بن مسعود رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جس نے تین بچے آگے بھیجے جو گناہ کی عمر کو نہ پہنچے ہوں، وہ اس کے لیے جہنم سے بچاؤ کے لیے ایک مضبوط رکاوٹ بن جائیں گے۔“ حضرت ابوذر رضی اللہ عنہ نے عرض کیا: میں نے دو بچے آگے بھیجے ہیں۔ آپ صلی اللہ علیہ وسلم نے فرمایا: ”اور دو بھی (جہنم سے حفاظت کا باعث بن جائیں گے)۔“ قُرّاء کے سردار حضرت ابی بن کعب رضی اللہ عنہ نے فرمایا: میں نے ایک بچہ آگے بھیجا ہے۔ نبی صلی اللہ علیہ وسلم نے فرمایا: ”اور ایک بھی (جہنم سے بچاؤ کا باعث ہوگا)۔“ [سنن ابن ماجه/كتاب الجنائز/حدیث: 1606]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”مجھے ساقط الحمل بچہ اپنے آگے بھیجنا، سوار اپنے پیچھے چھوڑنے سے زیادہ پسند ہے۔“ [سنن ابن ماجه/كتاب الجنائز/حدیث: 1607]

حضرت علی رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”ناتمام بچہ اپنے رب سے جھگڑا کرے گا (اصرار کے ساتھ شفاعت کرے گا) جب اس کا رب اس کے والدین کو جہنم میں داخل کرے گا۔ (اس کی اس شفاعت کے نتیجے میں) اسے کہا جائے گا: اے اپنے رب سے جھگڑنے والے ناتمام بچے! اپنے ماں باپ کو جنت میں لے جا، چنانچہ وہ انہیں اپنی آنول سے کھینچ کر جنت میں داخل کر دے گا۔“ ابو علی رحمہ اللہ نے کہا: ” «يُرَاغِمُ رَبَّهُ» کے معنی ہیں «يُغَاضِبُ» کہ وہ اپنے رب سے ناراضی کا اظہار کرے گا۔“ [سنن ابن ماجه/كتاب الجنائز/حدیث: 1608]

حضرت معاذ بن جبل رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”قسم ہے اس ذات کی جس کے ہاتھ میں میری جان ہے! ناتمام بچہ اپنی ماں کو آنول کے ذریعے سے کھینچ کر جنت میں لے جائے گا جب کہ اس نے اس پر صبر کیا ہو۔“ [سنن ابن ماجه/كتاب الجنائز/حدیث: 1609]

حضرت عبداللہ بن جعفر رضی اللہ عنہ سے روایت ہے، انہوں نے فرمایا کہ جب جعفر (بن ابی طالب رضی اللہ عنہ) کی وفات کی خبر آئی تو رسول اللہ صلی اللہ علیہ وسلم نے فرمایا: «اِصْنَعُوا لِآلِ جَعْفَرٍ طَعَامًا، فَقَدْ أَتَاهُمْ مَا يَشْغَلُهُمْ، أَوْ قَالَ: أَتَاهُمْ أَمْرٌ يَشْغَلُهُمْ» ”جعفر کے گھر والوں کے لیے کھانا تیار کرو، ان کے پاس وہ چیز آ گئی ہے، یا فرمایا: وہ معاملہ آ گیا ہے جس نے انہیں مشغول کر دیا ہے۔“ [سنن ابن ماجه/كتاب الجنائز/حدیث: 1610]

حضرت اسماء بنت عمیس رضی اللہ عنہا سے روایت ہے، انہوں نے فرمایا: جب جعفر رضی اللہ عنہ شہید ہوئے تو رسول اللہ صلی اللہ علیہ وسلم اپنے گھر والوں کے پاس تشریف لے گئے اور فرمایا: ”جعفر رضی اللہ عنہ کے گھر والے مرحوم کی وجہ سے مشغول ہیں (غم کی وجہ سے کھانا وغیرہ تیار کرنے کی طرف توجہ نہیں کر سکتے) تم لوگ ان کے لیے کھانا تیار کرو۔“ عبداللہ بن ابی بکر رضی اللہ عنہ نے فرمایا: یہ طریقہ جاری رہا حتی کہ وہ فخر ومباہات اور شہرت کا سبب بن گیا، چنانچہ اسے ترک کر دیا گیا۔ [سنن ابن ماجه/كتاب الجنائز/حدیث: 1611]