حضرت ام کرز رضی اللہ عنہا سے روایت ہے، انہوں نے فرمایا: ”میں نے نبی صلی اللہ علیہ وسلم سے سنا، آپ صلی اللہ علیہ وسلم فرما رہے تھے: ”لڑکے کی طرف سے دو ایک جیسی بکریاں اور لڑکی کی طرف سے ایک بکری (عقیقہ کے طور پر ذبح کی جائے۔)““ [سنن ابن ماجه/كتاب الذبائح/حدیث: 3162]

حضرت عائشہ رضی اللہ عنہا سے روایت ہے، انہوں نے فرمایا: ”رسول اللہ صلی اللہ علیہ وسلم نے ہمیں حکم دیا کہ ہم لڑکے کی طرف سے دو بکریاں اور لڑکی کی طرف سے ایک بکری عقیقہ کے طور پر ذبح کریں۔“ [سنن ابن ماجه/كتاب الذبائح/حدیث: 3163]

حضرت سلمان بن عامر رضی اللہ عنہ سے روایت ہے، انہوں نے نبی صلی اللہ علیہ وسلم سے سنا، آپ فرما رہے تھے: ”بچے کے ساتھ عقیقہ ہے، چنانچہ اس کی طرف سے خون بہاؤ اور اس کا میل کچیل دور کرو۔“ [سنن ابن ماجه/كتاب الذبائح/حدیث: 3164]

حضرت سمرہ رضی اللہ عنہ سے روایت ہے، نبی کریم صلی اللہ علیہ وسلم نے فرمایا: ”ہر لڑکا اپنے عقیقے کے بدلے گروی ہے، ساتویں دن اس کی طرف سے (عقیقے کا جانور) ذبح کیا جائے، اس کے سر کے بال اتارے جائیں اور اس کا نام رکھا جائے۔“ [سنن ابن ماجه/كتاب الذبائح/حدیث: 3165]

حضرت یزید بن عبد مزنی رضی اللہ عنہ سے روایت ہے، نبی صلی اللہ علیہ وسلم نے فرمایا: ”لڑکے کی طرف سے عقیقہ کیا جائے، اور اس کے سر کو خون نہ لگایا جائے۔“ [سنن ابن ماجه/كتاب الذبائح/حدیث: 3166]

حضرت نبیشہ (بن عبداللہ ہذلی) رضی اللہ عنہ سے روایت ہے کہ ایک آدمی نے رسول اللہ صلی اللہ علیہ وسلم کو آواز دے کر (اپنی طرف متوجہ کیا اور) کہا: ”اے اللہ کے رسول صلی اللہ علیہ وسلم ! ہم زمانہ جاہلیت میں رجب کے مہینے میں عتیرہ ذبح کیا کرتے تھے، اب آپ صلی اللہ علیہ وسلم ہمیں کیا حکم فرماتے ہیں؟“ رسول اللہ صلی اللہ علیہ وسلم نے فرمایا: ”اللہ کے نام پر ذبح کرو، چاہے کسی بھی مہینے میں ہو، اور اللہ (کی رضا) کے لیے نیکی کرو اور کھانا کھلاؤ۔“ حاضرین نے عرض کیا: ”اے اللہ کے رسول صلی اللہ علیہ وسلم ! ہم زمانہ جاہلیت میں فرع کے نام سے جانور ذبح کیا کرتے تھے، اب آپ صلی اللہ علیہ وسلم کا کیا حکم ہے؟“ آپ صلی اللہ علیہ وسلم نے فرمایا: ”ہر چرنے والے جانوروں (کے ریوڑ) میں فرع (مشروع) ہے، جو تیرے مویشی سے پیدا ہو، حتیٰ کہ جب وہ بوجھ اٹھانے (یا جفتی) کے قابل ہو جائے تو اسے ذبح کر کے اس کا گوشت مسافروں پر صدقہ کر دے، یہی بات بہتر ہے۔“ [سنن ابن ماجه/كتاب الذبائح/حدیث: 3167]

حضرت ابوہریرہ رضی اللہ عنہ سے روایت ہے، نبی صلی اللہ علیہ وسلم نے فرمایا: ”کوئی «فَرَعَ» (فرعہ) نہیں اور کوئی «عَتِيرَةَ» (عتیرہ) نہیں۔“ (ابن ماجہ کے استاذ) ہشام بن عمار رحمہ اللہ بیان کرتے ہیں: ” «الْفَرَعُ» (فرعہ) (جانور کا) پہلا بچہ ہوتا تھا اور «الْعَتِيرَةُ» (عتیرہ) اس بکری کو کہتے تھے جو گھر والے رجب میں ذبح کرتے تھے۔“ [سنن ابن ماجه/كتاب الذبائح/حدیث: 3168]

حضرت عبداللہ بن عمر رضی اللہ عنہما سے روایت ہے، نبی صلی اللہ علیہ وسلم نے فرمایا: ” «لَا فَرَعَ وَلَا عَتِيرَةَ» ”کوئی فرعہ نہیں اور کوئی عتیرہ نہیں۔“”ابن ماجہ رحمہ اللہ نے فرمایا: ”یہ حدیث عدنی کی نادر حدیثوں میں سے ہے۔“ [سنن ابن ماجه/كتاب الذبائح/حدیث: 3169]

حضرت شداد بن اوس (بن ثابت) رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اللہ عزوجل نے ہر چیز پر احسان کرنا فرض کیا ہے، لہٰذا جب تم قتل کرو تو اچھے انداز سے قتل کرو اور جب تم ذبح کرو تو اچھے انداز سے ذبح کرو۔ آدمی کو چاہیے کہ اپنی چھری تیز کرے اور ذبح ہونے والے جانور کو آرام پہنچائے۔“ [سنن ابن ماجه/كتاب الذبائح/حدیث: 3170]

حضرت ابو سعید خدری رضی اللہ عنہ سے روایت ہے کہ نبی صلی اللہ علیہ وسلم ایک آدمی کے پاس سے گزرے جو ایک بکری کو کان سے پکڑ کر کھینچے لیے جا رہا تھا۔ آپ صلی اللہ علیہ وسلم نے فرمایا: ”اس کا کان چھوڑ دے، گردن سے پکڑ لے۔“ [سنن ابن ماجه/كتاب الذبائح/حدیث: 3171]