حضرت ابو عبدالرحمان سفینہ رضی اللہ عنہ سے روایت ہے کہ ایک آدمی نے حضرت علی رضی اللہ عنہ کی دعوت کی۔ اس نے ان کے لیے کھانا تیار کیا۔ حضرت فاطمہ رضی اللہ عنہا نے فرمایا: ”کاش ہم نبی صلی اللہ علیہ وسلم کی بھی دعوت کرتے اور آپ صلی اللہ علیہ وسلم ہمارے ساتھ کھانا کھاتے۔“ (اس تجویز کے مطابق) انہوں نے نبی صلی اللہ علیہ وسلم کی دعوت کی۔ آپ صلی اللہ علیہ وسلم تشریف لائے اور اپنا ہاتھ دروازے کی چوکھٹ پر رکھا۔ آپ صلی اللہ علیہ وسلم کو گھر میں ایک طرف باریک پردہ نظر آیا تو آپ صلی اللہ علیہ وسلم واپس لوٹ گئے۔ حضرت فاطمہ رضی اللہ عنہا نے حضرت علی رضی اللہ عنہ سے کہا: ”جلدی سے جائیے اور رسول اللہ صلی اللہ علیہ وسلم سے عرض کیجیے: اے اللہ کے رسول صلی اللہ علیہ وسلم ! آپ صلی اللہ علیہ وسلم واپس کیوں تشریف لے گئے؟“ (حضرت علی رضی اللہ عنہ کے دریافت کرنے پر) نبی صلی اللہ علیہ وسلم نے فرمایا: ”مزین گھر میں داخل ہونا میری شان کے لائق نہیں۔“ [سنن ابن ماجه/كتاب الأطعمة/حدیث: 3360]

حضرت عبداللہ بن عمر رضی اللہ عنہ سے روایت ہے، وہ کھانا کھا رہے تھے کہ حضرت عمر رضی اللہ عنہ تشریف لے آئے۔ انہوں نے مجلس کے احترام والے مقام پر انہیں جگہ دی۔ (حضرت عمر رضی اللہ عنہ بیٹھ گئے اور کھانا شروع کرتے ہوئے) فرمایا: «بِسْمِ اللّٰهِ» ”اللہ کے نام سے“، پھر ہاتھ بڑھا کر ایک لقمہ لیا، پھر دوسرا لقمہ لیا، پھر فرمایا: ”مجھے چکنائی کا مزا محسوس ہو رہا ہے، اور یہ چکنائی گوشت کی چکنائی نہیں (گوشت میں تھوڑی بہت چربی ہوا کرتی ہے)۔“ حضرت عبداللہ رضی اللہ عنہ نے عرض کیا: ”امیر المومنین! میں فربہ (جانور کے) گوشت کی تلاش میں، اسے خریدنے بازار گیا، مجھے وہ مہنگا محسوس ہوا۔ میں نے ایک درہم کا دبلے (جانور کے گوشت) میں سے خرید لیا (جس میں چربی نہیں تھی) اور اس پر ایک درہم کا گھی ڈال لیا، میں چاہتا تھا کہ میرے بچوں کو ایک ایک ہڈی مل جائے۔“ حضرت عمر رضی اللہ عنہ نے فرمایا: ”رسول اللہ صلی اللہ علیہ وسلم کے پاس جب بھی یہ دونوں چیزیں (گوشت اور گھی) جمع ہو جاتی تھیں، آپ صلی اللہ علیہ وسلم ان میں سے ایک تناول فرماتے تھے اور دوسری صدقہ کر دیتے تھے۔“ حضرت عبداللہ رضی اللہ عنہ نے کہا: ”اے امیر المومنین! (اب تو) تناول فرمائیے، (آئندہ) جب بھی میرے پاس یہ دونوں جمع ہوں گے، میں بھی اسی طرح کیا کروں گا۔“ حضرت عمر رضی اللہ عنہ نے فرمایا: ”میں نہیں کھاؤں گا۔“ [سنن ابن ماجه/كتاب الأطعمة/حدیث: 3361]

حضرت ابوذر رضی اللہ عنہ سے روایت ہے، نبی صلی اللہ علیہ وسلم نے فرمایا: ”جب تو شوربہ تیار کرے تو اس میں پانی زیادہ ڈال لیا کرو اور اس میں سے کچھ شوربہ اپنے پڑوسیوں کو دے دیا کرو۔“ [سنن ابن ماجه/كتاب الأطعمة/حدیث: 3362]

حضرت معد بن طلحہ یعمری رحمہ اللہ سے روایت ہے کہ حضرت عمر رضی اللہ عنہ جمعے کے دن خطبہ دینے کھڑے ہوئے، آپ نے اللہ کی حمد و ثنا کے بعد فرمایا: ”اے لوگو! تم دو پودے کھاتے ہو، میں تو برا ہی سمجھتا ہوں، یعنی یہ لہسن اور یہ پیاز۔ میں نے رسول اللہ صلی اللہ علیہ وسلم کے زمانے میں دیکھا ہے کہ اگر کسی آدمی سے اس کی بو محسوس ہوتی تو اس کا ہاتھ پکڑ کر اسے بقیع (میدان) کی طرف نکال دیا جاتا تھا، اس لیے جس نے ضرور انہیں کھانا ہو وہ انہیں پکا کر (ان کی بو) ختم کر دے۔“ [سنن ابن ماجه/كتاب الأطعمة/حدیث: 3363]

حضرت ام ایوب انصاریہ رضی اللہ عنہا سے روایت ہے، انہوں نے فرمایا: ”میں نے نبی صلی اللہ علیہ وسلم کے لیے کھانا تیار کیا۔ اس میں کوئی (ناگوار بو والی) سبزی تھی۔ رسول اللہ صلی اللہ علیہ وسلم نے (وہ کھانا) نہ کھایا اور فرمایا: ”میں اپنے ساتھی (جبریل) کو تکلیف دینا پسند نہیں کرتا۔“” [سنن ابن ماجه/كتاب الأطعمة/حدیث: 3364]

حضرت جابر رضی اللہ عنہ سے روایت ہے کہ چند افراد نبی صلی اللہ علیہ وسلم کی خدمت میں حاضر ہوئے۔ آپ صلی اللہ علیہ وسلم کو ان افراد سے گندنے کی بو محسوس ہوئی تو آپ صلی اللہ علیہ وسلم نے فرمایا: ”کیا میں نے تمہیں یہ پودا کھانے سے منع نہیں کیا تھا؟ جس چیز سے انسان کو ایذا پہنچتی ہے، اس سے فرشتے بھی ایذا محسوس کرتے ہیں۔“ [سنن ابن ماجه/كتاب الأطعمة/حدیث: 3365]

حضرت عقبہ بن عامر جہنی رضی اللہ عنہ سے روایت ہے، انہوں نے کہا: رسول اللہ صلی اللہ علیہ وسلم نے اپنے صحابہ رضی اللہ عنہم سے فرمایا: ”پیاز نہ کھایا کرو۔“ پھر آپ صلی اللہ علیہ وسلم نے آہستہ آواز میں یہ الفاظ فرمائے: ”کچا نہ کھاؤ۔“ [سنن ابن ماجه/كتاب الأطعمة/حدیث: 3366]

حضرت سلمان فارسی رضی اللہ عنہ سے روایت ہے کہ رسول اللہ صلی اللہ علیہ وسلم سے گھی، پنیر اور پوستین کے بارے میں سوال کیا گیا، آپ صلی اللہ علیہ وسلم نے فرمایا: ”حلال وہ ہے جو اللہ نے اپنی کتاب میں حلال کیا ہے اور حرام وہ ہے جو اللہ نے اپنی کتاب میں حرام کیا ہے، اور جس کے بارے میں خاموشی اختیار فرمائی ہے، وہ ان چیزوں میں شامل ہے جن کے بارے میں اللہ نے معافی دے دی ہے۔“ [سنن ابن ماجه/كتاب الأطعمة/حدیث: 3367]

حضرت نعمان بن بشیر رضی اللہ عنہ سے روایت ہے، انہوں نے کہا: نبی کریم صلی اللہ علیہ وسلم کی خدمت میں طائف کے انگور ہدیہ کے طور پر پیش کیے گئے۔ آپ صلی اللہ علیہ وسلم نے مجھے بلایا اور فرمایا: ”یہ خوشہ اپنی والدہ کے پاس لے جاؤ۔“ میں نے والدہ کے پاس پہنچانے سے پہلے خود ہی کھا لیا۔ پھر کئی راتوں کے بعد رسول اللہ صلی اللہ علیہ وسلم نے مجھ سے فرمایا: ”اس خوشے کا کیا بنا؟ کیا وہ اپنی والدہ کو پہنچا دیا تھا؟“ میں نے کہا: نہیں۔ رسول اللہ صلی اللہ علیہ وسلم نے میرا نام دھوکے باز رکھ دیا (مجھے دھوکے باز فرمایا)۔ [سنن ابن ماجه/كتاب الأطعمة/حدیث: 3368]

حضرت طلحہ رضی اللہ عنہ سے روایت ہے، انہوں نے فرمایا: ”میں رسول اللہ صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم کے ہاتھ میں «سَفَرْجَلٌ» (بہی کا پھل) تھا۔ آپ صلی اللہ علیہ وسلم نے فرمایا: ”اے ابو طلحہ! یہ لے لو، اس سے دل کو راحت (اور قوت) حاصل ہوتی ہے۔““ [سنن ابن ماجه/كتاب الأطعمة/حدیث: 3369]