حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”تازہ پکی ہوئی کھجور خشک کھجور کے ساتھ ملا کر کھایا کرو۔ پرانے (پھل) کو نئے کے ساتھ ملا کر کھاؤ۔ (اس سے) شیطان کو غصہ آتا ہے اور وہ کہتا ہے: آدم کا بیٹا جیتا رہا حتی کہ اس نے نئی چیز کے ساتھ پرانی چیز بھی کھائی۔“ [سنن ابن ماجه/كتاب الأطعمة/حدیث: 3330]

حضرت عبداللہ بن عمر رضی اللہ عنہما سے روایت ہے، انہوں نے کہا: رسول اللہ صلی اللہ علیہ وسلم نے اس بات سے منع فرمایا کہ ”آدمی اپنے ساتھیوں سے اجازت لیے بغیر دو دو کھجوریں ملا کر کھائے۔“ [سنن ابن ماجه/كتاب الأطعمة/حدیث: 3331]

حضرت ابوبکر رضی اللہ عنہ کے آزاد کردہ حضرت سعد رضی اللہ عنہ، جو نبی صلی اللہ علیہ وسلم کی خدمت کیا کرتے تھے اور نبی صلی اللہ علیہ وسلم کو ان کی باتیں اچھی لگتی تھیں، ان سے روایت ہے کہ آپ صلی اللہ علیہ وسلم نے ”دو دو کھجوریں ملا کر کھانے سے منع فرمایا۔“ [سنن ابن ماجه/كتاب الأطعمة/حدیث: 3332]

حضرت انس بن مالک رضی اللہ عنہ سے روایت ہے، انہوں نے فرمایا: ”میں نے دیکھا کہ رسول اللہ صلی اللہ علیہ وسلم کی خدمت میں پرانی کھجوریں پیش کی گئیں تو آپ صلی اللہ علیہ وسلم ان کو (اندر سے) صاف کرنے لگے۔“ [سنن ابن ماجه/كتاب الأطعمة/حدیث: 3333]

حضرت عبداللہ بن بسر سلمی رضی اللہ عنہ اور حضرت عطیہ بن بسر سلمی رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم ہمارے پاس تشریف لائے۔ ہم نے آپ صلی اللہ علیہ وسلم کے بیٹھنے کے لیے (زمین پر) ایک چادر ڈال دی۔ آپ صلی اللہ علیہ وسلم اس پر بیٹھ گئے۔ تب ہمارے گھر میں اللہ عزوجل نے رسول اللہ صلی اللہ علیہ وسلم پر وحی فرمائی۔ ہم نے آپ صلی اللہ علیہ وسلم کی خدمت میں مکھن اور خشک کھجوریں پیش کیں اور آپ صلی اللہ علیہ وسلم کو مکھن بہت پسند تھا۔“ آپ صلی اللہ علیہ وسلم پر اللہ کی رحمتیں ہوں اور سلام ہو۔ [سنن ابن ماجه/كتاب الأطعمة/حدیث: 3334]

حضرت ابو حازم (سلمہ بن دینار) رضی اللہ عنہ سے روایت ہے، انہوں نے کہا: میں نے سہل بن سعد ساعدی رضی اللہ عنہ سے سوال کیا: ”کیا آپ صلی اللہ علیہ وسلم نے میدے کی روٹی دیکھی ہے؟“ انہوں نے فرمایا: ”میں نے رسول اللہ صلی اللہ علیہ وسلم کی وفات تک میدے کی روٹی نہیں دیکھی تھی۔“ میں نے کہا: ”کیا رسول اللہ صلی اللہ علیہ وسلم کے زمانے میں لوگوں کے پاس چھلنیاں ہوتی تھیں؟“ انہوں نے فرمایا: ”میں نے رسول اللہ صلی اللہ علیہ وسلم کی وفات تک چھلنی نہیں دیکھی۔“ میں نے کہا: ”پھر آپ لوگ جو (جو کا آٹا) بغیر چھانے کیسے کھا لیتے تھے؟“ انہوں نے کہا: ”ہاں! ہم لوگ اس میں پھونک مار لیا کرتے تھے۔ جو (بھوسی یا چھان) اڑنا ہوتا، اڑ جاتا، اور جو رہ جاتا، ہم اسے بھگو لیتے (اور آٹا گوندھ کر روٹی پکا لیتے)۔“ [سنن ابن ماجه/كتاب الأطعمة/حدیث: 3335]

حضرت ام ایمن (برکت) رضی اللہ عنہا سے روایت ہے کہ انہوں نے آٹا چھان کر نبی صلی اللہ علیہ وسلم کے لیے روٹی تیار کی تو آپ صلی اللہ علیہ وسلم نے فرمایا: ”یہ کیا ہے؟“ انہوں نے عرض کیا: ”یہ کھانا ہم اپنے علاقے میں بنایا کرتے ہیں۔ میرا جی چاہا کہ آپ صلی اللہ علیہ وسلم کے لیے بھی اس قسم کی ایک روٹی پکا دوں۔“ نبی صلی اللہ علیہ وسلم نے فرمایا: ”اس کو دوبارہ آٹے میں ڈال دو، پھر گوندھو۔“ [سنن ابن ماجه/كتاب الأطعمة/حدیث: 3336]

حضرت انس بن مالک رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم نے میدے کی روٹی (کھانا تو درکنار) اپنی آنکھ سے بھی نہیں دیکھی یہاں تک کہ آپ صلی اللہ علیہ وسلم اللہ کے پاس چلے گئے۔“ [سنن ابن ماجه/كتاب الأطعمة/حدیث: 3337]

حضرت عطا رضی اللہ عنہ سے روایت ہے، انہوں نے کہا: حضرت ابوہریرہ رضی اللہ عنہ اپنے لوگوں سے ملنے (غالباً «یُنَا» بستی میں) گئے۔ ان لوگوں نے آپ کی خدمت میں پہلے پکی ہوئی بڑی بڑی روٹیاں پیش کیں تو آپ رو دیے اور فرمایا: ”رسول اللہ صلی اللہ علیہ وسلم نے یہ روٹی کبھی اپنی آنکھوں سے دیکھی بھی نہیں۔“ [سنن ابن ماجه/كتاب الأطعمة/حدیث: 3338]

حضرت قتادہ رضی اللہ عنہ سے روایت ہے، انہوں نے کہا: ہم لوگ حضرت انس بن مالک رضی اللہ عنہ کی خدمت میں حاضر ہوتے، اور آپ کا نان بائی کھڑا ہوتا اور (حدیث کے راوی) دارمی بیان کرتے ہیں کہ آپ کا دسترخوان بچھا ہوا ہوتا۔ ایک دن آپ نے فرمایا: ”کھاؤ، میں نہیں جانتا کہ رسول اللہ صلی اللہ علیہ وسلم نے ”اللہ کے پاس جانے تک“ کبھی پتلی چپاتی یا سالم بھنی ہوئی بکری اپنی آنکھوں سے دیکھی بھی ہو (کھانے کا تو کیا ذکر)۔“ [سنن ابن ماجه/كتاب الأطعمة/حدیث: 3339]