حضرت عبداللہ بن عباس رضی اللہ عنہ سے روایت ہے، انہوں نے کہا: ہم نے فالوذج کا نام سب سے پہلے اس وقت سنا جب جبرئیل علیہ السلام نے نبی صلی اللہ علیہ وسلم کے پاس آ کر فرمایا: ”آپ صلی اللہ علیہ وسلم کی امت کو زمین میں فتوحات حاصل ہوں گی، اور انہیں دنیا میں کثرت حاصل ہو گی حتیٰ کہ وہ فالوذج کھائیں گے۔“ نبی صلی اللہ علیہ وسلم نے فرمایا: ”فالوذج کیا ہوتا ہے؟“ جبرئیل علیہ السلام نے فرمایا: ”وہ گھی اور شہد دونوں کو ملا دیں گے۔“ یہ سن کر نبی صلی اللہ علیہ وسلم آہستہ آواز سے رو دیے۔ [سنن ابن ماجه/كتاب الأطعمة/حدیث: 3340]

حضرت عبداللہ بن عمر رضی اللہ عنہ سے روایت ہے، ایک دن رسول اللہ صلی اللہ علیہ وسلم نے فرمایا: ”میرا جی چاہتا ہے کہ ہمارے پاس بھوری گندم کی سفید روٹی ہوتی جس میں گھی ملا ہوتا، ہم اسے کھاتے۔“ ایک انصاری نے یہ بات سنی اور ایسی روٹی تیار کر کے آپ صلی اللہ علیہ وسلم کی خدمت میں پیش کر دی۔ رسول اللہ صلی اللہ علیہ وسلم نے فرمایا: ”یہ گھی کس چیز میں رکھا ہوا تھا؟“ اس نے کہا: سانڈے کی (کھال سے بنی ہوئی) کپی میں۔ رسول اللہ صلی اللہ علیہ وسلم نے یہ روٹی کھانے سے انکار کر دیا۔ [سنن ابن ماجه/كتاب الأطعمة/حدیث: 3341]

حضرت انس بن مالک رضی اللہ عنہ سے روایت ہے، انہوں نے فرمایا: حضرت ام سلیم رضی اللہ عنہا نے نبی صلی اللہ علیہ وسلم کے لیے ایک روٹی تیار کی جس میں کچھ گھی ڈال دیا تھا، پھر (مجھے) کہا: نبی صلی اللہ علیہ وسلم کے پاس جاؤ انہیں بلا لاؤ۔ میں نے حاضر خدمت ہو کر عرض کیا: ”امی جان آپ صلی اللہ علیہ وسلم کو بلا رہی ہیں۔“ تو آپ صلی اللہ علیہ وسلم اٹھ کھڑے ہوئے، اور آپ صلی اللہ علیہ وسلم کی خدمت میں جو افراد حاضر تھے ان (سب) سے کہا: ”چلو۔“ میں ان سے پہلے حضرت ام سلیم رضی اللہ عنہا کے پاس پہنچ گیا اور انہیں بتایا (کہ نبی صلی اللہ علیہ وسلم تمام ساتھیوں کے ہمراہ تشریف لا رہے ہیں۔) نبی صلی اللہ علیہ وسلم تشریف لے آئے اور فرمایا: ”تم نے جو (کھانا) تیار کیا ہے لے آؤ۔“ میری والدہ نے عرض کیا: ”وہ تو صرف آپ صلی اللہ علیہ وسلم کے لیے تیار کیا ہے۔“ آپ صلی اللہ علیہ وسلم نے فرمایا: ”وہی لے آؤ۔“ پھر فرمایا: ”اے انس! دس دس آدمیوں کو اندر میرے پاس بلاؤ۔“ حضرت انس بن مالک رضی اللہ عنہ فرماتے ہیں: میں دس دس آدمیوں کو اندر بلاتا رہا (اور ہر گروپ کھانا کھا کر نکلتا رہا۔) ان سب نے سیر ہو کر کھا لیا، اور وہ اسی افراد تھے۔ [سنن ابن ماجه/كتاب الأطعمة/حدیث: 3342]

حضرت ابوہریرہ رضی اللہ عنہ سے روایت ہے، انہوں نے فرمایا: ”قسم ہے اس ذات کی جس کے ہاتھ میں میری جان ہے! اللہ کے نبی صلی اللہ علیہ وسلم نے کبھی تین دن مسلسل گندم کی روٹی پیٹ بھر کر نہیں کھائی حتی کہ اللہ عز و جل نے آپ صلی اللہ علیہ وسلم کو وفات دے دی۔“ [سنن ابن ماجه/كتاب الأطعمة/حدیث: 3343]

ام المومنین حضرت عائشہ رضی اللہ عنہا سے روایت ہے، انہوں نے فرمایا: ”حضرت محمد صلی اللہ علیہ وسلم کے اہل خانہ نے (ہجرت کر کے) مدینہ آنے سے لے کر آپ صلی اللہ علیہ وسلم کی وفات تک کبھی مسلسل تین راتیں گندم کی روٹی سیر ہو کر نہیں کھائی۔“ [سنن ابن ماجه/كتاب الأطعمة/حدیث: 3344]

ام المؤمنین حضرت عائشہ رضی اللہ عنہا سے روایت ہے، انہوں نے فرمایا: ”نبی صلی اللہ علیہ وسلم فوت ہوئے تو میرے گھر میں انسان کے کھانے کی کوئی چیز نہ تھی مگر تھوڑے سے جو میرے ٹانڈ پر پڑے ہوئے تھے۔ میں اس میں سے (لے لے کر) کھاتی رہی حتی کہ کافی مدت گزر گئی۔ (آخر) میں نے انہیں ماپ لیا تو وہ (جلد ہی) ختم ہو گئے۔“ [سنن ابن ماجه/كتاب الأطعمة/حدیث: 3345]

حضرت عائشہ رضی اللہ عنہا سے روایت ہے، انہوں نے فرمایا: ”حضرت محمد صلی اللہ علیہ وسلم کے اہل خانہ نے کبھی جو کی روٹی سیر ہو کر نہیں کھائی، حتی کہ آپ صلی اللہ علیہ وسلم فوت ہو گئے۔“ [سنن ابن ماجه/كتاب الأطعمة/حدیث: 3346]

حضرت عبداللہ بن عباس رضی اللہ عنہما سے روایت ہے، انہوں نے فرمایا: ”رسول اللہ صلی اللہ علیہ وسلم پر مسلسل کئی کئی راتیں ایسی آتی تھیں کہ آپ صلی اللہ علیہ وسلم خالی پیٹ رات گزارتے تھے اور آپ صلی اللہ علیہ وسلم کے گھر والوں کو بھی رات کا کھانا میسر نہیں ہوتا تھا، جبکہ اس وقت لوگوں کی عام غذا جو کی روٹی ہوتی تھی۔“ [سنن ابن ماجه/كتاب الأطعمة/حدیث: 3347]

حضرت انس بن مالک رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم اون کا لباس اور پیوند لگا جوتا پہن لیتے تھے۔“ اور فرمایا: ”رسول اللہ صلی اللہ علیہ وسلم نے موٹا کھایا اور موٹا پہنا۔“ حسن رحمہ اللہ سے پوچھا گیا: ”موٹے کھانے سے کیا مراد ہے؟“ انہوں نے فرمایا: ”جو کی موٹی روٹی جو پانی کے گھونٹ کے بغیر حلق سے نیچے نہیں اترتی تھی۔“ [سنن ابن ماجه/كتاب الأطعمة/حدیث: 3348]

حضرت مقدام بن معدی کرب رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”آدمی پیٹ سے برا کوئی برتن نہیں بھرتا۔ آدمی کو تو چند لقمے کافی ہیں جن سے اس کی کمر سیدھی رہے۔ اگر آدمی پر اس کا نفس غالب آ جائے (اور وہ زیادہ کھانا چاہے) تو ایک تہائی کھانے کے لیے، ایک تہائی پینے کے لیے اور ایک تہائی سانس کے لیے (رکھ لے۔)“ [سنن ابن ماجه/كتاب الأطعمة/حدیث: 3349]