حضرت ابو سعید رضی اللہ عنہ سے روایت ہے، جبریل علیہ السلام نبی صلی اللہ علیہ وسلم کی خدمت میں تشریف لائے اور فرمایا: ”اے محمد صلی اللہ علیہ وسلم ! آپ بیمار ہو گئے ہیں؟“ نبی صلی اللہ علیہ وسلم نے فرمایا: ”ہاں۔“ جبریل علیہ السلام نے فرمایا: «بِسْمِ اللّٰهِ أَرْقِيكَ، مِنْ كُلِّ شَيْءٍ يُؤْذِيكَ، مِنْ شَرِّ كُلِّ نَفْسٍ أَوْ عَيْنِ حَاسِدٍ، اللّٰهُ يَشْفِيكَ، بِسْمِ اللّٰهِ أَرْقِيكَ» ”میں آپ کو اللہ کے نام سے دم کرتا ہوں، آپ کو تکلیف دینے والی ہر چیز سے، ہر جان یا آنکھ یا حاسد کے شر سے، اللہ آپ کو شفا دے، میں آپ کو اللہ کے نام سے دم کرتا ہوں۔“ [سنن ابن ماجه/كتاب الطب/حدیث: 3523]

حضرت ابو ہریرہ رضی اللہ عنہ سے روایت ہے، انہوں نے کہا: نبی صلی اللہ علیہ وسلم میری عیادت کے لیے تشریف لائے اور مجھ سے فرمایا: ”کیا میں تجھے وہ دم نہ کروں جو میرے پاس جبریل علیہ السلام لائے ہیں؟“ میں نے کہا: کیوں نہیں، اے اللہ کے رسول صلی اللہ علیہ وسلم ! میرے ماں باپ آپ صلی اللہ علیہ وسلم پر قربان ہوں۔ آپ صلی اللہ علیہ وسلم نے تین بار فرمایا: «بِسْمِ اللّٰهِ أَرْقِيْكَ، وَاللّٰهُ يَشْفِيْكَ مِنْ كُلِّ دَاءٍ يُؤْذِيْكَ، وَمِنْ شَرِّ النَّفّٰثٰتِ فِي الْعُقَدِ، وَمِنْ شَرِّ حَاسِدٍ إِذَا حَسَدَ» ”اللہ کے نام سے تجھے دم کرتا ہوں، اور اللہ تجھے شفا دے گا تجھ میں موجود ہر بیماری سے، گرہوں میں پھونکیں مارنے والیوں کے شر سے اور حسد کرنے والے کے شر سے جب وہ حسد کرے۔“ [سنن ابن ماجه/كتاب الطب/حدیث: 3524]

حضرت عبداللہ بن عباس رضی اللہ عنہ سے روایت ہے کہ نبی صلی اللہ علیہ وسلم حضرت حسن اور حضرت حسین رضی اللہ عنہما کو دم کرتے تو یوں فرماتے تھے: «أَعُوذُ بِكَلِمَاتِ اللَّهِ التَّامَّةِ مِنْ كُلِّ شَيْطَانٍ وَهَامَّةٍ، وَمِنْ كُلِّ عَيْنٍ لَامَّةٍ» ”میں اللہ کے کامل کلمات کی پناہ میں آتا ہوں، ہر شیطان سے اور کیڑے مکوڑے سے اور ہر دیوانہ کردینے والی آنکھ سے۔“ نبی صلی اللہ علیہ وسلم نے فرمایا: ”تمہارے جدِ امجد حضرت ابراہیم علیہ السلام یہ دعا پڑھ کر حضرت اسماعیل اور حضرت اسحاق کو“ یا فرمایا: ”حضرت اسماعیل اور حضرت یعقوب کو دم کیا کرتے تھے۔“ اور یہ حدیث امام وکیع رحمہ اللہ کی ہے۔ [سنن ابن ماجه/كتاب الطب/حدیث: 3525]

حضرت عبداللہ بن عباس رضی اللہ عنہما سے مروی ہے کہ نبی صلی اللہ علیہ وسلم بخار اور ہر قسم کے درد سے (شفا کے لیے) یہ دعا سکھایا کرتے تھے کہ یوں کہیں: «بِسْمِ اللهِ الْكَبِيرِ، أَعُوذُ بِاللهِ الْعَظِيمِ، مِنْ شَرِّ عِرْقٍ نَعَّارٍ، وَمِنْ شَرِّ حَرِّ النَّارِ» ”کبریائی والے اللہ کے نام سے، میں عظمت والے اللہ کی پناہ میں آتا ہوں، جوش مارتی رگ کے شر سے اور آگ کی گرمی کے شر سے۔“ روایت کے راوی ابو عامر رحمہ اللہ نے کہا: ”میں لوگوں سے اس روایت کے الفاظ میں اختلاف کرتا ہوں، میں (نعار کی بجائے) یعار کہتا ہوں۔“ [سنن ابن ماجه/كتاب الطب/حدیث: 3526]

حضرت عبادہ بن صامت رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم کو بخار تھا۔ جبریل علیہ السلام تشریف لائے اور فرمایا: «بِسْمِ اللّٰهِ أَرْقِيْكَ، وَاللّٰهُ يَشْفِيْكَ، مِنْ كُلِّ شَيْءٍ يُؤْذِيْكَ، وَمِنْ كُلِّ عَيْنٍ وَحَاسِدٍ، بِسْمِ اللّٰهِ أَرْقِيْكَ» ”میں آپ کو اللہ کے نام سے دم کرتا ہوں، آپ کو تکلیف دینے والی ہر چیز سے، ہر جان یا آنکھ یا حاسد کے شر سے، اللہ آپ کو شفا دے۔“” [سنن ابن ماجه/كتاب الطب/حدیث: 3527]

حضرت عائشہ رضی اللہ عنہا سے روایت ہے کہ ”نبی صلی اللہ علیہ وسلم دم کرتے وقت پھونک مارتے تھے۔“ [سنن ابن ماجه/كتاب الطب/حدیث: 3528]

حضرت عائشہ رضی اللہ عنہا سے روایت ہے کہ انہوں نے فرمایا: ”نبی صلی اللہ علیہ وسلم جب بیمار ہو جاتے تو «مُعَوِّذَات» پڑھ کر اپنے آپ پر پھونک مارتے تھے، جب آپ صلی اللہ علیہ وسلم کا مرض شدت اختیار کر گیا تو میں نبی صلی اللہ علیہ وسلم پر (یہ سورتیں) پڑھتی تھی اور آپ صلی اللہ علیہ وسلم کا ہاتھ اس سے برکت کی امید پر (آپ کے جسم پر) پھیرتی تھی۔“ [سنن ابن ماجه/كتاب الطب/حدیث: 3529]

حضرت عبداللہ بن مسعود رضی اللہ عنہ کی اہلیہ حضرت زینب (بنت معاویہ ثقفیہ) رضی اللہ عنہا سے روایت ہے، انہوں نے فرمایا: ”ہمارے ہاں ایک بڑھیا آیا کرتی تھی، وہ سرخ باد کا دم کیا کرتی تھی۔ اور ہمارے پاس لمبے پایوں والی ایک چار پائی تھی۔ حضرت عبداللہ رضی اللہ عنہ جب گھر میں داخل ہوتے تو (پہلے) کھانستے اور آواز دیتے (پھر اندر داخل ہوتے)۔ ایک دن وہ تشریف لائے، جب اس (بڑھیا) نے ان کی آواز سنی تو ان سے پردہ کر لیا۔ وہ آ کر میرے پاس بیٹھ گئے، انہوں نے مجھے ہاتھ لگایا تو انہیں دھاگا محسوس ہوا (جو میں نے گلے میں ڈالا ہوا تھا)۔ انہوں نے کہا: ”یہ کیا ہے؟“ میں نے کہا: ”اس میں مجھے سرخ باد کا دم کر کے دیا گیا ہے۔“ انہوں نے اسے کھینچ لیا اور توڑ کر پھینک دیا اور فرمایا: ”عبداللہ کے گھر والوں کو شرک کی کوئی ضرورت نہیں۔ میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرما رہے تھے: ”دم جھاڑ، تعویذ اور حب کا عمل (یہ سب) شرک ہیں۔““ میں نے کہا: ”میں ایک دن (گھر سے) نکلی تو فلاں شخص نے مجھے دیکھ لیا، میری جو آنکھ اس کی طرف تھی، اس سے پانی بہنے لگا۔ جب میں دم کرواتی تو پانی رک جاتا، جب میں (دم کرائے بغیر) چھوڑ دیتی تو اس سے پانی بہنے لگتا۔“ انہوں نے کہا: ”وہ شیطان تھا، جب تو اس کی مرضی کا کام کرتی تھی، وہ تجھے چھوڑ دیتا، جب اس کی مرضی کے خلاف کرتی، وہ تیری آنکھ میں انگلی مار دیتا۔ لیکن اگر تو وہ کام کرتی جو اللہ کے رسول صلی اللہ علیہ وسلم نے کیا تھا تو تیرے لیے بہتر ہوتا اور تجھے ضرور شفا مل جاتی۔ تو اپنی آنکھ پر پانی کے چھینٹے مار اور کہہ: «أَذْهِبِ الْبَأْسَ رَبَّ النَّاسِ، وَاشْفِ أَنْتَ الشَّافِي، اشْفِ شِفَاءً لَا يُغَادِرُ سَقَمًا» ”بیماری دور کر دے، اے لوگوں کے رب! اور شفا دے دے، تو ہی شفا دینے والا ہے، تیری شفا کے سوا کوئی شفا نہیں، ایسی شفا دے کہ بیماری کو بالکل باقی نہ رہے۔“““ [سنن ابن ماجه/كتاب الطب/حدیث: 3530]

حضرت عمران بن حصین رضی اللہ عنہ سے روایت ہے کہ نبی صلی اللہ علیہ وسلم نے ایک شخص کے ہاتھ میں پیتل کا حلقہ (چھلا یا کڑا) دیکھا تو فرمایا: ”یہ حلقہ کیسا ہے؟“ اس نے کہا: یہ «الْوَاهِنَةُ» (واہنہ کی بیماری) کی وجہ سے ہے۔ آپ صلی اللہ علیہ وسلم نے فرمایا: ”اسے اتار دے، اس سے تیری کمزوری میں اضافہ ہی ہوگا۔“ [سنن ابن ماجه/كتاب الطب/حدیث: 3531]