حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جب تم میں سے کوئی شخص نیند سے جاگے تو اپنا ہاتھ برتن میں نہ ڈالے حتیٰ کہ پہلے اس پر تین دفعہ پانی ڈال کر دھو لے کیونکہ وہ نہیں جانتا کہ اس کے ہاتھ نے رات کہاں بسر کی۔ (رات بھر کہاں کہاں لگتا رہا ہے)۔“ [سنن نسائي/صفة الوضوء/حدیث: 161]

حضرت عائشہ رضی اللہ عنہا سے روایت ہے، رسول اللہ صلی اللہ علیہ وسلم نے فرمایا: ”جب کسی شخص کو نماز میں اونگھ آنے لگے تو وہ نماز چھوڑ کر پلٹ جائے۔ ہو سکتا ہے کہ وہ انجانے میں اپنے آپ کو بد دعا دے بیٹھے۔“ [سنن نسائي/صفة الوضوء/حدیث: 162]

حضرت عمرو بن زبیر رحمہ اللہ سے مروی ہے، انہوں نے کہا: ”میں مروان بن حکم رحمہ اللہ کے پاس گیا، چنانچہ ہم نے آپس میں ان چیزوں کا ذکر کیا جن سے وضو واجب ہوتا ہے۔ مروان نے کہا: ”شرم گاہ کو چھونے سے بھی وضو واجب ہو جاتا ہے۔“ میں نے کہا: ”مجھے تو اس بات کا علم نہیں۔“ مروان نے کہا: ”مجھے حضرت بسرہ بنت صفوان رضی اللہ عنہا نے بتایا کہ انہوں نے اللہ کے رسول صلی اللہ علیہ وسلم کو فرماتے سنا: ”جب تم میں سے کوئی اپنی شرم گاہ (عضو) کو چھو بیٹھے تو اسے چاہیے کہ وضو کرے۔“”“ [سنن نسائي/صفة الوضوء/حدیث: 163]

حضرت عروہ بن زبیر رضی اللہ عنہ سے منقول ہے، انہوں نے کہا کہ مروان نے مدینہ کی امارت (گورنری) کے دوران ذکر کیا کہ ”جب آدمی اپنا ہاتھ عضو مخصوص کو لگائے تو اسے اس کے بعد وضو کرنا چاہیے۔“ میں نے اس کا انکار کیا اور کہا: ”جس نے اپنے عضو مخصوص کو ہاتھ لگایا اس پر کوئی وضو نہیں ہے۔“ تو مروان نے کہا کہ مجھے حضرت بسرہ بنت صفوان رضی اللہ عنہا نے بیان کیا کہ انہوں نے اللہ کے رسول صلی اللہ علیہ وسلم کو ان چیزوں کا ذکر کرتے ہوئے سنا جن سے وضو کرنا پڑتا ہے، چنانچہ رسول اللہ صلی اللہ علیہ وسلم نے فرمایا: ”عضو مخصوص کو چھونے سے بھی وضو کرے۔“ عروہ نے کہا کہ میں مروان سے بحث کرتا رہا حتیٰ کہ اس نے اپنے محافظ دستے سے ایک آدمی بلایا اور اسے حضرت بسرہ رضی اللہ عنہا کے پاس بھیجا۔ اس نے ان سے اس روایت کے بارے میں سوال کیا جو انہوں نے مروان کو بیان کی تھی تو حضرت بسرہ رضی اللہ عنہا نے وہی روایت سنا کر بھیجی جو مروان نے مجھے ان کے نام سے بیان کی تھی۔ [سنن نسائي/صفة الوضوء/حدیث: 164]

حضرت طلق بن علی رضی اللہ عنہ سے روایت ہے، انہوں نے کہا: ”ہم وفد کی صورت میں اپنے علاقے سے نکلے حتیٰ کہ رسول اللہ صلی اللہ علیہ وسلم کے پاس پہنچے، چنانچہ ہم نے آپ کی بیعت کی اور آپ کے ساتھ نماز پڑھی۔ نماز ختم ہونے کے بعد ایک بدوی سا آدمی آیا اور کہنے لگا: اے اللہ کے رسول! اس آدمی کے بارے میں کیا حکم ہے جو نماز میں اپنے عضو تناسل کو چھو بیٹھتا ہے؟ آپ صلی اللہ علیہ وسلم نے فرمایا: ”وہ بھی تیرے جسم کا ایک ٹکڑا ہی تو ہے۔““ [سنن نسائي/صفة الوضوء/حدیث: 165]

حضرت عائشہ رضی اللہ عنہا سے روایت ہے، وہ فرماتی ہیں کہ ”بے شک اللہ کے رسول صلی اللہ علیہ وسلم نماز پڑھتے ہوتے اور میں آپ کے سامنے اس طرح لیٹی ہوتی جیسے جنازہ ہوتا ہے، یہاں تک کہ جب آپ صلی اللہ علیہ وسلم وتر پڑھنے کا ارادہ فرماتے تو مجھے پاؤں لگا کر جگا دیتے۔“ [سنن نسائي/صفة الوضوء/حدیث: 166]

حضرت عائشہ رضی اللہ عنہا فرماتی ہیں: ”(یوں سمجھو کہ) تم مجھے دیکھ رہے ہو کہ میں اللہ کے رسول صلی اللہ علیہ وسلم کے سامنے لیٹی ہوتی اور اللہ کے رسول صلی اللہ علیہ وسلم نماز پڑھتے ہوتے۔ جب آپ صلی اللہ علیہ وسلم سجدہ کرنے کا ارادہ فرماتے تو میرا پاؤں ہاتھ سے دباتے، میں پاؤں سکیڑ لیتی، پھر آپ صلی اللہ علیہ وسلم سجدہ فرماتے۔“ [سنن نسائي/صفة الوضوء/حدیث: 167]

حضرت عائشہ رضی اللہ عنہا فرماتی ہیں کہ ”میں اللہ کے رسول صلی اللہ علیہ وسلم کے سامنے سوئی ہوتی تھی اور میرے پاؤں آپ کے قبلے میں ہوتے تھے۔ جب آپ سجدہ فرماتے تو میرے پاؤں دبا دیتے۔ میں انہیں سکیڑ لیتی۔ جب آپ کھڑے ہوتے تو پھر بچھا لیتی۔ ان دنوں گھروں میں چراغ نہیں ہوتے تھے۔“ [سنن نسائي/صفة الوضوء/حدیث: 168]

حضرت عائشہ رضی اللہ عنہا فرماتی ہیں کہ ”ایک رات میں نے نبی صلی اللہ علیہ وسلم کو اپنے ساتھ نہ پایا تو میں نے اپنے ہاتھوں سے آپ کو تلاش کرنا شروع کر دیا، چنانچہ میرا ہاتھ آپ کے پاؤں کو لگا جو سیدھے کھڑے تھے، جبکہ آپ سجدے میں تھے اور پڑھ رہے تھے: «أَعُوذُ بِرِضَاكَ مِنْ سَخَطِكَ، وَبِمُعَافَاتِكَ مِنْ عُقُوبَتِكَ، وَأَعُوذُ بِكَ مِنْكَ، لَا أُحْصِي ثَنَاءً عَلَيْكَ، أَنْتَ كَمَا أَثْنَيْتَ عَلَىٰ نَفْسِكَ» ”(اے اللہ!) میں تیرے غصے سے (بچنے کے لیے) تیری رضا مندی اور تیری سزا سے (بچنے کے لیے) تیری معافی کی پناہ حاصل کرتا ہوں۔ اور تیرے غضب سے (بچنے کے لیے) تیری رحمت کی پناہ میں آتا ہوں۔ میں تیری پوری تعریف نہیں کرسکتا۔ تو اسی طرح ہے جس طرح تو نے خود اپنی تعریف کی ہے۔““ [سنن نسائي/صفة الوضوء/حدیث: 169]

حضرت عائشہ رضی اللہ عنہا سے منقول ہے کہ ”نبی صلی اللہ علیہ وسلم اپنی بعض بیویوں کو بوسہ دیتے، پھر نماز پڑھتے اور نیا وضو نہ فرماتے تھے۔“ امام ابوعبدالرحمٰن نسائی رحمہ اللہ بیان کرتے ہیں کہ: ”اس مسئلے میں اس سے بہتر کوئی روایت نہیں، اگرچہ اس کی سند مرسل (منقطع) ہے (کیونکہ ابراہیم تیمی کا حضرت عائشہ رضی اللہ عنہا سے سماع ثابت نہیں ہے)۔“ اعمش نے اس حدیث کو «حَبِيبِ بْنِ أَبِي ثَابِتٍ عَنْ عَائِشَةَ» ”حبیب بن ابی ثابت عن عائشہ“ کی سند سے بیان کیا ہے۔ یحییٰ بن سعید قطان رحمہ اللہ بیان کرتے ہیں کہ: ”یہ روایت اور اسی سند «حَبِيبٍ عَنْ عُرْوَةَ عَنْ عَائِشَةَ» ”حبیب عن عروہ عن عائشہ“ سے منقول ایک اور روایت: ”استحاضہ والی عورت نماز پڑھتی رہے اگرچہ خون چٹائی پر گرتا ہو“، دونوں غیر معتبر ہیں۔“ [سنن نسائي/صفة الوضوء/حدیث: 170]