حضرت انس رضی اللہ عنہ سے منقول ہے کہ نبی صلی اللہ علیہ وسلم کے پاس (پانی کا) ایک چھوٹا سا برتن لایا گیا اور آپ نے وضو فرمایا۔ شاگرد نے پوچھا کہ کیا نبی صلی اللہ علیہ وسلم ہر نماز کے لیے نیا وضو فرماتے تھے؟ انہوں نے فرمایا: ”ہاں۔“ شاگرد نے کہا: اور آپ لوگ، یعنی صحابہ بھی؟ انہوں نے فرمایا: ”ہم تو جب تک بے وضو نہیں ہوتے تھے، نمازیں پڑھتے رہتے تھے اور ایک وضو سے کئی کئی نمازیں پڑھ لیا کرتے تھے۔“ [سنن نسائي/صفة الوضوء/حدیث: 131]

حضرت عبداللہ بن عباس رضی اللہ عنہما سے روایت ہے کہ اللہ کے رسول صلی اللہ علیہ وسلم بیت الخلا سے باہر تشریف لائے اور آپ کو کھانا پیش کیا گیا۔ صحابہ رضی اللہ عنہم نے پوچھا: ”ہم آپ کے لیے وضو کا پانی نہ لائیں؟“ آپ صلی اللہ علیہ وسلم نے فرمایا: ”مجھے وضو کا حکم صرف اس وقت ہے جب میں نماز کے لیے اٹھوں۔“ [سنن نسائي/صفة الوضوء/حدیث: 132]

حضرت بریدہ رضی اللہ عنہ سے منقول ہے کہ اللہ کے رسول صلی اللہ علیہ وسلم ہر نماز کے لیے وضو فرمایا کرتے تھے۔ جب فتح مکہ کا دن تھا تو آپ صلی اللہ علیہ وسلم نے کئی نمازیں ایک وضو سے پڑھیں۔ حضرت عمر رضی اللہ عنہ نے کہا: ”آپ نے ایسا کام کیا ہے جو آپ اس سے پہلے نہیں کرتے تھے۔“ آپ صلی اللہ علیہ وسلم نے فرمایا: ”اے عمر! میں نے جان بوجھ کر ایسا کیا ہے۔“ [سنن نسائي/صفة الوضوء/حدیث: 133]

حضرت سفیان ثقفی رضی اللہ عنہ سے روایت ہے کہ رسول اللہ صلی اللہ علیہ وسلم ”جب وضو فرماتے تو پانی کا ایک چلو لیتے اور اسے ایسے کرتے۔“ شعبہ رحمہ اللہ نے اس کا طریقہ بیان کرتے ہوئے کہا: ”یعنی اپنی شرمگاہ پر چھڑک لیتے۔“ میں نے یہ بات ابراہیم نخعی رحمہ اللہ کو بتائی تو انہوں نے اسے بہت سراہا۔ امام ابن سنی رحمہ اللہ نے کہا: ”(سند میں مذکور) حکم سے مراد حکم بن سفیان ثقفی ہیں۔“ (حکم بن سفیان کو بعض راویوں نے سفیان بن حکم بھی کہا ہے۔ یہ صحابی ہیں اور ان سے صرف یہی ایک حدیث منقول ہے۔) [سنن نسائي/صفة الوضوء/حدیث: 134]

حضرت حکم بن سفیان رضی اللہ عنہ سے روایت ہے، وہ بیان کرتے ہیں کہ ”میں نے رسول اللہ صلی اللہ علیہ وسلم کو دیکھا کہ آپ نے وضو کیا اور اپنی شرم گاہ پر چھینٹے مارے۔“ استاد احمد بن حرب نے «وَنَضَحَ فَرْجَهُ» کے بجائے «فَنَضَحَ فَرْجَهُ» کہا۔ [سنن نسائي/صفة الوضوء/حدیث: 135]

حضرت ابوحیہ رحمہ اللہ سے منقول ہے، انہوں نے فرمایا: ”میں نے حضرت علی رضی اللہ عنہ کو دیکھا، آپ نے اعضائے وضو کو تین تین دفعہ دھویا، پھر کھڑے ہوکر وضو سے بچا ہوا پانی پیا اور فرمایا: ”اللہ کے رسول صلی اللہ علیہ وسلم نے ایسے ہی کیا جیسے میں نے کیا۔“” [سنن نسائي/صفة الوضوء/حدیث: 136]

حضرت ابو جحیفہ رضی اللہ عنہ سے روایت ہے کہ ”میں نے نبی صلی اللہ علیہ وسلم کو (مکہ کے مقام) بطحاء میں دیکھا۔ حضرت بلال رضی اللہ عنہ آپ کے وضو سے بچا ہوا پانی لے کر (خیمے سے) نکلے۔ لوگ تیزی سے ان کی طرف بھاگے۔ مجھے بھی اس میں سے کچھ پانی مل گیا۔ پھر آپ صلی اللہ علیہ وسلم کے لیے ایک نیزہ گاڑ دیا گیا اور آپ نے (اسے سامنے رکھ کر) لوگوں کو نماز پڑھائی۔ گدھے، کتے اور عورتیں آپ کے (سترے کے) آگے سے گزرتی تھیں۔“ [سنن نسائي/صفة الوضوء/حدیث: 137]

حضرت جابر رضی اللہ عنہ فرماتے ہیں کہ ”میں بیمار ہو گیا تو اللہ کے رسول صلی اللہ علیہ وسلم اور حضرت ابوبکر رضی اللہ عنہ میری بیمار پرسی کے لیے تشریف لائے تو مجھے بے ہوش پایا۔ آپ صلی اللہ علیہ وسلم نے وضو فرمایا اور وضو کا پانی مجھ پر ڈالا۔“ [سنن نسائي/صفة الوضوء/حدیث: 138]

حضرت ابوملیح رحمہ اللہ اپنے والد رضی اللہ عنہ سے بیان کرتے ہیں، انہوں نے کہا کہ رسول اللہ صلی اللہ علیہ وسلم نے فرمایا: ”اللہ تعالیٰ کوئی نماز بغیر طہارت (وضو) کے قبول نہیں فرماتا اور نہ حرام مال سے صدقہ قبول فرماتا ہے۔“ [سنن نسائي/صفة الوضوء/حدیث: 139]

عمرو بن شعیب اپنے باپ اور وہ اپنے دادا رضی اللہ عنہ سے بیان کرتے ہیں کہ ایک دیہاتی نبی صلی اللہ علیہ وسلم کے پاس آیا، وہ آپ صلی اللہ علیہ وسلم سے وضو کا طریقہ پوچھتا تھا، آپ صلی اللہ علیہ وسلم نے اسے تین تین دفعہ اعضائے وضو دھو کر دکھائے، پھر فرمایا: ”وضو اس طرح ہے، جس نے اس سے زیادہ کیا، اس نے برا کیا، حد سے بڑھا اور ظلم کا ارتکاب کیا۔“ [سنن نسائي/صفة الوضوء/حدیث: 140]