حضرت عبدالرحمٰن رحمہ اللہ سے روایت ہے کہ ایک آدمی نے حضرت عبداللہ بن عباس رضی اللہ عنہما سے کہا کہ میں علاقہ خراسان سے تعلق رکھتا ہوں۔ ہمارا علاقہ سخت ٹھنڈا ہے۔ (سردی کا توڑ کرنے کے لیے) ہم منقیٰ اور انگور وغیرہ سے مشروب تیار کرتے ہیں جسے ہم پیتے ہیں۔ مجھے اس کی (حلت و حرمت) کے بارے میں اشکال ہے۔ پھر اس نے اور کئی قسم کے مشروب بھی ذکر کیے یہاں تک کہ میں نے خیال کیا کہ حضرت عبداللہ بن عباس رضی اللہ عنہما نے انہیں نہیں سمجھا۔ حضرت عبداللہ بن عباس رضی اللہ عنہما نے فرمایا: ”تو نے بڑی لمبی چوڑی باتیں کی ہیں، (ضابطے کی بات یاد رکھ کہ) ہر نشہ آور چیز سے اجتناب کر خواہ وہ کھجور سے تیار ہو یا منقیٰ سے یا کسی اور پھل سے۔“ [سنن نسائي/كتاب الأشربة/حدیث: 5692]

حضرت ابن عباس رضی اللہ عنہما نے فرمایا: گدر کھجور کی نبیذ حرام ہے، قطعاً حلال نہیں۔ [سنن نسائي/كتاب الأشربة/حدیث: 5693]

حضرت ابو حمزہ رحمہ اللہ نے کہا کہ میں حضرت عبداللہ بن عباس رضی اللہ عنہما اور لوگوں (سائلین) کے درمیان ترجمانی کا فریضہ انجام دیا کرتا تھا۔ ایک عورت ان کے پاس آئی اور مٹکے کی نبیذ کے بارے میں پوچھنے لگی۔ انہوں نے اسے اس سے منع فرمایا۔ میں نے کہا: اے ابو عباس! میں سبز روغنی مٹکے میں میٹھی نبیذ بناتا ہوں، پھر اس میں سے پیتا ہوں تو میرے پیٹ میں گڑگڑ ہوتی ہے۔ انہوں نے کہا کہ ایسی نبیذ مت پیو، اگرچہ وہ شہد سے زیادہ میٹھی ہو۔ [سنن نسائي/كتاب الأشربة/حدیث: 5694]

حضرت ابو جمرہ رحمہ اللہ نے بیان کیا کہ میں نے حضرت ابن عباس رضی اللہ عنہما سے کہا کہ میری دادی میرے لیے ایک مٹکے میں نبیذ بناتی ہیں، میں اسے پیتا ہوں تو وہ بالکل میٹھی ہوتی ہے لیکن اگر میں اسے زیادہ مقدار میں پی لوں، پھر لوگوں میں جا بیٹھوں تو مجھے خطرہ ہوتا ہے کہ میں (کوئی نامناسب بات کر کے) کہیں رسوا نہ ہو جاؤں۔ حضرت ابن عباس رضی اللہ عنہما فرمانے لگے: قبیلہ عبد القیس کا وفد رسول اللہ صلی اللہ علیہ وسلم کی خدمت میں حاضر ہوا، آپ صلی اللہ علیہ وسلم نے فرمایا: ”خوش آمدید اس وفد کو جو نہ رسوا ہوئے اور نہ نادم۔“ وہ کہنے لگے: اے اللہ کے رسول! ہمارے اور آپ کے درمیان مشرکین حائل ہیں، ہم حرمت کے مہینوں کے علاوہ آپ تک نہیں پہنچ سکتے، لہٰذا ہمیں کوئی ایسی جامع بات بتائیں جس پر عمل کر کے ہم جنت میں داخل ہو جائیں اور ہم اس کی طرف لوگوں کو بھی دعوت دیں۔ آپ صلی اللہ علیہ وسلم نے فرمایا: ”میں تمہیں چار چیزوں کا حکم دیتا ہوں اور چار چیزوں سے روکتا ہوں: میں تمہیں اللہ تعالیٰ پر ایمان لانے کا حکم دیتا ہوں، کیا تم جانتے ہو کہ اللہ تعالیٰ پر ایمان لانے کا کیا مطلب ہے؟“ انہوں نے کہا: «اللَّهُ وَرَسُولُهُ أَعْلَمُ» ”اللہ تعالیٰ اور اس کے رسول ہی خوب جانتے ہیں۔“ آپ صلی اللہ علیہ وسلم نے فرمایا: ”اس بات کی گواہی دینا کہ اللہ تعالیٰ کے سوا کوئی معبود نہیں، نماز قائم کرنا، زکاۃ ادا کرنا اور یہ کہ تم غنیمت سے خمس (پانچواں حصہ) حکومت کو دو، اور میں تمہیں چار چیزوں سے منع کرتا ہوں: اس نبیذ سے جو «الدُّبَّاءِ» ”کدو کے برتن“، «النَّقِيرِ» ”کھجور کی جڑ کے برتن“، «الْحَنْتَمِ» ”روغنی مٹکے“ اور «الْمُزَفَّتِ» ”تارکول لگے ہوئے برتن“ میں بنائی جائے۔“ [سنن نسائي/كتاب الأشربة/حدیث: 5695]

(تھوڑی شراب کو جائز کہنے والے) ان لوگوں نے عبدالملک بن نافع کی حضرت عبداللہ بن عمر رضی اللہ عنہما سے مروی روایت (5697) سے بھی استدلال کیا ہے۔ [سنن نسائي/كتاب الأشربة/حدیث: 5696]

حضرت ابن عمر رضی اللہ عنہما نے کہا میں نے دیکھا: کہ ایک آدمی رسول اللہ صلی اللہ علیہ وسلم کے پاس پیالہ لے کر آیا، اس میں نبیذ تھی جبکہ رسول اللہ صلی اللہ علیہ وسلم اس وقت رکن کے پاس تھے، اس نے پیالہ آپ کو پکڑا دیا، آپ نے اسے اپنے منہ مبارک کی طرف بڑھایا تو آپ نے اسے تلخ محسوس کیا اور اسے واپس کر دیا، لوگوں میں سے ایک آدمی نے آپ سے کہا: اے اللہ کے رسول! کیا یہ حرام ہے؟ آپ نے فرمایا: ”اس (پیالے والے) آدمی کو میرے پاس لاؤ۔“ اسے لایا گیا تو آپ نے اس سے پیالہ پکڑا، پھر کچھ پانی منگوا کر اس میں ڈالا، پھر اسے اپنے دہن مبارک کی طرف بڑھایا لیکن پھر تیوری سی چڑھائی، پھر اور پانی منگوایا اور اس میں ڈالا، پھر فرمایا: ”جب ان برتنوں کی نبیذ میں نشہ اور تلخی پیدا ہونے لگے تو اس کی تیزی کو پانی سے توڑ لیا کرو۔“ [سنن نسائي/كتاب الأشربة/حدیث: 5697]

(ایک دوسری سند سے) حضرت ابن عمر رضی اللہ عنہما نے نبی اکرم صلی اللہ علیہ وسلم سے ایسی ہی روایت نقل فرمائی ہے۔ ابو عبدالرحمن (امام نسائی رحمہ اللہ) نے کہا کہ اس روایت کا راوی عبدالملک بن نافع مشہور نہیں اور نہ اس کی حدیث قابل احتجاج ہے، جب کہ حضرت ابن عمر رضی اللہ عنہما سے منقول مشہور روایات اس روایت کے خلاف ہیں۔ [سنن نسائي/كتاب الأشربة/حدیث: 5698]

حضرت زید بن جبیر رضی اللہ عنہ سے روایت ہے کہ ایک آدمی نے حضرت ابن عمر رضی اللہ عنہما سے چند مشروبات کے بارے میں پوچھا تو انہوں نے فرمایا: ہر جوش والے مشروب سے پرہیز کرو۔ [سنن نسائي/كتاب الأشربة/حدیث: 5699]

حضرت زید بن جبیر سے روایت ہے کہ انہوں نے کہا کہ میں نے حضرت ابن عمر رضی اللہ عنہما سے چند مشروبات کے بارے میں سوال کیا تو انہوں نے فرمایا: ہر نشہ آور مشروب سے دور رہو۔ [سنن نسائي/كتاب الأشربة/حدیث: 5700]

حضرت ابن عمر رضی اللہ عنہما نے فرمایا: نشہ آور چیز تھوڑی بھی حرام ہے اور زیادہ بھی۔ [سنن نسائي/كتاب الأشربة/حدیث: 5701]