حضرت داود رحمہ اللہ سے روایت ہے، انہوں نے کہا کہ میں نے حضرت سعید بن مسیب رحمہ اللہ سے پوچھا کہ وہ کون سا مشروب تھا جسے حضرت عمر رضی اللہ عنہ نے حلال قرار دیا تھا؟ انہوں نے فرمایا کہ جسے اتنا پکایا جائے کہ وہ دو تہائی خشک ہو جائے اور ایک تہائی رہ جائے۔ [سنن نسائي/كتاب الأشربة/حدیث: 5722]

حضرت سعید بن مسیب رحمہ اللہ نے فرمایا کہ حضرت ابوالدرداء رضی اللہ عنہ وہ طلاء پیتے تھے جس میں سے دو تہائی خشک ہو چکا ہوتا اور ایک تہائی باقی رہ گیا ہوتا۔ [سنن نسائي/كتاب الأشربة/حدیث: 5723]

حضرت ابوموسیٰ اشعری رضی اللہ عنہ سے مروی ہے کہ وہ ایسا طلاء پیتے تھے جس میں سے دو تہائی خشک ہو چکا ہوتا اور ایک تہائی باقی رہ گیا ہوتا۔ [سنن نسائي/كتاب الأشربة/حدیث: 5724]

حضرت یعلیٰ بن عطاء رحمہ اللہ سے روایت ہے کہ ایک اعرابی نے حضرت سعید بن مسیب رحمہ اللہ سے اس مشروب کے بارے میں پوچھا جو نصف خشک ہوچکا ہو؟ تو میں نے ان کو فرماتے سنا: نہیں، حتیٰ کہ دو تہائی خشک ہوجائے اور ایک تہائی باقی رہ جائے۔ [سنن نسائي/كتاب الأشربة/حدیث: 5725]

حضرت سعید بن مسیب رحمہ اللہ نے فرمایا: جب «الطِّلَاءُ» اس طرح پکایا گیا ہو کہ ایک تہائی رہ جائے تو اسے استعمال کرنے میں کوئی حرج نہیں۔ [سنن نسائي/كتاب الأشربة/حدیث: 5726]

حضرت ابورجاء رحمہ اللہ نے فرمایا کہ میں نے حضرت حسن بصری رحمہ اللہ سے اس طلاء کے بارے میں پوچھا جس میں سے نصف خشک ہو چکا ہو؟ تو انہوں نے فرمایا: اسے مت پی۔ [سنن نسائي/كتاب الأشربة/حدیث: 5727]

بشیر بن مہاجر رحمہ اللہ نے فرمایا کہ میں نے حسن بصری رحمہ اللہ سے انگوروں کے پکے ہوئے جوس کے بارے میں پوچھا کہ کون سا جائز ہے؟ انہوں نے فرمایا: جسے اتنا پکایا جائے اور ایک تہائی باقی رہ جائے۔ [سنن نسائي/كتاب الأشربة/حدیث: 5728]

حضرت انس بن سیرین رحمہ اللہ سے روایت ہے کہ میں نے حضرت انس بن مالک رضی اللہ عنہ کو فرماتے سنا کہ حضرت نوح علیہ السلام سے شیطان نے انگور کی بیل کے بارے میں جھگڑا کیا۔ انہوں نے فرمایا: ”یہ میری ہے۔“ شیطان نے کہا: ”یہ میری ہے۔“ آخر دونوں نے اس بات پر صلح کر لی کہ ایک تہائی حضرت نوح علیہ السلام کی ہو گی اور دو تہائی شیطان کی۔ [سنن نسائي/كتاب الأشربة/حدیث: 5729]

عبدالملک بن طفیل جزری رحمہ اللہ سے روایت ہے کہ عمر بن عبدالعزیز رحمہ اللہ نے ہمیں لکھا کہ طلاء نہ پیو حتیٰ کہ اس میں دو تہائی خشک ہو جائے اور ایک تہائی باقی رہ جائے۔ اور (یاد رکھو) ”ہر نشہ آور چیز حرام ہے۔“ (خواہ وہ طلاء ہی ہو)۔ [سنن نسائي/كتاب الأشربة/حدیث: 5730]

حضرت مکحول رحمہ اللہ نے کہا کہ: ”ہر نشہ آور چیز حرام ہے۔“ [سنن نسائي/كتاب الأشربة/حدیث: 5731]