سیدنا رافع بن خدیج رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”کتے کی قیمت خبیث ہے، زانیہ کی کمائی خبیث ہے اور حجام کی کمائی خبیث ہے۔“ [سلسله احاديث صحيحه/البيوع والكسب والزهد/حدیث: 1078]

سیدنا جابر بن عبداللہ انصاری رضی اللہ عنہ سے روایت ہے کہ رسول اللہ صلی اللہ علیہ وسلم نے کتے اور بلے کی قمیت سے منع فرمایا۔ [سلسله احاديث صحيحه/البيوع والكسب والزهد/حدیث: 1079]

سیدنا ابوہریرہ رضی اللہ عنہ بیان کرتے ہیں: میں نے رسول اللہ صلی اللہ علیہ وسلم کو بانسری بجانے والے کی کمائی سے منع کرتے ہوئے سنا۔ [سلسله احاديث صحيحه/البيوع والكسب والزهد/حدیث: 1080]

سیدنا عبداللہ بن عمر رضی اللہ عنہما سے روایت ہے، وہ کہتے ہیں: رسول اللہ صلی اللہ علیہ وسلم نے میرا کندھا پکڑا اور فرمایا: ”دنیا میں اس طرح ہو جا، گویا کہ تو اجنبی مسافر ہے۔“ [سلسله احاديث صحيحه/البيوع والكسب والزهد/حدیث: 1081]

سیدنا ابوذر رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”قیامت والے دن زیادہ مال والے گٹھیا لوگ ہوں گے مگر جس نے مال کو (راہ حق میں) ادھر ادھر خرچ کیا اور حلال کمایا۔“ [سلسله احاديث صحيحه/البيوع والكسب والزهد/حدیث: 1082]

سیدنا عبداللہ بن عمر رضی اللہ عنہما بیان کرتے ہیں کہ ایک آدمی نے رسول اللہ صلی اللہ علیہ وسلم کے پاس ڈکار لی، آپ صلی اللہ علیہ وسلم نے اسے فرمایا: ”ہم سے اپنی ڈکار کو دور رکھ، بلاشبہ دنیا میں بہت زیادہ سیر و سیراب ہونے والے قیامت کے دن بہت زیادہ بھوکے رہنے والے ہوں گے۔“ [سلسله احاديث صحيحه/البيوع والكسب والزهد/حدیث: 1083]

نبی کریم صلی اللہ علیہ وسلم نے فرمایا: ”اگر اللہ تعالیٰ کے ہاں دنیا کی قدر و قیمت مچھر کے پر کے برابر بھی ہوتی تو وہ اس میں کافر کو پانی کا ایک گھونٹ بھی نہ پلاتا۔“ یہ حدیث سیدنا سہل بن سعد، سیدنا ابوہریرہ، سیدنا عبداللہ بن عمر اور سیدنا عبداللہ بن عباس رضی اللہ عنہم سمیت کئی صحابہ سے مروی ہے اور حسن اور عمرو بن مرہ سے مرسلاً مروی ہے۔ [سلسله احاديث صحيحه/البيوع والكسب والزهد/حدیث: 1084]

سیدنا سہل بن سعد رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”اگر اللہ تعالیٰ کے ہاں دنیا کی قدر و قیمت مچھر کے پر کے برابر بھی ہوتی تو وہ کافر کو پانی کا ایک گھونٹ بھی نہ پلاتے۔“ [سلسله احاديث صحيحه/البيوع والكسب والزهد/حدیث: 1085]

سیدنا ابوموسیٰ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بلاشبہ اس درہم و دینار نے تم سے پہلے لوگوں کو ہلاک کیا اور یہ تمہیں بھی ہلاک کرنے والے ہیں۔“ [سلسله احاديث صحيحه/البيوع والكسب والزهد/حدیث: 1086]

سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:“ ”جاگیریں نہ بناؤ وگرنہ دنیا میں پڑ جاؤ گے۔“ [سلسله احاديث صحيحه/البيوع والكسب والزهد/حدیث: 1087]