سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جس نے قطع رحمی کی یا جھوٹی قسم اٹھائی، وہ مرنے سے پہلے اس کا وبال دیکھ لے گا۔“ [سلسله احاديث صحيحه/الاداب والاستئذان/حدیث: 2854]

سیدنا ابوامامہ باہلی رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”جو آدمی اللہ تعالیٰ اور یوم آخرت پر ایمان رکھتا ہو، وہ ریشم پہنے نہ سونا۔“ [سلسله احاديث صحيحه/الاداب والاستئذان/حدیث: 2855]

سیدنا انس بن مالک رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جس نے اپنے غصے پر قابو پایا، اللہ تعالیٰ اس سے اپنا عذاب روک لے گا۔ جس نے اپنی زبان کی حفاظت کی، اللہ تعالیٰ اس کے عیوب پر پردہ ڈالے گا اور جس نے اللہ تعالیٰ سے معذرت کی، وہ اس کا عذر قبول کرے گا۔“ [سلسله احاديث صحيحه/الاداب والاستئذان/حدیث: 2856]

سیدنا جریر رضی اللہ عنہ سے روایت ہے، وہ کہتے ہیں کہ رسول اللہ صلی اللہ علیہ وسلم نے فرمایا: ”جو (‏‏‏‏ مخلوق پر) رحم نہیں کرتا، (‏‏‏‏ اللہ تعالیٰ کی طرف سے) اس پر رحم نہیں کیا جاتا۔ جو (‏‏‏‏ مخلوق کو) معاف نہیں کرتا، (‏‏‏‏ اللہ تعالیٰ کی طرف سے) اس کی بخشش نہیں ہوتی اور جو (‏‏‏‏اللہ کی طرف) توبہ نہیں کرتا، اسے (‏‏‏‏اس کی طرف سے) معاف نہیں کیا جاتا۔“ [سلسله احاديث صحيحه/الاداب والاستئذان/حدیث: 2857]

سیدنا جابر بن عبداللہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”جو اپنے بھائی کی ضرورت پوری کرتا ہے، اللہ تعالیٰ اس کی ضرورت پوری کرتا ہے۔“ [سلسله احاديث صحيحه/الاداب والاستئذان/حدیث: 2858]

سیدنا عبداللہ بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ”جو مومن لوگوں کے ساتھ مل جل کر رہتا ہے اور ان کی تکالیف پر صبر کرتا ہے، وہ اس سے بہتر ہے جو نہ تو لوگوں کے ساتھ مل جل کر رہتا ہے اور نہ ہی ان کی اذیتوں پر صبر کرتا ہے۔“ [سلسله احاديث صحيحه/الاداب والاستئذان/حدیث: 2859]

سیدنا سہل بن سعد رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”مومن تو وہ ہے جو مانوس ہوتا ہے اور جس سے مانوس ہوا جاتا ہے۔ اس آدمی میں کوئی خیر و بھلائی نہیں جو نہ کسی سے مانوس ہوتا ہے اور نہ کوئی اس سے مانوس ہوتا ہے۔“ [سلسله احاديث صحيحه/الاداب والاستئذان/حدیث: 2860]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”مومن (‏‏‏‏لوگوں سے) مانوس ہوتا ہے اور (‏‏‏‏لوگ اس سے) مانوس ہوتے ہیں۔ اس آدمی میں کوئی خیر نہیں جو نہ خود کسی سے مانوسں ہوتا ہے اور نہ کوئی اس سے مانوس ہوتا ہے۔ اور لوگوں میں سب سے بہتر وہ ہے جو دوسرے لوگوں کے لیے زیادہ مفید ہو۔“ [سلسله احاديث صحيحه/الاداب والاستئذان/حدیث: 2861]

سیدنا ابوبرزہ رضی اللہ عنہ کہتے ہیں: میں نے کہا: اے اللہ کے رسول! کسی ایسے عمل پر میری رہنمائی فرمائیں جس سے میں فائدہ حاصل کر سکوں۔ آپ صلی اللہ علیہ وسلم نے فرمایا: ”مسلمانوں کے راستے سے تکلیف دہ چیز ہٹا دیا کر۔“ [سلسله احاديث صحيحه/الاداب والاستئذان/حدیث: 2862]

سیدنا جابر بن عبداللہ رضی اللہ عنہ کا خیال ہے کہ نبی کریم صلی اللہ علیہ وسلم نے گھروں میں تصاویر رکھنے سے منع فرمایا اور اس بات سے بھی منع فرمایا کہ آدمی تصویریں بنائے۔ [سلسله احاديث صحيحه/الاداب والاستئذان/حدیث: 2863]