حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”کسی مسلمان کو یہ لائق نہیں کہ وہ اپنی کسی چیز میں وصیت کرنا چاہتا ہو مگر دو راتیں بھی اس حالت میں گزارے کہ اس کے پاس وصیت تحریری شکل میں موجود نہ ہو۔“ محمد بن مسلم نے عمرو کے ذریعے سے ابن عمر رضی اللہ عنہما کے نبی کریم صلی اللہ علیہ وسلم سے روایت کرنے میں مالک کی متابعت کی ہے۔ [صحيح البخاري/كتاب الوصايا/حدیث: 2738]

حضرت عمرو بن حارث رضی اللہ عنہما سے روایت ہے جو رسول اللہ صلی اللہ علیہ وسلم کے سسرالی رشتہ دار اور حضرت جویریہ بنت حارث رضی اللہ عنہما کے بھائی ہیں، انہوں نے فرمایا کہ رسول اللہ صلی اللہ علیہ وسلم نے وفات کے وقت نہ کوئی درہم و دینار، نہ کوئی غلام لونڈی اور نہ کوئی اور چیز ہی چھوڑی، صرف ایک سفید خچر، ہتھیار اور کچھ زمین چھوڑی جسے آپ صلی اللہ علیہ وسلم نے صدقہ کر دیا تھا۔ [صحيح البخاري/كتاب الوصايا/حدیث: 2739]

حضرت طلحہ بن مصرف رحمہ اللہ سے روایت ہے، انہوں نے کہا: میں نے حضرت عبداللہ بن ابی اوفیٰ رضی اللہ عنہما سے دریافت کیا: کیا نبی کریم صلی اللہ علیہ وسلم نے کسی چیز کی وصیت کی تھی؟ انہوں نے فرمایا: نہیں۔ میں نے کہا: پھر لوگوں پر وصیت کرنا کیوں فرض کیا گیا ہے؟ یا لوگوں کو وصیت کرنے کا کیوں حکم دیا گیا ہے؟ انہوں نے فرمایا: (ہاں،) آپ صلی اللہ علیہ وسلم نے ”کتاب اللہ پر عمل پیرا رہنے“ کی ضرور وصیت کی تھی۔ [صحيح البخاري/كتاب الوصايا/حدیث: 2740]

حضرت اسود بن یزید رحمہ اللہ سے روایت ہے کہ لوگوں نے حضرت عائشہ رضی اللہ عنہا کے پاس حضرت علی رضی اللہ عنہ کے وصی ہونے کا ذکر کیا تو انہوں نے فرمایا: آپ صلی اللہ علیہ وسلم نے حضرت علی رضی اللہ عنہ کو کب وصیت فرمائی؟ حالانکہ (آخری لمحات میں) میں نے آپ صلی اللہ علیہ وسلم کو اپنے سینے سے لگایا ہوا تھا۔ یا فرمایا: میں انہیں اپنی گود میں رکھے ہوئے تھی، تب آپ صلی اللہ علیہ وسلم نے پانی کا طشت منگوایا، اتنے میں آپ صلی اللہ علیہ وسلم کا سر مبارک میری جھولی میں جھک گیا۔ مجھے معلوم نہ ہو سکا کہ آپ صلی اللہ علیہ وسلم وفات پا چکے ہیں، تو آپ صلی اللہ علیہ وسلم نے (حضرت علی رضی اللہ عنہ کے لیے) وصیت کب فرمائی؟ [صحيح البخاري/كتاب الوصايا/حدیث: 2741]

حضرت سعد بن ابی وقاص رضی اللہ عنہ سے روایت ہے، انہوں نے فرمایا: نبی کریم صلی اللہ علیہ وسلم میری تیمارداری کے لیے تشریف لائے جبکہ میں مکہ مکرمہ میں تھا اور آپ صلی اللہ علیہ وسلم اس بات کو پسند نہیں کرتے تھے کہ اس کی وفات اس سرزمین میں ہو جہاں سے ہجرت کر چکے ہیں۔ آپ صلی اللہ علیہ وسلم نے فرمایا: ”اللہ تعالیٰ عفراء کے بیٹے پر رحم فرمائے۔“ میں نے عرض کیا: اللہ کے رسول صلی اللہ علیہ وسلم ! کیا میں اپنے تمام مال کی وصیت کر سکتا ہوں؟ آپ صلی اللہ علیہ وسلم نے فرمایا: ”نہیں۔“ میں نے عرض کیا: اپنے نصف مال کی؟ آپ صلی اللہ علیہ وسلم نے فرمایا: ”نہیں۔“ پھر میں نے عرض کیا: ایک تہائی کی وصیت کر دوں؟ آپ صلی اللہ علیہ وسلم نے فرمایا: ”ہاں، تیسرے حصے کی وصیت درست ہے۔ لیکن یہ بھی زیادہ ہے، کیونکہ تم اگر اپنے ورثاء کو مالدار چھوڑ جاؤ تو یہ اس سے بہتر ہے کہ انہیں تنگ دست و محتاج چھوڑو جو لوگوں کے آگے ہاتھ پھیلا کر مانگتے پھریں۔ تم جو مال بھی خرچ کرو گے وہ تمہارے لیے صدقہ ہو گا حتیٰ کہ وہ لقمہ جسے تم توڑ کر اپنی بیوی کے منہ میں ڈالو گے وہ بھی صدقہ ہے۔ یقیناً تمہاری عمر دراز ہو گی اور اللہ تعالیٰ تمہیں بلند مرتبہ عطا فرمائے گا کہ کچھ لوگ تمہاری ذات سے فائدہ اٹھائیں گے جبکہ کچھ لوگوں کو تمہاری وجہ سے نقصان پہنچے گا۔“ اس وقت حضرت سعد رضی اللہ عنہ کی صرف ایک بیٹی تھی۔ [صحيح البخاري/كتاب الوصايا/حدیث: 2742]

حضرت عبداللہ بن عباس رضی اللہ عنہما سے روایت ہے، انہوں نے فرمایا: کاش کہ لوگ وصیت میں چوتھائی تک کمی کر لیں کیونکہ رسول اللہ صلی اللہ علیہ وسلم نے فرمایا: ”ایک تہائی تک وصیت کرو، وصیت کی یہ مقدار بھی بہت زیادہ یا بہت بڑی ہے۔“ [صحيح البخاري/كتاب الوصايا/حدیث: 2743]

حضرت سعد بن ابی وقاص رضی اللہ عنہ سے روایت ہے، انہوں نے کہا: میں بیمار ہوا تو نبی کریم صلی اللہ علیہ وسلم میری تیمار داری کے لیے تشریف لائے۔ میں نے عرض کیا: اللہ کے رسول صلی اللہ علیہ وسلم ! آپ میرے لیے اللہ سے دعا کریں کہ وہ مجھے ایڑیوں کے بل واپس نہ کر دے (مکہ میں مجھے موت نہ آئے) آپ صلی اللہ علیہ وسلم نے فرمایا: ”شاید اللہ تعالیٰ تمہیں دراز عمر دے اور لوگوں کو تم سے نفع پہنچائے۔“ میں نے عرض کیا: میرا وصیت کرنے کا ارادہ ہے اور میری ایک ہی بیٹی ہے، کیا میں آدھے مال کی وصیت کر دوں؟ آپ صلی اللہ علیہ وسلم نے فرمایا: ”نصف مال تو زیادہ ہے۔“ میں نے عرض کیا: تہائی مال کی وصیت کر دوں؟ آپ صلی اللہ علیہ وسلم نے فرمایا: ”ہاں ثلث ٹھیک ہے لیکن ثلث کی مقدار بھی زیادہ یا بڑی ہے۔“ راوی کہتا ہے کہ لوگ ایک تہائی مال کی وصیت کرنے لگے کیونکہ تہائی کی مقدار کو آپ صلی اللہ علیہ وسلم نے ان کے لیے جائز قرار دیا۔ [صحيح البخاري/كتاب الوصايا/حدیث: 2744]

نبی کریم صلی اللہ علیہ وسلم کی زوجہ محترمہ ام المومنین حضرت عائشہ رضی اللہ عنہا سے روایت ہے، انہوں نے فرمایا کہ عتبہ بن ابی وقاص نے اپنے بھائی حضرت سعد بن ابی وقاص رضی اللہ عنہ کو وصیت کی کہ زمعہ کی لونڈی کا فرزند میرے نطفے سے ہے، اسے اپنے قبضے میں لے لینا، چنانچہ فتحِ مکہ کے موقع پر حضرت سعد بن ابی وقاص رضی اللہ عنہ نے اسے پکڑ لیا اور کہا کہ یہ میرا بھتیجا ہے، اس کے متعلق میرے بھائی نے مجھے وصیت کی تھی۔ تب عبد بن زمعہ کھڑا ہوا اور کہنے لگا: یہ تو میرا بھائی ہے اور میرے باپ کی لونڈی کا بیٹا ہے جو اس کے بستر پر پیدا ہوا ہے۔ دونوں رسول اللہ صلی اللہ علیہ وسلم کی خدمت میں اپنا جھگڑا لے کر حاضر ہوئے۔ حضرت سعد بن ابی وقاص رضی اللہ عنہ نے عرض کیا: اے اللہ کے رسول صلی اللہ علیہ وسلم ! یہ میرے بھائی کا بیٹا ہے اور اس نے مجھے اس کے متعلق وصیت کی تھی۔ عبد بن زمعہ نے کہا: یہ میرا بھائی ہے اور میرے باپ کی لونڈی کا بیٹا ہے۔ رسول اللہ صلی اللہ علیہ وسلم نے فیصلہ فرمایا: «هُوَ لَكَ يَا عَبْدُ بْنَ زَمْعَةَ، الْوَلَدُ لِلْفِرَاشِ وَلِلْعَاهِرِ الْحَجَرُ» ”اے عبد بن زمعہ! یہ تمہارا ہے کیونکہ بچہ اسی کا ہوگا جس کے بستر پر پیدا ہوا اور زانی کے لیے پتھر ہیں۔“ اس کے بعد آپ صلی اللہ علیہ وسلم نے ام المومنین حضرت سودہ رضی اللہ عنہا سے فرمایا: «احْتَجِبِي مِنْهُ يَا سَوْدَةُ» ”اس سے پردہ کرو۔“ کیونکہ آپ صلی اللہ علیہ وسلم نے عتبہ کی مشابہت اس میں دیکھی تھی، چنانچہ اس لڑکے نے حضرت سودہ رضی اللہ عنہا کو کبھی نہ دیکھا حتیٰ کہ وہ اللہ سے جا ملا۔ [صحيح البخاري/كتاب الوصايا/حدیث: 2745]