حضرت عائشہ رضی اللہ عنہا سے روایت ہے کہ نبی صلی اللہ علیہ وسلم نے جب ان سے نکاح کیا تو ان کی عمر چھ سال کی تھی اور جب ان کی رخصتی ہوئی تو عمر نو سال کی تھی۔ حضرت ہشام رحمہ اللہ نے کہا: ”مجھے بتایا گیا کہ حضرت عائشہ رضی اللہ عنہا آپ صلی اللہ علیہ وسلم کے ہاں نو برس تک رہیں۔“ [صحيح البخاري/كتاب النكاح/حدیث: 5134]

حضرت سہل بن سعد رضی اللہ عنہ سے روایت ہے، انہوں نے کہا کہ ایک عورت رسول اللہ صلی اللہ علیہ وسلم کے پاس آئی اور عرض کی: ”میں خود کو آپ کے لیے ہبہ کرتی ہوں“، پھر وہ دیر تک وہاں کھڑی رہی۔ اتنے میں ایک شخص نے کہا: ”اگر آپ کو اس کی ضرورت نہ ہو تو مجھ سے اس کا نکاح کر دیں۔“ آپ صلی اللہ علیہ وسلم نے دریافت فرمایا: ”کیا تیرے پاس اسے مہر دینے کے لیے کوئی چیز ہے؟“ اس نے کہا: ”میرے پاس اس تہبند کے علاوہ اور کچھ نہیں۔“ آپ صلی اللہ علیہ وسلم نے فرمایا: ”اگر تم اپنا تہبند اسے دے دو گے تو تمہارے پہننے کے لیے کوئی تہبند نہیں ہوگا، کوئی اور چیز تلاش کر لو۔“ اس نے عرض کی: ”میرے پاس کچھ بھی نہیں۔“ آپ صلی اللہ علیہ وسلم نے فرمایا: ”کچھ تو تلاش کرو اگرچہ لوہے کی انگوٹھی ہو۔“ تاہم اسے وہ بھی مل نہ سکی تو آپ صلی اللہ علیہ وسلم نے اسے فرمایا: ”کیا تجھے کچھ قرآن یاد ہے؟“ اس نے کہا: ”ہاں، فلاں فلاں سورت یاد ہے“، اس نے چند سورتوں کا نام لیا۔ آخر کار آپ صلی اللہ علیہ وسلم نے فرمایا: ”جاؤ، ہم نے تیرا نکاح اس عورت سے کر دیا اس قرآن کے بدلے جو تجھے یاد ہے۔“ [صحيح البخاري/كتاب النكاح/حدیث: 5135]

حضرت ابوہریرہ رضی اللہ عنہ سے روایت ہے، انہوں نے بیان کیا کہ نبی صلی اللہ علیہ وسلم نے فرمایا: ”بیوہ عورت کا نکاح اس وقت تک نہ کیا جائے جب تک اس سے پوچھ نہ لیا جائے اور کنواری عورت کا نکاح اس وقت تک نہ کیا جائے جب تک اس کی اجازت نہ لی جائے۔“ صحابہ نے عرض کی: اللہ کے رسول! کنواری کی اجازت کس طرح ہوگی؟ آپ صلی اللہ علیہ وسلم نے فرمایا: ”(پیغام نکاح سن کر) اس کا خاموش رہنا ہی اس کی اجازت ہے۔“ [صحيح البخاري/كتاب النكاح/حدیث: 5136]

حضرت عائشہ رضی اللہ عنہا سے روایت ہے، انہوں نے عرض کیا: ”اللہ کے رسول! کنواری لڑکی تو شرماتی ہے (اس لیے بول نہیں سکتی)“ تو آپ صلی اللہ علیہ وسلم نے فرمایا: ”اس کی خاموشی ہی اس کی رضا مندی ہے۔“ [صحيح البخاري/كتاب النكاح/حدیث: 5137]

حضرت خنساء بنت خدام انصاریہ رضی اللہ عنہا سے روایت ہے کہ ”ان کے والد نے ان کا نکاح کر دیا جبکہ وہ «ثَيِّبَة» (شوہر دیدہ) تھیں، انہیں یہ نکاح منظور نہیں تھا، اس لیے رسول اللہ صلی اللہ علیہ وسلم کی خدمت میں حاضر ہوئیں تو آپ صلی اللہ علیہ وسلم نے اس کا نکاح فسخ کر ڈالا۔“ [صحيح البخاري/كتاب النكاح/حدیث: 5138]

حضرت عبدالرحمن بن یزید رضی اللہ عنہ اور مجمع بن یزید رضی اللہ عنہ سے روایت ہے کہ ”خذام نامی ایک آدمی نے اپنی ایک لڑکی کا نکاح کرایا تھا،“ پھر سابقہ حدیث کی طرح بیان کیا۔ [صحيح البخاري/كتاب النكاح/حدیث: 5139]

حضرت عروہ بن زبیر رضی اللہ عنہ سے روایت ہے، انہوں نے حضرت عائشہ رضی اللہ عنہا سے پوچھا اور عرض کی: ”اے اماں جان! اس آیت کریمہ کی تفسیر کیا ہے: ﴿وَإِنْ خِفْتُمْ أَلَّا تُقْسِطُوا فِي الْيَتَامَىٰ فَانكِحُوا مَا طَابَ لَكُم مِّنَ النِّسَاءِ﴾ [سورة النساء: 3] ”اور تمہیں یہ خطرہ ہو کہ یتیم لڑکیوں کے بارے میں انصاف نہ کر سکو گے تو پھر دوسری عورتوں سے جو تمہیں پسند آئیں نکاح کرلو...“؟“ ام المومنین حضرت عائشہ رضی اللہ عنہا نے فرمایا: ”اے میرے بھانجے! یہ وہ یتیم لڑکی ہے جو اپنے سرپرست کی کفالت میں ہوتی، وہ اس کی مالداری اور خوبصورتی میں دلچسپی رکھتا (اور اپنے ساتھ نکاح کر لیتا) لیکن اس کے حق مہر میں کمی کر دیتا، اس لیے یتیم بچیوں سے انہیں نکاح کرنے سے روک دیا گیا مگر یہ کہ انہیں پورا پورا حق مہر دیں، نیز بصورت دیگر انہیں نکاح کرنے کا حکم دیا گیا۔“ حضرت عائشہ رضی اللہ عنہا نے (سلسلہ گفتگو جاری رکھتے ہوئے) فرمایا: ”اس کے بعد لوگوں نے رسول اللہ صلی اللہ علیہ وسلم سے پوچھا تو اللہ تعالیٰ نے ان کے لیے یہ آیت نازل فرمائی: ﴿وَيَسْتَفْتُونَكَ فِي النِّسَاءِ ۖ قُلِ اللَّهُ يُفْتِيكُمْ فِيهِنَّ وَمَا يُتْلَىٰ عَلَيْكُمْ فِي الْكِتَابِ فِي يَتَامَى النِّسَاءِ اللَّاتِي لَا تُؤْتُونَهُنَّ مَا كُتِبَ لَهُنَّ وَتَرْغَبُونَ أَن تَنكِحُوهُنَّ﴾ [سورة النساء: 127] ”لوگ آپ سے عورتوں کے بارے میں فتویٰ پوچھتے ہیں۔ آپ ان سے کہہ دیں کہ اللہ تعالیٰ تمہیں ان کے متعلق فتویٰ دیتا ہے اور اس کے بارے میں جو یتیم عورتوں سے متعلق اس کتاب میں پہلے سے سنایا جا چکا ہے۔ جن کے مقررہ حقوق تو تم دیتے نہیں ہو لیکن ان سے نکاح کرنے میں بہت دلچسپی رکھتے ہو۔“ اللہ تعالیٰ نے انہیں اس آیت کریمہ میں فرمایا کہ یتیم لڑکی جب خوبصورت اور مالدار ہو تو تم اس کے نکاح، نسب اور حق مہر میں دلچسپی رکھتے ہو اور جب وہ خوبصورت نہ ہو اور کم مالداری کی وجہ سے اس کے متعلق کوئی رغبت نہ ہو تو اسے چھوڑ دیتے ہو، اور ان کے علاوہ دوسری عورتیں اپنے حبالہ عقد میں لے آتے ہو۔“ حضرت عائشہ رضی اللہ عنہا نے فرمایا: ”جیسے وہ عدم رغبت کی صورت میں چھوڑ دیتے ہیں تو ان کے لیے یہ بھی جائز نہیں کہ جب ان میں دلچسپی رکھیں تو ان سے نکاح کریں الا یہ کہ ان سے انصاف کریں اور انہیں پورا پورا مہر ادا کریں۔“ [صحيح البخاري/كتاب النكاح/حدیث: 5140]

حضرت سہل بن سعد رضی اللہ عنہ سے روایت ہے کہ ایک عورت، نبی صلی اللہ علیہ وسلم کی خدمت میں حاضر ہوئی اور خود کو آپ پر پیش کیا تو آپ صلی اللہ علیہ وسلم نے فرمایا: ”مجھے آج کل کسی دوسری عورت کی حاجت نہیں۔“ ایک آدمی نے عرض کیا: ”اللہ کے رسول! آپ اس کا نکاح مجھ سے کر دیں۔“ آپ نے (اسے) فرمایا: ”تیرے پاس کیا ہے؟“ اس نے کہا: ”میرے پاس کچھ بھی نہیں۔“ آپ نے فرمایا: ”اسے کچھ نہ کچھ تو دینا پڑے گا خواہ لوہے کی انگوٹھی ہی کیوں نہ ہو۔“ اس نے پھر عرض کی: ”میرے پاس تو کچھ بھی نہیں۔“ آپ نے فرمایا: ”تو نے کچھ قرآن یاد کیا ہے؟“ اس نے کہا: ”ہاں، اتنا قرآن یاد ہے۔“ آپ صلی اللہ علیہ وسلم نے فرمایا: ”میں نے اسے تمہارے نکاح میں دے دیا اس قرآن کے بدلے جو تمہیں یاد ہے۔“ [صحيح البخاري/كتاب النكاح/حدیث: 5141]

حضرت ابن عمر رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے منع فرمایا کہ ”ایک آدمی دوسرے کی خرید و فروخت پر خرید و فروخت کرے اور (اس سے بھی منع فرمایا کہ) اپنے بھائی کے پیغامِ نکاح پر کوئی دوسرا پیغام بھیجے، حتیٰ کہ پہلا پیغام دینے والا اسے ترک کر دے یا وہ اسے اجازت دے دے۔“ [صحيح البخاري/كتاب النكاح/حدیث: 5142]