حضرت ابوہریرہ رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے فرمایا: ”عورت اور اس کی پھوپھی کو ایک عقد میں جمع نہ کیا جائے اور نہ عورت اور اس کی خالہ ہی کو ایک عقد میں جمع کیا جائے۔“ [صحيح البخاري/كتاب النكاح/حدیث: 5109]

حضرت ابوہریرہ رضی اللہ عنہ سے روایت ہے انہوں نے کہا کہ رسول اللہ صلی اللہ علیہ وسلم نے ”عورت اور اس کی پھوپھی، نیز عورت اور اس کی خالہ کو ایک عقد میں جمع کرنے سے منع فرمایا ہے“۔ بیوی کے باپ کی خالہ کو بھی اسی درجے میں رکھا گیا ہے۔ [صحيح البخاري/كتاب النكاح/حدیث: 5110]

کیونکہ حضرت عروہ رحمہ اللہ نے حضرت عائشہ رضی اللہ عنہا سے بیان کیا، انہوں نے فرمایا: ”جو رشتے نسب سے حرام ہوتے ہیں انہیں رضاعت سے بھی حرام قرار دو۔“ [صحيح البخاري/كتاب النكاح/حدیث: 5111]

حضرت ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے «الشِّغَارِ» ”شغار“ سے منع فرمایا: ”اور شغار یہ ہے کہ کوئی شخص اپنی بیٹی کا نکاح (کسی کے ساتھ) اس شرط کے ساتھ کرے کہ وہ دوسرا شخص بھی اپنی بیٹی کا نکاح اس سے کرے گا اور ان دونوں کا کوئی حق مہر مقرر نہ ہو۔“ [صحيح البخاري/كتاب النكاح/حدیث: 5112]

حضرت ہشام بن عروہ اپنے باپ سے روایت کرتے ہیں، انہوں نے کہا کہ حضرت خولہ بنت حکیم رضی اللہ عنہا ان عورتوں میں سے ہیں جنہوں نے اپنے آپ کو نبی صلی اللہ علیہ وسلم کے لیے ہبہ کیا تھا۔ اس پر حضرت عائشہ رضی اللہ عنہا نے کہا: ”کیا عورت کو شرم نہیں آتی کہ وہ اپنے آپ کو کسی مرد کے لیے ہبہ کرتی ہے؟“ پھر جب یہ آیت نازل ہوئی: ﴿تُرْجِي مَنْ تَشَاءُ مِنْهُنَّ وَتُؤْوِي إِلَيْكَ مَنْ تَشَاءُ﴾ [سورة الأحزاب: 51] ”(اے پیغمبر!) تو اپنی جس بیوی کو چاہے پیچھے ڈال دے۔“ تو میں نے کہا: ”اے اللہ کے رسول! مجھے اب پتا چلا ہے کہ آپ کا رب آپ کی خواہش پوری کرنے میں کس قدر جلدی کرتا ہے۔“ اس حدیث کو ابو سعید مؤدب، محمد بن بشر اور عبدہ نے ہشام سے، انہوں نے اپنے والد عروہ سے، انہوں نے حضرت عائشہ رضی اللہ عنہا سے بیان کیا، وہ ایک دوسرے سے حدیث میں کچھ اضافہ کرتے تھے۔ [صحيح البخاري/كتاب النكاح/حدیث: 5113]

حضرت ابن عباس رضی اللہ عنہما سے روایت ہے کہ نبی صلی اللہ علیہ وسلم نے ”احرام کی حالت میں نکاح کیا“۔ [صحيح البخاري/كتاب النكاح/حدیث: 5114]

حضرت علی بن ابی طالب رضی اللہ عنہ سے روایت ہے، انہوں نے حضرت ابن عباس رضی اللہ عنہ سے کہا کہ ”رسول اللہ صلی اللہ علیہ وسلم نے فتح خیبر کے وقت متعہ اور گھریلو گدھوں کے گوشت سے منع فرمایا تھا۔“ [صحيح البخاري/كتاب النكاح/حدیث: 5115]

حضرت ابو جمرہ رضی اللہ عنہ سے روایت ہے، انہوں نے کہا کہ میں نے حضرت ابن عباس رضی اللہ عنہما سے سنا، ان سے عورتوں سے نکاح متعہ کے متعلق سوال کیا گیا تو انہوں نے اس کی اجازت دی۔ پھر ان کے ایک غلام نے ان سے پوچھا کہ ”اس کی اجازت مجبوری، عورتوں کی کمی یا اس جیسی دیگر صورتوں میں ہوگی؟“ تو حضرت ابن عباس رضی اللہ عنہما نے جواب دیا کہ ”ہاں۔“ [صحيح البخاري/كتاب النكاح/حدیث: 5116]

حضرت جابر بن عبداللہ اور حضرت سلمہ بن اکوع رضی اللہ عنہما سے روایت ہے، انہوں نے کہا: ”ہم ایک لشکر میں تھے تو رسول اللہ صلی اللہ علیہ وسلم کا قاصد ہمارے پاس آیا اور اس نے کہا: تمہیں نکاحِ متعہ کرنے کی اجازت دی گئی ہے، لہٰذا تم نکاحِ متعہ کر سکتے ہو۔“ [صحيح البخاري/كتاب النكاح/حدیث: 5117]

حضرت جابر بن عبداللہ اور حضرت سلمہ بن اکوع رضی اللہ عنہما سے روایت ہے، انہوں نے کہا: ”ہم ایک لشکر میں تھے تو رسول اللہ صلی اللہ علیہ وسلم کا قاصد ہمارے پاس آیا اور اس نے کہا: ”تمہیں نکاحِ متعہ کرنے کی اجازت دی گئی ہے، لہٰذا تم نکاحِ متعہ کر سکتے ہو۔“” [صحيح البخاري/كتاب النكاح/حدیث: 5118]