حضرت ام قیس رضی اللہ عنہا سے روایت ہے، انہوں نے کہا کہ میں اپنے ایک بیٹے کو لے کر رسول اللہ صلی اللہ علیہ وسلم کی خدمت میں حاضر ہوئی جبکہ میں نے عذرہ (گلے کی بیماری) کی وجہ سے اس کا تالو دبوایا تھا۔ آپ صلی اللہ علیہ وسلم نے فرمایا: ”تم اپنے بچوں کو انگلی سے حلق دبا کر کیوں تکلیف دیتی ہو؟ تم عود ہندی استعمال کرو۔ اس میں سات بیماریوں کی شفا ہے، ان میں سے ایک سینے کا درد ہے۔ اگر حلق کی بیماری ہے تو ناک میں دوائی ڈالی جائے اور سینے کے درد کے لیے منہ کے ایک جانب دوائی ڈالی جائے۔“ (سفیان کہتے ہیں کہ) میں نے زہری سے سنا کہ آپ صلی اللہ علیہ وسلم نے دو بیماریوں کو بیان کیا لیکن باقی پانچ بیماریوں کا ذکر نہیں کیا۔ (عبداللہ بن مدینی نے کہا کہ) میں نے سفیان سے ذکر کیا کہ معمر تو «أَعْلَقْتُ عَلَيْهِ» ”أعلقت علیہ“ کے الفاظ بیان کرتا ہے؟ انہوں نے کہا: معمر نے یاد نہیں رکھا، مجھے یاد ہے کہ زہری نے «أَعْلَقْتُ عَنْهُ» ”أعلقت عنہ“ کہا۔ سفیان نے اس تحنیک کو بیان کیا جو بچے کو پیدائش کے وقت کی جاتی ہے۔ سفیان نے اپنے حلق میں انگلی ڈالی اور اپنے تالو کو انگلی سے اٹھایا۔ سفیان نے اعلاق کے یہ معنیٰ بیان کیے کہ بچے کو حلق میں انگلی ڈال کر اس کا تالو اٹھانا، انہوں نے «أَعْلَقُوا عَنْهُ شَيْئًا» ”أعلقوا عنہ شیئا“ کے الفاظ نہیں کہے۔ [صحيح البخاري/كتاب الطب/حدیث: 5713]

نبی صلی اللہ علیہ وسلم کی زوجہ محترمہ ام المومنین حضرت عائشہ رضی اللہ عنہا سے روایت ہے انہوں نے کہا: جب رسول اللہ صلی اللہ علیہ وسلم کی بیماری شدت اختیار کر گئی اور تکلیف زیادہ ہو گئی تو آپ صلی اللہ علیہ وسلم نے بیماری کے دن میرے گھر گزارنے کے لیے اپنی دوسری مطہرات سے اجازت طلب کی۔ انہوں نے آپ صلی اللہ علیہ وسلم کو اجازت دے دی تو آپ صلی اللہ علیہ وسلم دو اشخاص حضرت عباس رضی اللہ عنہ اور ایک دوسرے آدمی کے درمیان سہارا لے کر باہر تشریف لائے، اس وقت آپ صلی اللہ علیہ وسلم کے قدم مبارک زمین پر گھسٹ رہے تھے۔ (راوی کہتا ہے کہ) میں نے حضرت ابن عباس رضی اللہ عنہما سے اس کا ذکر کیا تو انہوں نے فرمایا: ”کیا تمہیں معلوم ہے کہ دوسرے صاحب کون تھے جن کا حضرت عائشہ رضی اللہ عنہا نے نام نہیں لیا؟“ میں نے کہا: نہیں، مجھے تو معلوم نہیں، انہوں نے فرمایا: ”وہ حضرت علی بن ابی طالب رضی اللہ عنہ تھے۔“ حضرت عائشہ رضی اللہ عنہا نے کہا: میرے حجرے میں داخل ہونے کے بعد نبی صلی اللہ علیہ وسلم نے فرمایا جبکہ آپ صلی اللہ علیہ وسلم کی بیماری بڑھ گئی تھی: ”مجھ پر سات مشکیزے پانی ڈالو جو پانی سے لبریز ہوں، شاید میں لوگوں کو کچھ نصیحت کروں۔“ پھر آپ صلی اللہ علیہ وسلم کو ہم نے ایک بڑے لگن میں بٹھایا جو نبی صلی اللہ علیہ وسلم کی زوجہ محترمہ حضرت حفصہ رضی اللہ عنہا کا تھا، پھر ہم نے ان مشکیزوں سے آپ صلی اللہ علیہ وسلم پر پانی بہانا شروع کر دیا حتی کہ آپ صلی اللہ علیہ وسلم نے ہماری طرف اشارہ کیا کہ تم نے تعمیلِ حکم کر دی ہے۔ ام المومنین حضرت عائشہ رضی اللہ عنہا نے بیان کیا کہ اس کے بعد آپ صلی اللہ علیہ وسلم صحابہ کرام رضی اللہ عنہم کے پاس آئے، انہیں نماز پڑھائی پھر خطاب کیا۔ [صحيح البخاري/كتاب الطب/حدیث: 5714]

حضرت ام قیس بنت محصن اسدیہ رضی اللہ عنہا سے روایت ہے، ان کا تعلق قبیلہ خزیمہ کی شاخ بنو اسد سے تھا، وہ پہلی پہلی مہاجر عورتوں میں سے ہیں جنہوں نے رسول اللہ صلی اللہ علیہ وسلم سے بیعت کی تھی۔ نیز آپ حضرت عکاشہ بن محصن رضی اللہ عنہ کی ہمشیرہ ہیں۔ وہ رسول اللہ صلی اللہ علیہ وسلم کی خدمت میں اپنے بیٹے کو لائیں، انہوں نے اپنے بیٹے کی عذرہ بیماری کا علاج تالو دبا کر کیا تھا۔ نبی صلی اللہ علیہ وسلم نے فرمایا: ”تم عورتیں کس لیے اپنی اولاد کو تالو دبا کر تکلیف دیتی ہو؟ تمہیں چاہیے کہ اس مرض میں عودِ ہندی استعمال کیا کرو کیونکہ اس میں سات بیماریوں سے شفا ہے، ان میں سے ایک سینے کا درد ہے۔“ اس سے آپ کی مراد کست تھی، یہی عودِ ہندی ہے۔ یونس اور اسحاق بن راشد نے امام زہری سے «أَعْلَقْتِ» کے بجائے «عَلَّقْتِ» کے الفاظ بیان کیے ہیں۔ [صحيح البخاري/كتاب الطب/حدیث: 5715]

حضرت ابوسعید خدری رضی اللہ عنہ سے روایت ہے، انہوں نے کہا کہ ایک آدمی نبی صلی اللہ علیہ وسلم کی خدمت میں حاضر ہوا اور عرض کی کہ میرے بھائی کو اسہال کا عارضہ ہے، آپ صلی اللہ علیہ وسلم نے فرمایا: ”اسے شہد پلاؤ۔“ اس نے پلایا اور پھر واپس آ کر کہنے لگا کہ میں نے اسے شہد پلایا تھا لیکن اسہال بڑھ گئے ہیں۔ آپ صلی اللہ علیہ وسلم نے فرمایا: ”اللہ تعالیٰ نے سچ فرمایا ہے، البتہ تیرے بھائی کا پیٹ خطا کار ہے۔“ نضر نے شعبہ سے روایت کرنے میں محمد بن جعفر کی متابعت کی ہے۔ [صحيح البخاري/كتاب الطب/حدیث: 5716]

حضرت حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ” «لَا عَدْوَىٰ وَلَا صَفَرَ وَلَا هَامَةَ» ”امراض میں چھوت چھات، صفر (پیٹ کی ایک بیماری) کا جان لیوا ہونا اور الو کی نحوست کی کوئی حیثیت نہیں“”، اس پر ایک اعرابی بولا: ”اللہ کے رسول! پھر میرے اونٹوں کو کیا ہو گیا ہے؟ پھر ایک خارشی اونٹ آتا ہے تو سب کو خارشی بنا دیتا ہے“، آپ صلی اللہ علیہ وسلم نے فرمایا: ”پہلے کو خارشی کس نے بنایا تھا؟“ اس حدیث کو امام زہری رحمہ اللہ نے ابو سلمہ رحمہ اللہ اور سنان بن ابی سنان رحمہ اللہ سے روایت کیا ہے۔ [صحيح البخاري/كتاب الطب/حدیث: 5717]

حضرت ام قیس بنت محصن رضی اللہ عنہا سے روایت ہے، یہ خاتون ان پہلی مہاجرات سے ہیں جنہوں نے رسول اللہ صلی اللہ علیہ وسلم کی بیعت کی تھی، نیز یہ حضرت عکاشہ بن محصن رضی اللہ عنہ کی ہمشیرہ ہیں، انہوں نے بیان کیا کہ وہ رسول اللہ صلی اللہ علیہ وسلم کی خدمت میں اپنا ایک بیٹا لے کر حاضر ہوئیں جبکہ انہوں نے «عُذْرَة» بیماری کی وجہ سے بچے کا تالو دبا دیا تھا۔ نبی صلی اللہ علیہ وسلم نے فرمایا: ”اللہ سے ڈرو، تم عورتیں اپنی اولاد کو اس طرح تالو دبا کر کیوں تکلیف پہنچاتی ہو؟ تم اس کے لیے «عُودِ هِنْدِي» استعمال کرو، اس میں سات بیماریوں کے لیے شفا ہے، جن میں سے ایک نمونیہ بھی ہے“، آپ صلی اللہ علیہ وسلم کی مراد «كُسْت» تھی جسے «قُسْط» بھی کہا جاتا ہے، یہ بھی ایک لغت ہے۔ [صحيح البخاري/كتاب الطب/حدیث: 5718]

حضرت حماد سے روایت ہے، انہوں نے کہا کہ ”ایوب کے سامنے ابوقلابہ کی لکھی ہوئی احادیث پڑھی گئیں، ان میں وہ احادیث بھی تھیں جنہیں انہوں نے بیان کیا تھا اور وہ بھی تھیں جو ان کے سامنے پڑھ کر سنائی گئی تھیں۔“ ان تحریر شدہ احادیث میں حضرت انس بن نضر رضی اللہ عنہ سے مروی یہ حدیث بھی تھی، وہ حضرت انس رضی اللہ عنہ سے بیان کرتے ہیں، انہوں نے کہا کہ ”رسول اللہ صلی اللہ علیہ وسلم نے قبیلہ انصار کے بعض گھرانوں کو زہریلے جانوروں کے کاٹنے اور کان کی تکلیف میں دم کرنے کی اجازت دی تھی۔“ حضرت انس رضی اللہ عنہ نے بیان کیا کہ ”پسلی کے درد کی وجہ سے مجھے داغ دیا گیا تھا، جبکہ رسول اللہ صلی اللہ علیہ وسلم حیات تھے، اس وقت حضرت ابوطلحہ، حضرت انس بن نضر اور حضرت زید بن ثابت رضی اللہ عنہم بھی حاضر تھے اور مجھے حضرت ابوطلحہ رضی اللہ عنہ نے داغ دیا تھا۔“ [صحيح البخاري/كتاب الطب/حدیث: 5719]

حضرت حماد رحمہ اللہ سے روایت ہے، انہوں نے کہا: ”ایوب کے سامنے ابوقلابہ کی لکھی ہوئی احادیث پڑھی گئیں، ان میں وہ احادیث بھی تھیں جنہیں بیان کیا تھا اور وہ بھی تھیں جو ان کے سامنے پڑھ کر سنائی گئی تھیں۔ ان تحریر شدہ احادیث میں حضرت انس بن نضر رضی اللہ عنہ، حضرت انس رضی اللہ عنہ سے بیان کرتے ہیں، انہوں نے کہا کہ رسول اللہ صلی اللہ علیہ وسلم نے ”قبیلہ انصار کے بعض گھرانوں کو زہریلے جانوروں کے کاٹنے اور کان کی تکلیف میں دم کرنے کی اجازت دی تھی“۔ حضرت انس رضی اللہ عنہ نے بیان کیا: ”پسلی کے درد کی وجہ سے مجھے داغ دیا گیا تھا جبکہ رسول اللہ صلی اللہ علیہ وسلم حیات تھے، اس وقت حضرت ابو طلحہ، حضرت انس بن نضر اور حضرت زید بن ثابت رضی اللہ عنہم بھی حاضر تھے اور مجھے حضرت ابو طلحہ رضی اللہ عنہ نے داغ دیا تھا۔““ [صحيح البخاري/كتاب الطب/حدیث: 5720]

حضرت حماد رحمہ اللہ سے روایت ہے، انہوں نے کہا کہ ایوب رحمہ اللہ کے سامنے ابوقلابہ رحمہ اللہ کی لکھی ہوئی احادیث پڑھی گئیں، ان میں وہ احادیث بھی تھیں جنہیں (ابوقلابہ نے) بیان کیا تھا اور وہ بھی تھیں جو ان کے سامنے پڑھ کر سنائی گئی تھیں۔ ان تحریر شدہ احادیث میں حضرت انس بن نضر رضی اللہ عنہ، حضرت انس رضی اللہ عنہ سے بیان کرتے ہیں، انہوں نے کہا کہ: ”رسول اللہ صلی اللہ علیہ وسلم نے قبیلہ انصار کے بعض گھرانوں کو زہریلے جانوروں کے کاٹنے اور کان کی تکلیف میں دم کرنے کی اجازت دی تھی۔“ حضرت انس رضی اللہ عنہ نے بیان کیا کہ: ”پسلی کے درد کی وجہ سے مجھے داغ دیا گیا تھا جبکہ رسول اللہ صلی اللہ علیہ وسلم حیات تھے، اس وقت حضرت ابوطلحہ، حضرت انس بن نضر اور حضرت زید بن ثابت رضی اللہ عنہم بھی حاضر تھے اور مجھے حضرت ابوطلحہ رضی اللہ عنہ نے داغ دیا تھا۔“ [صحيح البخاري/كتاب الطب/حدیث: 5721]

حضرت سہل بن سعد ساعدی رضی اللہ عنہ سے روایت ہے، انہوں نے کہا کہ ”جب نبی صلی اللہ علیہ وسلم کے سر مبارک پر خود ٹوٹ گیا اور آپ کا چہرہ مبارک خون آلود ہو گیا، نیز سامنے کے دو دانت بھی ٹوٹ گئے تو حضرت علی بن ابی طالب رضی اللہ عنہ اپنی ڈھال میں پانی بھر بھر کر لاتے تھے اور حضرت فاطمہ رضی اللہ عنہا آپ کے چہرہ مبارک سے خون دھو رہی تھیں۔ پھر جب حضرت فاطمہ رضی اللہ عنہا نے دیکھا کہ خون پانی سے بھی زیادہ آ رہا ہے تو انہوں نے ایک چٹائی جلا کر اس کی راکھ رسول اللہ صلی اللہ علیہ وسلم کے زخموں پر لگائی تو خون رک گیا۔“ [صحيح البخاري/كتاب الطب/حدیث: 5722]