حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”پیٹ کی بیماری سے مرنے والا شہید ہے اور طاعون کی بیماری سے مرنے والا بھی شہید ہے۔“ [صحيح البخاري/كتاب الطب/حدیث: 5733]

نبی صلی اللہ علیہ وسلم کی زوجہ محترمہ ام المومنین حضرت عائشہ رضی اللہ عنہا سے روایت ہے، انہوں نے رسول اللہ صلی اللہ علیہ وسلم سے طاعون کے متعلق سوال کیا تو اللہ کے نبی صلی اللہ علیہ وسلم نے انہیں بتایا: ”طاعون (اللہ کا) عذاب تھا، وہ اسے جس پر چاہتا بھیج دیتا، پھر اللہ تعالیٰ نے اسے اہل ایمان کے لیے باعثِ رحمت بنا دیا۔ اب کوئی بھی اللہ کا بندہ اگر صبر کے ساتھ اس شہر میں ٹھہرا رہے جہاں طاعون پھوٹ پڑا ہو اور یقین رکھتا ہو کہ جو کچھ اللہ تعالیٰ نے اس کے لیے لکھ دیا ہے وہ اس کو ضرور پہنچ کر رہے گا، تو اس کو شہید کا سا ثواب ملے گا۔“ نضر بن شمیل نے داود سے روایت کرنے میں حبان بن ہلال کی متابعت کی ہے۔ [صحيح البخاري/كتاب الطب/حدیث: 5734]

حضرت عائشہ رضی اللہ عنہا سے روایت ہے کہ نبی صلی اللہ علیہ وسلم اپنے مرضِ وفات میں خود پر «الْمُعَوِّذَاتِ» ”معوذات“ پڑھ کر دم کرتے تھے۔ پھر جب آپ صلی اللہ علیہ وسلم زیادہ بیمار ہو گئے تو میں یہ سورتیں پڑھ کر آپ صلی اللہ علیہ وسلم کو دم کرتی تھی اور برکت کے لیے آپ صلی اللہ علیہ وسلم کا دستِ مبارک ہی آپ صلی اللہ علیہ وسلم کے جسدِ اطہر پر پھیرتی تھی۔ (معمر نے کہا) میں نے امام زہری سے پوچھا: ”آپ صلی اللہ علیہ وسلم کس طرح دم کرتے تھے؟“ تو انہوں نے بتایا کہ ”آپ صلی اللہ علیہ وسلم دم کر کے اپنے دونوں ہاتھوں پر پھونک مارتے، پھر انہیں اپنے چہرہ انور پر پھیر لیتے تھے۔“ [صحيح البخاري/كتاب الطب/حدیث: 5735]

حضرت ابوسعید خدری رضی اللہ عنہ سے روایت ہے کہ نبی صلی اللہ علیہ وسلم کے چند صحابہ کرام رضی اللہ عنہم عرب کے قبائل میں سے کسی قبیلے کے پاس سے گزرے تو انہوں نے ان کی ضیافت نہ کی۔ اس دوران میں اس قبیلے کے سردار کو کسی زہریلے جانور نے کاٹ لیا۔ قبیلے والوں نے صحابہ کرام رضی اللہ عنہم سے کہا: ”تمہارے پاس اس کی کوئی دوا یا دم کرنے والا ہے؟“ صحابہ کرام رضی اللہ عنہم نے کہا: ”تم لوگوں نے ہماری مہمان نوازی نہیں کی، لہٰذا ہم اس وقت تک دم نہیں کریں گے جب تک تم ہماری مزدوری طے نہ کرو۔“ چنانچہ انہوں نے کچھ بکریاں دینا طے کر دیں۔ پھر ان میں ایک شخص نے سورہ فاتحہ پڑھنا شروع کر دی، دم کرتے وقت منہ میں تھوک جمع کرتا رہا اور متاثرہ جگہ پر لگاتا رہا، ایسا کرنے سے وہ سردار تندرست ہو گیا۔ قبیلے والے بکریاں لے کر آئے تو صحابہ کرام رضی اللہ عنہم نے کہا: ”جب تک ہم نبی صلی اللہ علیہ وسلم سے اس کے متعلق پوچھ نہ لیں ہم یہ بکریاں نہیں لے سکتے۔“ چنانچہ انہوں نے آپ صلی اللہ علیہ وسلم سے پوچھا تو آپ نے مسکراتے ہوئے فرمایا: ”تمہیں کیسے معلوم ہوا کہ سورہ فاتحہ سے بھی دم کیا جا سکتا ہے؟ بکریاں لے لو اور ان میں میرے لیے بھی حصہ رکھو۔“ [صحيح البخاري/كتاب الطب/حدیث: 5736]

حضرت ابن عباس رضی اللہ عنہما سے روایت ہے کہ نبی صلی اللہ علیہ وسلم کے چند صحابہ کرام چشمے پر رہنے والوں کے پاس سے گزرے، ان کے ہاں زہریلے کا کاٹا ہوا ایک شخص تھا، صحابہ کرام کے پاس ان کا ایک آدمی آیا اور کہنے لگا: ”کیا تم میں کوئی دم جھاڑ کرنے والا ہے؟ کیونکہ اس چشمے پر ایک آدمی کو کسی زہریلے جانور نے کاٹ لیا ہے۔“ صحابہ کرام میں سے ایک آدمی اس کے ہمراہ گیا اور چند بکریاں لینے کی شرط پر سورہ فاتحہ سے دم کیا تو وہ تندرست ہو گیا، وہ صحابی بکریاں لے کر اپنے ساتھیوں کے پاس آیا تو انہوں نے اسے اچھا خیال نہ کیا اور کہا: ”تو نے اللہ کی کتاب پڑھ کر اجرت لی ہے؟“ آخر جب حضرات مدینہ طیبہ آئے تو انہوں نے عرض کی: ”اللہ کے رسول! اس شخص نے اللہ کی کتاب پر اجرت لی ہے۔“ رسول اللہ صلی اللہ علیہ وسلم نے فرمایا: «إِنَّ أَحَقَّ مَا أَخَذْتُمْ عَلَيْهِ أَجْرًا كِتَابُ اللَّهِ» ”جن چیزوں کی تم اجرت لیتے ہو ان میں سب سے اجرت لینے کے قابل اللہ کی کتاب ہے۔“ [صحيح البخاري/كتاب الطب/حدیث: 5737]

حضرت عائشہ رضی اللہ عنہا سے روایت ہے، انہوں نے کہا: ”نبی صلی اللہ علیہ وسلم نے مجھے حکم دیا... یا (کہا کہ) آپ نے حکم دیا... کہ نظرِ بد لگ جانے سے دم کیا جائے۔“ [صحيح البخاري/كتاب الطب/حدیث: 5738]

حضرت ام سلمہ رضی اللہ عنہا سے روایت ہے کہ نبی صلی اللہ علیہ وسلم نے ان کے گھر میں ایک لڑکی دیکھی جس کے چہرے پر سیاہ دھبے تھے تو آپ صلی اللہ علیہ وسلم نے فرمایا: ”اسے دم کراؤ کیونکہ اسے نظرِ بد لگ گئی ہے“ عقیل نے کہا کہ ان سے زہری نے بیان کیا، انہیں عروہ نے خبر دی، انہوں نے اسے نبی صلی اللہ علیہ وسلم سے (مرسل طور پر) بیان کیا، عبداللہ بن سالم نے زبیدی سے روایت کرنے میں محمد بن حرب کی متابعت کی ہے۔ [صحيح البخاري/كتاب الطب/حدیث: 5739]

حضرت ابوہریرہ رضی اللہ عنہ سے روایت ہے، وہ نبی صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”نظر لگ جانا برحق ہے“ اور آپ صلی اللہ علیہ وسلم نے جسم میں سرمہ بھرنے سے بھی منع فرمایا ہے۔ [صحيح البخاري/كتاب الطب/حدیث: 5740]

حضرت اسود رحمہ اللہ سے روایت ہے، انہوں نے کہا: ”میں نے حضرت عائشہ رضی اللہ عنہا سے زہریلے جانور کے کاٹنے پر دم کرنے کے متعلق پوچھا تو انہوں نے فرمایا کہ نبی صلی اللہ علیہ وسلم نے ”ہر زہریلے جانور کے کاٹنے پر دم کرنے کی اجازت دی ہے۔“” [صحيح البخاري/كتاب الطب/حدیث: 5741]