سیدنا عمر بن خطاب رضی اللہ عنہ کہتے ہیں: میں نے رسول اللہ صلی اللہ علیہ وسلم کو یہ فرماتے سنا ہے کہ: ”جو شخص اپنے وظیفے سے رات کو سو جائے پھر اس کو دوپہر کے وقت ظہر تک پڑھ لے تو گویا اس نے رات کو ہی پڑھ لیا ہے۔“ [معجم صغير للطبراني/كتاب الصلوٰة/حدیث: 305]

سیدنا محمد بن المنکدر اپنے باپ سے روایت کرتے ہیں، انہوں نے کہا: نبی صلی اللہ علیہ وسلم نے ایک رات عشاء کی نماز کچھ دیر مؤخر کر دی، پھر آپ صلی اللہ علیہ وسلم باہر تشریف لائے تو فرمانے لگے: ”تم کس چیز کا انتظار کر رہے ہو؟“ وہ کہنے لگے: ہم نماز کا انتظار کر رہے ہیں، تو آپ صلی اللہ علیہ وسلم نے فرمایا: ”تم جب تک اس کا انتظار کرتے رہے اس وقت تک نماز میں رہے۔“ پھر آپ صلی اللہ علیہ وسلم نے آسمان کی طرف نظر اٹھائی تو فرمایا: ”ستارے آسمان والوں کے لیے امان ہیں، جب ستارے چلے جائیں تو آسمان والوں کے پاس وہ چیز آجائے گی جس کا وعدہ کیے جاتے ہیں۔ اور میں اپنے صحابہ رضی اللہ عنہم کے لیے امان ہوں، جب میں چلا جاؤں گا تو میرے صحابہ کے پاس وہ کچھ آجائے گا جس کا وہ وعدہ کیے جاتے ہیں۔ اور میرے صحابہ میری امت کے لیے امان ہیں، جب میرے صحابہ چلے جائیں تو میری امت کے پاس وہ چیز آجائے گی جس کا وہ وعدہ کیے جاتے ہیں۔ بلال اٹھیں اقامت کہیں۔“ [معجم صغير للطبراني/كتاب الصلوٰة/حدیث: 306]

سیدنا عبداللہ بن مسعود رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”وتر قرآن والوں پر لازم ہے۔“ [معجم صغير للطبراني/كتاب الصلوٰة/حدیث: 307]

سیدنا انس بن مالک رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”جو شخص استخارہ کرتا ہے وہ کبھی ناکام نہیں ہوتا، اور جو شخص مشورہ کرے وہ کبھی نادم اور شرمندہ نہیں ہوتا، اور جو شخص میانہ روی سے خرچ کرے وہ کبھی تنگ دست نہیں ہوتا۔“ [معجم صغير للطبراني/كتاب الصلوٰة/حدیث: 308]

سیدنا عبداللہ بن مسعود رضی اللہ عنہ کہتے ہیں: نبی صلی اللہ علیہ وسلم جمعہ کے دن صبح کی نماز میں سورہ ﴿الٓمٓ تَنْزِيْلُ السَّجْدَةَ﴾ اور ﴿هَلْ أَتَى عَلَى الْإِنْسَانِ﴾ پڑھا کرتے تھے، اور یہ ہمیشہ پڑھتے۔ [معجم صغير للطبراني/كتاب الصلوٰة/حدیث: 309]

سیدنا بلال رضی اللہ عنہ کہتے ہیں: نبی صلی اللہ علیہ وسلم نماز میں ہمارے کندھوں کو برابر کیا کرتے تھے۔ [معجم صغير للطبراني/كتاب الصلوٰة/حدیث: 310]

سیدہ عائشہ رضی اللہ عنہا کہتی ہیں کہ نبی کریم صلی اللہ علیہ وسلم وتر کی دو رکعت میں سلام نہیں پھیرتے تھے۔ [معجم صغير للطبراني/كتاب الصلوٰة/حدیث: 311]

سیدنا ابن عمر رضی اللہ عنہما کہتے ہیں: رسول اللہ صلی اللہ علیہ وسلم نے فرمایا: ”جب نماز قائم کی جائے اور رات کا کھانا بھی تیار ہو تو پہلے کھانا کھا لو۔“ [معجم صغير للطبراني/كتاب الصلوٰة/حدیث: 312]

ابوالکنود رحمہ اللہ کہتے ہیں: میں نے سیدنا ابن عمر رضی اللہ عنہما سے سفر کی نماز کے متعلق سوال کیا تو انہوں نے فرمایا: وہ دو رکعتیں آسمان سے نازل ہوئیں، اب اگر تم چاہو تو انہیں واپس کر دو۔ [معجم صغير للطبراني/كتاب الصلوٰة/حدیث: 313]

سیدنا جابر رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”مسکرانے سے نماز نہیں ٹوٹتی، بلکہ قہقہہ لگا کر ہنسنے سے نماز ٹوٹ جاتی ہے۔“ [معجم صغير للطبراني/كتاب الصلوٰة/حدیث: 314]