عبداللہ بن مغفل رضی اللہ عنہ سے روایت ہے کہ انہوں نے اپنے بیٹے کو دعا کرتے ہوئے سنا: اے اللہ! میں تجھ سے جنت کے دائیں طرف سفید محل کی درخواست کرتا ہوں، تو انہوں نے فرمایا: بیٹا! اللہ سے جنت کی درخواست کرو اور جہنم سے اس کی پناہ طلب کرو، کیونکہ میں نے رسول اللہ صلی ‌اللہ ‌علیہ ‌وآلہ ‌وسلم کو فرماتے ہوئے سنا: ”عنقریب میری امت میں کچھ ایسے لوگ ہوں گے جو وضو (کے اعضاء دھونے) اور دعا کرنے میں حد سے تجاوز کریں گے۔“ صحیح، رواہ احمد وابوداؤد وابن ماجہ۔ [مشكوة المصابيح/كتاب الطهارة/حدیث: 418]

ابی بن کعب رضی اللہ عنہ نبی صلی ‌اللہ ‌علیہ ‌وآلہ ‌وسلم سے روایت کرتے ہیں، آپ صلی ‌اللہ ‌علیہ ‌وآلہ ‌وسلم نے فرمایا: ”دورانِ وضو وسوسہ ڈالنے والے شیطان کا نام «وَلَهَان» ہے، چنانچہ پانی کے استعمال کے وقت وسوسوں سے بچو۔“ ضعیف۔ امام ترمذی رحمہ اللہ نے فرمایا: یہ حدیث غریب ہے، اس کی سند محدثین کے نزدیک قوی نہیں، کیونکہ ہم نہیں جانتے کہ خارجہ (راوی) کے علاوہ کسی اور نے اسے مرفوع روایت کیا ہے، جبکہ وہ ہمارے اصحاب کے نزدیک قوی نہیں۔ [مشكوة المصابيح/كتاب الطهارة/حدیث: 419]

معاذ بن جبل رضی اللہ عنہ بیان کرتے ہیں، میں نے رسول اللہ صلی ‌اللہ ‌علیہ ‌وآلہ ‌وسلم کو دیکھا کہ آپ نے وضو کیا تو اپنے کپڑے کے کنارے سے اپنے چہرے کو صاف کیا۔ ضعیف۔ [مشكوة المصابيح/كتاب الطهارة/حدیث: 420]

عائشہ رضی اللہ عنہا بیان کرتی ہیں، رسول اللہ صلی ‌اللہ ‌علیہ ‌وآلہ ‌وسلم کے پاس کپڑے کا ایک ٹکڑا تھا، آپ اس کے ساتھ وضو کے بعد اپنے اعضاء صاف کیا کرتے تھے۔ ترمذی، اور انہوں نے کہا: یہ حدیث صحیح نہیں، ابومعاذ راوی، محدثین کے نزدیک ضعیف ہے۔ ضعیف۔ [مشكوة المصابيح/كتاب الطهارة/حدیث: 421]

ثابت بن ابو صفیہ رحمہ اللہ بیان کرتے ہیں، میں نے ابو جعفر محمد الباقر رحمہ اللہ سے کہا: جابر رضی اللہ عنہ نے آپ کو یہ حدیث بیان کی ہے کہ نبی صلی ‌اللہ ‌علیہ ‌وآلہ ‌وسلم نے ایک ایک مرتبہ، دو دو مرتبہ اور تین تین مرتبہ وضو کیا ہے؟ انہوں نے کہا: ہاں۔ ضعیف۔ [مشكوة المصابيح/كتاب الطهارة/حدیث: 422]

عبداللہ بن زید رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم نے دو دو مرتبہ وضو کیا اور فرمایا: ”وہ نور پرنور (سونے پہ سہاگہ) ہے۔“ «لَا أَصْلَ لَهُ» ”اس کی کوئی اصل نہیں ہے“، «رَوَاهُ رَزِينٌ (لَمْ أَجِدْهُ)» ”اسے رزین نے روایت کیا ہے (میں نے اسے نہیں پایا)“۔ [مشكوة المصابيح/كتاب الطهارة/حدیث: 423]

عثمان رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم نے تین تین مرتبہ وضو کیا اور فرمایا: ”یہ میرا، مجھ سے پہلے انبیاء علیہم السلام اور ابراہیم علیہ السلام کا وضو ہے۔“ رزین نے دونوں روایتیں کیں، جبکہ امام نووی رحمہ اللہ نے شرح صحیح مسلم میں دوسری روایت کو ضعیف قرار دیا ہے۔ ضعیف۔ [مشكوة المصابيح/كتاب الطهارة/حدیث: 424]

انس رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم ہر نماز کے لیے وضو کیا کرتے تھے، جبکہ ہم میں سے کسی کے لیے (پہلا) وضو کافی رہتا ہے جب تک اس کا وضو نہ ٹوٹے۔ (صحیح، رواہ الدارمی والبخاری) [مشكوة المصابيح/كتاب الطهارة/حدیث: 425]

محمد بن یحییٰ بن حبان رحمہ اللہ بیان کرتے ہیں کہ میں نے عبیداللہ بن عبداللہ بن عمر سے کہا: کیا تم نے عبداللہ بن عمر رضی اللہ عنہما کو ہر نماز کے لیے وضو کرتے ہوئے دیکھا ہے؟ قطع نظر اس کے کہ وہ پہلے ہی باوضو تھے یا بے وضو، نیز انہوں نے یہ مسئلہ کہاں سے لیا ہے؟ انہوں نے کہا: اسماء بنت زید بن خطاب رضی اللہ عنہا نے انہیں حدیث بیان کی کہ عبداللہ بن حنظلہ بن ابی عامر الغسیل رضی اللہ عنہما نے انہیں حدیث بیان کی کہ رسول اللہ صلی ‌اللہ ‌علیہ ‌وآلہ ‌وسلم کو ”وضو ہونے یا وضو نہ ہونے، ہر دو صورتوں میں ہر نماز کے لیے وضو کرنے کا حکم دیا گیا“، چنانچہ جب رسول اللہ صلی ‌اللہ ‌علیہ ‌وآلہ ‌وسلم پر یہ گراں گزرا تو آپ صلی ‌اللہ ‌علیہ ‌وآلہ ‌وسلم کو ”ہر نماز کے وقت مسواک کرنے کا حکم دیا گیا اور وضو کا حکم ختم کر دیا گیا، البتہ وضو نہ ہونے کی صورت میں وضو کرنے کا حکم باقی رہا“، راوی بیان کرتے ہیں کہ عبداللہ رضی اللہ عنہما سمجھتے تھے کہ انہیں ہر نماز کے لیے نیا وضو کرنے کی استطاعت حاصل ہے، لہٰذا وہ مرتے دم تک اس پر عمل پیرا رہے۔ اسنادہ حسن، رواہ احمد۔ [مشكوة المصابيح/كتاب الطهارة/حدیث: 426]

عبداللہ بن عمرو بن عاص رضی اللہ عنہما سے روایت ہے کہ نبی صلی ‌اللہ ‌علیہ ‌وآلہ ‌وسلم سعد رضی اللہ عنہ کے پاس سے گزرے جبکہ وہ وضو کر رہے تھے، آپ نے فرمایا: ”سعد! یہ کیسا اسراف ہے؟“ انہوں نے عرض کیا: کیا وضو کرنے میں بھی اسراف ہے؟ آپ صلی ‌اللہ ‌علیہ ‌وآلہ ‌وسلم نے فرمایا: ”ہاں، خواہ تم نہرِ رواں پر ہو۔“ ضعیف۔ [مشكوة المصابيح/كتاب الطهارة/حدیث: 427]