شرح السنہ میں میمونہ رضی اللہ عنہا عن ابن عباس رضی اللہ عنہما، مصابیح کے الفاظ سے مروی ہے، یہ روایت ضعیف ہے۔ [مشكوة المصابيح/كتاب الطهارة/حدیث: 458]

عائشہ رضی اللہ عنہا بیان کرتی ہیں، رسول اللہ صلی ‌اللہ ‌علیہ ‌وآلہ ‌وسلم غسلِ جنابت کیا کرتے پھر آپ مجھ سے گرمائش حاصل کرتے جبکہ میں نے ابھی غسل نہیں کیا ہوتا تھا۔ ابنِ ماجہ، ترمذی نے بھی اسی طرح روایت کیا ہے۔ شرح السنہ میں مصابیح کے الفاظ ہیں۔ ضعیف۔ [مشكوة المصابيح/كتاب الطهارة/حدیث: 459]

علی رضی اللہ عنہ بیان کرتے ہیں، نبی صلی ‌اللہ ‌علیہ ‌وآلہ ‌وسلم بیت الخلا سے باہر تشریف لاتے تو ہمیں قرآن پڑھاتے اور ہمارے ساتھ گوشت تناول فرماتے اور جنابت کے علاوہ کوئی اور چیز آپ صلی ‌اللہ ‌علیہ ‌وآلہ ‌وسلم کو قرآن سے مانع نہیں تھی۔ ابوداؤد، نسائی، جبکہ ابن ماجہ نے بھی اسی طرح روایت کیا ہے۔ «إِسْنَادُهُ حَسَنٌ» ”اس کی سند حسن ہے“۔ [مشكوة المصابيح/كتاب الطهارة/حدیث: 460]

ابن عمر رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”حائضہ اور جنبی شخص قرآن سے کچھ نہ پڑھیں۔“ ضعیف۔ [مشكوة المصابيح/كتاب الطهارة/حدیث: 461]

عائشہ رضی اللہ عنہا بیان کرتی ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”ان گھروں کے دروازے مسجد کی دوسری طرف کر لو، کیونکہ میں حائضہ اور جنبی کے لیے مسجد کو حلال قرار نہیں دیتا۔“ اسنادہ حسن، رواہ ابوداؤد۔ [مشكوة المصابيح/كتاب الطهارة/حدیث: 462]

علی رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جس گھر میں تصویر، کتا اور جنبی ہوں وہاں (رحمت و برکت کے) فرشتے نہیں جاتے۔“ اسنادہ حسن، رواہ ابوداؤد والنسائی۔ [مشكوة المصابيح/كتاب الطهارة/حدیث: 463]

عمار بن یاسر رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”تین قسم کے لوگ ہیں کہ (رحمت و برکت کے) فرشتے ان کے قریب بھی نہیں جاتے، کافر کی لاش، «خَلُوْق» (زعفران کی خوشبو) سے لتھڑے ہوئے شخص اور جنبی الا یہ کہ وہ وضو کر لے۔“ ضعیف۔ [مشكوة المصابيح/كتاب الطهارة/حدیث: 464]

عبداللہ بن ابی بکر بن محمد بن عمرو بن حزم سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم نے عمرو بن حزم رضی اللہ عنہ کے نام جو خط لکھا اس میں تحریر تھا: «لَا يَمَسُّ الْقُرْآنَ إِلَّا طَاهِرٌ» ”صرف پاک شخص ہی قرآن کو ہاتھ لگا سکتا ہے۔“ حسن، رواہ مالک و الدار قطنی۔ [مشكوة المصابيح/كتاب الطهارة/حدیث: 465]

نافع بیان کرتے ہیں، میں کسی کام کی غرض سے ابن عمر رضی اللہ عنہما کے ساتھ گیا، پس جب ابن عمر رضی اللہ عنہما نے اپنا کام مکمل کر لیا تو انہوں نے اس دن ایک حدیث سنائی کہ ایک آدمی کسی گلی سے گزرا تو وہ رسول اللہ صلی ‌اللہ ‌علیہ ‌وآلہ ‌وسلم سے ملا جبکہ آپ صلی ‌اللہ ‌علیہ ‌وآلہ ‌وسلم بول و براز سے فارغ ہو کر آ رہے تھے، اس شخص نے آپ صلی ‌اللہ ‌علیہ ‌وآلہ ‌وسلم کو سلام کیا، لیکن آپ صلی ‌اللہ ‌علیہ ‌وآلہ ‌وسلم نے اسے جواب نہ دیا، حتیٰ کہ قریب تھا کہ وہ آدمی گلی میں سے اوجھل ہو جاتا۔ رسول اللہ صلی ‌اللہ ‌علیہ ‌وآلہ ‌وسلم نے اپنے دونوں ہاتھ دیوار پر مارے اور انہیں اپنے چہرے پر ملا، پھر دوبارہ ہاتھ مارے تو انہیں بازوؤں پر مل لیا، پھر آپ صلی ‌اللہ ‌علیہ ‌وآلہ ‌وسلم نے اس آدمی کے سلام کا جواب دیا، اور فرمایا: ”تمہارے سلام کا جواب دینے میں صرف یہی ایک رکاوٹ تھی کہ میں اس وقت باوضو نہیں تھا۔“ ضعیف۔ [مشكوة المصابيح/كتاب الطهارة/حدیث: 466]

مہاجر بن قنفذ رضی اللہ عنہ سے روایت ہے کہ وہ نبی صلی ‌اللہ ‌علیہ ‌وآلہ ‌وسلم کی خدمت میں حاضر ہوئے جبکہ آپ صلی ‌اللہ ‌علیہ ‌وآلہ ‌وسلم پیشاب کر رہے تھے، پس انہوں نے آپ صلی ‌اللہ ‌علیہ ‌وآلہ ‌وسلم کو سلام کیا لیکن آپ صلی ‌اللہ ‌علیہ ‌وآلہ ‌وسلم نے وضو کر لینے تک سلام کا جواب نہ دیا، پھر آپ صلی ‌اللہ ‌علیہ ‌وآلہ ‌وسلم نے ان سے معذرت کی اور فرمایا: ”میں نے وضو کے بغیر اللہ کا ذکر کرنا نا پسند کیا۔“ (ابوداؤد، حدیث ضعیف ہے)۔ اور امام نسائی رحمہ اللہ نے «حَتَّى تَوَضَّأَ» تک روایت کیا، اور فرمایا: جب آپ صلی ‌اللہ ‌علیہ ‌وآلہ ‌وسلم نے وضو کیا تو ان کے سلام کا جواب دیا۔ [مشكوة المصابيح/كتاب الطهارة/حدیث: 467]