ابی بن کعب رضی اللہ عنہ بیان کرتے ہیں: ”پانی (غسل)، پانی (انزال) کی وجہ سے واجب ہوتا ہے“، اس بارے میں شروع اسلام میں رخصت تھی، پھر اس سے منع کر دیا گیا۔ (صحیح، رواہ الترمذی، وابو داؤد، والدارمی)۔ [مشكوة المصابيح/كتاب الطهارة/حدیث: 448]

علی رضی اللہ عنہ بیان کرتے ہیں کہ ایک آدمی نبی صلی ‌اللہ ‌علیہ ‌وآلہ ‌وسلم کی خدمت میں حاضر ہوا تو اس نے عرض کیا: میں نے غسل جنابت کیا اور میں نے نماز فجر ادا کی، پھر میں نے ناخن برابر جگہ خشک دیکھی جہاں پانی نہیں پہنچا تھا، تو رسول اللہ صلی ‌اللہ ‌علیہ ‌وآلہ ‌وسلم نے فرمایا: ”اگر تم اپنا گیلا ہاتھ اس پر پھیر دیتے تو وہ تمہارے لیے کافی ہوتا۔“ ضعیف۔ [مشكوة المصابيح/كتاب الطهارة/حدیث: 449]

ابن عمر رضی اللہ عنہما بیان کرتے ہیں کہ نمازیں پچاس تھیں، غسل جنابت سات مرتبہ تھا، اور کپڑے سے پیشاب دھونا بھی سات مرتبہ تھا، رسول اللہ صلی ‌اللہ ‌علیہ ‌وآلہ ‌وسلم مسلسل (تخفیف کے لیے اپنے رب سے) سوال کرتے رہے حتیٰ کہ نمازیں پانچ، غسل جنابت ایک مرتبہ اور پیشاب کی وجہ سے کپڑے کا دھونا ایک مرتبہ کر دیا گیا۔ ضعیف۔ [مشكوة المصابيح/كتاب الطهارة/حدیث: 450]

ابوہریرہ رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم کی مجھ سے ملاقات ہوئی اور میں اس وقت جنبی تھا، پس آپ صلی ‌اللہ ‌علیہ ‌وآلہ ‌وسلم نے میرا ہاتھ پکڑا تو میں نے آپ صلی ‌اللہ ‌علیہ ‌وآلہ ‌وسلم کے ساتھ چلنا شروع کیا حتیٰ کہ آپ صلی ‌اللہ ‌علیہ ‌وآلہ ‌وسلم بیٹھ گئے تو میں وہاں سے چپکے سے اٹھا اور گھر آ کر غسل کر کے پھر خدمت میں حاضر ہوا تو آپ صلی ‌اللہ ‌علیہ ‌وآلہ ‌وسلم وہیں تشریف فرما تھے، آپ صلی ‌اللہ ‌علیہ ‌وآلہ ‌وسلم نے فرمایا: ”ابوہریرہ! تم کہاں تھے؟“ میں نے عرض کیا، تو آپ صلی ‌اللہ ‌علیہ ‌وآلہ ‌وسلم نے فرمایا: «سُبْحَانَ اللّٰهِ» ”سبحان اللہ! مومن نجس نہیں ہوتا۔“ یہ بخاری کے الفاظ ہیں اور مسلم کی روایت بھی اس کے ہم معنی ہے اور انہوں نے ”میں نے آپ صلی ‌اللہ ‌علیہ ‌وآلہ ‌وسلم کو بتایا“ کے بعد درج ذیل کا اضافہ نقل کیا ہے: ”جب آپ صلی ‌اللہ ‌علیہ ‌وآلہ ‌وسلم مجھے ملے تو میں جنبی تھا، پس میں نے غسل کیے بغیر آپ صلی ‌اللہ ‌علیہ ‌وآلہ ‌وسلم کے ساتھ ہم نشین ہونا ناپسند کیا۔“ بخاری کی دوسری روایت بھی اسی طرح ہے۔ متفق علیہ۔ [مشكوة المصابيح/كتاب الطهارة/حدیث: 451]

ابن عمر رضی اللہ عنہما بیان کرتے ہیں، عمر بن خطاب رضی اللہ عنہ نے رسول اللہ صلی ‌اللہ ‌علیہ ‌وآلہ ‌وسلم کو بتایا کہ وہ رات کو جنبی ہو جاتے ہیں، رسول اللہ صلی ‌اللہ ‌علیہ ‌وآلہ ‌وسلم نے انہیں فرمایا: ”وضو کر، استنجا کر اور سو جا۔“ متفق علیہ۔ [مشكوة المصابيح/كتاب الطهارة/حدیث: 452]

عائشہ رضی اللہ عنہا بیان کرتی ہیں، جب نبی صلی ‌اللہ ‌علیہ ‌وآلہ ‌وسلم جنبی ہوتے اور آپ کھانے یا سونے کا ارادہ فرماتے تو آپ نماز کے وضو جیسا وضو فرماتے۔ متفق علیہ۔ [مشكوة المصابيح/كتاب الطهارة/حدیث: 453]

ابوسعید خدری رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جب تم میں سے کوئی اپنی اہلیہ سے جماع کرے اور پھر وہ دوبارہ جماع کرنا چاہے تو وہ ان دونوں کے درمیان وضو کر لے۔“ رواہ مسلم۔ [مشكوة المصابيح/كتاب الطهارة/حدیث: 454]

انس رضی اللہ عنہ بیان کرتے ہیں کہ نبی صلی ‌اللہ ‌علیہ ‌وآلہ ‌وسلم اپنی ازواجِ مطہرات کے پاس غسلِ واحد کے ساتھ چکر لگا لیا کرتے تھے۔ رواہ مسلم۔ [مشكوة المصابيح/كتاب الطهارة/حدیث: 455]

عائشہ رضی اللہ عنہا بیان کرتی ہیں کہ نبی صلی ‌اللہ ‌علیہ ‌وآلہ ‌وسلم ہر حالت میں اللہ عزوجل کا ذکر کیا کرتے تھے۔ رواہ مسلم۔ اور ابن عباس رضی اللہ عنہما سے مروی حدیث ہم ان شاء اللہ تعالیٰ، کتاب الاطعمہ میں ذکر کریں گے۔ [مشكوة المصابيح/كتاب الطهارة/حدیث: 456]

ابن عباس رضی اللہ عنہما بیان کرتے ہیں کہ نبی صلی ‌اللہ ‌علیہ ‌وآلہ ‌وسلم کی کسی زوجہ محترمہ نے ایک ٹب میں غسل کیا، پھر رسول اللہ صلی ‌اللہ ‌علیہ ‌وآلہ ‌وسلم نے اس سے غسل کرنا چاہا تو انہوں نے عرض کیا: اللہ کے رسول! میں تو جنبی تھی، آپ صلی ‌اللہ ‌علیہ ‌وآلہ ‌وسلم نے فرمایا: ”پانی جنبی نہیں ہوتا۔“ ترمذی، ابوداؤد، ابن ماجہ، جبکہ دارمی نے بھی اسی طرح روایت کیا ہے۔ ضعیف۔ [مشكوة المصابيح/كتاب الطهارة/حدیث: 457]