سائب بن یزید رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم، ابوبکر رضی اللہ عنہ اور عمر رضی اللہ عنہ کے دور میں جمعہ کے روز جب امام منبر پر بیٹھ جاتا تب پہلی اذان کہی جاتی تھی، پس جب عثمان رضی اللہ عنہ کا دور آیا اور لوگ زیادہ ہو گئے تو انہوں نے مقامِ زوراء پر تیسری اذان کا اضافہ فرمایا۔ رواہ البخاری۔ [مشكوة المصابيح/كتاب الصلاة/حدیث: 1404]

جابر بن سمرہ رضی اللہ عنہ بیان کرتے ہیں، نبی صلی ‌اللہ ‌علیہ ‌وآلہ ‌وسلم جمعہ کے دو خطبے دیا کرتے تھے، آپ صلی ‌اللہ ‌علیہ ‌وآلہ ‌وسلم ان کے درمیان بیٹھتے تھے، آپ قرآن پڑھتے اور لوگوں کو وعظ و نصیحت فرماتے تھے، آپ کا خطبہ اور نماز متوسط ہوتی تھی۔ (رواہ مسلم)۔ [مشكوة المصابيح/كتاب الصلاة/حدیث: 1405]

عمار رضی اللہ عنہ بیان کرتے ہیں، میں نے رسول اللہ صلی ‌اللہ ‌علیہ ‌وآلہ ‌وسلم کو فرماتے ہوئے سنا: ”بیشک آدمی کی نماز کا لمبا ہونا اور اس کے خطبے کا مختصر ہونا اس کے فقیہ ہونے کی علامت ہے۔ تم نماز لمبی کرو اور خطبہ مختصر کرو، اور بیشک بعض بیان سحر انگیز ہوتے ہیں۔“ رواہ مسلم۔ [مشكوة المصابيح/كتاب الصلاة/حدیث: 1406]

جابر رضی اللہ عنہ بیان کرتے ہیں کہ جب رسول اللہ صلی ‌اللہ ‌علیہ ‌وآلہ ‌وسلم خطبہ ارشاد فرماتے تو آپ کی آنکھیں سرخ ہو جاتیں، آواز بلند ہو جاتی اور غصہ شدید ہو جاتا، حتیٰ کہ یہ کیفیت ہو جاتی گویا آپ صلی ‌اللہ ‌علیہ ‌وآلہ ‌وسلم کسی حملہ آور لشکر سے آگاہ کرتے ہوئے فرما رہے ہوں: ”وہ صبح یا شام تم پر حملہ آور ہونے والا ہے۔“ اور آپ صلی ‌اللہ ‌علیہ ‌وآلہ ‌وسلم فرماتے: ”مجھے (ایسے وقت میں) مبعوث کیا گیا ہے کہ میں اور قیامت اس طرح ہیں۔“ آپ صلی ‌اللہ ‌علیہ ‌وآلہ ‌وسلم اپنی درمیانی انگلی اور انگشتِ شہادت کو باہم ملاتے۔ «رَوَاهُ مُسْلِمٌ» ۔ [مشكوة المصابيح/كتاب الصلاة/حدیث: 1407]

یعلیٰ بن امیہ رضی اللہ عنہ بیان کرتے ہیں، میں نے رسول اللہ صلی ‌اللہ ‌علیہ ‌وآلہ ‌وسلم کو منبر پر یہ آیت پڑھتے ہوئے سنا: ” ﴿وَنَادَوْا يَا مَالِكُ لِيَقْضِ عَلَيْنَا رَبُّكَ﴾ [سورة الزخرف: 77] وہ (جہنمی) کہیں گے اے مالک! (دربان دوزخ) تیرا رب ہمیں موت ہی دے دے۔“ متفق علیہ۔ [مشكوة المصابيح/كتاب الصلاة/حدیث: 1408]

ام ہشام بنت حارثہ بن نعمان رضی اللہ عنہا بیان کرتی ہیں، میں نے سورۂ ق رسول اللہ صلی ‌اللہ ‌علیہ ‌وآلہ ‌وسلم سے سن سن کر یاد کی، آپ صلی ‌اللہ ‌علیہ ‌وآلہ ‌وسلم ہر جمعہ جب منبر پر لوگوں سے خطاب فرماتے تو اسے پڑھا کرتے تھے۔ (رواہ مسلم)۔ [مشكوة المصابيح/كتاب الصلاة/حدیث: 1409]

عمرو بن حریث رضی اللہ عنہ سے روایت ہے کہ نبی صلی ‌اللہ ‌علیہ ‌وآلہ ‌وسلم نے جمعہ کے دن خطاب فرمایا تو آپ کے سر پر سیاہ پگڑی تھی جبکہ آپ نے اس کے دونوں کنارے (پلو) اپنے کندھوں کے درمیان لٹکائے ہوئے تھے۔ [رواہ مسلم] [مشكوة المصابيح/كتاب الصلاة/حدیث: 1410]

جابر رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے خطبے کے دوران فرمایا: ”جب تم میں سے کوئی شخص جمعہ کے دن دورانِ خطبہ مسجد میں آئے تو وہ دو مختصر رکعتیں پڑھے۔“ رواہ مسلم۔ [مشكوة المصابيح/كتاب الصلاة/حدیث: 1411]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جو شخص نماز (جمعہ) کی ایک رکعت پا لے تو اس نے نماز پا لی۔“ (متفق علیہ)۔ [مشكوة المصابيح/كتاب الصلاة/حدیث: 1412]

ابن عمر رضی اللہ عنہما بیان کرتے ہیں کہ نبی صلی ‌اللہ ‌علیہ ‌وآلہ ‌وسلم دو خطبے دیا کرتے تھے۔ جب آپ منبر پر چڑھتے تو مؤذن کے فارغ ہونے تک منبر پر بیٹھتے تھے۔ پھر کھڑے ہو کر خطبہ ارشاد فرماتے۔ پھر بیٹھ جاتے، اس دوران آپ کوئی بات نہ کرتے، پھر کھڑے ہو کر خطبہ ارشاد فرماتے۔ ضعیف، رواہ البخاری۔ [مشكوة المصابيح/كتاب الصلاة/حدیث: 1413]